प्रेरित 2
2
पवित्र आत्मा राछ
1पेन्तिकोस डेच यहूदीकुङ चाड राहा र येशूकी विश्वास जाट्च पट्ट भर्मीको काठोवाङ न भेला छानन्या। 2होडीक बेला होला स्वर्ग लकीङ मोसोमायाङ बाड्को नाम्सु रान्हाङ लेखा काट आवाज राहा र होसे आवाजै होखुरीक ङुच इम न न्हेपा। 3होटै न्हुइङ म्हेओ मेलेट ल्याक्चको होखुरीक लेठाङ डाङा र होसे पट्ट मीटाक राहा। 4होखुरीक पट्ट जना पवित्र आत्मै न्हेपा र पवित्र आत्मै याछ बोली अनुसार होखुरीक अन्य भाषाकोवाङ ङाक्की ठाला।
5संसारभरि लेच देश लकीङ परमेश्वरकी मन्डीच यहूदीको होडीक बेला यरूशलेमाङ राम्हन्या। 6याङ्च हल्ला सेयार भर्मीको राहा र होला बाड्को भीड भेला छाना। होसे भर्मीको छक्क पर्या, हीजैडेनाङ मेखुरीकुङ भाषाकोवाङ ङाक्च होखुरीकै सेया। 7होखुरीक साह्रै न अचम्म मन्डीचै डेया, “ही इसे ङाक्चको च पट्ट न गालीलीको माहाले र? 8कुटजाट्न इखुरीकै कानुङ भाषाकोवाङ ङाक्च कानै सेमन ले? 9कानको च इला पार्थी, मादी र एलामी, मेसोपोटामिया, यहूदिया, कापाडोकिया, पोन्टस र एशियुङ बासिन्दाको ले। 10अनि फ्रिगिया, पामफिलिया, मिश्र र कुरेनीयाङ पर्च लिबियुङ कुडीक क्षेत्रको र रोम लकीङ राछ, 11यहूदी र यहूदी मत मन्डीचको नीस न ले, क्रेटुङ बासिन्दाको र अरबीको र ले। अनि होखुरीकै काल्हौ भाषाकोवाङ परमेश्वरौ महान कामकुङ चर्चा जाट्च काल्है सेमन ले।”
12अनि होखुरीक पट्ट न छक्क पर्या र अलमल्ल छानार काटै काटकी इट डेकी ठाला, “इच्यौ अर्थ ही हो?” 13तर कुडीक जनै चहिँ खीस्डीचै डेया, “इखुरीक च अङ्गुरौ मद्य गार म्होर्नने।”
पत्रुसै भीडकी डेच
14तर पत्रुसै एघार जना प्रेरितकोखाटा खडा छानार बाड्को स्वरै होसे भर्मीकोलाक डेया, “ए यहूदियुङ भर्मीको र यरूशलेमुङ पट्ट न बासिन्दाको, नाखुरीकै इसे कुरा वार्न्ही र ङौ कुरा सेनी। 15नाखुरीकै आर्मीट्च लेखा इखुरीक माम्होर्ने हीजैडेनाङ चाहाँ गोराकुङ नौ बजे मट्टै छान्नने। 16तर योएल अगमवक्तै ङाक्च कुरा इसे न हो,
17परमेश्वर डेले,
‘अन्तिम दिनकोवाङ याङ्च छान्ने, ङा पट्ट न भर्मीको मीटाक ङौ आत्मा ह्वाक्ङ याल्हे
अनि नाखुरीकुङ लेन्जा मीजाको र मास्टो मीजाकै अगमवाणी ङाक्ले
रेन्जा मीजाकै दर्शन डाङ्ले
र बुढा पाकाकै चहिँ माङ्नामाङ दर्शन डाङ्ले।
18हो, ङा ङौ सेवा जाट्चको मीटाक होसे दिनकोवाङ लेन्जा भर्मी र मास्टो भर्मीको मीटाक ङौ आत्मा ह्वाक्ङ याल्हे।
अनि होखुरीकै अगमवाणी ङाक्ले।
