रोमी 8
8
पवित्र आत्मौ शक्तियाङ जीवाकी
1होटबाटै अब ख्रीष्ट येशूवाङ काट न छान्च भर्मीकोलाक परमेश्वरै सजाय माह्याले। 2हीजैडेनाङ कान ख्रीष्ट येशूवाङ काट न छान्चबाटै पवित्र आत्मौ शक्तिये कानकी पाप र मृत्युओ शक्ति लकीङ छुटकारा याल्हे। 3व्यवस्थै पापौ शक्ति लकीङ कानकी छुटकारा याखी माह्योका, हीजैडेनाङ कान पापी स्वभाव लेच भर्मी लेचबाटै व्यवस्था पालन जाट्की माह्योका। तर व्यवस्थै जाट्की माह्योक्च कुरा परमेश्वरै जाटा। होसकै कान भर्मीयो लेखा न शरीराङ लहो मीजाकी बीर्न्हका, र होसकै ख्रीष्टौ सरीरकी बलिदान याहार कानखाटा लेच पापौ शक्तिकी नाश जाटा। 4इटजाट्न पापी स्वभाव अनुसार होइन, तर पवित्र आत्मा अनुसार जीवाच जाटा डेनाङ व्यवस्थै डेच धार्मिक कुरा पूरा छान्ने। 5लहो पाप स्वभावौ अधीनाङ ङुच भर्मीको पाप स्वभावाङ न मीमन लैडीले तर पवित्र आत्मै डेच अनुसार जाट्चकै पवित्र आत्मौ इच्छाङ न मीमन लैडीले। 6पाप स्वभावौ इच्छै भर्मीकी मृत्युवाङ टाहाक्ले, तर पवित्र आत्मौ इच्छै भर्मीकी सेन र मासीच जीवन र शान्तियाङ टाहाक्ले। 7पाप स्वभावौ अधीनाङ ङुच भर्मी परमेश्वरौ विरुद्धाङ छान्ने, हीजैडेनाङ होङ्च भर्मीये परमेश्वरौ व्यवस्थाकी मामन्डीले र मन्डीकी र माह्योक्ले। 8पाप स्वभावौ अधीनाङ लेचकै परमेश्वरकी खुसी पार्की माह्योक्ले।
9साँच्ची न परमेश्वरौ आत्मा नाखुरीकखाटा बास जाट्नने डेनाङ नाखुरीक पाप स्वभावाङ माछान्ने तर पवित्र आत्मौ अधीनाङ न छान्ने। इडीक कुसेर भर्मीखाटा ख्रीष्टौ आत्मा माले डेनाङ होसे ख्रीष्टौ भर्मी छान्की माह्योक्ले। 10तर इडीक ख्रीष्ट नाखुरीकखाटा ले डेनाङ पापौ कारणै नाखुरीकुङ शरीर सीनाङ र परमेश्वरौ म्याहासाङ धर्मी ठहरीसार नाखुरीकुङ आत्मा चहिँ जीवाले। 11इडीक येशूकी सीच लकीङ जीवाटाक्च परमेश्वरौ आत्मा नाखुरीकखाटा बास जाट्नने डेनाङ, येशू ख्रीष्टकी सीच लकीङ जीवाटाक्च होसकुङ आत्मै न नाखुरीकुङ सीम नुङ्च शरीरकी र जिउँदो खास्ले।
12होटबाटै विश्वासी डाजेभाइको र डैबहिनीको, कानुङ पाप स्वभावै इच्छा जाट्नाङ लेखा जीवाकी कानकी कर मालग्डीस्ले। 13इडीक नाखुरीक पाप स्वभाव अनुसार जीवाले डेनाङ नाखुरीक सीले, तर पवित्र आत्मौ शक्तिये नाखुरीकै पाप जाट्की डासा डेनाङ नाखुरीक जीवाले। 14परमेश्वरौ आत्मै टान्हाक्च लामाङ ह्वाचको परमेश्वरौ न मीजाको हो। 