1 Rapajko 9
9
Probhu Isor do Solomon ṭhene ńel ocoyen
(2 Bõsbudạ 7.11-22)
1Nonkate Solomon do Probhu Isorakʼ oṛakʼ, raj dolan ar acʼ apnar kusi leka okako kạmiye menletʼ onako sanamakʼe sạtkeda. 2#1 Raj 3.5; 2 Bõs 1.7 Ona tayom Probhu Isor do dosar dhao uni ṭhene ńel ocoyena cetʼleka Gibeonre mitʼ dhaoe ńel ocolen. 3Probhu Isor do uniye metadea, “Am okaṭakʼ koejoṅ ar nehõrem dohoakatʼ ona doń ańjom akada. Amakʼ benaoakʼ niạ mundil do jaejug hạbicʼ ińakʼ tahen oṛakʼ lekate iń ńutumteń begar dohoakada. Niạ cetanre ińakʼ mẽtʼ ar mon do jao okte tahentińạ.
4“Ar amren ạpum Dạud leka khạṭi ontorte, dhoromte iń samaṅrem taṛam ar ińakʼ sanam hukum ar ạn-ạrikom batao, 5#1 Raj 2.4 enḍekhan iń do jaejug hạbicʼ Israelko cetanre amakʼ siṅghạson iń teṅgo keṭejtama. Niạ katha do amren ạpum Dạud ṭhen hõń gokʼletʼ tahẽkana, ‘Israelakʼ siṅghạsonre duṛubokʼ lạgitʼ amakʼ bõsren hoṛkoakʼ okulạn do baṅge hoyokʼa.’
6“Menkhan ape se aperen hoponko ińakʼ hor khonpe ghańjeṛokʼ ar ape ṭhen emakan ińakʼ hukum ar ạn-ạriko manao baṅkate debotakope sewawako, 7enḍekhan Israelko okaṭakʼ disạmiń emakatʼko ona khon doń laga oḍokpea. Ar okaṭakʼ mundil do ińakʼ tahen oṛakʼ lạgitʼ iń begar dohoakatʼ ona hõ ińakʼ mẽtʼãhã samaṅ khoniń sạṅgiń giḍikakʼa. Unre Israel do eṭakʼ eṭakʼ jạtrenko ṭhen kạhtuk ar cigạri lekako hoyokʼa. 8#2 Raj 25.9; 2 Bõs 36.19 Niạ mundil do ńitokʼ maraṅ utạrakʼ hoyakanre hõ unre ona aṛete okoeko parom calakʼ onko do unreko comkao godokʼa ar cigạrikateko mena, ‘Probhu Isor do cedakʼ niạ disạm ar niạ mundil doe nonka ocokeda?’ 9Unre hoṛkoko roṛ ruạṛa, ‘noa reakʼ karon do hoyokʼkana, okoe do Misor disạm khone oḍok ạguletʼko onko hapṛamkoren Probhu Isor do onkoe bạgi giḍi akatʼkoa. Onko do debota secʼko ghańjeṛ akana ar onkoko sewawako kana. Ar onatege Probhu Isor do onko cetanre noa bạṛicʼakʼe paṛao ocoakada.’ ”
Solomonakʼ eṭakʼ eṭakʼ kạmiko
(2 Bõsbudạ 8.1,2)
10Probhu Isorakʼ oṛakʼ ar raj dolan benaote Solomon do bargel bochor lagaoade tahẽkana. 11Turren raj Hirạm do Solomonakʼ monsubạ leka debdạru ar saro kaṭ ar sonakoe jogaṛade tahẽkante Solomon do Gạlil reakʼ bargel atoye danadea. 12Hiram do onako ato ńel lạgitʼ Tur khone hecʼena, menkhan ona ńelkate bae kusilena. 13Uni do Solomone metadea, “E boeha, am do cetʼ lekan atokom emadińạ?” Uni do onako reakʼ ńutum Kabul#9.13: Kabul: Noa ńutum reakʼ mane do “cetʼ kạmi reakʼge baṅa.” disạme metatʼa (ona reakʼ mane do “Cetʼ kạmi reakʼge baṅa”). Ar teheń hạbicʼ onako do inạ ńutumge menakʼa. 14Hirạm do jotote pon ṭon tala khon hõ ḍher sona Solomon raje emade tahẽkana.
