प्रेरित 12
12
हेरोद राजा लकीङ सतावट
1होडीक बेला राजा हेरोद अग्रिपासै मण्डलीयुङ कुडीक जना विश्वासीकोलाक मासेम्ह सतडीकी ठाला। 2होचे यूहन्नौ डाजे याकूबकी तरवारै साट्की लैडीया। 3याकूबकी साट्रखीङ यहूदीको माह्राङ्छ डाङार हेरोदै पत्रुसकी र घोवा। इसे घटना अखमिरी रोटोओ चाडौ बेलाङ छानन्या। 4हेरोदै पत्रुसकी घोरखीङ झ्यालखानाङ कार छुटकारौ चाड न्हुइङ मट्टै होसकी न्यायौ लागि भर्मीकुङ अगाडि राक्च विचार जाटार होसकी रुङ्की डेम सोह्र जना सिपाहीकुङ बुली-बुली जना सिपाहीकुङ बुली टोली खासार जिम्मा याहा। 5इटजाट्न पत्रुसकी झ्यालखानाङ का तर होच्यो लागि मण्डलीये परमेश्वरखाटा लगातार प्रार्थना जाट्न ङुमन्या।
झ्यालखानीङ पत्रुसै छुटकारा डुप्च
6हेरोदै पत्रुसकी न्यायौ लागि भर्मीकुङ म्याहासाङ बाहिर राक्की पर्च दिनौ अगाडियुङ नाबीक पत्रुस नीस जना सिपाहीकुङ मीघ्याङ मीस्न ङुमन्या। होसकी नीस साङ्लै छ्याक्नन्या र सिपाहीको र झ्यालखानौ गालाम अगाडि टोङ्हार रुङ्ङ ङुमन्या। 7मोसोमायाङ प्रभुओ काट स्वर्गदूत होला डाङा र कोठाङ ट्याङ-ट्याङ डाङ्ङ ज्योति चम्कडीसा। अनि स्वर्गदूतै पत्रुसकी कोट्याकार, “छिटो सोना” डेयार होसकी सोटा। पत्रुसौ नीस मीहुटाङ छ्याक्च साङ्लाको भाराहार झाला। 8होटै स्वर्गदूतै पत्रुसकी डेया, “पटुका छ्याको र जुत्ता बील्हो।” अनि पत्रुसै होटन जाटा। फेरि स्वर्गदूतै होसकी डेया, “खास्टो बील्हार ङा न्हुङ-न्हुङ रान्हा।” 9पत्रुस होटै ख्योहार स्वर्गदूतौ न्हुङ-न्हुङ नुङा। तर स्वर्गदूतै जाट्च इसे कुरा साँच्ची न हो डेयार होसकी थाहा माछाना। होचे दर्शन डाङ्ङन ले डेम आर्मीटा। 10होखुरीक पहिला र दोस्रो रुङ्च सिपाहीकुङ टोली लकीङ चेसार सहराङ ख्योछ फलामौ गालामाङ टाहा। होसे गालाम मेल्हा न होखुरीकुङ लागि फोवा र होखुरीक बाहिर ख्योहार काट गल्लीयो लामीङ नुङा र तुरुन्तै स्वर्गदूत पत्रुसकी डासार ह्वा।
11होटै पत्रुस झस्याङ्ग छानार लाहाकी ही छान्च हो डेम थाहा डुपा र होचे डेया, “अब ङाकी साँच्ची न थाहा छाना, प्रभुये लहो स्वर्गदूत बीर्न्हकार हेरोद राजौ मीहुटीङ र यहूदीकै ङाकी ही जाट्की पामन्या होसे पट्ट लकीङ जोगडीया।”
12पत्रुसकी इसे कुरा थाहा छान्च न्हुइङ, होसे मर्कूस डेच यूहन्नौ मोइ मरियमौ इमाङ नुङा। होला वास्टै विश्वासीको जम्मा छानार प्रार्थना जाट्न न लेया। 13पत्रुसै गालाम ढ्वाक-ढ्वाक जाटा र रोदा डेच काट नोकर्नी गालाम फोकी राहा। 14होचे पत्रुसौ स्वर चीन्डीया र माह्राङार गालाम माफोम न ल्हेसार खेर्न नुङा, “पत्रुस गालामटुआङ टोङ्ह ङुमने” डेयार सेटाका। 15तर होखुरीकै रोदाकी डेया, “नाङ बौलडीसा की ह्याले?” तर होचे साँच्ची न हो डेयार जिद्दी जाटा। अनि होखुरीकै डेया, “होसे पत्रुसकी सहायता जाट्च स्वर्गदूत औला।”
16तर पत्रुसै चहिँ गालाम ढ्वाक-ढ्वाक जाट्न न ङुवा। होटै गालाम फोनाङ होसकी डाङार होखुरीक छक्क पर्या। 17पत्रुसै माच्याक्नी डेम मीहुटै इशारा जाटा र प्रभुये होसकी कुटजाट्न झ्यालखाना लकीङ बाहिर छ्युका डेच पट्ट न घटनाको होखुरीककी सेटाका। होटै न्हुइङ होखुरीककी डेकी डेम “इसे खबर याकूब#१२:१७ याकूब: इसे चहिँ येशूओ भाइ हो र इसे चहिँ यरूशलेमुङ परमेश्वरौ मण्डलीयुङ अगुवा लेया। र अरु डाजेभाइकोलाक सेटाक्की” डेयार होसे होटै अर्को न ठावाङ नुङा।
18ट्याङरखीङ गोराक न पत्रुसकी ही छाना डेम सिपाहीकुङ मीघ्याङ बाड्को हल्ला-खल्ला छाना। 19हेरोद राजै होसकी पाकी लैडीया तर माडुप्च न्हुइङ सिपाहीकोलाक कडा केरकार जाटा। हीर जवाफ माडुप्नाङ होखुरीककी साट्की डेम हुकुम याहा। होटै हेरोद राजा यहूदिया डासार कैसरिया सहराङ नुङार होला न ङुवा।
हेरोद राजा सीच
20हेरोद राजा टुरोस र सीदोनुङ भर्मीकोखाटा साह्रै मीरीस ख्योम्हन्या। होसे नीस सहरुङ भर्मीकै ज्याच अन्न हेरोदौ देशीङ राक्की पर्न्या। होटबाटै होखुरीक काट मीमनुङ छानार हेरोद लेठाङ खाट्की डेम राहा। होच्यो काम जाट्च भर्मी बलस्तसखाटा सहायता ङेहार राजाकी डुप्की बिन्ती जाटा।
21होटै तोक्डीच याकनीक राजै बील्छ बढीन बील्हार हेरोद सिंहासनाङ ङुवार भर्मीकोलाक होचे भाषण याहा। 22भर्मीकै “इसे च देवतौ बोली हो, भर्मीयो होइन!” डेयार च्याका। 23हेरोदै परमेश्वरकी आदर माजाट्चबाटै होडीक न बेला प्रभुओ काट स्वर्गदूतै होसकी प्रहार जाटा र बिरामी छाना अनि होसे डुकार सीया।
24तर परमेश्वरौ वचन चहिँ निरन्तर फैलडीस्चै र विश्वासीको बड्डीस्चै नुङा।
25बारनाबास र शाऊल लहो सेवाकाइ पूरा जाटार यरूशलेमीङ एन्टिओखियाङ ल्हेसा। होखुरीकै यूहन्ना डेच मर्कूसकी र लाहाखाटा राका।
Currently Selected:
प्रेरित 12: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.