प्रेरित 13
13
बारनाबास र शाऊलकी भाक्च
1एन्टिओखिया सहरुङ मण्डलीयाङ अगमवक्ताको र शिक्षा याछ भर्मीको लेया। होखुरीक बारनाबास, काला डेच शिमियोन, कुरेनीयुङ लुकियस, राजा हेरोदखाटा होर्च मनेन र शाऊल लेया। 2होखुरीक प्रभुओ आराधना जाट्चै उपवास ङुच बेलाङ पवित्र आत्मै डेया, “ङौ लागि बारनाबास र शाऊलकी भाक्नी हीजैडेनाङ जुन कामौ लागि ङै होखुरीककी आर्घामने।” 3होटै होखुरीकै उपवास ङुम होखुरीक मीटाक मीहुट डार प्रार्थना जाटा र होखुरीककी बिदा याहा।
साइप्रस टापुवाङ
4इटजाट्न पवित्र आत्मै बीर्न्हकाचबाटै बारनाबास र शाऊल सिलुकियाङ नुङा। होटै जहाजाङ काल्हार साइप्रस नुङा। 5सलामिसाङ टाह्ररखीङ होखुरीकै यहूदीकुङ सभा ङुच इमकोवाङ नुङार परमेश्वरौ वचन सेटाका। होखुरीककी सहायता जाट्की यूहन्ना डेच मर्कूस र होखुरीकखाटा न लेया।
6होटै होखुरीक पट्ट न टापुको ह्वाम चेसार पाफोस डेच सहराङ टाहा। होला होखुरीकै काट जना यहूदी झूटो अगमवक्ता बार-येशू डेच जादूगरकी डुपा। 7होसे जादूगर साइप्रस टापुवाङ बडा-हाकिम सर्गियस पौलुसौ खेरेपुङ भर्मी हो। सर्गियस पौलुस चहिँ बुद्धि लेच भर्मी लेया। हीजैडेनाङ होचे परमेश्वरौ वचन सेकी मीमन जाट्न्या होटबाटै होचे शाऊल र बारनाबासकी आर्घा। 8तर बार-येशू होच्यो अर्को म्यार्मीन एलुमासै (ग्रीक भाषाङ होसे एलुमास म्यार्मीनौ अर्थ जादूगर हो) सर्गियस पौलसकी विश्वास लकीङ ल्हेटाक्की पा र होखुरीककी बाधा जाटा। 9तर शाऊलै (होसकी पावल र डेले) पवित्र आत्मै न्हेपार एलुमासकी एकोहोरो ङोसार डेया, 10“ए शैतानौ मीजा, पट्ट धार्मिकतौ शत्रु, दुष्ट र झूटो कुरै न्हेप्च! ही नाङ प्रभुओ सोझो लाम बाङ्गडीकी माडास्ले? 11ङोसो, प्रभुओ दण्ड नाङ मीटाक पर्नने र अब नाङ हीर समयसम्म अन्धा छानार नाखानौ ट्याङ्छ र माडाङ्ले।” होटै होडीक न बेला होच्यो मीमीककी छुम्छ डेबुये हुपार सुयेर होसकी घोवार डोरीम याल्हे की डेम मीहुटै इलाक-आलाक पाकी ठाला।
12होसे बडा-हाकिमै इसे घटना छान्च डाङार विश्वास जाटा हीजैडेनाङ प्रभुओ शिक्षाओ बारेयाङ होचे अचम्म मन्डीया।
पावल एन्टिओखियुङ पिसिदिया सहराङ
13पावल र मेन लाफाको पाफोस सहर लकीङ पानी जहाजाङ काल्हार पामफिलियुङ पर्गा सहराङ टाहा। होटै यूहन्ना डेच मर्कूस चहिँ बारनाबास र पावलकी डासार यरूशलेमाङ ल्हेसा। 14तर पावल र बारनाबासचहिँ पर्गा लकीङ ख्योहार पिसिदियुङ एन्टिओखियाङ नुङा र होखुरीक म्हुङ बाट्चनीक सभा ङुच इम भित्री नुङार ङुवा। 15मोशौ व्यवस्था र अगमवक्ताकुङ किताब लकीङ परेस्न भ्यारखीङ सभा ङुच इमुङ शासककै होखुरीक लेठाङ इट डेयार बीर्न्हका, “ए भाइको, नाखुरीकखाटा भर्मीकुङ लागि अर्ती याछ वचन ले डेनाङ डेम यान्ही।”
