1 Rapajko 1

Haṛam pạṛiạre Dạud raj

1Dạud raj doe haṛam idiyena ar umer hõ ạḍi ḍher hoyentaea. Ar ḍher kicricʼkote oyokatere hõ uni do bae lolokʼ kan tahẽkana. 2Ona iạte uniren kạmiyạko do uniko metadea, “Ale do aleren mạlik maharaj lạgitʼ mitʼṭen kũạri kuṛile sendra ạguyea. Uni do raj ṭhen tahẽkate uniye jotonea. Ar aleren mạlikakʼ hoṛmo hõ jemon lolokʼtae onate uniyakʼ koṛam ṭhene gitijokʼma.”

3Onate onko do mitʼṭen mońj okocʼ kuṛi ńame lạgitʼ goṭa Israel disạmre sendrayeko ehopʼena. Tayomte onko do Sunemiạ Abisogko ńamkedea ar uni do raj ṭhenko ạgukedea. 4Kuṛi do ńelokʼte ạḍitetʼ napaegeye tahẽkana. Ar Abisog do raj ṭhen tahẽkate uni jotone ehopʼena, menkhan raj do uni bae jakʼ joṭetʼledea.

Adoniạ do raj hoyokʼ reakʼe kurumuṭukan

5 # 2 Sam 3.4 Hagit hopon Adoniạ do acʼte usulokʼte roṛ baṛaeye ehopʼena, “Ińge rajiń hoyokʼa.” Ar noa menkate uni do rãt gạḍiko ar aswarikoe jogaṛketʼkoa ar acʼ laha lahate calakʼ lạgitʼ mõṛẽgel hoṛe bachaoana. 6Uniren apattetʼ do tishõ uniyakʼ kạmire bae tạkicʼ daram akadea, se bae men akadea, “Cedakʼ nonka dom kạmikana?” Uni do Absalom leka ńelokʼte mońjgeye tahẽkana; ar Absalom bokottetʼe tahẽkana. 7Adoniạ do Seruạren hopon Joab ar naeke Abiạthar sãoteye solhakeda, ar unkin do unikin goṛowadea. 8Menkhan Sadok naeke ar Jehoyada hopon Bonae, Nathan nạbi, Simai, Reyi ar Dạudren birbanṭa hoṛko do Dạud secʼgeko tahẽyena.

9Adoniạ do On-regel aṛere Sohelot dhiri ṭhen ḍaṅgrako, bheḍako, lodgopʼ lodgopʼ bạchurkoe samaṅketʼkote acʼren boehako, metatʼme rajren hoponko ar Jihudạren sanam rajren kạmiyạkoe neotaketʼkoa. 10Menkhan uni do Nathan nạbi, Bonae, Dạudren birbanṭa hoṛko ar uniren boeha Solomonteko do bae neotaletʼkoa.

11 # 2 Sam 12.24 Unre Nathan do Solomonren eṅgattetʼ Bethsebae metadea, “Aleren mạlik Dạud begor baḍae ocoyete Hagitren hopon Adoniạ do raje hoyakan ona do cetʼ bam ańjom akada?” 12Amren hopon Solomonakʼ jiwi do cekatem rukhiyạitaea ona reakʼ solhań emam kana. 13Am do ńitge Dạud raj ṭhen senkate menme, ‘E ińren mạlik maharaj, amren kạ̃ṛmĩ ṭhen niạ do cetʼ bam gokʼleda, am tayom do amren hopon Solomonge raje hoyokʼa mente ar unige amakʼ siṅghạsonreye duṛupʼa. Enḍekhan cekate Adoniạ do raje hoyakana?’ 14Am do raj sãote tinre katham roṛa unre onḍe senkate ińhõ amakʼ kathareń suhũkʼakʼa.”

15Unre Bethseba do raj sãote ńapamokʼ lạgitʼ uniyakʼ oṛakʼteye boloyena. Unre raj do ạḍitetʼe haṛam thalakʼ thulukʼ caba akan tahẽkana ar Sunemiạ Abisog do uniye jotonede tahẽkana. 16Bethseba do raje joharadea.

Raj do uniye kulikedea, “Jãhãnakʼem khojkana?”

