लूका 13
13
पापको डासार परमेश्वर पट्टी ल्हेस्की पर्ले
1येशूये पाहाक्च बेला होला लेच कुडीक भर्मीकै डेया, “भोग याछ बेलाङ पिलातसै कुडीक जना गालीलीकोलाक साटार होखुरीकुङ ह्यु भोग याछ पशुकुङ ह्युखाटा मोल्होक्ङ याहा!”। 2येशूये होखुरीककी डेया, “होखुरीकै होटजाट्न कष्ट भोग्डीया डेठाङ न, ‘इसे गालीलीको अरु गालीलीको डेनाङ पापी लेया’ डेम ही नाखुरीक आर्मीट्ले? 3तर ङा नाखुरीककी डेले, होङ्च होइन! इडीक नाखुरीकै पश्चात्ताप माजाटा डेनाङ, नाखुरीक र होटजाट्न न नाश छान्ने। 4होटजाट्न न ही सिलोआम डेच ठाँउङ धरहरा फुटार सीच होसे अठार जना भर्मीको यरूशलेमुङ अरु पट्ट न भर्मीको डेनाङ पापी डेम नाखुरीक आर्मीट्ले? 5तर ङा नाखुरीककी डेले, होट होइन! नाखुरीकै पश्चात्ताप माजाटा डेनाङ नाखुरीक र होटजाट्न न सीले।”
मीस्या मास्याटाक्च म्यार्टुङौ उदाहरण
6होटै न्हुइङ येशूये होखुरीककी काट उदाहरण सेटाक्चै इट डेया, “काट भर्मीये लहो अङ्गुर बारीयाङ अञ्जीरौ म्यार्टुङ रोप्डीम्या। होटै होसे भर्मी अञ्जीरौ म्यार्टुङाङ मीस्या स्याकी डेम ङोस्की नुङा। 7होटै होसे भर्मीये ह्याङ काम जाट्च नोकरकी डेया, ‘ङोस्नी, सोम वर्ष अगाडि लकीङ इसे अञ्जीरै मीस्या स्याटाक्ले की डेम ङै लेन्न राहा, तर काट र मास्याटाका। होटबाटै इसकी फुस्न यान्ही। इसकी हीजै ह्या ओकडीकी याखी?’ 8होटै होसे नोकरै डेया, ‘हजुर, इसकी काट वर्ष टडीक डाकी यान्ही। ङा इसे म्यार्टुङौ वार्लाक-पार्लाक कोम्ह मल काम याल्हे, 9मीस्या स्या डेनाङ ठिक न ले, मास्या डेनाङ इसे म्यार्टुङकी फुस्न यान्ही’।”
म्हुङ बाट्चनीक छाचकी गेपाक्च
10होटै कायाक म्हुङ बाट्चनीक येशूये यहूदीकुङ सभा ङुच इमाङ पाहाक्ङन लेया। 11होला काट जना मास्टो भर्मी र लेया। होसकी अठार वर्ष लकीङ दुष्टआत्मा लग्डीसार छाम कुकुरुक छान्नन्या। होसे लाहा न सीधा छान्की माह्योक्न्या। 12होटै येशूये होसे मास्टोकी डाङार लाहा लेठाङ आर्घार इट डेया, “ए नानी, नाको अब इसे रोग लकीङ गेपा।” 13होटै लहो मीहुटै होसे मास्टोकी छुवा, होडीक न बेला होसे गेपार मीचारी सीधा छाना र परमेश्वरकी प्रशंसा जाट्की ठाला।
14होसे मास्टोकी म्हुङ बाट्चनीक येशूये गेपाक्च डाङार सभा ङुच इमुङ शासक मीरीस ख्योहार भर्मीकोलाक इट डेया, “कानै काम जाट्की काट हप्ताङ छ याक ले। नाखुरीक छ याक भित्रीयाङ राहार गेप्नी, म्हुङ बाट्चनीक होइन।”
15तर प्रभुये डेया, “ए कपटीको! ही म्हुङ बाट्चनीक नाखुरीकै ङ्हेट र भैँसीकोलाक गोठीङ डासार डी कास्की माआल्हे र? 16इसे अब्राहामौ मास्टो मीजाकी दुष्टआत्मै अठार वर्ष लकीङ बन्धनाङ डामन्या। ही म्हुङ बाट्चनीक इचे होसे बन्धनीङ छुटकारा डीन्खी पर्च माहाले र?” 17होसकुङ याङ्च जवाफ सेरखीङ होसकोकी माजाक्चको काराम सेकी पर्या। होटै भर्मीको चहिँ येशूये जाट्च अचम्मौ काम डाङार माह्राङा।
राइगानौ छोयो र खमिरौ उदाहरण
(मत्ती १३:३१-३३; मर्कूस ४:३०-३२)
