यहुडा 1
1
1ङा येशू ख्रीष्टौ डास र याकुबौ भाइ यहूदा लकीङ।
परमेश्वर बोये चुन्डीयार प्रेम जाट्च, र येशू ख्रीष्टौ लागी सुरक्षा याछ नाखुरीक पट्टकी ङा इसे चीठी रीक्ङन ले।
2नाखुरीककी कृपा, शान्ति र प्रेम, प्रसस्त खाटा छान्चै नुङ्ख्यौ।
झुटो शिक्षकको
3ङौ विश्वासी डाजेभाइ र डै बहीनीको, काल्हा पट्टकै डुप्च मुक्तियो बारेयाङ नाखुरीककी रीक्की सार्है मीमन सेया, टर अब परमेश्वरै लहौ पवित्र भर्मीकोलाक काखेपाङ न सढैंभरीयो लागी याछ विश्वासकी सेम्ह जोगडीयार डाकी डेच बारेयाङ र नाखुरीककी उत्साह याहार रीक्की न पर्ले डेम ङाकी आवस्यक सेया।
4हीजैडेनाङ कुसे भर्मीकै दण्ड डुप्ले डेम धर्मशास्त्राङ धेरै अघीलकीङ रीक्च कुडीक जना चहीँ नाखुरीकुङ मीघ्याङ सुटुक्क पर्न भ्यामने। होखुरीक परमेश्वरकी मामन्डीच भर्मीको हो, होखुरीककी परमेश्वरै अनुग्रह जाट्च बाटै, पट्टकै मास्च काम जाट्की छान्ने डेयार पाहाक्ले। अनी येशू ख्रीष्टकी कानुङ काट मट्टै प्रभु र मालीक डेयार मामन्डीले।
5नाखुरीककी पट्ट न कुराको थाहा लेनाङ र ङा इसे कुरा नाखुरीककी आर्मीटाक्ले। प्रभुये लहो भर्मीकोलाक मिश्र देशलकीङ डोनार राका, टर होखुरीक मढ्याङ कुडीक जना विश्वास माजाट्चकोलाक चहीँ न्हुइङ पट्ट न नास जाटा। 6अनी लहो अधिकारौ ठाउँ डासार बाहीर व्हाच स्वर्गदूतकोलाक समेट परमेश्वरै होसे बाड्को न्याय छान्च डीनाङ सजाय याखी डेम सेन्र भीस्की माय्होक्च छुम्छ ठावाङ छ्याकार बन्धनाङ डामने। 7होटजाट्न न सदोम र गमोरा अनी होसे खेरेपुङ सहरकुङ भर्मीकै झीर्न सेच व्यभिचारौ काम जाटार पाप जाट्नन्या, होटबाटै होखुरीक सधैँभरी ढाम ङुच म्हेओ दण्डवाङ पर्च उदाहरण छाना।
8होसे झुटो शिक्षकै माङ्नामाङ डाङ्ले, होचे जाट्नाङ होसे भर्मीकै लहो शरीरकी अशुद्ध पार्ले, प्रभुओ अधिकारकी विरोध जाट्ले र स्वर्गाङ लेच स्वर्गदूतकुङ विरुधाङ ङाक्ले। 9टर मुख्य स्वर्गदूत मीखाएलै र मोशौ लासौ बारेयाङ शैतानखाटा विवाद जाट्नाङ होसकी मास्च दोष लैडीच साहस माजाटा “प्रभुये नाङ्की हप्कडीख्यौ” मट्टै डेया। 10टर इसे भर्मीको च लहे माबुझडीस्च कुराकुङ डोस लैडीयार विरोध जाट्ले, अनी होखुरीकुङ बुझडीस्च शक्ति चहीँ बुद्धि मालेच पसुको लेखा न र होखुरीक होचे न नास छान्ने। 11होखुरीककी धिक्कार ले! हीजैडेनाङ होखुरीक कयीनौ लामा#1:11 कयीनौ लाम कयीनै लहो भाइ हाबीलकी साटा। उट्पटी ४:३-८ ङोस्नीङ व्हा। पैसौ लागी बालामै#1:11 बालामै बालामै पैसौ लागी इस्राएलीकोलाक साराप याखी मीमन जाटा। गन्टी २२:१-३५ ङोस्नी जाट्च मास्च कामौ लामकी डुटा। अनी कोरहै#1:11 कोरहै कोरहै मोसा र हारुनौ बीरुढाङ इस्राएलीकोलाक उक्सडीया। गन्टी १६:१-३५ ङोस्नी। लेखा न होखुरीकै विरोध जाटा र होखुरीक होसे लेखा न नास छान्ने। 