प्रेरित 3
3
काट जना लङ्गडा गेप्च
1कायाक पत्रुस र यूहन्ना नाम्सीन सोम बजे प्रार्थना जाट्की डेम परमेश्वरौ मन्दिराङ नुङ्ङ न लेया। 2परमेश्वरौ मन्दिर भित्री पर्चकोखाटा भीख ङेखी डेम जन्मै लकीयुङ काट जना लङ्गडाकी भर्मीकै बुम राक्न्या र दिन-दिनै परमेश्वरौ मन्दिरौ सुन्दर म्यार्मीनुङ गालामाङ डाम याम्हन्या। 3होचे पत्रुस र यूहन्नाकी परमेश्वरौ मन्दिर भित्री नुङ्चै जाट्च डाङार होखुरीकखाटा भीख ङेहा। 4यूहन्ना र पत्रुसै होसे लङ्गडाकी सेम्हजा ङोसा र पत्रुसै डेया, “कान पट्टी ङोसो!” 5होखुरीक लकीङ हीर डुप्च आशा जाटार होचे ध्यान याहार होखुरीककी ङोसा। 6पत्रुसै डेया, “ङाखाटा सुन-चाँदी माले, तर ङाखाटा ही ले, होसे न ङा नाङ्की याल्हे। नासरतुङ येशू ख्रीष्टौ म्यार्मीनाङ सोवार ह्वाना!” 7पत्रुसै होच्यो डोरमीहुट घोवार होसकी सोटा र तुरुन्तै होडीक न बेला होसे भर्मीयो मीखुट्यौ गोली-गाठाकोवाङ तागत राहा। 8होसे जुरुक्कै सोवार टोङ्हा र ह्वाकी ठाला। होटै होसे ह्वाचै, फोर्जोछै परमेश्वरौ प्रशंसा जाट्चै होखुरीकखाटा परमेश्वरौ मन्दिर भित्री पर्या। 9पट्ट न भर्मीकै होसकी ह्वाचै जाट्च र परमेश्वरौ प्रशंसा जाट्च डाङा। 10होखुरीकै होसकी परमेश्वरौ मन्दिरौ सुन्दर म्यार्मीनुङ गालामटुआङ ङुवार भीख ङेखी ङुम-ङुच इसे न हो डेयार चीन्डीया। अनि होच्यो जीवनाङ याङ्च घटना छान्च डाङार होखुरीक साप्फी अचम्म मन्डीया।
मन्दिराङ पत्रुसौ उपदेश
11होसे गेप्च भर्मी पत्रुस र यूहन्नौ मीहुट घोवार ह्वाच डाङार पट्ट न भर्मीको अचम्म मन्डीचै सोलोमन डेच दलानाङ खेर्न राहा। 12अनि पत्रुसै होखुरीककी ङोसार डेया, “ए इस्राएलुङ भर्मीको, इसे कुराङ नाखुरीक हीजै अचम्म मन्डीचै ङोस्च? ही कानै लहो शक्ति र भक्तिये इसकी ह्वाकी ह्योक्च खास्च हो र? 13अब्राहाम, इसहाक र याकूबौ परमेश्वर, कानुङ पुर्खाकुङ परमेश्वरै लहो सेवक येशूकी महिमित पार्या। नाखुरीकै चहिँ होसे न येशूकी घोवाका र पिलातसै होसकोकी डास्न याछ विचार जाट्नाङ र नाखुरीक होसकुङ न म्याहासाङ मामन्डीया। 14तर नाखुरीकै पवित्र र धर्मी भर्मीयो सट्ठाङ काट भर्मी साट्चकी डास्न याखी डेम ङेहा। 15जीवन याछकी चहिँ नाखुरीकै साटा। तर होसकोकी परमेश्वरै सीच लकीङ जीवाटाक्ने र इसे कुरौ कान साक्षी ले। 16येशूकी विश्वास जाट्च बाटै इसे लङ्गडै बल डुपा। होसकुङ म्यार्मीन लकीङ होच्यो मीमनाङ विश्वास राहा। इच्यौ विश्वासै जाट्न अब नाखुरीकै न डाङ्च र चीन्डीच इसे भर्मी गेप्च नाखुरीकै डाङ्ङन ले।
17“ए इस्राएली लाफाको, ङाकी थाहा ले, नाखुरीक र नाखुरीकुङ शासककै येशू सु हो डेम माचीन्डीम न साट्च हो। 18तर मुक्ति याछ ख्रीष्टै दु:ख भोग्डीकी पर्ले डेम परमेश्वरै अघि लकीङ न पट्ट अगमवक्ताकुङ मेङ्गेरीङ डेच अगमवाणी होसकै इटजाट्न पूरा जाटा। 19होटबाटै पश्चात्ताप जाट्नी र पाप लकीङ ल्हेस्नी अनि नाखुरीकुङ पापको मेट्डीम याल्हे। नाखुरीकै परमप्रभु लकीङ शान्ति र आनन्द डुप्ले। 20र परमेश्वरै नाखुरीकुङ लागि अघि लकीङ न चुन्डीच मुक्ति याछ ख्रीष्ट येशूकी बीर्न्हकाम याल्हे। 21तर परमेश्वरै खायाक लकीङ लहो पवित्र अगमवक्ताकुङ मेङ्गेरीङ ङाक्च पट्ट न कुराको नयाँ खास्च समय माह्राठर येशू स्वर्गाङ न ङुकी पर्ले। 22मोशै डेमन्या,
‘परमप्रभु परमेश्वरै ङाकी खडा जाट्नाङ लेखा न
नाखुरीकुङ डाजेभाइकुङ मीघीङ काट अगमवक्ता नाखुरीकुङ लागि खडा जाट्ले।
अनि होसकै नाखुरीककी ही-ही डेले
होसे पट्ट न कुरा नाखुरीकै सेकी पर्ले।
23तर होसे अगमवक्तौ कुरा मासेच भर्मीको चहिँ
परमेश्वरौ जनको लकीङ भाक्ले र नाश छान्ने।’#व्यवस्था १८:१५,१८-१९
24“अगमवक्ता शमूएल लकीङ न्हुङ्लाकुङ पट्ट न अगमवक्ताकै र इसे दिनकोवाङ छान्न ङुच कुराकुङ बारेयाङ डेमन्या। 25परमेश्वरै अगमवक्ताको लकीङ याछ करार नाखुरीकुङ लागि हो, र परमेश्वरै नाखुरीकुङ पुर्खा अब्राहामखाटा जाट्च करार र नाखुरीकुङ लागि हो। परमेश्वरै अब्राहामकी डेया, ‘नाकुङ सन्तानको लकीङ ङा पृथ्वीयुङ पट्ट न जातिकोलाक आशिष याल्हे।’#उत्पत्ति २२:१८ 26नाखुरीक पट्टकोलाक लहो दुष्ट कामको लकीङ ल्हेटाकार नाखुरीककी आशिष याखी डेम परमेश्वरै लहो सेवक येशूकी चुन्डीयार नाखुरीक इस्राएलुङ भर्मीको लेठाङ पहिला बीर्न्हकाच हो।”
Currently Selected:
प्रेरित 3: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.