प्रेरित 14
14
आइकोनियन सहराङ
1पावल र बारनाबास आइकोनियन सहराङ यहूदीकुङ सभा ङुच इमाङ नुङा र इट डेयार ङाका, यहूदीकै र अन्यजातिकुङ बाड्को हुद्दै प्रभु येशू ख्रीष्टकी विश्वास जाटा। 2तर विश्वास माजाट्च यहूदीकै चहिँ अन्यजातिकोलाक भड्कडीयार विश्वास जाट्च डाजेभाइकुङ विरुद्धाङ होखुरीकुङ मीमन बीर्छ खास्न याहा। 3तर पनि प्रभुओ भरोसाङ साहस जाटार ङाक्चै वास्टै याकसम्म पावल र बारनाबास होला ङुवा। अनि प्रभुये होखुरीकुङ मीहुटीङ चिन्हको र अचम्मौ कामको जाटाकार लहो अनुग्रहौ वचनौ गवाही याहा। 4तर होसे सहरुङ भर्मीकोवाङ फाटो छानार कुडीक जना यहूदीको पट्टी र कुडीक जना चहिँ प्रेरितको पट्टी छाना। 5होटै अन्यजाति र यहूदीको मेखुरीकुङ शासककोखाटा खाटार पावल र बारनाबासकी मासेछ व्यवहार जाट्की र ल्हुङै ङापार साट्की डेम सल्लाह जाटा। 6तर पावल र बारनाबासै इसे कुरा थाहा डीन्हा र भोग्डीसार लुकोनियुङ सहर लुस्त्रा, डर्बी र छेउ-छाउङ जिल्लाकोवाङ नुङा। 7होटै होला र होखुरीकै सेछ समाचार सेटाक्ङन ङुवा।
लुस्त्रा र डर्बी सहराङ
8लुस्त्रा सहराङ मीखुट्या माक्योस्च काट जना भर्मी ङुमन्या। होसे डीन्हाङ लकीङ न कुज्या लेया र सेन र ह्वाकी माह्योक्न्या। 9पावलै ङाक्च होचे ध्यान याहार सेम ङुमन्या। होटै पावलै होच्यो मीटाहाङ सेम्हजा ङोसार होसे भर्मीये होसे गेप्ले डेच विश्वास ले डेच कुरा डाङा। 10पावलै होसकी बाड्को स्वरै च्याकार डेया, “नुओ मीखुट्यौ भराङ टोङ्हो!” अनि होसे जुरुक्क सोवार ह्वाकी ठाला।
11जब पावलै याङ्च काम जाट्च डाङा र होखुरीकै लहो लुकोनियुङ भाषाङ बाड्को स्वरै च्याकार डेया, “देवताको च भर्मीयो रुपाङ कान लेठाङ टी राम्हनेसा!” 12होखुरीकै बारनाबासकी चहिँ जिउस डेच देवता डेया र पावलकी चहिँ हर्मेस डेच देवता डेया हीजैडेनाङ होसे मुख्य वक्ता लेया। 13जिउस देवतौ मन्दिर चहिँ होसे सहरौ अगाडि न लेया। अनि होलुङ पूजाहारीकै मुल गालामकोवाङ बाछाको र सारौ मालाको राका। होलुङ भर्मीकोखाटा खाटार पावल र बारनाबासौ म्याहासाङ बलि याखी डेम तयार छाना।
14तर प्रेरितको, पावल र बारनाबासै इसे कुरा सेया अनि निराश छान्चै होखुरीकै लाहा लहो बढीन च्याटा र इट डेम च्याक्चै भर्मीकुङ मीघ्याङ खेर्न नुङार डेया, 15“ए डाजेभाइको, नाखुरीकै हीजै याङ्च काम जाट्च? कान र नाखुरीक लेखा न भर्मी मट्टै हो। कान नाखुरीककी याङ्च व्यर्थौ कुराको लकीङ जीवित परमेश्वर पट्टी ल्हेसाक्की डेम सेछ समाचार सेटाक्ले, कुसे परमेश्वरै स्वर्ग, पृथ्वी, समुद्र र होला लेच पट्ट ठोक खासा। 16होसकै अगाडियुङ पुस्ताङ पट्ट न जातिकोलाक लाहा लहो न लामाङ ह्वाकी याहा। 17तर पनि होसकै सेन र भलाइ जाट्च कामको जाट्की माडासा। होसकै सर्घा लकीङ नामास राहाकार ठिक समयाङ उब्जनी जाटाक्ले। होसकै नाकोकी प्रशस्त ज्याच ठोक जुटडीम याहार नाकुङ मीमनकी आनन्दये न्हेपाक्ङ याल्हे। इटजाट्न परमेश्वरौ कामकै न होसकुङ साक्षी याल्हे।” 18इसे कुरा डेयार होखुरीकै बल्ल-बल्ल होखुरीककी बलि याखी लकीङ होसे भर्मीकोलाक रोकडीया।
19होटै न्हुइङ एन्टिओखिया र आइकोनियन सहरीङ कुडीक जना यहूदीको होला राहा। होखुरीकै भर्मीकुङ हुलकी सोटार पावलकी ल्हुङ ङापार हीर्कडीकी लैडीया र होसे सीया डेयार होखुरीकै आर्ढुस्चै सहर लकीङ बाहिर आल्हार लोम्हका। 20तर जब विश्वासीको पावलौ वरिपरि टोङ्हा होसे सोवा होटै फेरि सहर भित्री पर्या। पीउह्राक लेखो बारनाबासखाटा ख्योहार डर्बीयाङ नुङा।
सिरियुङ एन्टिओखीयाङ ल्हेस्च
21पावल र बारनाबासै डर्बी सहराङ सेछ समाचार सेटाकार वास्टै चेलाको खासा। होटै होखुरीक लुस्त्रा, आइकोनियन र पिसिदियुङ एन्टिओखियाङ ल्हेसा। 22विश्वासीकुङ आत्माकी बलियो खास्चै होखुरीककी विश्वासाङ ङुम-ङुकी डेम अर्ती याहा र “वास्टै कष्ट सहडीयार कान परमेश्वरौ राज्याङ पर्की पर्ले” डेयार होखुरीककी पाहाका। 23जब पावल र बारनाबासै होखुरीकुङ पट्ट न मण्डलीयाङ अगुवाको नियुक्ती जाटा तब प्रार्थना र उपवास सहित होखुरीकै लहे विश्वास जाट्च प्रभुओ चरनाङ होखुरीककी याहा।
24होटै न्हुइङ होखुरीक पिसिदिया क्षेत्र छान्चै पामफिलियाङ राहा। 25पर्गा डेच ठावाङ प्रचार जाटार होखुरीक अटालियाङ झाला। 26होटै होखुरीक जहाजाङ काल्हार एन्टिओखियुङ सिरियाङ नुङा, होला होखुरीकै चाहाँ पूरा जाट्च कामौ लागि परमेश्वरौ अनुग्रहाङ होखुरीककी अर्पण जाट्नन्या।
27जब होखुरीक एन्टिओखियाङ टाह्रा, तब मण्डलीयुङ विश्वासीकोलाक भेला जाटा, होटै न्हुइङ पावल र बारनाबासै परमेश्वरै होखुरीकुङ साथाङ जाट्च पट्ट न कामौ बयान जाटा र कुटजाट्न अन्यजातिकुङ लागि विश्वासौ लाम खोलीम याहा डेम सेटाका। 28होखुरीक होला विश्वासीकोखाटा निकै याक ङुवा।
Currently Selected:
प्रेरित 14: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.