সখরিয় 3

দাঙর্ ধর্মগুরুবোত্তে সাব্‌গোজ্যে পোজাক্

1পরেদি সেই স্বর্গদূত্‌‌‌‌তো মরে দেগেল দাঙর্ ধর্মগুরু যিহোশূয় লগেপ্রভুর দূত্‌‌‌‌তো মুজুঙোত্ থিয়্যেই আঘে আর তারে দুষ্ দিবাত্তে শদানে তা ডেনেদি থিয়্যেই আঘে। 2লগেপ্রভু শদান্নোরে কলঅ, “শদান, লগেপ্রভু তরে মানা গোরোক্। যিরূশালেমানরে যিবে বেঈ নেযেয়্যে তে তরে মানা গোরোক্। এই মানুচ্চো কি আগুনোত্তুন্ নিগিলেই আন্যে তক্তা নয়?”

3সেক্কে যিহোশূয় কজরা কাবড় উজ্যে অবস্থায় লগেপ্রভুর দূত্‌তো মুজুঙোত্ থিয়্যেই এলঅ। 4সেই দূত্‌তো নিজো মুজুঙোত্ থিয়্যেই থেইয়্যে অন্য দূত্‌তুনোরে কলঅ, “তার কজরা কাবড়-চুগোরানি খুলি ফেলঅ।” সে পরেদি তে যিহোশূয়রে কলঅ, “চাহ্, মুই তঅ পাপ্পানি দূর্ গুরি দুয়োং‌‌ আর মুই তরে দোল্ কাবড়-চুগোর্ উরেম।”

5সেক্কে মুই কলুং, “তা মাঢাবোত্ এক্কান সাব্‌গোজ্যে খবং দিয়্যে ওক্।” সেনত্তে সেই দূত্‌তুনে তা মাঢাবোত্ এক্কান সাব্‌গোজ্য খবং দিলো আর তারে কাবড় উরেল। সেক্কেয়ো লগেপ্রভুর দূত্‌‌‌‌‌তো তারা কায়কুরে থিয়্যেই এলঅ।‌‌

6সে পরেদি লগেপ্রভুর দূত্‌‌‌‌তো যিহোশূয়রে কলঅ, 7“বেগত্তুন খেমতাবলা লগেপ্রভু তরে কত্তে, ‘তুই যুনি মঅ পধেদি চলচ্ আর মর্ সেবা-কাম গরচ্ সালে তুই মঅ ঘরর্ বেক্কানি পরিচালনা গুরিবে আর মর্ উদোনর্ চেইচিদিবার ভারান্ পেবে, আর যিগুনে ইয়েনত্ থিয়্যেই আগন্ মুই তারা ধোক্ক্যেন মঅ মুজুঙোত্ এবার অধিকারান্ তরে দিম। 8ও দাঙর্ ধর্মগুরু যিহোশূয়, তুই শুন আর তঅ মুজুঙোত্ বৈই থেইয়্যে তর্ সমাজ্যে-ধর্মগুরুগুনে শুনোদোক্। মুই যে সেই চারাবোরে, অত্তাৎ মর্ চাগর্‌বোরে আনিবে এই ধর্মগুরুগুন অলাক্ তার চিহ্নো। 9ও যিহোশূয়, মুই তঅ মুজুঙোত্ এক্কো পাত্তর্ থোইয়োং। সেই পাত্তর্‌‌‌‌‌‌বো উগুরে সাত্‌তো চোগ্ আগন, আর তা উগুরে মুই এক্কান কধা খোদাই গুরিম আর মুই এক দিনে এ দেজর্ পাপ্‌‌‌‌‌‌‌পানি দূর গুরি দিম।‌‌‌‌ 10সেদিন্যে তুমি পত্তিজনে তমার্ আংগুর লুদি আর ডোমোর্ গাজ তলাত্ বুজিবাত্তে তমা পাড়াল্যেগুনোরে ভাত্ত্যেবা। মুই বেগত্তুন খেমতাবলা লগেপ্রভু এ কধাগান কঙর্।’ ”

Currently Selected:

সখরিয় 3: CBT

Highlight

Copy