लूका 3
3
बप्तिस्मा याछ यूहन्नौ प्रचार
(मत्ती ३:१-१२; मर्कूस १:१-८; यूहन्ना १:१९-२८)
1रोमी कैसर तिबेरिअसै राज्य जाट्च पन्ध्र वर्ष छान्नन्या। होडीक बेला पन्तियस पिलातस यहूदा क्षेत्रौ बाड्को हाकिम लेया। रोमी महाराजौ अधीनाङ हेरोदै गालीलौ क्षेत्राङ राज्य जाट्न्या र होच्यो डाजे फिलिपै चहिँ इतुरिया र त्राखोनितिस क्षेत्राङ राज्य जाट्नन्या। अबिलेने डेच ठावाङ चहिँ लुसानियास डेच भर्मीये राज्य जाट्नन्या। 2होडीक बेलुङ प्रधान पूजाहारीको चहिँ हन्नास र कैयाफा लेया। होडीक न बेला परमेश्वरौ वचन जकरियो मीजा यूहन्ना लेठाङ राहा।
3होटै यूहन्नै यर्दन नदीयो खेरेपुङ ठाउँ-ठावाङ नुङार भर्मीकोलाक इट डेम प्रचार जाटा, “पश्चात्ताप जाटार बप्तिस्मा लानी। अनि परमेश्वरै नाखुरीकै जाट्च पापको क्षमा याल्हे।” 4इटजाट्न यशैया अगमवक्तै धर्मशास्त्राङ रीक्च इसे कुराको ओल्हार राहा,
“सेनी उजाड ठावाङ काट भर्मीये बाड्को स्वर छ्युकार इट डेमन ले,
प्रभुओ लाम तयार जाट्नी, होसकुङ लाम सोझो खास्नी।
5पट्ट खोल्साको पुरीस्ले, र
पट्ट डाँडा-काँडा न्हामाक्ले, बाङ्गो टेढोको सोझो छान्ने।
र अप्ठ्यारो लामकोसम्म छान्ने।
6अनि पट्ट न भर्मीकै परमेश्वर लकीङ राछ मुक्ति डाङ्ले।”#यशैया ४०:३-५
7होटबाटै वास्टै भर्मीको यूहन्ना लेठाङ बप्तिस्मा लाकी डेम राहा र यूहन्नै होखुरीककी डेया, “ए बुलौ मीजाको! आइलग्डीस्च क्रोध लकीङ भोग्डीस्की नाखुरीककी सुये चेतावनी याहा? 8पश्चात्ताप जाट्च हो डेनाङ होटजाट्न न ह्वानी। तर ‘कानको अब्राहामौ सन्तानको हो’ डेनाङ न नाखुरीक दण्ड लकीङ भीस्की डीन्ल्हे डेम माआर्मीट्नी। तर परमेश्वरै अब्राहामौ लागि डेम ल्हुङ लकीङ र सन्तान खास्की ह्योक्ले। 9चाहाँ न आउरा सीङो म्यार्टुङकुङ जराङ पर्न भ्यामने। होटबाटै असल मीस्या मास्याटाक्च सीङौ म्यार्टुङकोलाक चेयार म्हेआङ लोम्हकाले।”
10होटै भर्मीकै यूहन्नाकी गीना, “होटडेनाङ कानै ही जाट्की पर्ले?” 11यूहन्नै होखुरीककी डेया, “लाहाखाटा नीस दौरा लेचये हीर मालेचकोलाक काट यान्ही। सु-सुखाटा ज्याच ठोक ले होखुरीकै र होटन जाट्नी डेम पाहाका।” 12कर सोट्च भर्मीको र बप्तिस्मा लाकी डेम राहार यूहन्नाकी गीना, “गुरु ज्यु, कानै ही जाट्की पर्ले?” 13होखुरीककी यूहन्नै डेया, “सरकारै डेच डेनाङ वास्टै कर मासोट्की।” 14सिपाहीकै र गीना, “कानै चहिँ ही जाट्की पर्ले?” यूहन्नै होखुरीककी र डेया, “फोकोकी मालेच दोष लैडीयार, झुक्डीयार मालुट्डीकी। लहो न तलबाङ सन्तोक जाट्की।”
15पट्ट न भर्मीको मुक्ति याछ ख्रीष्टौ लाम ङोस्न ङुमन्या। होटै होखुरीकै चहिँ मीमनाङ यूहन्ना न मुक्ति याछ ख्रीष्ट हो की ह्याले? डेम आर्मीट्न न लेया। 16होखुरीककी यूहन्नै डेया, “ङा नाखुरीककी डीये बप्तिस्मा याल्हे। तर ङा डेनाङ कह्राङ्छ काट जना राम्हन ले। ङा च होसकुङ मीहीलुङ चप्पलौ फित्ता पीसाक्की ज्योस्च र माले। होसकै नाखुरीककी पवित्र आत्मा र म्हेये बप्तिस्मा याल्हे। 17टाप्च न्हाङ्ल्या होसकुङ मीहुटाङ न ले। होटबाटै गहुँ र भुस भाकार गहुँ जति ढुकुटीयाङ ठन्कडीले र भुसकी चहिँ सेन र मासीच म्हेयाङ काम याल्हे।”
