मत्ती 22
22
भ्याइ डोन्की अर्त
(लुका १४:१५-२४)
1ओसेम् येसुचे देबेएनो ल्हो-ल्हो अर्तमारी यहुदी अगुवामात सुङ्ज्यी, 2“स्वर्गइ य्हुल्मी ग्यल्बो गीतेङ् व्हब खम्ब, थेचे र्हङ्की जइ भ्याकी डोन् टोप् लज्यी। 3ग्यल्बोचे डोन्री ङ्होत्पलमात खोउ पङ्बरी र्हङ्की बानमात पीत्ज्यी, तर थेङ्यीमा खबे सेम् अल। 4थेचे देबेएनो ल्हो-ल्हो योक्पोमात चोले पङ्ज्यीम् पीत्ज्यी, ‘ङ्होत्पलमात चोले पङो, ङचे डोन् टोप् लज्यीन्बल मुब, ङचे छोब-छोबे सेम्ज्येन्मा सेत्ज्यीम् जम्मनो स्हेःमा टोप् लबल मुब। भ्याइ डोन्री ब्योन्खउ।’ 5तर डोम्बोमाचे थेमाइ तम् अङ्येन्नले डेत् र्हङ्की म्रङ्री ओसेम् डेत् र्हङ्की छोङ्री य्हर्ज्यी। 6ओसेम् ल्हो-ल्होमाचे ग्यल्बोइ योक्पोमात चुङ्ज्यीम् तोब-ग्यङ्ब लज्यी ओसेम् सेत्लाज्यी। 7ओसेम् ग्यल्बोत य्हक्को बोमो खज्यी, र्हङ्की स्यीपइमात पीत्ज्यीम् हुजु योक्पोमात सेत्पे म्हीमात सेत्लापुङ्ज्यी, ओसेम् थेङ्यीमाकी सहर् मेचे ख्रङ्लाज्यी।
8 “हुजु लीप्चे ग्यल्बोचे योक्पोमात पङ्ज्यी, ‘भ्याइ डोन्मी टोप्ले मुब, तर ङ्होत्पलमा योग्यल अत। 9होत्तज्यीम् एङ्यीमा ग्यम् ल्हम्डमारी ङ्यीउ ओसेम् खल खलत खतु तज्यी हुजुमात डोन्री ङ्होदो।’ 10होत्तज्यीम् हुजु योक्पोमा ग्यम् ल्हम्डमारी ङ्यीज्यीम् खतु तबलमा जम्मनो ज्यब-अज्यबमात ङ्होत्ज्यीम् बज्यी, ओसेम् भ्या स्य्हेङ्बे दीम् डोम्बोमाचे प्लीङ्ज्यी।
11 “तर ग्यल्बो डोम्बोमात खतु लबरी खमम् थेचे म्ही गीत भ्यारी येन्बे गोइल अयेन्नले खबल म्रङ्ज्यी। 12ग्यल्बोचे थेत, ‘र्हो, एचे भ्यारी येन्बे येन् अयेन्नले खले न्हङ्री वङ्ज्यी?’ बी ङ्योत्ज्यी, तर थेचे तेएनो पङ्अखम्। 13हुजु लीप्चे ग्यल्बोचे योक्पोमात पङ्ज्यी, ‘लो चु म्हीइ यातेङ् कङ् खीःज्यीम् दोरी म्हुन्दुङ्न्हङ् ख्लापीतो। हुजुरी थे क्राज्यीम् स क्रीतीक्स्ये मुब।’”
14ज्युःरी येसुचे सुङ्ज्यी, “ङ्होत्पलमा य्हक्को मुब, तर दम्बलमा चेक्कीनो मुब।”
तीरो फाबे बारेरी ङ्योत्पल
(मर्कुस् १२:१३-१७; लुका २०:२०-२६)
