प्रेरित 8
8
1स्तिफनसकी साट्नाङ शाऊल र खाट्नन्या।
शाऊलै विश्वासीकोलाक दु:ख याछ
होसनीक लकीङ न यरूशलेमाङ लेच मण्डलीयो विरुद्धाङ बाड्को सतावट सुरु छाना। प्रेरितको बाहेक अरु चेलाको पट्ट न भोग्डीसार यहूदिया र सामरिया इलाका पट्टी छरपष्ट छाना। 2अनि प्रभुओ भक्तजनकै स्तिफनसकी आल्हार ठाका र होच्यो लागि बाड्को विलाप जाटा।
3तर शाऊलै चहिँ मण्डलीकी नाश जाट्की डेम इम-इमाङ पर्यार विश्वासी पट्ट न लेन्जा भर्मी र मास्टो भर्मीकोलाक आर्ढुस्चै आल्हार झ्यालखानाङ कामयाम्ह्न्या।
सामरियाङ सेछ समाचार सेटाक्च
4होसे छरपष्ट छान्च विश्वासीकै पट्टलाक नुङार वचन प्रचार जाटा। 5अनि फिलिप चहिँ सामरियो काट सहराङ नुङार मुक्ति याछ ख्रीष्टौ बारेयाङ प्रचार जाटा। 6होटै फिलिपै डेच वचन सेयार होचे जाट्च अचम्मौ चिन्हको डाङा र भर्मीकुङ भीडै होच्यो कुराङ ध्यान याहार सेया। 7हीजैडेनाङ वास्टै भर्मीको लकीङ दुष्टआत्माको बाड्को स्वरै च्याक्चै ख्योहा अनि वास्टै जना पक्षाघात छानार छाचको र लुला-लङ्गडाकोलाक गेपाका। 8इटजाट्न होसे सहराङ साह्रै न आनन्द छाना।
9सिमोन म्यर्मीनुङ काट जना भर्मी होसे सहराङ लेया। होचे अघि लकीङ न होसे सहराङ जादु जाटार सामरियुङ भर्मीकोलाक अचम्म पार्नन्या र लाहा खुब बाड्को ल्हेस्नन्या। 10होसे सहरुङ भर्मीकै होसकी मार्जा लकीङ बाड्सोकोसम्म पट्टये न इट डेम मन्डीम्या, “इसे भर्मीखाटा परमेश्वरौ बाड्को शक्ति ले।” 11होखुरीकै होसे भर्मीकी मन्डीम्या हीजैडेनाङ धेरै वर्ष लकीङ होचे जादु जाटार भर्मीकोलाक अचम्म पार्यार डामन्या। 12तर फिलिपै परमेश्वरौ राज्यौ बारेयाङ प्रचार जाटा र येशू न मुक्ति याछ ख्रीष्ट हो डेम सेछ समाचार सेटाका, तब वास्टै भर्मीकै फिलिपौ कुराङ विश्वास जाटा। अनि होसे विश्वास जाट्च लेन्जा भर्मी र मास्टो भर्मी पट्टये बप्तिस्मा ला। 13सिमोनै र विश्वास जाटा र बप्तिस्मा ला। अनि होसे र फिलिपखाटा ह्वाकी ठाला, फिलिपै जाट्च बा-बाड्सो अचम्मौ काम र चिन्हको डाङार होसे छक्क पर्या।
14सामरियुङ भर्मीकै परमेश्वरौ वचन ग्रहण जाटा डेच सेयार यरूशलेमाङ लेच प्रेरितकै पत्रुस र यूहन्नाकी होखुरीक लेठाङ बीर्न्हका। 15होखुरीक होला राहार विश्वास जाट्चकै पवित्र आत्मा डुप्ख्यो डेयार प्रार्थना जाटा। 16हीजैडेनाङ होखुरीक सु मीटाक र पवित्र आत्मा माह्रामन्या। होखुरीक प्रभु येशूओ म्यार्मीनाङ मट्टै बप्तिस्मा छानन्या। 17होटै न्हुइङ पत्रुस र यूहन्नै होखुरीक मीटाक लहो मीहुट डा अनि होखुरीकै पवित्र आत्मा डुपा।
18प्रेरितकै मीहुट डानाङ पवित्र आत्मा डुप्च लेसा डेच डाङार सिमोनै होखुरीककी इट डेचै पैसा याखी पा, 19“ङाकीर इसे शक्ति यान्ही, होटबाटै ङै र भर्मीमीटाक मीहुट डानाङ होचे पवित्र आत्मा डुप्ख्यो।” 20तर पत्रुसै डेया, “नुओ पैसा नाङखाटा न नष्ट छान्ख्यो, हीजैडेनाङ परमेश्वरौ वरदान पैसै लोकी ह्योक्ले डेच नीये विचार जाटा। 21इसे कामाङ न त नुओ भाग ले न त अधिकार ले, हीजैडेनाङ परमेश्वरौ म्याहासाङ नुओ मीमन सेछ मालेसा। 22होटबाटै नुओ इसे दुष्ट विचारौ लागि पश्चात्ताप जाटो र प्रभुखाटा प्रार्थना जाटो, कुटै र नुओ मीमनुङ मासेछ विचारको क्षमा छान्ने की। 23हीजैडेनाङ ङै डाङ्ङने, नुओ मीमन डाहै न्हेप्मने र नाङ पापौ बन्धनाङ ले।” 24अनि सिमोनै पत्रुस र यूहन्नाकी डेया, “नाखुरीकै न ङौ लागि प्रभुखाटा प्रार्थना जाट्न यान्ही, नाखुरीकै डेच कुसे कुरा र ङा मीटाक आइ मापर्ख्यो।”