Solomonakʼ ḍher kạmiko
(2 Bõsbudạ 8.3-18)
15Solomon raj do Probhu Isorakʼ oṛakʼ, acʼakʼ raj dolan, Milo, Jerusalem reakʼ pạcri, Hasor, Megido ar Geser benao lạgitʼ ạḍi utạr hoṛko kạmireye jormoṭketʼkoa. 16Inạ lahare Misorren Pharao raj do Geser hatkate seṅgelteye ḍahao marao akatʼ tahẽkana ar onḍeko tahẽkan Kananrenko doe gocʼletʼkoa. Tayomte ona jaega do acʼren hoponera, metakʼme, Solomonren bạhu ńutumte baplare dan sandes lekateye emlena. 17Ona iạte Solomon do Geser arhõe benao dohṛakeda. Ona chaḍa uni do latar Bet-Horon, 18Bakʼ alatʼ, Jihudạ hahaṅkar reakʼ Tamor, 19acʼakʼ sanam gola-nagrahako ar rãt gạḍiko ar aswariko lạgitʼ nagrahakoe benaokeda, metakʼme, Lebanonre ar acʼakʼ ḍanṭao gobolre okako rajosṭi tahẽkan onako modre okako benao dohṛae menletʼ ona do jotogeye benaokeda. 20-21Ar okoe do Israelko baṅkan, metakʼme Amoriko, Hittiko, Peresiko, Jebusikoren bõsko onko do unhõ jiwetʼko tahẽkana, Israelko do onko bako marao giḍi daṛeatʼko tahẽkana, menkhan Solomon do onkoge golam lekate kạmi lạgitʼe sapʼ paṭetʼletʼkoa, ar teheń hạbicʼ hõ onko do ona kạmigeko kạmikana. 22Menkhan uni do Israelko modren okoe hõ golam do bae benaoletʼkoa; onko do acʼren lạṛhại birko, acʼren kạmiyạko, acʼ latarren subedarko, mukhiyạko, rãt gạḍi cakʼlaoko ar aswarikoko tahẽkantaea. 23Ona chaḍa Solomon do jotowakʼ kạmiko ńel todarot lạgitʼ mõṛẽ sae mõṛẽgel asol asol kạmiyạ hoṛko tahẽkantaea. Ar okoeko hoṛko kạmikan tahẽkan noko do onkoakʼ kạmiko ńel todarotetʼ tahẽkana.
24Pharaoren hoponera do Dạud nagraha bạgikate acʼ lạgitʼ benao akatʼ raj dolanteye hecʼen khan Solomon do Milo nagrahae benaokeda.
25 #
Exo 23.17; 34.23; Bib 16.16 Probhu Isor ńutumte Solomon do okaṭakʼ pinḍe benaoletʼ onḍe uni do bochorre pe dhao jeredokʼ samaṅokʼakʼ ar sulukren samaṅokʼakʼ porobe hoyocoyetʼ tahẽkana. Ona sãote uni do Probhu Isor samaṅre dhupko hõe jeretʼetʼ tahẽkana. Onate Solomon do, Salom mundil reakʼ joto kạmigeye sạt akatʼ tahẽkana.
26Solomon raj do arakʼ jalapuri aṛe Edom disạm reakʼ Elot nagraha ṭhen Esion Geberre dakʼ jahajkoe benao ocokeda. 27Ar hoṛko sãote jahajre kạmi lạgitʼ Hirạm do acʼren gạkhuṛ cakʼlaokoe kolketʼkoa. 28Onko do Ophirte senkate gel turui tala ṭon sona ạgukate Solomon rajko emadea.
Currently Selected:
1 Rapajko 9: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