15हुजु लीप्चे फरीसीमा य्हर्ज्यीम् येसुचे अतबे तम् सुङ्सम् तम्री फसाइतीबरी तम् डीःज्यी। 16फरीसीमाचे डेत्-डेत् र्हङ्की डबमात हेरोद्की म्हीमातेङ् बक्च्य येसुइज पीत्ज्यी। थेङ्यीमाचे येसुत ङ्योत्ज्यी, “लोप्पोन्, ङ्यीमाचे स्येःबलनो मुब, थेङ्चे देमेन्कीनो सुङ्ब। थेङ्चे पर्मेस्वर्की ग्यम् देमेन्नो ङोन्जेत्प। थेङ्चे खलइ तम्तेएनो वास्त स्य्हेङ्अजेत्, तलेपङ्सम् थेङ्चे खल्लेएनो लीः स्हीज्यीम् लक् स्य्हेङ्अजेत्। 17देरेम् ङ्यीमात सुङ्जेतो रोमी ग्यल्बो कैसर्त तीरो फाब नीयम् अनुसार् तब वुइ अत?” 18तर येसुचे थेङ्यीमाकी अज्यबे सेम् खेम्ज्यीम् सुङ्ज्यी, “एङ्यी कपटीमा, एङ्यीमाचे तले ङत फसाइतीब म्हइब? 19खइ तीरो फाबरी कोल्बे म्हुइकी टङ गी ङत ङोनो।” ओसेम् थेङ्यीमाचे थेङ्ज म्हुइकी टङ गी बज्यी। 20येसुचे थेङ्यीमात, “चुरी खलइ लीःतेङ् मीन् ब्रीबल मुब?” बी ङ्योत्जेत्ज्यी। 21थेङ्यीमाचे, “कैसरल” बी जोहप् पीन्ज्यी। हुजु लीप्चे येसुचे थेङ्यीमात सुङ्जेत्ज्यी, “होलेपङ्सम् कैसरल कैसर्तनो पीनो, ओसेम् पर्मेस्वर्ल पर्मेस्वर्तनो पीनो।” 22थेङ्यीमाचे थेङ्की जोहप् थ्येःब बीसेम् तेःङेन् तज्यीम् थेङ्त ख्लेथेन्ज्यीम् र्हङ्-र्हङ्की ग्यम्से य्हर्ज्यी।
पुनरुत्थान्तेङ् भ्याइ बारेरी ङ्योत्पल
(मर्कुस् १२:१८-२७; लुका २०:२७-४०)
23हुजु दीन्रीनो स्यीब ग्यम्से पुनरुत्थान् अत पङ्बे डेत्-डेत् सदुकीमा येसुइज खज्यीम् ङ्योत्ज्यी, 24“लोप्पोन्, मोसाचे चोले पङ्बल मुब, खलइल पङ्लेनो कोलमा अतननो थे स्यीज्यी पङ्सम् थेइ अलेचे अज्योइ लागीरी कोलमा तखइ बी चङ्त भ्या स्य्हेङ्थोब।#ब्यबस्था २५:५ 25ग्ला गीरी अज्यो-अलेमा थेत् ङ्यीस् मुबल। अज्यो ग्रेन्चे भ्या स्य्हेङ्ब बीसेम् थेल कोल अतननो थे स्यीज्यी। होत्तज्यीम् अले परङ्बचे चङ्त भ्या स्य्हेङ्ज्यी। 26थेलेएनो कोल अतननो थे स्यीज्यी। ओसेम् सइलतेएनो होलेनो तज्यी, होलेनो थेत् ङ्यीस्चेनो चङ्त भ्या स्य्हेङ्ज्यी, ओसेम् होलेनो तज्यी। 27ज्युःरी हुजु अमकोलेएनो स्यीज्यी। 28देरेम् स्यीबलमा पुनरुत्थान् तबे बेलोरी हुजु अमकोल खलइ म्रीङ् तब? तलेपङ्सम् अमकोलत थेत् ङ्यीस्चेनो भ्या स्य्हेङ्बल मुबल।”
29येसुचे थेङ्यीमात जोहप् न्हङ्ज्यी, “एङ्यीमा न्होर्टीबल टीम्, तलेपङ्सम् एङ्यीमाचे धर्म छ्येःतेङ् पर्मेस्वर्की सक्तीइ बारेरी गोबल अरेम्। 30तलेपङ्सम् स्यीबलमा पुनरुत्थान् तबे बेलोरी न्ह भ्या स्य्हेङ्ब न्ह भ्या स्य्हेङ्पीन्ब। थेङ्यीमा स्वर्गइ स्वर्गदुत्मा र्हङ्ब तस्ये मुब। 31स्यीबलमा पुनरुत्थान् तबे बारेरी पर्मेस्वर्चे ता सुङ्बल मुब एङ्यीमाचे धर्म छ्येःरी खेमेएनो खेत्पल अरे? 