प्रेरित 28
28
पावल माल्टा टापुवाङ
1कान सेम्हजा किनाराङ राह्रखीङ होसे टापुओ म्यार्मीन माल्टा लेसा डेच कुरा थाहा छाना। 2होलुङ भर्मीकै कानकी सेन र माटान्हाक्च दया टान्हाका। नामास राहार जुङ्छ बाटै होखुरीकै म्हे ढाक्ङ याहा र कान पट्टकी स्वागत जाटा। 3पावलै काट बीटा सीङ जम्मा जाट्नन्या र होसे राकार म्हेयाङ का। म्हेये खान्छये जाट्नाङ काट बुल ख्योहार राहा र होच्यो मीहुटाङ डोकाकार च्योलोहा। 4होलुङ भर्मीकै होच्यो मीहुटाङ बुल च्योल्होछ डाङार मेखुरीक-मेखुरीक इट डेकी ठाला, “इसे भर्मीये पक्का र भर्मी साट्च छान्की पर्ले। इसे समुद्र लकीङ जीवार च राहा तर इन्साफ जाट्च दैव लकीङ इसे भीस्की माह्योका।” 5तर पावलै चहिँ होसे बुलकी म्हेयाङ न झट्कारीम याहा र पावलकी हीर माछाना। 6होला लेच भर्मीकै पावल अब कालापाङ विषै जाट्नाङ सोकार सीले डेम ङोस्न ङुवा। तर वास्टै बेरसम्म र होसकी हीर माछाना। इसे डाङार होखुरीकुङ विचार फेरीसा र छक्क पर्चै होखुरीकै डेकी ठाला, “इसे च देवता टी लेसा।”
7होसे ठाउँ लकीङ होसे टापुङ मुखिया पब्लियसौ इम बारीको खेरेप न लेया। पब्लियसै कानकी लहो इमाङ आल्हार स्वागत जाटा। कान सोम दिनसम्म आसकुङ न इमाङ पाहुना छानार ङुवा। 8पब्लियसौ बोइकी ज्वरो राम्हन्या अनि मासी र पर्नन्या। होटबाटै पावल पब्लियसौ बोयो कोठाङ नुङ्ङ प्रार्थना जाट्चै लहो मीहुट बिरामी मीटाक डाच न्हुइङ आसको गेपा। 9इसे घटना छान्रखीङ होसे टापुङ अरु रोगी भर्मीको र राहा अनि पावलै होखुरीककी गेपाका। 10होखुरीकै कानकी वास्टै प्रकारै आदर जाटा। जब कान जहाजाङ काल्हा होखुरीकै कानकी लामाङ चहडीस्च जति सामानको जहाजाङ काल्हाक्ङ याहा।
पावल रोमाङ
11सोम महिना न्हुइङ कान अलेक्जेन्ड्रियुङ जहाजाङ काल्हा। इसे जहाज हिउँदाङ इसे टापुवाङ न लेया। जहाजौ अगाडियुङ भागाङ जुम्ल्याहा देवतौ मूर्ति खोप्डीमन्या। 12सुराकुसाइयाङ टाहार कान होला सोम दिन ङुवा। 13होटै कान जहाजाङ काल्हार रेगीयनाङ टाह्रा। पीउह्राक लेखो दक्षिण लकीङ नाम्सु क्योसा र आपीह्रीन लेखो कान पटिओली डेच सहराङ टाह्रा। 14होला कानै विश्वासी डाजेभाइकोलाक डुपार होखुरीकै कानकी सात दिनसम्म होखुरीकखाटा न ङुकी बिन्ती जाटा। इटजाट्न कान रोमाङ टाह्रा। 15होटै कान रोमाङ राछ थाहा डीन्हार डाजेभाइको कानकी डुप्की अप्पियसौ बजार र सोम पाटी डेच ठावाङ राम्हन्या। इखुरीककी डाङार पावलै परमेश्वरकी धन्यवाद याहा र साहस डुपा।
पावल रोम सहराङ
16जब कान रोमाङ राहा तब पावलै काट जना सिपाहीयो रेखदेखाङ लाहा काट न ङुच अनुमति डुपा।
