रोमी 14
14
काटै काटकी स्वीकार जाट्नी
1विश्वासाङ कमजोर लेच विश्वासी भर्मीकोलाक हीर माडेम स्वीकार जाट्नी, तर होखुरीकुङ विचारकी ठिक अथवा गलत डेयार योन्च काम माजाट्नी। 2कुडीक विश्वासी भर्मीकै पट्ट ठोक ज्याकी छान्ने डेयार विश्वास जाट्ले, तर विश्वासाङ कमजोर लेच भर्मीको चहिँ स्या माज्याम फीछ गानको मट्टै ज्याले। 3पट्ट ज्याच ठोक ज्याचकै स्या माज्याम फीछ गानको मट्टै ज्याचकोलाक तुच्छ माआर्मीट्नी। होटजाट्न न माज्याचकै र ज्याचकोलाक नियम मामन्डीया डेयार दोष मालैडीनी। हीजैडेनाङ होसे नीस खाल्या विश्वासीकोलाक न परमेश्वरै ग्रहण जाट्नने। 4फोकुङ नोकरकोलाक दोष लैडीच नाको सु हो? लहो मालिकै टी नोकरकै सेछ काम जाट्न न लेकी मास्च काम जाट्न न ले डेच कुरा निधो जाट्ले। प्रभुये न लहो नोकरकोलाक ठिक काम जाट्की सहायता याल्हे, हीजैडेनाङ प्रभुखाटा होखुरीककी सहायता जाट्की ह्योक्च शक्ति ले।
5कुडीक भर्मीकै कायाककी अरु दिन डेनाङ पवित्र आर्मीट्ले, कुडीक भर्मीकै पट्ट न दिन काट न हो डेले। पट्ट न भर्मीकै लहो न मीमनाङ लहे विश्वास जाट्च कुरा पक्का जाट्की पर्ले। 6कुसेर दिनकी पवित्र मन्डीचये परमेश्वरौ न आदरौ लागि मन्डीले, कुसे भर्मीये पट्ट ठोक ज्याले, होचे र परमेश्वरौ न आदरौ लागि ज्याले, हीजैडेनाङ होचे ज्याकी डेनाङ पहिला परमेश्वरकी धन्यवाद याहार ज्याले। सुये स्या माज्याले होचे र परमेश्वरौ आदरौ लागि न माज्याले र परमेश्वरकी धन्यवाद याल्हे। 7कान सुर लहो न लागि माजीवाले र सुर लहो न लागि मासीले। 8कान जीवानाङ र प्रभुओ लागि न जीवाले र सीनाङ र प्रभुओ लागि न सीले। होटबाटै कान सीनाङ र जीवानाङ र प्रभुओ न हो। 9इच्यौ न लागि ख्रीष्ट सीयार फेरि जीवाम सोवा अनि होसको सीचकुङ र जीवाचकुङ पट्टकुङ प्रभु छाना। 10होटडेनाङ हीजै नाखुरीक लहो विश्वासी डाजेभाइको र डैबहिनीकोलाक दोष लैडीले? नाखुरीक हीजै लहो विश्वासी डाजेभाइकोलाक तुच्छ आर्मीट्ले? कान पट्टको परमेश्वरौ न्याय जाट्च आसनौ म्याहासाङ टोङ्खी पर्ले। 11धर्मशास्त्राङ रीक्ङने,
“परमप्रभु डेले,
‘कुटजाट्न ङा जीवित ले,
साँच्ची न पट्ट भर्मीकै ङौ म्याहासाङ घुँडा टुस्की पर्ले,
पट्टकै ङाकी परमेश्वर डेम प्रशंसा जाट्की पर्ले।’”#यशैया ४५:२३
12होटबाटै कान पट्टकै लाहा-लहै जाट्च कामौ लेखा परमेश्वरकी याखी पर्ले।
13कान काटै काटकी दोष लैडीकी डासीङ। बरु विश्वासी डाजेभाइको र डैबहिनीकोलाक बाधा याछ अनि पापाङ फसडीच कुरा सेन र जाट्की माछान्ने डेम कान अठोट जाटीङ। 14प्रभु येशूकी विश्वास जाट्च बाटै इसे कुरा ङा पक्का वार्ल्हे, कुसेर ज्याच ठोक अशुद्ध माछान्ने, तर सुर भर्मीये हीर ज्याच ठोककी अशुद्ध आर्मीट्ले डेनाङ, होच्यो लागि होसे अशुद्ध न छान्ने। 15नाकै ज्याच कुरै अरु विश्वासी डाजेभाइको र डैबहिनीकोलाक चित्त बीकाका डेनाङ नाकै होसकी प्रेम माजाट्ले। नाकै ज्याच कुरै अरु विश्वासीकोलाक नाश माजाट्ख्यो। हीजैडेनाङ ख्रीष्ट होखुरीकुङ लागि र सीच हो। 16नाकोकी सेछ सेच कुराकी अरु सुयेर विरोध जाट्की माह्योक्ख्यो। 17हीजैडेनाङ परमेश्वरौ राज्य डेच ज्याच र गाच कुरा होइन, तर धार्मिकता, शान्ति र आनन्दौ बारेयाङ हो, होसे कानकी पवित्र आत्मै याल्हे। 18कुसे भर्मीये इटजाट्न ख्रीष्टकी सेवा जाट्ले, होचे परमेश्वरकी खुसी पार्ले, अनि अरु भर्मीको लकीङ र आदर डुप्ले।
19होटबाटै कान कुसे कुरै शान्ति याल्हे र कुसे कुरै विश्वासीकुङ विश्वासकी बलियो खास्ले होसे कुराकी जोड येहीङ। 20ज्याच ठोकौ कारणै परमेश्वरै जाट्च कामकी नाश माजाट्नी। पट्ट न ज्याच ठोकको शुद्ध ले तर लहे ज्याच कुरै अरुकी पापाङ फसडीच जाट्न हीर ज्याकी माछान्ने। 21पट्ट डेनाङ सेछ चहिँ स्या माज्याकी, म्होरोक्च कुरा मागाकी र विश्वासीकोलाक ठेस लग्डीस्च जाट्न हीर मासेछ काम माजाट्की सेछ हो। 22होटबाटै इसे कुराकुङ बारेयाङ नाकोखाटा लेच विश्वास परमेश्वर र नाकुङ मीघ्याङ मट्टै डानी। होसे भर्मी आशिष डुप्च हो, कुसे भर्मीकी होचे ठिक ठहरीच कुरै लाहाकी न दोषी माठहरीख्यो। 23तर सुयेर शंका जाटार हीर ज्या डेनाङ परमेश्वरै होसकी दोषी ठहरीले। हीजैडेनाङ होचे विश्वास माजाट्न ज्याले र बिना विश्वास ही काम जाट्नाङ र पाप हो।
Currently Selected:
रोमी 14: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.