17Bethseba do uniye metadea, “E ińren mạlik, amge amren Isor ńutumte kiriạkate amren kạ̃ṛmĩ ṭhenem menleda, amren hopon Solomonge am tayom raj doe hoyokʼa ar unige amakʼ siṅghạsonreye duṛupʼa. 18Menkhan ńitokʼ Adoniại raj akan ona babotre ińren mạlik maharaj do cetʼge bae baḍaekana. 19Uni do ạḍi utạr ḍaṅgrako, lodgopʼ lodgopʼ bạchurko ar bheḍakoe samaṅketʼkoa ar rajren sanam hoponko, naeke Ạbiạthar ar subedar Joab hõe neota akadea, menkhan amren guti Solomon do bae neotaledea. 20E ińren mạlik maharaj, sanam Israelko do amko koyokʼ hor akatʼmea. Onko do am ṭhen khon baḍae sanayetʼkoa ińren mạlik maharajakʼ do acʼ tayom siṅghạsonre okoeye duṛubea mente. 21Ar baṅkhan ińren mạlik maharaj do tinre acʼren hapṛamko ṭhene senokʼa unre iń ar ińren hopon Solomon do dusi hoṛ menteko hudislińạ.”

22Raj sãote Bethsebawakʼ katha ạuri mucạdokʼrege Nathan do onḍeye seṭer gotʼena. 23Unre mitʼ hoṛ do raje metadea, “Nathan nạbi do nonḍeye hecʼ akana.” Unre Nathan do raj samaṅre senkate otre ombakʼkateye joharadea.

24Ona tayom uni do raje metadea, “E ińren mạlik maharaj, am do cetʼ noam lại sodoreda je, am tayom do Adoniạge raje hoyokʼa mente, ar unige amakʼ siṅghạsonrey duṛupʼa? 25Ente uni do teheń senkate ạḍi utạr ḍaṅgra, lodgopʼ lodgopʼ bạchurko ar bheḍakoe samaṅ akatʼkoa ar rajren hoponko, senaputiko ar naeke Ạbiạthar hõe neota akadea. Onko do ńitokʼ uni sãoteko jom-ńũiyeda arko meneda, ‘Adoniạ raj do jaejug hạbicʼ jiwetʼe tahenma.’ 26Amren guti iń, ar naeke Sadok, Jehoyadaren hopon Banae ar amren guti Solomon noko do okoe hõ bae neotaletʼkoa. 27Ińren mạlik maharaj tayom okoe siṅghạsonreye duṛupʼ uni do cetʼ ińren mạlik maharaj ar uniren kạmiyạko begor baḍae ocokote uni do cetʼ ṭhikakʼe kạmi akada?”

Solomon do raje hoyen

28Unre Dạud raje menkeda, “Bethseba hohowaepe.” Onate Bethseba do raj samaṅreye teṅgoyena. 29Unre raj do kiriạyenteye menkeda, “Okoe do sanam muhin khone bańcao akadiń, uni jiwetʼ Isor ńutumte kiriạkateń meneda, 30Israelkoren Isor ńutumte okaṭakʼ iń kiriạ akan ona do teheń khạṭigeń purạua. Amren hopon Solomonge iń tayom raje hoyokʼa ar unige ińakʼ siṅghạsonreye duṛupʼa.”

31Unre Bethseba do otre ombakʼkate raje ḍobokʼadeteye menkeda, “Ińren mạlik maharaj do jaejug hạbicʼ jiwetʼe tahen ma.”

32Ar Dạud raj doe menkeda, “Naeke Sadok, Nathan nạbi ar Jehoyadaren hopon Banae iń ṭhen hoho ạgukope.” Ar onko do raj ṭhenko hecʼena. 33Dạud do onkoe metatʼkoa, “Ape do ińren rurukhiyạ dolko soṅgekope ar ińren hopon Solomon do ińren khaccarre dejepe ar Gihon tapol otette idiyepe. 34Sadok naeke ar Nathan nạbi do onḍe Israelkoren raj mente uni kin ojokʼ bahalea. Ar ona tayom do sakwa oroṅkate ãṭ aṛaṅtepe mena, ‘Solomon raj do jaejug hạbicʼ jiwetʼ baṛeye tahenma.’ 35Inạ tayom ape do uni tayom tayomtepe ruạṛ hijukʼa. Ar uni do ińakʼ siṅghạsonreye duṛupʼa ar ińakʼ jaegareye rajokʼa. Ar iń do Israel ar Jihudạren disạm cakʼlaoyicʼ iń ojokʼ bahalkedea.”

