रोमी 6
6
पापाङ मृत्यु ख्रीष्टाङ जीवन
1अब कानै ही डेकी ट? ही परमेश्वरौ अनुग्रह प्रशस्तखाटा डुप्म ङुइङ डेयार कानै पाप जाट्न न ङुइङ ट? 2अ हँ होट जाट्की माछान्ने! कान पापौ लागि सीमने, होट छान्चबाटै कान अझै र हीजै पाप न जाट्न ङुकी? 3नाखुरीककी थाहा न ले, कानै ख्रीष्ट येशूवाङ बप्तिस्मा लानाङ होसकोखाटा न काट छानार सीया।
4होटबाटै जब कानै बप्तिस्मा ला, कान सीया र होसकोखाटा न ठाहा। कुटजाट्न परमेश्वर बोये लहो महिमौ शक्तिये ख्रीष्टकी सीच लकीङ जीवाटाका, होटजाट्न न कान र पुरानो जीवन डासार नयाँ जीवनाङ ख्रीष्ट लेखा न जीवाले।
5इडीक होसकुङ मृत्युवाङ कान होसकोखाटा काट छान्नने डेनाङ, होसको सीच लकीङ जीवाम सोनाङ र साँच्ची न कान होसकोखाटा काट छान्ने। 6कानकी इसे कुरा थाहा ले, पापै राज्य जाट्च जीवन नाश छान्ख्यो र अब लकीङ आलाक कान पापौ दास माछानीङ डेयार कानुङ पुरानो जीवन ख्रीष्टखाटा क्रूसाङ टाङ्डीमने। 7हीजैडेनाङ सुर भर्मी सीले डेनाङ, होसे भर्मीये पापौ अधीन लकीङ छुटकारा डुप्ले। 8इडीक कान ख्रीष्टखाटा सीमने डेनाङ च होसकोखाटा न फेरि कान जीवाले डेयार कान विश्वास जाट्ले। 9हीजैडेनाङ कानकी थाहा ले, ख्रीष्ट सीच लकीङ जीवाम सोमने र होसको फेरि सेन र मासीले। अब लकीङ आलाक होसको मीटाक मृत्युओ कुसेर शक्तिये हीर जाट्की माह्योक्ले। 10होसको सीनाङ पापौ शक्तिकी जुकीयो लागि काट चोटी मट्टै सीया। अब होसको सेन र सीकी मापर्ले र होसको परमेश्वरौ आदर र महिमौ लागि सधैँभरि जीवाम ङुले। 11होटजाट्न न नाखुरीक र लहो पापौ लागि सीच, तर ख्रीष्ट येशूवाङ परमेश्वरौ लागि जीवाच आर्मीट्की पर्ले। 12होटबाटै नाखुरीकुङ सीम नुङ्च शरीराङ पापकी अधीन जाट्की माह्यानी र शरीरै जाट्की पाच मासेछ कुराको जाट्की माह्यानी। 13नाखुरीकुङ लहो शरीरुङ कुसेर अङ्गकोलाक पाप जाट्की र दुष्ट कामको जाट्की माह्यानी। तर मृत्यु लकीङ जीवनाङ राछ भर्मीको लेखा न लाहाकी परमेश्वराङ सुम्पडीनी र होसकुङ धार्मिकतौ लागि नाखुरीकुङ लहो शरीरौ अङ्गको होसकोकी यान्ही। 14पापै नाखुरीक मीटाक राज्य माजाट्ले, हीजैडेनाङ नाखुरीक व्यवस्थौ अधीनाङ होइन तर परमेश्वरौ अनुग्रहौ अधीनाङ ले।
15अब इसे पट्ट न कुरा ही होट? कान व्यवस्थौ अधीनाङ माले, तर परमेश्वरौ अनुग्रहौ अधीनाङ ले डेयार पाप जाट्न ङुइङ ट? सेन र होट जाट्की माछान्ने। 16नाखुरीक सुओ कुरा मन्डीयार चाकरी जाट्ले, होच्यो न कमारा छान्ने डेयार नाखुरीककी थाहा माले? पापौ कमारा छानार होच्यो न आज्ञा मन्डीले डेनाङ नाखुरीक सीले, तर परमेश्वरौ आज्ञा मन्डीया डेनाङ नाखुरीक धर्मी ठहरीस्ले। 17परमेश्वरकी धन्यवाद छान्ख्यो, हीजैडेनाङ काट चोटी नाखुरीक पापौ कमारा लेया, तर अब नाखुरीकै हृदय लकीङ न लहो परमेश्वरै पाहाक्च शिक्षा मन्डीच छान्नने। 18नाखुरीकै पाप लकीङ छुटकारा डुप्मने र अब नाखुरीक परमेश्वरौ असल काम जाट्कीयो लागि होसकुङ कमारा छान्नने। 19नाखुरीकुङ पापी स्वभावौ कमजोरीये जाट्नाङ ङा भर्मीकै बुझडीस्की ह्योक्च जाट्न मालिक र कमारौ उदाहरण याहार डेमन ले। काट खेप मास्च इच्छा लार बाड्को पाप र दुष्ट काम जाट्की नाखुरीकै लहो अङ्गको कमारै लेखा न सुम्पडीया। अब पवित्र छान्की नाखुरीकुङ अङ्गको परमेश्वरौ लागि धार्मिक काम जाट्च कमारै लेखा न सुम्पडीम यान्ही। 20जब नाखुरीक पापौ कमारा लेया होडीक बेला नाखुरीकै परमेश्वरौ म्याहासाङ धार्मिक काम जाटार परमेश्वरकी खुसी पार्च च कुरा न माछाना। 21नाखुरीकै पहिला जाट्च काम लकीङ ही डुपा ट? नाखुरीक चाहाँ होसे काम डाङार काराले। होसे पट्ट न झीर्न सेच कामै अन्तिमाङ च मृत्यु मट्टै राक्ले। 22अब नाखुरीकै पाप लकीङ छुटकारा डुप्मने र परमेश्वरौ कमारा छान्नने। इचे नाखुरीककी पवित्र खास्ले र नाखुरीककी सेन र मासीच जीवनाङ टाहाक्ले। 23हीजैडेनाङ पापौ ज्याला मृत्यु हो, तर परमेश्वरै होटन याछ आशिष चहिँ कानुङ प्रभु येशू ख्रीष्टाङ सेन र मासीच जीवन हो।
Currently Selected:
रोमी 6: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.