12इसे भर्मीको नाखुरीकुङ मन्डलीयाङ भोज भटीयार छान्नाङ बडनाम जाट्चको हो। हीजैडेनाङ इखुरीक अरुकुङ वास्टा माजाट्न लहौ मट्टै मीटुक न्हेपाक्ले। इखुरीक नाम्सुये भुरुकार आल्छ र नामास माराहाक्च डेबु ल्याक्च न ले। इखुरीक लहो समयाङ मीस्या मास्याटाक्च, सीम भ्याच जरालकीङ हुट्च म्यार्टुङ ल्याक्च न ले। 13होखुरीक समुन्द्रौ बीर्हीमसेच डीयो छाल ल्याक्च न ले, होखुरीकै लहौ झीर्न सेच कुराको समुन्द्रौ घोचोस लेखा न बाहीर छ्युक्ले। होखुरीक लाम म्य्हाक्च टुगाको ल्याक्च न ले, होखुरीकुङ लागी नरकाङ बीर्हीमसेच छुम छुम डाङ्च ठाउँ सधैँभरीयो लागी टयार खासार डामने। 14आदमलकीङ साट पुस्तुङ हनोकै इसे भर्मीकुङ बारेयाङ पहीला न याङ्च अगमवाणी डेमन्या, “सेनी, प्रभु लहो हील्की माय्होक्च पवित्र दूतकोखाटा राल्हे। 15होसकै पट्ट न भर्मीकुङ न्याय जाट्ले र पापीकोलाक होखुरीकै जाट्च पट्ट न खालुङ मास्च कामकुङ लागी र होसकुङ विरुधाङ ङाक्च पट्ट न मास्च कुराकुङ लागी होसकै दण्ड याल्हे।”
16इसे भर्मीको सेन्र सन्टोस माछान्च, सढैँ अरुकुङ डोस पार छ्युक्च र लहो न मास्च इच्छाङ व्हाच, लहो बारेयाङ घमन्डी कुरा ङाक्चको अनी लहो फाइडौ लागी अरुकोलाक सीडी मोल्छको छान्ने।
चेतावनी र शिक्षा
17टर ङौ विश्वासी डाजेभाइको र डै बहीनीको, नाखुरीकै चहीँ काल्हौ प्रभु येशू ख्रीष्टौ प्रेरितकै अघीलकीङ न डेच बचनकोलाक आर्मीट्नी। 18होखुरीकै डेमन्या, “अन्टीमुङ डीनाङ ठट्टा जाट्चको छान्ले। होखुरीक परमेश्वरकी मामन्डीम लहो न इच्छाकोवाङ व्हाले।” 19नाखुरीकुङ मीघ्याङ फाटो राक्च भर्मीको इखुरीक न हो। होखुरीक संसारुङ न बीचाराङ छान्ने, र होखुरीक खाटा पवित्र आत्मा माछान्ने।
20टर ङौ विश्वासी डाजेभाइको र डै बहीनीको, नाखुरीक चहीँ अटी पवित्र विश्वासाङ बलीयो छानार ल्होङ्चै नुङ्नी र पवित्र आत्मौ शक्तियाङ प्रार्थना जाट्नी। 21लाहाकी परमेश्वरौ प्रेमाङ डानी र सेन्र मासीच जीवनौ लागी कानुङ प्रभु येशू ख्रीष्टौ दयाकी लेन्नाङ इट जाट्नी। 22सङ्खा जाट्चकोलाक दया टान्हाक्नी। 23अरुकोलाक नरकौ म्हेयाङ पर्की माय्हाम टान्डीयार जीवाटाक्नी। कुडीक जनाकी दया जाट्नाङ होसीयार जाट्नी, टर होखुरीकुङ जीवनाङ लेच पापकी घृणा जाट्नी।
24अब परमेश्वर बोइ मेखोलै न नाखुरीककी पापाङ पर्की लकीङ जीवाटाक्की य्होक्ले, र पाप न मालेच नीस्कलङ्क खासार अनी बाड्को आनन्द खाटा लहौ महीमौ अघी आल्खी य्होक्ले, 25काल्हौ प्रभु येशू ख्रीष्टाङ काल्हाकी मुक्ति याछ काट मट्टै परमेश्वरकी पट्ट न महीमा, सम्मान, शक्ति, अधिकार सुरुलकीङ याहा र अन्टीम सम्म न सधैँभरी छान्न ङुख्यौ! आमेन।
Currently Selected:
यहुडा 1: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.