16पावल टोङ्हार भर्मीकोलाक माच्याक्की डेम मीहुटै इशारा जाटा र डेया, “ए इस्राएलुङ भर्मीको र अन्यजाति परमेश्वरकी मन्डीचको, ङौ कुरा सेनी। 17इस्राएली जातिकुङ परमेश्वरै कानुङ बोइ बाज्युकोलाक चुन्डीया र मिश्र देशाङ ङुनाङ होखुरीककी बाड्को जाति खासा। होसकुङ शक्तिशाली मीहुटै होखुरीककी होसे देश लकीङ छ्युकार राका। 18उजाड-ठाँवाङ चालीस वर्षसम्म होसकै न होखुरीककी ङोसा। 19तब होसकै कनान देशुङ सात जातिकोलाक नाश जाटार कानुङ पुस्ताकी अधिकार जाट्की याहा। 20इसे पट्ट न कुरा ओल्खीयो लागि बुलीसय पचास वर्ष टडीक समय लग्डीसा। होटै न्हुइङ शमूएल अगमवक्तौ पालासम्म परमेश्वरै शासन जाट्कीयो लागि न्यायकर्ताको याहा। 21होस न्हुइङ होखुरीकै राजा ङेहा र परमेश्वरै बेन्यामिन कुलुङ कीशौ लेन्जा मीजा शाऊलकी राजा खासा। होचे चालीस वर्षसम्म राज्य जाटा। 22परमेश्वरै शाऊलकी हटडीरखीङ दाऊदकी होखुरीकुङ राजा खासा। होच्यो बारेयाङ परमेश्वरै डेया, ‘ङै यिशैयो मीजा दाऊदकी ङौ मीमन लेखा न डुपा। होचे ङौ पट्ट न इच्छा पूरा जाट्ले।’#१ शमूएल १३:१४ 23इसे भर्मीयो सन्तान लकीङ न लहे जाट्च प्रतिज्ञा अनुसार परमेश्वरै इस्राएलीकुङ लागि काट मुक्तिदाता येशूकी बीर्न्हका। 24येशू राखी डेनाङ अगाडि यूहन्नै इस्राएलुङ पट्ट भर्मीकोलाक लहे जाट्च पापौ पश्चात्ताप जाटार बप्तिस्मा लाकी डेम प्रचार जाटा। 25यूहन्नै लहो काम भ्याकी पाच बेलाङ डेया, ‘नाखुरीक ही डेले, ही ङा मसीह हो? ङा होसको होइन। तर ङा न्हुइङ काट जना राल्हे, होसकुङ मीहीलुङ चप्पलौ फित्ता पीसाक्ङ याखीसम्म र ज्योस्च ङा माले।’
26“ए, अब्राहामौ सन्तानको र परमेश्वरखाटा बीह्रीछ अन्यजाति डाजेभाइको, इसे मुक्ति याछ सेछ समाचार काल्हा लेठाङ न बीर्न्हकामने। 27हीजैडेनाङ यरूशलेमाङ ङुच भर्मीको र होखुरीकुङ शासककै येशू न मसीह हो डेयार माचीन्डीया। हरेक म्हुङ बाट्चनीक परेस्च अगमवक्ताकुङ वचनको र माबुझडीसा। होटबाटै होसकोकी मृत्युदण्डओ आज्ञा याहा र होसकुङ बारेयाङ रीक्च वचन पूरा छाना। 28येशूकी साट्की पर्च कारण हीर माडुप्नाङ र होखुरीकै होसकोकी साट्की पर्ले डेयार पिलातसखाटा बिन्ती जाटा। 29होसकुङ बारेयाङ धर्मशास्त्राङ रीक्च पट्ट न कुरा होखुरीकै पूरा जाट्रखीङ येशूकी होखुरीकै क्रूसीङ झालाकार चिहानाङ ठाका। 30तर परमेश्वरै होसकोकी सीच लकीङ जीवाटाका। 31होसकोखाटा गालील लकीङ यरूशलेमाङ राछकै होसकोकी वास्टै याकसम्म डाङ्ङ ङुवा। होखुरीक न चाहाँ इस्राएलुङ भर्मीकुङ म्याहासाङ होसकुङ साक्षीको हो। 32परमेश्वरै कानुङ बोइ बाज्युकोखाटा प्रतिज्ञा जाटा। होटबाटै सेछ समाचार कान नाखुरीककी सेटाक्ले, 33कुटजाट्न परमेश्वरै येशूकी सीच लकीङ जीवाटाकार सोटा। होसे कुरा काल्हा, होखुरीकुङ सन्तानौ लागि पूरा जाट्न याहा, भजनसंग्रह नीसाङ रीक्ङने,
‘नाङ ङौ लेन्जा मीजा हो, छीनी ङै नाङ्की डीन्हने।’#भजनसंग्रह २:७
34“अनि परमेश्वरै मुक्ति याछ ख्रीष्टकी अब सेन र मासीच जाट्न सीच लकीङ जीवाटाक्ले डेच बारेयाङ चहिँ इट डेमने,
‘ङा नाखुरीककी दाऊदखाटा प्रतिज्ञा जाट्च पवित्र र अटल आशिषको याल्हे।’#यशैया ५५:३
35“हीजैडेनाङ अर्को ठावाङ र इट डेमने,
‘नाकै लहो पवित्र जनौ शरीर घेरेल्की माह्याले।’#भजनसंग्रह १६:१०
