रोमी 1
1
1ङा पावल येशू ख्रीष्टौ दासै इसे चिठी रीक्ङन ले। होसकै ङाकी लहो चुन्डीच प्रेरित छान्की आर्घा र परमेश्वरौ सेछ समाचार सेटाक्च कामाङ भाका। 2परमेश्वरै वास्टै वर्ष अगाडि न लहो अगमवक्ताको लकीङ सेछ समाचार याल्हे डेयार प्रतिज्ञा जाट्नन्या। होसे प्रतिज्ञा पवित्र धर्मशास्त्राङ रीक्ङने।
3-4इसे सेछ समाचार परमेश्वरौ मीजा काल्हौ प्रभु येशू ख्रीष्टौ बारेयाङ हो, होसको भर्मी छानार राजा दाऊदौ वंशाङ जन्मडीसा। येशू ख्रीष्ट कानुङ प्रभु पवित्र आत्मौ शक्ति लकीङ सीचको लकीङ जीवाम सोच बाटै परमेश्वरौ मीजा ठहरीया। 5काल्हौ प्रभु येशू ख्रीष्ट लकीङ परमेश्वरै ङाकी अनुग्रह टान्हाकार लहो विशेष दूत खासा। पट्ट न जातिकुङ भर्मीकै विश्वास जाटार होसकै डेच कुरा मन्डीख्यो डेम ङा होसकुङ म्यार्मीनाङ खटडीच प्रेरित हो। 6रोम सहराङ लेच नाखुरीक र होखुरीकखाटा येशू ख्रीष्टौ भर्मीको छान्की आर्घाचको हो।
7रोम सहराङ लेच नाखुरीक पट्टकी ङा इसे चिठी रीक्ङन ले। परमेश्वरै नाखुरीक पट्टकी प्रेम जाट्नने र होसकुङ पवित्र भर्मी छान्कीयो लागि आर्घाचको हो। काल्हौ परमेश्वर बोइ र प्रभु येशू ख्रीष्टै नाखुरीककी अनुग्रह र शान्ति याख्यो।
पावल रोम सहराङ नुङ्च इच्छा जाट्ले
8पट्ट डेनाङ पहिला ङा नाखुरीक पट्टओ लागि येशू ख्रीष्ट लकीङ परमेश्वरकी धन्यवाद याल्हे। हीजैडेनाङ नाखुरीकै ख्रीष्टाङ जाट्च विश्वासौ बारेयाङ संसारभरि प्रचार छान्नने। 9होसकुङ न मीजौ सेछ समाचार सेटाकार ङा हृदय लकीङ न होसकुङ सेवा जाट्ले। ङै नाखुरीककी माया मामारीमे र सधैँ नाखुरीकुङ लागि प्रार्थना जाट्न ङुमने। ङै डेच इसे कुरा साँचो हो डेयार परमेश्वर लाहा न साक्षी ले। 10परमेश्वरौ इच्छा अनुसार अब नाखुरीककी डुप्की ह्योकीङ डेम ङा होसकोकी बिन्ती जाट्न न ले। 11पवित्र आत्मा लकीङ डुप्च आशिष नाखुरीककी याहार नाखुरीकुङ विश्वासकी बलियो खास्की नाखुरीककी डुप्च ङौ बाड्को मीमन ले। 12ङौ विश्वासै नाखुरीककी र नाखुरीकुङ विश्वासै ङाकी उत्साह खाट्ख्यो डेच ङौ मीमन हो।
13विश्वासी डाजेभाइको र डैबहिनीको, नाखुरीककी थाहा छान्ख्यो, वास्टै खेप ङै नाखुरीककी डुप्च मीमन जाटा तर काट न काट कारणै जाट्नाङ डुप्की माह्योका। अरु ठाउँङ अन्यजातिकै लेखा न नाखुरीकै र भर्मीकोलाक सेछ समाचार सेटाकार ख्रीष्टाङ राक्च ङोस्च ङौ मीमन ले। 14हीजैडेनाङ ङाकी सभ्य र असभ्य, बुद्धि लेच र मूर्खकुङ लागि सेछ समाचार सेटाक्की कर लग्डीस्नने। 15होटबाटै नाखुरीक रोम सहराङ लेचकोलाक र इसे सेछ समाचार सेटाक्की ङौ मीमन हतारीस्नने।
16ङाकी सेछ समाचार सेटाक्की काराम मासेले। हीजैडेनाङ विश्वास जाट्च पट्ट न भर्मीकोलाक मुक्ति याछ इसे सेछ समाचार परमेश्वरौ शक्ति हो, पहिले यहूदीकुङ लागि, होटै न्हुइङ अन्यजातिकुङ लागि र हो। 17सेछ समाचारै भर्मीकी परमेश्वरै लहो म्याहासाङ कुटजाट्न धर्मी ठहरीले डेच कुरा टान्हाक्ले अनि परमेश्वरखाटा धर्मी ठहरीच कुरा विश्वास लकीङ न सुरु छान्ने र विश्वास लकीङ न पूरा र छान्नने। इसे कुरा धर्मशास्त्राङ र डेमने, “सु विश्वास लकीङ परमेश्वरखाटा धर्मी ठहरीस्ले, होसे भर्मीये न जीवन डुप्ले।”