17सोम याक न्हुइङ पावलै यहूदीकुङ नेताकोलाक आर्घा। होखुरीक भेला छान्रखीङ पावलै डेया, “डाजेभाइको, ङै काल्हौ जाति र काल्हौ बोइ बाज्युको लकीङ क्योस्चै राछ रीतिरिवाजकुङ विरोधाङ हीर माजाट्नाङ र यहूदी डाजेभाइकै ङाकी यरूशलेमाङ घोवार रोमीकोलाक जिम्मा याहा। 18रोमीकै केरकार जाट्रखीङ ङाकी डास्न याखी पा हीजैडेनाङ ङाकी ज्यान सजाय याखी पर्च हीर दोष माडुपा। 19तर यहूदीकै विरोध जाट्च बाटै कैसर लेठाङ अपिल जाट्की ङाकी कर लग्डीसा। ङाखाटा ङौ जातियो विरुद्धाङ दोष लैडीकी पर्च हीर कुरा माले। 20होटबाटै ङै नाखुरीकखाटा डुपार गफ जाट्की डेम नाखुरीककी आर्घाच हो। ङा इसे साङ्लीयाङ छ्याम्हने हीजैडेनाङ ङा विश्वास जाट्ले इस्राएलौ आशा, मुक्ति याछ ख्रीष्ट राम्हभ्यामने।”
21होखुरीकै होसकी डेया, “कानै च नाकुङ विषयाङ यहूदिया लकीङ कुसेर चिठी माडुप्ने। कुसेर कानुङ भाइकै राहार नाकुङ विरुद्धाङ हीर मास्च कुरा मासेटाक्ने, अनि माङाक्ङने र। 22तर नाकुङ विचार ही हो, होसे नाको लकीङ सेकी मीमन ले। हीजैडेनाङ इसे दलौ बारेयाङ कानकी इडीक मट्टै थाहा ले की जताततै भर्मीको नाकुङ समुहौ विरोधाङ ङाक्ङने।”
23होखुरीकै पावलौ कुरा सेकी दिन तोक्डीया। तोक्डीच दिनाङ पहिला डेनाङ वास्टै यहूदीको भेला छानार पावल लेठाङ राहा। होसनीक पावलै गोराक लकीङ नाबीलाङसम्म परमेश्वरौ राज्यौ बारेयाङ शिक्षा याहा। मोशौ व्यवस्थाङ र अगमवक्ताकै रीक्च कुरा लार होचे येशूओ बारेयाङ पाहाक्चै होखुरीककी विश्वासाङ राक्की पा। 24पावलै डेच कुरा कुडीकै विश्वास जाटा कुडीकै माजाटा। 25होखुरीक लाहा लाहाङ न माखाटार भाकी पाच बेलाङ पावलै डेया, “नाखुरीकुङ बोइ बाज्युकोलाक यशैया अगमवक्ता लकीङ पवित्र आत्मै डेच वचन ठिक न लेया। आसकै डेया,
26‘इसे भर्मीको लेठाङ नुङार डेउ, सेकी च नाखुरीक सेले तर सेन र माबुझडीस्ले, ङोस्की च ङोस्ले तर सेन र माडाङ्ले।
27हीजैडेनाङ इसे भर्मीकुङ मीमन बोधो छान्नने
र होखुरीकुङ मेनेकेप मासेच छान्नने,
र होखुरीकै लहो मीमीक बन्द जाट्ले।
नभा च होखुरीकै मीमीक डाङ्च लेया,
मेनेकेपै सेच लेया मीमनै बुझडीस्च लेया र ङा पट्टी ल्हेस्च लेया,
र ङा नाखुरीककी गेपाक्च लेया।’#यशैया ६:९-१०”
28अनि पावलै डेया, “होटबाटै नाखुरीककी थाहा छान्ख्यो की परमेश्वरौ मुक्तियो सेछ समाचार अन्यजातिकुङ लागि र बीर्न्हकाच हो र होखुरीकै सेले।” 29[अनि होचे इसे वचन डेम भ्यारखीङ यहूदीको मेखुरीक-मेखुरीक न माखाटार वादविवाद जाट्चै भा।]#२८:२९ कोइ कोइ संस्करनौ बाइबलाङ इसे पद माले।
30होटै पावल लहे न भाडाङ लार ङुच इमाङ पूरा नीस वर्षसम्म रोमाङ ङुवार होसे लेठाङ राछको पट्टकी स्वागत जाटा। 31होचे खुल्लम-खुल्ला परमेश्वरौ राज्यौ प्रचार जाटा र प्रभु येशू ख्रीष्टौ बारेयाङ शिक्षा यान्हाङ सुयेर रोकडीकी मापा।
Currently Selected:
प्रेरित 28: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.