36Unre Jehoyadaren hopon Banae do raje metadea, “Amen. Aboren mạlik maharajren Isor do onkage baṛeye kạmima. 37Isor do cetʼleka ińren mạlik maharaj sãoteye tahẽkan onkage Solomon tulucʼ hõe tahenma ar ińren mạlik Dạudakʼ rajosṭi khon uniyakʼ rajosṭi do arhõ ṭhonok anakʼe hoeocoytae ma!”

38Unre naeke Sadok, Nathan nạbi, Jehoyadaren hopon Banae, Korethiạ ar Polethiạko do senkate Dạud rajakʼ siṅghạsonre Solomonko duṛupʼkedete Gihonteko idikedea. 39Unre naeke Sadok do sonot tạmbu khon dereńte sunume ạgukeda ar Solomone ojokʼ bahalkedea. Ona tayom onko do sakwako oroṅkeda ar Israelko do ãṭ aṛaṅte hohoateko menkeda, “Solomon raj do jaejug baṛe jiwetʼe tahenma.” 40Ona tayom hoṛko do tiriyạ oroṅ oroṅte ar ạḍi rạskạ salakʼ Solomon tayom tayomteko ruạṛ hecʼena. Onko do nunạkʼko rạskạyena, onkoakʼ andoṛte ot hõ dal dalaoena.

41Unre Adoniạ ar uniren sanam neota akan hoṛko do ạuriko jom sạtrege ona reakʼ andoṛko ańjomkeda. Sakwa reakʼ saḍe ańjomte Joab doe kuliyana, “Nagrahare nonka gulmal do cedakʼ hoyokʼkana?”

42Uniyakʼ ona katha ạuri mucạdokʼrege naeke Abiạtharren hopon Jonathan do onḍeye seṭerena. Ar Adoniạ do uniye metadea, “Dela, hijukʼme. Am dom bhage hoṛ kana khạṭige mońj sombatem ạguakada.”

43Jonathane roṛ ruạṛkeda, “Baṅa. Aboren mạlik Dạud do Solomone raj akadea. 44Ar raj do uni sãote Sadok naeke, Nathan, Jehoyadaren hopon Banae, Korethiạ ar Polethiạkoe kol akatʼkoa. Onko do rajakʼ duṛupʼakʼre uniko duṛupʼkedea, 45ar Sadok naeke ar Nathan nạbi do Gihonre raj lekate unikin ojokʼ bahalkedea. Onḍe khon hoṛko do rạskạ salakʼko ruạṛ hạjukʼkan reakʼ andoṛge nagrahare hoyokʼkana. Ape do ona reakʼ anḍoṛgepe ańjomeda. 46-48Ona chaḍa Solomon raj do siṅghạsonreye duṛupʼ akana, ar rajren kạmiyạko do aboren mạlik Dạud maharajko joharaekana arko meneda, ‘amren Isor do am khon hõ Solomonakʼ ńutume maraṅtaema ar amakʼ rajosṭi khon uniyakʼ rajosṭi do arhõe ṭhonok ocoytaema.’ Unre raj do acʼakʼ aṭetʼ cetanrege ombakʼkate Isor sewawadeteye menkeda, ‘Israelkoren Isorakʼ sarhao hoyokʼtae ma. Ińakʼ siṅghạsonren ạidạriyicʼ teheń uni doe ńel ocokedińa.’ ”

49Adoniạren neota akan hoṛko do niạ kathako ańjomketʼ khan ạḍiko botorena ar beretʼkate apan ạpin horteko calao baṛayena. 50Menkhan Adoniạ do Solomon botorte senkate pinḍ reakʼ dereńreye sapʼena. 51Unre Solomonko baḍae ocokedea, Adoniạ do am botorte pinḍ reakʼ dereńe sapʼ hapeketʼteye menkeda, “Solomon raj do teheń iń ṭhene kiriạkʼma, jemon acʼren guti aloe gocʼ giḍikae.”

52Solomone roṛ ruạṛkeda, “Bhage hoṛ kanae menteye sạbud ocolen khan enḍekhan uni do bohokʼ reakʼ mitʼṭecʼ upʼ hõ otre baṅ ńurokʼtaea; menkhan unire jãhãn bạṛicʼakʼ ńamokʼ enḍekhan uni doe gujukʼa.” 53Noa menkate Solomon do hoṛ kolkate pinḍ khon Adoniại ạgu ocokedea. Ar Adoniạ do hecʼkate Solomon raj samaṅre otreye ombakʼ hapeyena. Solomone menkeda, “Do amakʼ oṛakʼte calakʼme.”

Currently Selected:

1 Rapajko 1: SBT

Highlight

Copy