भर्मीको मीटाक परमेश्वरौ क्रोध
18स्वर्ग लकीङ परमेश्वरौ क्रोध भर्मीकुङ पाप र दुष्ट कामौ विरुद्धाङ डाङ्ङने। होखुरीकै लहो दुष्ट कामै जाट्नाङ सत्यकी छेलीमने। 19परमेश्वरौ बारेयाङ वार्खी पर्च कुरा होखुरीककी थाहा न ले, हीजैडेनाङ परमेश्वर लहे न होखुरीककी होसे कुरा छर्लङ्गै छान्च जाट्न टान्हाक्ङ याम्हने। 20संसार सुरु छान्च दिन लकीङ न होसकै खास्च ठोकको लकीङ भर्मीकै परमेश्वरकी वार्खी ह्योक्ले। परमेश्वरौ सधैँ ङुच शक्ति र इश्वरीय स्वभाव ल्याक्च माडाङ्च गुणको होखुरीकै सेम्ह बुझडीस्की ह्योक्ले। होट छान्चबाटै होखुरीककी कुसेर किसिमौ बहाना जाट्च ठाउँ न माले। 21होखुरीकै परमेश्वरकी चीन्डीम र परमेश्वरकी जाट्की पर्च आदर माजाटा, न त होखुरीकै धन्यवाद न याहा, तर होखुरीकुङ विचार काम मालग्डीस्च छानार होखुरीकुङ मूर्ख हृदय झन् छुम्छये न्हेपा। 22होखुरीकै लाहाकी न बुद्धिमान डेम आर्मीट्नाङ र होखुरीक मूर्ख छाना। 23होखुरीकै नाश माछान्च परमेश्वरकी आदर जाट्की पर्ठाङ नाश छानार नुङ्च भर्मी, पशु, भुर्च ग्वाजाको र घसारीसार ह्वाच जन्तुकुङ रुप लेच मूर्तिकी पूजा जाटा।
24होखुरीकुङ हृदये जाट्की पानाङ लेखा न झीर्न सेच काम जाट्कीयो लागि परमेश्वरै होखुरीककी डास्न याहा र होखुरीकै लाहा लाहाङ न काराम सेच काम जाटार लहो शरीरकी अशुद्ध खासा। 25होखुरीकै परमेश्वरौ सत्यकी झूटखाटा योसा। सृष्टि जाट्च र सधैँभरि आदर जाट्की पर्च परमेश्वरकी होइन तर होसकै खास्च ठोककोलाक पूजा र सेवा जाटा।
26होटबाटै परमेश्वरै होखुरीककी मेखुरीकुङ न झीर्न सेच इच्छा अनुसारुङ काम जाट्की डास्न याहा। होखुरीकुङ मास्टोकै लहो लेन्जाकोखाटा सहवास जाट्की डासार मास्टो मास्टोको न सहवास जाटा। 27होटजाट्न न होखुरीकुङ लेन्जाकै र लहो मास्टोकोखाटा सहवास जाट्की डासार लेन्जाकै लेन्जाकोखाटा न व्यभिचारौ कामबासनै उत्तेजित छानार झीर्न सेच काम जाटा, र लहो न शरीराङ लहे जाट्च दुष्ट कामौ उचित दण्ड भोग्डीया।
28होखुरीकै परमेश्वरकी याखी पर्च सम्मान याखी मीमन माजाट्चबाटै परमेश्वरै होखुरीककी मासेछ विचारौ अवस्थाङ न डास्न याहा। 29होटबाटै होखुरीक पट्ट खालुङ खराब र दुष्टतै न्हेप्च छान्ने। होखुरीक लोभ र घृणा जाट्ले, अरुकी डाह जाट्ले र अरुकी साट्ले। होखुरीक पुन्ल्हे, छल जाट्ले र झूटो ङाक्ले, काटै-काटौ कुरा चेले। 30होखुरीक फोकुङ निन्दा जाट्ले र परमेश्वरकी र घृणा जाट्ले। सुकीर आदर माजाट्ले, तर लाहा न घमण्डये सोक्ले, बा-बाड्सो कुरा जाट्ले। होखुरीक खराब काम जाट्की जुक्ति लैडीले र बोइ-मोये डेच कुरा मामन्डीले। 31होखुरीक मूर्ख ले, होखुरीकै जाट्च प्रतिज्ञा पूरा माजाट्ले, भर्मीकी माया माजाट्ले, अनि होखुरीकखाटा दया माछान्ने। 32याङ्च भर्मीको मृत्युओ योग्य छान्ने डेम परमेश्वरौ धार्मिक विधान वार्न्ह-वार्न्ह र होखुरीकै होङ्च न काम जाट्ले। होडीक मट्टै होइन, झन् याङ्च काम जाट्की अरु भर्मीकोलाक र सुरडीले।
Currently Selected:
रोमी 1: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.