15हीजैडेनाङ कानकी कमारा खासार फेरि बीह्रीमसेच आत्मौ अधीनाङ होइन तर कानै परमेश्वरौ मीजाको छान्च पवित्र आत्मा डुप्मने। होटबाटै कान परमेश्वरकी “अब्बा, बोइ” डेयार आर्घाले। 16कान परमेश्वरौ मीजाको हो डेम पवित्र आत्मा लहे न कानुङ आत्माकी गवाही याल्हे। 17कान होसकुङ मीजाको हो डेनाङ च हकवाला र हो, परमेश्वरौ हकवाला अनि ख्रीष्टखाटा साझे हकवाला हो। अनि कान ख्रीष्टखाटा दु:ख कष्ट भोग्डीया डेनाङ कान होसकोखाटा न आदर र डुप्ले।
न्हुइङ डुप्च महिमा
18ङौ विचाराङ, कानै चाहाँ भोग्डीच दु:ख कष्ट न्हुइङ डुप्च महिमाखाटा तुलना जाट्नाङ होसे दु:ख च हीर होइन। 19परमेश्वरै लहो मीजाकोलाक प्रकट जाट्च दिन सेन राल्हे डेयार पट्ट न सृष्टिये बाड्को चाख मन्डीयार लेन्न ङुमने। 20सृष्टि न काम मालग्डीस्च छान्नन्या, तर इट छान्की सृष्टियो लहो न इच्छै होइन, सृष्टिये न आशा जाटार लेन्न ङुख्यो डेयार परमेश्वरै न इट जाट्च हो। 21सृष्टि र नाश छान्च बन्धन लकीङ कायाक छुटकारा डुपार परमेश्वरौ मीजाकुङ महान महिमित छुटकाराङ सहभागी छान्ने। 22कानकी थाहा ले, पट्ट न सृष्टि चाहाँसम्म मीजा डीन्खी व्यथा लग्डीस्च मास्टो लेखा न कष्टये छटपटडीस्न ङुमने। 23तर सृष्टि मट्टै होइन, पवित्र आत्मै न्हुइङ राक्च सुख-सम्मानौ लागि कान र छटपटडीस्चै परमेश्वरौ लाम ङोस्न ङुमने। हीजैडेनाङ परमेश्वरै कानकी लहो मीजाको खासार कानुङ शरीरकी पाप र कष्ट लकीङ नाश छान्की माह्याम जीवाटाक्ले। 24हीजैडेनाङ परमेश्वरै कानकी इसे न आशौ लागि जीवाटाका, आशा डेच कानै माडाङ्च कुरा डुप्कीयो लागि लेन्न ङुकी हो। भर्मीकै पहिला न डाङ्ङ भ्याच कुसेर कुराकी सुयेर आशा माजाट्ले। 25तर इडीक कानै माडाङ्च कुरौ आशा जाट्ले डेनाङ कानै होसकी डुप्कीयो लागि धैर्य छानार लेन्न ङुकी पर्ले।
26पवित्र आत्मै कानकी विश्वासाङ कमजोरी छान्च बेलाङ सहयोग जाट्ले। कानै कुटजाट्न प्रार्थना जाट्की पर्च हो कान माह्वार्ले, तर कानै डेकी न माह्योक्च शब्दकोवाङ पवित्र आत्मा लहे न कानुङ सट्टाङ प्रार्थना जाट्न याल्हे। 27भर्मीयो हृदय डाङ्च परमेश्वरै पवित्र आत्मौ ही विचार ले वार्ल्हे, हीजैडेनाङ पवित्र आत्मै परमेश्वरौ इच्छा अनुसार पवित्र भर्मीकुङ लागि होसकोखाटा प्रार्थना जाट्न याल्हे।
