३ युहन्ना 1
1
1ङा मण्डलीयुङ अगुवै ङौ जाक्च लाफा गायसकी इसे चीठी रीक्ङन ले, होसकी ङा साँचो प्रेम जाट्ले।
2ङौ जाक्च लाफा, नाकुङ पट्ट न कुराको सेम्ह छान्ख्यौ डेयार ङा प्रार्थना जाट्ले। अनी नाकुङ आत्मा स्वार्थ छान्नाङ लेखा न नाकुङ शरीर र नीरोगी छान्ख्यौ। 3कुडीक जना विश्वासी डाजेभाइको र डै बहीनीको ङा लेठाङ राहार नाङ सत्यताङ विश्वासयोग्य छान्च र सधैँ सत्यताङ व्हाच कुराको सेटाक्नाङ ङाकी साप्फी आनन्द छाना। 4लहो मीजाको#1:4 लहो मीजाको इसे मीजाको डेच चहीँ युहन्नै येसुवाङ बीस्वास जाटाक्च भर्मीकोलाक टान्हाक्ले। सत्यताङ व्हामने डेच कुरा सेकी डीन्खी डेनाङ अरु बाड्को आनन्द ङौ लागी ही छान्की य्होक्ले र?
5ङौ जाक्च लाफा, नाको लेठाङ राछ विश्वासी डाजेभाइको र डै बहीनीको होखुरीक कुडीक च अपरीचीट र लेया, होखुरीककी सहायता जाटार नाकै विश्वास योग्य काम जाटा। 6होखुरीकै मण्डलीयो म्याहासाङ नीये जाट्च प्रेमौ बारेयाङ सेटाक्ङने। नाकै परमेश्वरकी जाक्ङ सेच कीसीमै होखुरीकुङ नुङ्च लामाङ सहायता जाट्न याहा डेनाङ झन सेम्ह छान्ले। 7हीजैडेनाङ होखुरीक ख्रीष्टौ सेवा जाट्की व्हाच हो, अनी प्रभुकी विश्वास माजाट्चको लकीङ होखुरीकै हीर सहायता मालामे। 8होटबाटै कान विश्वासीकै याङ्च डाजेभाइको र डै बहीनीकोलाक सहायता जाट्की पर्ले। इट जाटार होखुरीककी सत्य कुरौ बारेयाङ डेकी सघडीले।
9ङै मण्डलीकी चीठी रीक्ङन्या, टर नाखुरीकुङ मीघ्याङ लाहाकी बाड्को आर्मीट्च डीयोटीरीफसै ङै रीक्च कुराको सुइकार माजाट्ले। 10ङा होला रान्हाङ होचे जाट्च मास्च काम र कानुङ विरुधाङ ङाक्च पट्ट न खराब कुराको नाखुरीक खाटा डेले। होचे होडीक मट्टै होइन, परदेशी विश्वासी डाजेभाइको र डै बहीनीकुङ विरोध जाट्ले, होखुरीकुङ स्वागट माजाट्ले। अनी होखुरीककी स्वागट जाट्की पाच कोलाक होचे रोकडीले र मण्डली लकीङ छ्युक्ङ याल्हे।
11ङौ जाक्च लाफा, मास्च कुरा सुलकीङ र मालाकी, टर सेछ कुराको मट्टै लाकी। सुये सेछ काम जाट्ले, होसे परमेश्वरौ भर्मी हो, सुये मासेछ काम जाट्ले, होचे परमेश्वरकी माचीन्डीमने। 12डेमेत्रियसौ बारेयाङ च पट्टकै सेम्ह डेले र सत्य मेल्है र इसे गबाही याल्हे। कानै र होच्यो बारेयाङ सेछ डेले। नाखुरीककी थाहा न ले, कानुङ गबाही साँचो ले।
13ङै नाकोकी डेकी पर्च कुराको च धेरै लेया, टर ङा कागज र मसीये मारीक्ले। 14टर ङै नाकोखाटा छीट्टो न डुप्च आशा डामने। अनी होडीक बेला काठोवाङ न ङुवार पट्ट न कुरा जाटीङ।
15परमेश्वरौ शान्ति नाकोखाटा ङुख्यौ। इला लेच नाकुङ पट्ट न लाफाकै र नाकोकी झोर्ले डेमने। अनी होला लेच पट्ट न लाफाकोलाक ङौ झोर्ले डेयार सेटाक्ङ याखी है।
Currently Selected:
३ युहन्ना 1: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.