18इटजाट्न वास्टै अर्तीको याहार यूहन्नै भर्मीकोलाक परमेश्वरौ सेछ समाचार सेटाका। 19तर हेरोद राजै लहो भायो मास्टो हेरोदियासकी मेल्हाखाटा डामन्या र मासेछ काम जाट्च बाटै यूहन्नै हेरोदकी हक्कारीमन्या। 20होटबाटै यूहन्नाकी हेरोदै झ्यालखानाङ ठुनार होचे झन् मासेछ काम जाटा।
येशूये बप्तिस्मा लाच
(मत्ती ३:१३-१७; मर्कूस १:९-११; यूहन्ना १:३२-३४)
21होटै पट्ट न भर्मीकै बप्तिस्मा लाचै जाट्नाङ प्रभु येशूये र बप्तिस्मा लार होसकै प्रार्थना जाट्चै जाट्नाङ होडीक न बेला स्वर्ग उघारीसा। 22होटै पवित्र आत्मा ढुकुर लेखा होसको मीटाक बाखी राहा। होटै स्वर्ग लकीङ याङ्च आवाज राहा, “नाको ङौ प्यारो मीजा हो, नाकोखाटा ङा साह्रै माह्राङ्ने।”
मुक्ति याछ ख्रीष्टौ पुर्खाको
(मत्ती १:१-१७)
23इटजाट्न येशूये परमेश्वरौ काम जाट्की सुरु जाट्नाङ होसको तीस वर्ष टाम्हन्या। भर्मीकै योसेफकी न येशूओ बोइ डेम मन्डीमन्या। योसेफौ बोइ एली लेया, 24एलीयो बोइ मत्तात, मत्तातौ लेवी, लेवीयो मल्की, मल्कीयो यान्ना, यान्नौ योसेफ, 25इटजाट्न न योसेफौ बोइ मत्ताथियास, मत्ताथियासौ बोइ आमोस, आमोसौ बोइ नहूम, नहूमौ बोइ इसली, इसलीयौ बोइ नग्गै, 26नग्गैयो माथ, माथौ मत्ताथियास, मत्ताथियासौ सेमैन, सेमैनौ योसेख, योसेखौ बोइ योदा लेया, 27योदाओ बोइ योआनन, योआननौ रेसा, रेसौ यरुबाबेल, यरुबाबेलौ शालतिएल, शालतिएलौ नेरी, 28नेरीयो बोइ मल्की, मल्कीयो बोइ अद्दी, अद्दीओ कोसाम, कोसामौ एलमादम, एलमादमौ एर, 29एरौ बोइ यहोशू, यहोशूऔ एलीएजर, एलीएजरौ योरीम, योरीमौ मत्तात, मत्तातौ लेवी, 30लेवीयो शिमियोन, शिमियोनौ यहूदा, यहूदौ योसेफ, योसेफौ योनान, योनानौ एल्याकीम लेया, 31एल्याकीमौ बोइ मलेआ, मलेऔ बोइ मीन्ना लेया, मीन्नौ मत्ताथा, मत्ताथाओ नातान, नातानौ दाऊद, 32दाऊदौ यिशै, यिशैयो ओबेद, ओबेदौ बोअज, बोअजौ सल्मोन, सल्मोनौ नहशोन, 33नहोशोनौ अम्मीनादाब, अम्मीनादाबौ बोइ एडमीन लेया, एडमीनौ आरम, आरामौ बोइ हेस्रोन, हेस्रोनौ फारेस, फारेसौ यहूदा, 34यहूदौ याकूब, याकूबौ इसहाक, इसहाकौ अब्राहाम, अब्राहामौ तेरह, तेरहौ नाहोर लेया, 35नाहोरौ बोइ सरुग, सरुगौ रऊ, रऊओ पेलेग, पेलेगौ एबेर, एबेरौ शेलह, 36शेलहौ केनान, केनानौ अर्पक्षद, अर्पक्षदौ शेम, शेमौ नोआ, नोऔ लेमेख, 37लेमेखौ मतूशेलह, मतूशेलहौ हनोक, हनोकौ येरेद, येरेदौ महलालेल, महलालेलौ केनान, 38केनानौ एनोश, एनोशौ शेत, शेतौ बोइ आदम लेया, आदमौ बोइ परमेश्वर लेया।
Currently Selected:
लूका 3: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