28परमेश्वरकी प्रेम जाट्चको अनि होसकै लहो इच्छा पूरा जाट्कीयो लागि आर्घाच पट्ट न भर्मीकुङ लागि पट्ट कुराङ भलाइ न जाट्ले डेच कुरा कानकी थाहा ले। 29परमेश्वर लहे न आर्घाच भर्मीकोलाक पहिला लकीङ न चीन्डीमन्या। परमेश्वरै होखुरीककी लहो न मीजा ख्रीष्ट ल्याक्च न छान्ख्यो डेयार मीमन जाटा। इटजाट्न ख्रीष्ट वास्टै भाइको मध्याङ जेठा डाजे छाना। 30परमेश्वरै सु-सुकी पहिला भाका होखुरीककी आर्घा र पनि, होसकै सु-सुकी आर्घा, होखुरीककी धर्मी र ठहरीया, र सु-सुकी धर्मी ठहरीया होसकै होखुरीककी सम्मान र याहा।
ख्रीष्ट येशूआङ परमेश्वरौ प्रेम
31कानै इच्यौ बारेयाङ ही डेइङ ट? इडीक परमेश्वर काल्हा पट्टी ले डेनाङ, कानुङ विरुद्धाङ चहिँ सु छान्की ह्योक्ले ट? 32परमेश्वरै लहो न मीजाकी च जोगडीयार माडा तर कान पट्टकुङ लागि याहा डेनाङ, ही मीजाखाटा न अरु पट्ट ठोकको कानकी माह्याले र? 33परमेश्वरै भाक्च भर्मीकुङ विरुद्धाङ सुये दोष लैडीकी ह्योक्ले र? होसको लहे न होखुरीककी धर्मी ठहरीमने। 34होटबाटै होखुरीककी दोष लैडीच सुर माछान्ने, हीजैडेनाङ ख्रीष्ट येशू होखुरीकुङ लागि सीया। होसको सीच-सीच न माछाना, होसकोकी सीच लकीङ जीवाटाक्ङने र परमेश्वरौ डोर पट्टी ङुवार कानुङ लागि होसकोखाटा बिन्ती जाट्न ङुमने। 35सुये कानकी ख्रीष्टौ प्रेम लकीङ अलग जाट्की ह्योक्ले? कानकी दु:ख छान्की ह्योक्ले, कठिनाइ छान्की ह्योक्ले, सतावट राखी ह्योक्ले। कान बील्छ बढीन मालेम नाङ्ग्या छान्की ह्योक्ले, ज्याच ठोकको ज्याकी माढीन्की ह्योक्ले। कान मृत्युओ जोखिमाङ पर्की ह्योक्ले अथवा कानकी सुयेर साट्की ह्योक्ले, तर इसे कुसेर ठोकै कानकी ख्रीष्टौ प्रेम लकीङ अलग जाट्की माह्योक्ले। 36कानकी दु:ख छान्ने डेयार च धर्मशास्त्राङ इटजाट्न रीक्ङने,
“कानै नाकोकी विश्वास जाट्च बाटै कानकी दिन-दिनै साट्की पाले।
कान डठ्याक्की ठिक जाट्च भेडा लेखा न छान्नने।”#भजनसंग्रह ४४:२२
37इसे पट्ट ठोक लेनाङ र कानकी प्रेम जाट्च ख्रीष्ट लकीङ न कानै इसे पट्ट ठोक मीटाक जुमने। 38हीजैडेनाङ ङाकी पक्का थाहा ले, कुसे कुरै र कानकी ख्रीष्टौ प्रेम लकीङ अलग जाट्की माह्योक्ले। न त मृत्युये, न त जीवनै, न त स्वर्गदूतकै, न त संसारौ शक्तिये, न त चहुङ, 39न त न्हुयुङ, न त ढेनामुङ कुरै, न त म्हाकुङ कुरै, सृष्टियो कुसेर शक्तिये कानकी परमेश्वरौ प्रेम लकीङ अलग जाट्की माह्योक्ले हीजैडेनाङ परमेश्वरै ख्रीष्ट लकीङ कानकी प्रेम जाट्नने।
Currently Selected:
रोमी 8: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.