36“दाऊदै लहे न इसे बारेयाङ माडेया, हीजैडेनाङ आसकै चहिँ लहो पुस्ताङ जीवनभरि परमेश्वरौ योजना अनुसार सेवा जाटा, र होसे सीरखीङ मेन बोइ बाज्युकोखाटा ठाका र होच्यो शरीर घेरेला। 37तर सुकी परमेश्वरै सीच लकीङ जीवाटाका होसकुङ शरीर चहिँ माघेरेला। 38होटबाटै डाजेभाइको, नाखुरीककी थाहा छान्ख्यो, इसे न येशू लकीङ पाप क्षमा छान्ने डेयार ङा सेटाक्ले। 39नाखुरीक विश्वास जाट्चको पट्टकै होसको लकीङ न पट्ट न पाप लकीङ छुटकारा डुप्नने। होसे छुटकारा मोशौ व्यवस्था लकीङ नाखुरीकुङ लागि सम्भव मालेया। 40होटबाटै होशियार ङुनी, नभा च अगमवक्ताकुङ किताबाङ रीक्च इसे कुरा नाखुरीक मीटाक आइआपरे:
41‘ङोस्नी, ए गिल्ला जाट्चको,
अचम्म मन्डीनी अनि नाश छान्नी,
हीजैडेनाङ नाखुरीकुङ समयाङ ङा काट काम जाट्ले,
होसे कामौ बारेयाङ सुयेर नाखुरीककी डेम यान्हाङ र नाखुरीकै विश्वास माजाट्ले।’#हबकूक १:५”
42पावल र बारनाबास सभा ङुच इमीङ ख्योहार नुङ्च बेलाङ भर्मीकै “अर्को म्हुङ बाट्चनीक र इसे न कुरौ बारेयाङ सेटाक्ङ याख्यो, डेयार होखुरीककी बिन्ती जाटा।” 43सभा भ्यारखीङ यहूदीको र यहूदी धर्म मन्डीच अन्यजाति भक्तको पावल र बारनाबासकी डुटा। अनि पावल र बारनाबास होखुरीकखाटा ङाक्चै परमेश्वरौ अनुग्रहाङ सधैँ ङुम-ङुकी डेयार होखुरीकखाटा बिन्ती जाटा।
44अर्को म्हुङ बाट्चनीक वास्टै जसो न सहरुङ भर्मीको प्रभुओ वचन सेकी डेम उल्टडीसार राहा। 45होटै यहूदीकै भीडकोलाक डाङार होखुरीकुङ मीमन डाहै न्हेपा र पावलै ङाक्च कुरौ विरोधाङ होसकी च्याका। 46तर पावल र बारनाबासै साहस जाटार डेया, “परमेश्वरौ वचन चहिँ पट्ट डेनाङ पहिला नाखुरीककी न सेटाक्की खाँचो लेया। नाखुरीकै इसकी इन्कार जाटार लाहाकी सेन र मासीच जीवनौ लागि अयोग्य ठहरीचबाटै कान अब अन्यजातिको लेठाङ नुङ्ले। 47हीजैडेनाङ प्रभुये कानकी याङ्च आज्ञा याम्हने,
‘पृथ्वीयो अन्तिमसम्म मुक्ति टाहाक्की डेम
ङै नाखुरीककी अन्यजातिकुङ लागि काट ज्योति छान्की चुन्डीमने।’#यशैया ४९:६”
48इसे कुरा सेयार अन्यजातिको माह्राङ्छै प्रभुओ वचनौ प्रशंसा जाटा र सेन र मासीच जीवनौ लागि चुन्डीचको जतिये वचनकी विश्वास जाटा।
49प्रभुओ वचन पट्ट क्षेत्रलाक फैलडीसा। 50तर पावल र बारनाबासौ विरुद्धाङ यहूदीकै भक्ति जाट्च र भर्मीकै मान जाट्च मास्टो भर्मीको र सहरुङ मुख्य-मुख्य भर्मीकोलाक सोटा। होखुरीककी सतडीयार मेखुरीकुङ क्षेत्र लकीङ छ्युकार खेट्डीम का। 51पावल र बारनाबासै चहिँ परमेश्वरै न न्याय जाट्ले डेम लहो मीहीलुङ झाबुल होखुरीकुङ विरुद्धाङ खाह्राम डार आइकोनियन सहराङ नुङा।#१३:५१ मीहीलुङ झाबुल खाह्राकी डेच चहिँ लहे डेच कुराको जति डेनाङ र मामन्डीनाङ लाहाकी होसे दोष मालग्डीस्ख्यो डेम साक्षीयो लागि खाह्राछ हो। 52एन्टिओखिया सहराङ डास्न डाच विश्वासीको पवित्र आत्मा र आनन्दै न्हेपा।
Currently Selected:
प्रेरित 13: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.