18होटै न्हुइङ येशूये इट डेम गीना, “परमेश्वरौ राज्य ही ल्याक्च ले? ङा होसकी ही चिजखाटा दाँजडीङ? 19होसे राइगानौ छोयो काट दाना ल्याक्च हो। काट जना भर्मीये काट दाना आल्हार लहो ह्याङ रोप्डीया। होसे गीटार बाड्को म्यार्टुङ छाना। होटै हाँगाबिगाङ ग्वाजाकै मीम खासा।”
20होटै येशूये फेरि डेया, “परमेश्वरौ राज्यकी ङा हीखाटा दाँजडीङ? 21होसे चहिँ खमिर ल्याक्च न हो, काट मास्टोये सोम पाथी बेभोकाङ चेक्जा खमिर मोल्होक्नाङ र पट्ट न बेभोक खमिर छान्की क्योटा।”
साँगुरो गालाम
(मत्ती ७:१३-१४,२१-२३; ८:११-१२)
22येशू यरूशलेम सहरलाक नुङ्चै जाट्नाङ लाङ्घा-लाङ्घा र सहर-सहराङ पर्यार होला लेच भर्मीकोलाक शिक्षा पाहाका। 23होटै होडीक बेला काट भर्मीये होसकोकी गीना, “प्रभु, मुक्ति डुप्च भर्मीको थोरै मट्टै ले?” तर होसकै होखुरीककी डेया, 24“साँगुरो गालामीङ पर्की बल जाट्नी। ङा नाखुरीककी डेले, वास्टै जना पर्की च पाले, तर भित्री केल्खी माह्योक्ले। 25होडीक बेला इमुङ मीमुरुङ सोवार गालाम ठुन्ले। होटै नाखुरीक बाहिर लकीङ गालामकी ढ्वाक-ढ्वाक जाट्ले, ‘प्रभु, कानकी गालाम फोम यान्ही’। होसकै डेले, ‘नाखुरीक सु आले र? ङा माचीन्डीले!’ 26होटै नाखुरीकै डेले, ‘कानै नाकोखाटा काट ठावाङ न ङुवार ज्या, गा, होटै नाकै कानुङ लाम-लामाङ शिक्षा पाहाक्न्या।’ 27तर होचे डेले, ‘ङा नाखुरीककी डेले, नाखुरीक सु आले र कुटै राछ, ङा माह्वार्ले। ए दुष्ट काम जाट्चको ङा लकीङ लोस नुङ्नी।’ 28होटै नाखुरीकुङ पुर्खा अब्राहाम, इसहाक, याकूब र पट्ट अगमवक्ताकोलाक परमेश्वरौ राज्य भित्री डाङ्ले। र नाखुरीक लाहा चहिँ बाहिर लोम्ह काच छान्ने, होडीक बेला मीस्याक जीक्चै, विलाप जाट्चै राप्ले। 29भर्मीको पूर्व, पश्चिम, उत्तर, दक्षिण लकीङ राहार परमेश्वरौ राज्याङ भोज ज्याकी गाकी ङुले। 30तर ङोस्नी, चाहाँ न्हुङ्लाक छान्चको अगाडि छान्ने, अनि चाहाँ अगाडि छान्चको चहिँ न्हुङ्लाक छान्ने।”
यरूशलेमौ लागि येशूओ विलौना
(मत्ती २३:३७-३९)
31होडीक न बेला सु-सु फरिसीकै येशू लेठाङ राहार इट डेया, “नाको इटै ख्योहार नुङ्की क्योट्नी, हीजैडेनाङ हेरोद राजै नाकोकी साट्की पामन ले।” 32येशूये होखुरीककी डेया, “नुङार होसे सीलाकी डेम यान्ही, छीनी र पीउह्राक ङा भूत छ्युक्च र गेपाक्च काम जाट्न न ले। होटै सोमयाकाङ चहिँ ङौ काम भ्याले। 33होट छान्नाङ र, ङा छीनी, पीउह्राक र आपीह्रीन र ङै काम जाट्न ह्वाम ङुकी न पर्ले। हीजैडेनाङ यरूशलेम लकीङ बाहिर कुसेर अगमवक्ताकी साट्की माह्योक्ले।”
34 “ए यरूशलेम! नीये अगमवक्ताकोलाक साट्ले। होटै नाङ लेठाङ बीर्न्हकाच अगमवक्ताकोलाक ल्हुङे हीर्कडीले। कुटजाट्न गोमानै लहो मीजाकोलाक मीखार भित्री हुपार भेला पार्ले, होटजाट्न न ङै कुडीक खेप नुओ बालककोलाक भेला पार्च मीमन जाटा, तर नाङ मामन्डीया। 35ङोस्नी, नाखुरीकुङ इम उजाड छान्नने।” ङा नाखुरीककी डेले, “परमप्रभुओ म्यार्मीनाङ राछ ‘आशिषित ले’ माडेठर नाखुरीकै ङाकी डाङ्की माढीन्ले।”#भजनसंग्रह ११८:२६
Currently Selected:
लूका 13: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