19सर्घाङ ङा अचम्मौ चिन्हको टान्हाक्ले
र पृथ्वीयाङ ङा अचम्मौ कामको जाट्ले।
ह्यु, म्हे र धुवौँ मुस्लो डाङ्ले।
20परमप्रभुओ महान र महिमामय दिन राखी डेनाङ अगाडि नाखान छुम्छ छान्ने,
र ग्याहोट ह्यु ल्याक्च ग्याच छान्ने।
21होस बेला सुये परमप्रभुओ म्यार्मीन लाले होसे जीवाले।’#योएल २:२८-३२
22“इस्राएलुङ भर्मीको, इसे कुरा सेनी नासरतुङ येशूकी परमेश्वरै बीर्न्हकाच हो डेम होसकै जाट्च अचम्मौ कामको र चिन्हको लकीङ नाखुरीकुङ म्याहासाङ प्रमाणित जाट्ने। नाखुरीककी थाहा न ले परमेश्वरै नाखुरीकुङ मीघ्याङ इसे कामको होसको लकीङ जाट्च हो। 23परमेश्वरै ठहरीच निश्चित योजना चहिँ होसकोकी अगाडि लकीङ न थाहा लेया होसे अनुसार न येशूकी नाखुरीकुङ मीहुटाङ जिम्मा याहा। अनि नाखुरीकै होसकोकी अधर्मी भर्मीकुङ मीहुटाङ याहा र क्रूसाङ टङ्गडीयार साटा।
24“तर होसकोकी परमेश्वरै मृत्युओ कष्ट लकीङ छुटकारा याहार जीवित खासा। हीजैडेनाङ मृत्युओ अधीनाङ होसको ङुम-ङुकी असम्भव लेया। 25अनि दाऊदै होसकुङ बारेयाङ डेले,
‘ङै प्रभुकी सधैँ ङौ म्याहासाङ डाङा,
हीजैडेनाङ ङा माबीह्रीख्यो डेयार होसको ङौ डोर पट्टी ङुमने।
26होटबाटै ङौ मीमन आनन्दित छान्नने र ङौ मेलेट माह्राङ्ने।
अनि ङौ शरीर र आशाङ जीवाले।
27हीजैडेनाङ नाकै ङौ प्राणकी पातलाङ माडास्ले
न त नाकै लहो पवित्र जनौ शरीरकी घेरेल्की न याल्हे।
28नाकै ङाकी जीवनौ लामको टान्हाका।
अनि नाकै ङाकी लहो उपस्थितियाङ आनन्दये गद-गद खास्ले।’#भजनसंग्रह १६:८-११
29“ए भाइको, काल्हौ पुर्खा दाऊदौ बारेयाङ ङा नाखुरीककी पक्काखाटा डेकी ह्योक्ले। दाऊद सीयार होसकी ठाका, अनि चाहाँसम्म र होच्यो चिहान लेमै ले। 30तर दाऊद काट अगमवक्ता लेचबाटै र होचे वार्न्हन्या की परमेश्वरै प्रतिज्ञा जाट्च र होच्यो न सन्तान लकीङ होसकी लेखा न सिंहासनाङ काट जनाकी परमेश्वरै डाले। 31होटबाटै अघि लकीङ न इसे कुरा डाङार दाऊदै मुक्ति याछ ख्रीष्ट सीच लकीङ जीवाचओ बारेयाङ डेया, परमेश्वरै होसकोकी न त पातलाङ डास्ले न त होसकुङ शरीर न घेरेल्की याल्हे।
32“अब इसे न येशूकी परमेश्वरै सीच लकीङ जीवाटाकार इसे कुरौ कान पट्ट जना साक्षी ले। 33परमेश्वर बोये येशूकी मान जाटार लहो डोरमीहुट पट्टी डार लहे प्रतिज्ञा जाट्च अनुसार होसकोकी पवित्र आत्मा याहा। अनि होसे पवित्र आत्मा येशूये काल्हा मीटाक ह्वाक्ङ याछ हो, होसे न कुराको नाखुरीकै चाहाँ डाङ्ङने र सेमने। 34दाऊद च स्वर्गाङ मानुङा तर होचे मेल्है न डेले,