32पर्मेस्वर्चे सुङ्ज्यी, ‘ङ अब्रहाम्तेङ् इसहाक् ओसेम् याकुब्की पर्मेस्वर् य्हीन्ब।’ होत्तज्यीम् थेङ् स्यीबलमाकी पर्मेस्वर् अय्हीन्#२२:३२ स्यीबलमाकी पर्मेस्वर् अय्हीन्- चु पङ्बलम् पर्मेस्वर् स्यीबे म्हीमाकी पर्मेस्वर् अय्हीन् पङ्बल अय्हीन्। चु पङबलम् थेङ्री जम्मनो म्हीमा खेमपङ्लेनो सोम्बो टीब पङ्बल य्हीन्ब।, तर सोम्बोमाकी पर्मेस्वर् य्हीन्ब।” 33थेङ्चे चोले लोप्पल थ्येःब बीसेम् य्हक्को म्हीमा तेःङेन् तज्यी।
गोदोब्न्हङ्की ङ्हच्छ्यङ् अर्ती
(मर्कुस् १२:२८-३४; लुका १०:२५-२८)
34येसुचे सदुकीमात कुटीले टीन लज्यी पङ्बे तम् थ्येःब बीसेम् फरीसीमा गीले र्हुब तज्यीम् थेङ्ज खज्यी। 35थेङ्यीमान्हङ्री धर्म लोप्पोन् गीचे थेङ्त फसाइतीब म्हेन्ज्यीम् ङ्योत्ज्यी, 36“लोप्पोन्, पर्मेस्वर्की नीयम्मा न्हङ्री गोदोब्न्हङ् ङ्हच्छ्यङ् अर्ती खजु य्हीन्ब?” 37येसुचे जोहप् न्हङ्ज्यी, “‘एचे परम्प्रभु र्हङ्की पर्मेस्वर्त एइ जम्मनो सेम्य्हङ्से, जम्मनो बुः य्हङ्से ओसेम् जम्मनो लो य्हङ्से म्होइगो।’#ब्यबस्था ६:५ 38गोदोब्न्हङ्की ङोन्ग्यम्तेङ् ङ्हच्छ्यङ् अर्ती चुनो य्हीन्ब। 39ओसेम् चुइ लीक्यम्की अर्तीएनो चु र्हङ्बे ङ्हच्छ्यङ्नो य्हीन्ब- ‘एचे र्हङ्की खीम्चेत र्हङ्त र्हङ्लेनो म्होइगो।’#लेबी १९:१८ 40मोसाचे ब्रीबे पर्मेस्वर्की जम्मनो नीयम्मातेङ् अगम्बक्तमाचे लोप्पे जम्मनो तम्माकी टामी चु अर्ती ङ्य्हीनो य्हीन्ब।”
ख्रीस्ट् खलइ ज?
(मर्कुस् १२:३५-३७; लुका २०:४१-४४)
41हुजु लीप्चे हुजुरी र्हुब् तबे फरीसीमात येसुचे ङ्योत्जेत्ज्यी, 42“एङ्यीमाचे मुक्ती न्हङ्बे ख्रीस्ट्की बारेरी ता म्हेन्ब? थे खलइ ज य्हीन्ब?” थेङ्यीमाचे थेङ्त, “थे दाउद्की ज य्हीन्ब” बी पङ्ज्यी। 43येसुचे ङ्योत्जेत्ज्यी, “होलेपङ्सम् खले दाउद्त पबीत्र आत्माचे अगुवाइ स्य्हेङ्ज्यीम् थेत ‘प्रभु’ पङ्पुङ्ज्यी? तलेपङ्सम् दाउद्चे पङ्ज्यी
44 परम्प्रभुचे ङइ प्रभुत सुङ्ज्यी,
‘ङचे एइ सत्तुर्मात एइ कङ् थीङ्री अथेन्गदे,
ए ङइ केत् या पट्टीचे टीउ।’ #
भजन्सङ्ग्रह ११०:१
45 “दाउद्चे थेत ‘प्रभु’ पङ्ब पङ्सम् थे खले दाउद्की ज तब खम्ब?” 46ओसेम् खल्चेएनो येसुत जोहप् पीन्ब अखम्। ओसेम् हुजु दीन् य्हङ्से खल्चेएनो येसुत ल्हो-ल्हो तइ तम्एनो ङ्योत्पे आर् अल।
Currently Selected:
मत्ती 22: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
