प्रेरित 20
20
पावल माकेडोनियाङ र ग्रीसाङ
1जब होहल्ला शान्त छाना, पावलै विश्वासीकोलाक आर्घाम भेला जाटा र होखुरीककी उत्साह याहा। अनि होखुरीकखाटा बिदा छानार पावल माकेडोनियाङ नुङा। 2होसे इलाकौ ठाउँ-ठावाङ नुङार विश्वासीकोलाक उत्साहखाटा वचन लकीङ वास्टै शिक्षा याहा, होटै पावल ग्रीसाङ नुङा। 3होला पावल सोम महिनासम्म ङुवा। होटै होसे जहाजीङ सिरियालाक नुङ्की पानाङ यहूदीकै होच्यो विरुद्धाङ षड्यन्त्र जाट्च थाहा डीन्छ बाटै होचे माकेडोनिया छान्चै सिरिया ल्हेस्च निश्चय जाटा। 4तब बेरियाङ ङुच पुरसौ लेन्जा मीजा सोपात्रोस, थेसलोनिके लकीङ अरिस्तार्खस र सिकन्दस, डर्बीयुङ गायस अनि एशियुङ तुखिकस र त्रोफिमस र तिमोथी पावलखाटा नुङा। 5होखुरीक चहिँ कान डेनाङ अगाडि न टाहार त्रोआस सहराङ कानकी लेन्न ङुमन्या। 6तर कान चहिँ अखमिरी रोटोओ चाड मन्डीम भ्यारखीङ फिलिप्पी सहर लकीङ जहाजाङ नुङार बाङा याकाङ त्रोआसाङ टाहा। कान होला सात दिनसम्म ङुवा।
पावल अन्तिम पल्ट त्रोआस सहराङ
7हप्तौ पहिलो दिन #२०:७ हप्तौ पहिलो दिन: यहूदीकुङ चलन अनुसार हप्तौ पहिलो दिन शनिबार नाबीलाङ लकीङ सुरु छान्ने। जब कान र अरु विश्वासीको प्रभुभोज ज्याकी भेला छाना, तब पावलै चहिँ पीउह्राक लेखो नुङ्च मीमन जाट्च बाटै, होखुरीकखाटा आधारातसम्म गफ जाट्न ङुवा। 8कान भेला छान्च ढेम्च तलौ कोठाङ वास्टै बत्तीको ढाक्ङ डाम्या। 9युटिकस म्यार्मीनुङ काट रेन्जा जजा चहिँ झ्यालाङ ङुम-ङुमन्या। पावलै धेरै बेरसम्म ङाक्ङ ङुनाङ होसकी साप्फी मीमीक झुका र मीमीक झुक्चबाटै होसे सोम तला लकीङ म्हाका झाङ झाला। जब भर्मीको होसकी सोट्की टान्हाङ सीम भ्याच डुपाना।
10तब पावल झाङ झाला र होसे मीटाक खुखुप छानार होसकी अङ्गालो का र वरिपरि लेच भर्मीकोलाक डेया, “चिन्ता माजाट्नी, हीजैडेनाङ चाहाँ इसे जिउँदै न ले!” 11तब पावल ढेनाम कोठाङ काल्हा र रोटो ग्याकार प्रभुभोज ज्या अनि ज्याम भ्यारखीङ माट्याङ्ठर होसे गफ जाट्चै ङुवा। होटै होखुरीक लकीङ बिदा छानार ह्वा। 12अनि होखुरीकै होसे रेन्जा जजाकी जिउँदै इमाङ आल्हार होखुरीकै वास्टै सान्त्वना डुपा हीजैडेनाङ होसे रेन्जा जजा जीवामन्या।
त्रोआस लकीङ मिलेटससम्मौ यात्रा
13त्रोआस लकीङ पावल बाहेक कान पट्ट न पानी जहाजाङ काल्हार अस्सोस सहराङ नुङा। अनि पावलै चहिँ अस्सोस सहरसम्म ह्वार नुङ्च मीमन जाट्च बाटै होचे लाहाकी अस्सोससाङ मट्टै पानी जहाजाङ काल्छ बन्दोबस्त जाट्नन्या। 14जब पावलै कानकी अस्सोसाङ डुपा, अनि कानै होसकी जहाजाङ काल्हाकार मितिलेनेनाङ नुङा। 15पीउह्राक लेखो कान जहाजाङ समुद्रओ लाम छान्चै खियस टापुओ छेउवाङ टाहा र आपीह्रीन लेखो सामोस टापुवाङ टाहा। होटै अर्को दिन चहिँ मिलेटस सहराङ टाहा। 16पावलै एशियाङ समय माबीतडीच विचार छान्चबाटै होचे एफिससाङ मापर्न न नुङ्च निधो जाटा। हीजैडेनाङ ह्योक्ठर यहूदीकुङ चाड पेन्तिकोसौ दिन यरूशलेमाङ न टाछ होचे आतुरी जाट्नन्या।
एफिसस मण्डलीयुङ अगुवाकोखाटा पावल बिदा छान्च