25पत्रुस र यूहन्नै लहो गवाही याहा र प्रभुओ वचन सेटाक्ङ भ्याच न्हुइङ होखुरीक सामरीकुङ वास्टै लाङ्घाङ नुङार सेछ समाचार प्रचार जाट्चै होखुरीक यरूशलेमाङ ल्हेसा।
फिलिप र इथियोपियुङ सरकारी भर्मी
26होटै न्हुइङ प्रभुओ काट स्वर्गदूतै फिलिपकी डेया, “सोना र दक्षिणपट्टी यरूशलेम लकीङ गाजापट्टी नुङ्च मरुभुमीयो लाम ले होटै नुङ्ना।” 27फिलिप सोवार नुङा अनि होडीक न बेला काट जना इथियोपियाली नपुङ्सककी डुपा, होसे इथियोपिया देशुङ महारानी कन्दाकीयो पट्ट न धन-सम्पत्ति ङोस्च बाड्को पदुङ अधिकारी लेया। होसे यरूशलेमाङ आराधना जाट्की राम्हन्या। 28होटै होसे ल्हेस्न न लेया र लहो रथाङ ङुवार यशैया अगमवक्तौ किताब परेस्न ङुमन्या।
29पवित्र आत्मै फिलिपकी डेया, “उ होसे रथ खाट-खाट नुङ्ना।” 30होटै फिलिप खेरार रथौ खेरेप नुङा र होसे भर्मीये यशैया अगमवक्तौ किताब परेस्च सेयार फिलिपै होसकी गीना, “नाकै परेस्चै जाट्च कुरा बुझडीस्ले?” 31अनि होसे भर्मीये डेया, “सुयेर डेम माह्याम ङै कुटजाट्न बुझडीस्की ह्योक्ले र?” होचे फिलिपकी रथाङ काल्हार लाहाखाटा ङुकी डेम बिन्ती जाटा। 32अनि होचे परेस्चै जाट्च धर्मशास्त्रओ खण्ड इसे लेया,
“कुटजाट्न भेडाकी साट्की आल्न्हाङ लुरु-लुरु नुङ्ले,
अथवा भेडा ऊन चेचओ अघि माच्याक्ङ ङुले
होटजाट्न न होसकै र लहो मेङ्गेर माखोलीया।
33होसकुङ बेइज्जत छान्नाङ होसकै न्याय माडुपा।
होसकुङ सन्तानकुङ बारेयाङ सुये डेकी ह्योक्ले?
हीजैडेनाङ होसकुङ जीवन पृथ्वी लकीङ आल्हा।” #यशैया ५३:७-८
34होसे नपुङ्सकै फिलिपकी गीना, “दया जाट्न ङाकी डेनी, इसे कुरा अगमवक्तै सुओ बारेयाङ डेच हो? आसकै लहो न बारेयाङ डेच हो की अरुकुङ बारेयाङ डेच हो?” 35तब फिलिपै ङाक्की सुरु जाटा धर्मशास्त्रओ होसे न खण्ड लकीङ येशूओ सेछ समाचार होसकी सेटाक्की ठाला।
36होखुरीक लामाङ नुङ्नाङ-नुङ्नाङ न डी लेच ठावाङ टाहा। अनि होसे नपुङ्सकै फिलिपकी डेया, “ङोस्नी, इला डी लेसा, अब ङाकी बप्तिस्मा लाकी हीये रोक्डीकी ह्योक्ले?” 37[फिलिपै होसकी डेया, “इडीक नाको हृदय लकीङ न विश्वास जाट्ले डेनाङ नाकै बप्तिस्मा लाकी ह्योक्ले।” होचे जवाफ याहा, “येशू ख्रीष्ट न परमेश्वरौ मीजा हो डेम ङा विश्वास जाट्ले।”] #८:३७ कोइ कोइ संस्करनौ बाइबलाङ इसे पद माले 38होचे रथ रोकडीकी लैडीया होटै होखुरीक नीस जना न झाला। डी लेच ठावाङ नुङार फिलिपै होसे नपुङ्सककी बप्तिस्मा याहा। 39जब होखुरीक डी लकीङ बाहिर ख्योहा तब तुरुन्तै प्रभुओ आत्मै फिलिपकी घोवार आल्हा र नपुङ्सकै होसकी फेरि माडाङा। होटै होसे माह्राङ्छै लाम लग्डीसा।
40होटै फिलिपै लाहाकी अश्दोदाङ टाह्राछ डुपा र कैसरिया माटाह्राठर वास्टै सहरकोवाङ सेछ समाचार सेटाक्चै नुङा।
Currently Selected:
प्रेरित 8: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.