मत्ती 28
28
येसु पुनरुत्थान् तजेत्पल
(मर्कुस् १६:१-११; लुका २४:१-१२; युहन्न २०:१-१८)
1दुःब न्हबे दीन्की न्हम्स्य्होर्हङ् अइतबार् स्य्होरी मी छीरीरीले म्रङ्मम् मरीयम् मग्दलीनीतेङ् गीब मरीयम् येसुत थेन्बे दुर्स च्याबरी ङ्यीज्यी। 2हुजु बेलोरीनो ङ्हच्छ्यङ् सङ्गुल् य्हर्ज्यी, तलेपङ्सम् स्वर्ग ग्यम्से प्रभुइ स्वर्गदुत् गी युज्यीम् दुर्सइ म्रप्की युङ्ब दोलाज्यीम् हुजुइ जोरी टीज्यी। 3थेइ लीः तीप्लीक् र्हङ्बे सर्बलतेङ् थेइ येन् ग्लीङ् र्हङ्बे तर् मुबल। 4ओसेम् हुजुरी रुङ्ज्यीम् टीबे स्यीपाइमा लोङ्ज्यीम् दर्ज्यी ओसेम् स्यीबर्हङ् तज्यी।
5तर स्वर्गदुत्चे हुजु अमकोलमात पङ्ज्यी, “थलोङो, ङत था मुब, एङ्यीमा क्रुस्री च्योलाबे येसुत म्हइबरी खबल य्हीन्ब। 6थेङ् चुरी अरे, थेङ्चे सुङ्ब र्हङ्लेनो थेङ् स्यीब ग्यम्से सोजेत्पल मुब। खज्यीम् थेङ्की ल्हीः थेन्बे ग्ला च्याको। 7ओसेम् ग्योन्-ग्योन् य्हर्ज्यीम् थेङ्की डबमात ‘थेङ् सोजेत्पल मुब, ओसेम् एङ्यीमा बीमम् ङोन्ग्यम् गालील्री स्येःटीबल मुब, एङ्यीमाचे थेङ्त हुजुरी म्रङ्स्ये मुब’ बी स्येतो। ज्यनले ङ्येनो, देरेम् चु तम् ङचे एङ्यीमात पङ्बल मुब।”
8होत्तज्यीम् हुजु अमकोलमा लोङ्एनो लोङ्ज्यी, ओसेम् य्हक्को तङ्एनो तङ्ज्यीम् थेङ्की डबमात सम्तर् स्येत्परी दुर्स ग्यम्से छ्योङ्य्हर्ज्यी।
9हुजु बेलोरी येसुचे थेङ्यीमात खतु तज्यीम् “लस्सो!” बी सुङ्ज्यी, ओसेम् थेङ्यीमा थेङ्की ङोन्री पब्लु लज्यी, ओसेम् थेङ्की स्य्हब् चुङ्ज्यीम् थेङ्त तेन्ज्यी। 10हुजु लीप्चे येसुचे थेङ्यीमात सुङ्ज्यी, “थलोङो, एङ्यीमा ङ्यीज्यीम् ङइ डबमात गालील्री ङ्यीउ पङ्पीनो। थेङ्यीमाचे ङत हुजुरी म्रङ्स्ये मुब।”
रुङ्बलमाचे बोर्बे सम्तर्
11हुजु अमकोलमा य्हर्ज्यीन्ब बीसेम् दुर्स रुङ्ज्यीम् टीबे डेत्-डेत् स्यीपइमाएनो सहर्री ङ्यीज्यी। ओसेम् दुर्सरी तबे जम्मनो तम्म ङ्हच्छ्यङ् लम्बुमात स्येत्पीन्ज्यी। 12ओसेम् ङ्हच्छ्यङ् लम्बुमाचे ल्हो-ल्हो एल्डर्मातेङ् तम् डीःज्यीम् स्यीपइमात य्हक्को टङ पीन्ज्यी। 13ओसेम् पङ्ज्यी, “एङ्यीमाचे ‘म्हुन ङ्यीमा म्हेर्बे बेलोरी येसुइ डबमा खज्यीम् थेइ ल्हीःत य्हो लज्यीम् बोर्नेम्’ बी पङो। 14रोमी सर्कार्चे चु तम् थ्येःसम् ङ्यीमाचे थेत व्हम्ल, एङ्यीमाचे चु तम्री गदेएनो छेर्अतो।” 15ओसेम् हुजु रुङ्बे म्हीमाचे टङ कीन्ज्यीम् ङ्हच्छ्यङ् लम्बुमाचे लोप्प र्हङ्ले पङ्ज्यी। चु तम् देरेसम्मनो यहुदीमाकी गुङ्री ठम्बल मुब।
ज्युःरी येसुचे डबमात लोप्जेत्पल
(मर्कुस् १६:१४-१८; लुका २४:३६-४९; युहन्न २०:१९-२३; प्रेरीत् १:६-८)
16हुजु लीप्चे चुख्रीत् डबमा येसुचे ङ्यीउ बी सुङ्बे गालील् गङ्री ङ्यीबरी डोङ्ज्यी। 17थेङ्यीमाचे येसुत म्रङ्ब बीसेम् थेङ्त तेन्ज्यी। तर डेत्-डेत् डबमाचेम् सङ्क लज्यी। 18ओसेम् येसु थेङ्यीमाकी रेइरी ब्योन्खज्यीम् सुङ्ज्यी, “ङत स्वर्गतेङ् जम्बुलीङ्की जम्मनो हक् न्हङ्बल मुब। 19होत्तज्यीम् देरेम् एङ्यीमा य्हर्ज्यीम् जम्मनो जातीमात ङइ डबमा स्य्हेङो, अपतेङ् ज ओसेम् पबीत्र आत्माइ छेन्री थेङ्यीमात बप्तीस्मा पीनो। 20ङचे एङ्यीमात कुल्बे जम्मनो अर्तीमा र्हङ्ले थेङ्यीमात ब्रबरी लोपो। देमेन्नो, ङ एङ्यीमातेङ् खेमपङ्लेनो बक्च्य तस्ये मुब, ओसेम् ङ जम्बुलीङ्की ज्युःकी दीन्सम्मनो एङ्यीमातेङ् तस्ये मुब।”
Currently Selected:
मत्ती 28: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