17पावलै मिलेटस लकीङ एफिसस मण्डलीयुङ अगुवाकोलाक आर्घाकी डेम भर्मी बीर्न्हका। 18जब होखुरीक होला टाह्रा तब पावलै होखुरीककी डेया, “ङा एशियाङ पाइला टेक्डीच नीक लकीङ न नाखुरीकुङ मीघ्याङ कुटजाट्न दिन बीतडीया होसे नाखुरीकै वार्न्हने। 19पूरा नम्रताखाटा मीराप्डी जोकाक्चै, यहूदीकुङ सतावटाङ र ङै प्रभुओ सेवा जाटा। 20नाखुरीककी भलाइ छान्च कुरा नाखुरीकुङ न म्याहासाङ सेटाक्की र इम-इमाङ नुङार नाखुरीककी र अरु भर्मीकी शिक्षा याखी ङा सेन र न्हुङ्लाक माहटडीसा। 21यहूदीकोलाक र ग्रीककोलाक पश्चात्ताप जाटार काल्हौ प्रभु येशू ख्रीष्ट मीटाक विश्वास जाट्की डेच कुरौ गवाही ङै याम्हने।
22“अब ङोस्नी, ङा पवित्र आत्मै डेच अनुसार यरूशलेमाङ नुङ्ङ न ले, होला ङाकी ही कुट आइलग्डीस्ले होसे ङा हीर माह्वार्ले। 23इडीक मट्टै वार्ल्हे, की सहर पीच्छी कैद र कष्ट ङा मीटाक पर्न राल्हे डेच कुरा पवित्र आत्मै ङाकी डेमने। 24तर ङा ङाल्हौ जीवनकी हीर मोलौ र लहो लागि प्रिय माठान्डीले। इडीक मट्टै ङा मीमन जाट्ले, की प्रभु येशू लकीङ डुप्च सेवकाइ ङा पूरा जाट्की ह्योकीङ। होसे चहिँ परमेश्वरौ अनुग्रहौ सेछ समाचार टाहाक्की हो। 25अब ङोस्नी, नाखुरीक सु-सुओ मीघ्याङ ङै परमेश्वरौ राज्यौ प्रचार जाट्चै राम्हने, नाखुरीकै फेरि ङाकी सेन र माडाङ्ले डेच कुरा ङाकी थाहा ले। 26होटबाटै छीनीयुङ दिन ङा नाखुरीककी साक्षी याल्हे, की ङा सुओर ह्युओ दोषी माछान्ने। 27हीजैडेनाङ परमेश्वरौ पट्ट न इच्छा नाखुरीककी डेकी ङा न्हुङ्लाक माहटडीसा। 28नाखुरीक लहो लागि र लहो पट्ट न बगालौ लागि होशियार छान्नी। पवित्र आत्मै नाखुरीककी बगालौ जिम्मेवारी खास्चबाटै परमेश्वरै लहो न मीजौ ह्युये लोच मण्डलीकी नाखुरीकै सेम्ह ङोस्की। 29हीजैडेनाङ ङाकी थाहा ले, ङा नुङ्च न्हुइङ बीह्रीमसेच ब्वाँसाको नाखुरीकुङ मीघ्याङ पर्ले, होखुरीकै बगालकी दु:ख याखी माडास्ले। 30नाखुरीकुङ न मीघीङ झूटो कुराको ङाक्च भर्मीको सोले, होखुरीकै विश्वासीकोलाक मेखुरीकुङ न्हुङ-न्हुङ आल्खी पाले। 31इटबाटै होशियार छान्नी र इसे कुरा आर्मीट्नी, सोम वर्षसम्म नाबीक नाम्सीन मीराप्डी जोकाक्चै पट्ट भर्मीकोलाक ङै चेतावनी याम्हन ङुवा।
32“अब ङा नाखुरीककी परमेश्वराङ र होसकुङ अनुग्रहौ वचनाङ जिम्मा याल्हे, होचे नाखुरीककी विश्वासाङ बलियो खास्की ह्योक्ले र पवित्र जाट्च पट्टकुङ मीघ्याङ हकदार खास्ले। 33ङै कुसे भर्मीयो र सुन, चाँदी र बढीनौ लोभ माजाटा। 34नाखुरीक लाहाकी र थाहा ले, ङौ इसे न मीहुटै काम जाटार ङाल्हौ लागि र ङाखाटा लेचकुङ खाँचोको ओल्होक्ङ याम्हने। 35ङै पट्ट न कुराङ नाखुरीककी पाहाक्ङने, नाखुरीकै र इटजाट्न न मेहनत जाटार कमजोरीकोलाक सहायता जाट्की पर्ले। प्रभु येशूओ वचन आर्मीट्नी, कुटजाट्न होसकै लहे न डेमने, ‘लाकी डेनाङ याखी झन् आशिष हो।’#२०:३५ येशूये डेच इसे शब्दको चहिँ सेछ समाचारौ कुसेर किताबाङ माले।”
36अनि इडीक डेम भ्यार पावलै घुँडा टुसार होखुरीक पट्टखाटा प्रार्थना जाटा। 37होखुरीक पट्ट न रापार पावलकी अङ्गालो कार चुम्हा अनि बिदा जाटा। 38होखुरीक साप्फी दु:खी छाना हीजैडेनाङ पावलै डेमन्या, अब फेरि सेन र होसकी डाङ्की माढीन्ले। होटै होखुरीकै पावलकी जहाजाङ साखी नुङा।
Currently Selected:
प्रेरित 20: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.