‘परमप्रभुये ङौ प्रभुकी डेया,
नाको ङौ डोरमीहुट पट्टी ङुनी
35जबसम्म ङा नाकुङ
शत्रुकोलाक नाकुङ मीकु म्होकी मापार्ले।’#भजनसंग्रह ११०:१
36“होटबाटै इस्राएलुङ पट्ट न भर्मीकै इसे कुरा पक्का जाट्न वार्खी पर्ले। नाखुरीकै क्रूसाङ टङ्गडीच येशूकी न परमेश्वरै प्रभु र मुक्ति याछ ख्रीष्ट खासा।”
37पत्रुसौ इसे कुरा सेयार भर्मीकुङ मीमन छिया-छिया छाना। होटै पत्रुस र अरु प्रेरितकोलाक होखुरीकै गीना, “ए भाइको, अब कानै ही जाट्की?” 38तब पत्रुसै होखुरीककी डेया, “नाखुरीक पट्टकै जाट्च पापौ क्षमा डुप्कीयो लागि पश्चात्ताप जाट्नी, अनि येशू मुक्ति याछ ख्रीष्टौ म्यार्मीनाङ नाखुरीक पट्टकै बप्तिस्मा लानी। होस न्हुइङ नाखुरीकै परमेश्वरौ वरदान पवित्र आत्मा डुप्ले। 39हीजैडेनाङ इसे प्रतिज्ञा नाखुरीक र नाखुरीकुङ सन्तानकुङ लागि र लो-लोस लेच पट्टकुङ लागि हो। इसे चहिँ पट्टकुङ लागि हो, सु-सुकी प्रभु कानुङ परमेश्वरै मेखोल्है न आर्घाले।”
40पत्रुसै होखुरीककी अरु धेरै कुराको लकीङ साक्षी याहा अनि इट डेयार अर्ती याहा, “इसे दुष्ट पुस्ता मीटाक राछ दण्ड लकीङ नाखुरीकै लाहाकी जोगडीनी।” 41सु-सुये पत्रुसौ शिक्षाकी विश्वास जाटा होखुरीकै चहिँ बप्तिस्मा ला र होसनीक लगभग सोम हजार भर्मीको विश्वासीकुङ संख्याङ ठप्डीसा। 42होखुरीक प्रेरितकुङ शिक्षा, सङ्गति, भोजाङ #२:४२ भोजाङ: प्रभु भोज र भोज नीस न सङ्केत जाट्ले।र प्रार्थनाङ लगातार लग्डीस्न न ङुमन्या।
प्रभु येशूकी विश्वास जाट्चकुङ रहनसहन
43प्रेरितकै जाट्च अचम्मौ काम र चिन्हको डाङार पट्ट न भर्मीको छक्क पर्या। 44अनि विश्वास जाट्च जति पट्ट जनाको सेन खाल काठोवाङ न भेला छान्नन्या र होखुरीकुङ पट्ट न ठोकको साझ्या लेया। 45होखुरीकै लहो सम्पत्ति र चीजबीजको आर्लार मेखुरीक मीघ्याङ सु-सुकी हीयो खाँचो पर्या होसे पट्टकोलाक पुङ्ङ याम्हन्या। 46र दिन-दिनै होखुरीक परमेश्वरौ मन्दिराङ काठोवाङ जम्मा छानन्या, र माह्राङ्छै खाटार इम-इमाङ भोज ज्यामन्या गामन्या। 47होखुरीकै सधैँ परमेश्वरौ प्रशंसा जाट्न्या र अरु भर्मीकै र होखुरीककी जाक्ङन्या। उद्धार डुप्चकोलाक प्रभुये दिन-दिनै होखुरीकुङ संख्याङ ठप्डीम याम्हनन्या।
Currently Selected:
प्रेरित 2: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.