রোমীয় 14
14
ভেইয়ুনোর্ দুষ্চানি ন-ধোজ্জ্য
1বিশ্বাজে যে মন্মরা তারে আপন গুরি নেয; তা কধাগান্দোই তা সমারে তর্কাতর্কি ন-গোজ্য। 2কেঅ কেঅ মনে গরন্ তে বেক্কানি হেই পারে, মাত্তর্ যে বিশ্বেজদি দুর্বল তে বানা শাক্-পাত্ খায়। 3চোইদ্দ্যে হেইয়্যেবো যেন শাক্-পাত্ হেইয়্যেবোরে ঈচ্ ন-গরে আর শাক্-পাত্ হেইয়্যেবো যেন চোইদ্দ্যে হেইয়্যেবোরে দুষ্ ন-ধরে, কিয়া গোজেনে দঅ সেই দ্বিজনরে আপন গুরি লোইয়্যে। 4তুই কন্না, যে অন্য চাগরর্ বিচের গরচ্? তে থিয়্যেই আঘে, না পড়ি যেইয়্যে, সিয়েন তা গিরোজ্সো বুঝিবো। মাত্তর্ তে থিয়্যেই থেবঅ, কিয়া গোজেনে তারে থিয়্যেই রাগেই পারে।
5কারঅ ইধু কনঅ এক্কো দিন অন্য এক্কো দিনোত্তুন্ মূল্যবান। আরঅ কেঅ বেক্ দিনুনোরে সং মনে গরন্। এ পৌইদ্যেনে কন্না কি গুরিবো ন-গুরিবো, সিয়েন্দোই যেন তা মনান্ পুরোপুরি গুরিনে সায় দে। 6বিশেষ্ কনঅ এক্কো দিন যে পালায় তে দঅ গোজেনরে হুজি গুরিবাত্তে সিয়েন গরে। যে বেক্কানি খায় তে গোজেনরে হুজি গুরিবাত্তে খায়, কিয়া তে গোজেনরে ভালেদি জানায়। যে বেক্কানি ন-খায় তে গোজেনরে হুজি গুরিবাত্তে ন-খায়, আর তেয়ো গোজেনরে ভালেদি জানায়। 7আমা ভিদিরে কেঅ নিজোত্যে বাঁজি ন-থায় আর কেঅ নিজোত্যে ন-মরে। 8আমি যুনি বাঁজিই সালে প্রভুত্যে বাঁজি থেই, আর যুনি মুরিই সালে প্রভুত্যে মুরিই। সালে আমি বাঁজিই কি মুরিই আমি প্রভুর্।
9যীশু খ্রীষ্ট মোজ্জ্যে আরঅ জেদায়ো ওইয়্যে যেন তে জেদা আর মরা দুনোবোর্ প্রভু ওই পারে। 10সালে কিত্ত্যে তুই তর্ ভেইয়ো দুষ্ ধরর্? আর কিত্ত্যেই বা তঅ ভেইবোরে থেঝেরা গরর্? বিচেরত্তে আমি বেক্কুনে দঅ গোজেন মুজুঙোত্ থিয়্যেবং। 11পবিত্র বোইবোত্ লেগা আঘে, “প্রভু কয়, ‘মুই মঅ নাঙে কঙর্, মঅ মুজুঙোত্ বেক্কুনে আঢু পাদিবাক্ আর মরে গোজেন বিলিনে স্বিগের্ গুরিবাক্।’ ”
12সালে দেগা যাত্তে, আমা বেক্কুনোর্ নিজো পৌইদ্যেনে গোজেন ইধু ইজেব্ দিয়্যে পড়িবো।
ভেইবোরে পাপঅ পধেদি ন-নেযেইয়ো
13ইয়েনত্তে আমি যেন একজন আরেক্ জনরে দুষ্ ন-ধুরিই, বরং এমন্ কনঅ কাম্ ন-গুরিবোং বিলিনে ঠিগ্ গুরিই, যিয়েন দেগিনে কনঅ ভেই মনত্ যাগুলুক্ পায় বা পাপত্ পড়িই পারে। 14প্রভু যীশু সমারে মিজেয়োং বিলিনে মুই গমেডালে কোই পারং যে, আজলে কনঅ হানা অসিজি নয়, মাত্তর্ কেঅ যুনি কনঅ হানাগানরে অসিজি মনে গরে সালে সিয়েন তা ইধু অসিজি। 15কনঅ হানাত্যে যুনি তুই তঅ ভেইয়ো মনত্ দুঘ্ দুয়োচ্ সালে দঅ তুই আর কোচ্পানার্ মনভাব্পোই ন-চলর্। যে ভেইয়োত্যে খ্রীষ্ট মোজ্জ্যে, হানাত্যেই তারে নাশ্ ন-গোজ্জ্য। 16তমা ইধু যিয়েন্ গম্, কেঅ যেন সিয়েনর্ নিন্দে গুরি ন-পারন। 17গোজেন রেজ্যত্ হানা-দানা দাঙর্ কধা নয়; দাঙর্ কধা অলঅ, পবিত্র আত্মার্ মাধ্যমে গম্ পধেদি চলানা আর সেক্কে সুগ্-শান্দি, মন হুজি থায়। 18যে এবাবোত্যেগুরি খ্রীষ্টরে সেবা গরে গোজেনে তা উগুরে হুজি অয় আর মান্জ্যেয়ো তারে গম্ মনে গরন্।
19ইয়েনত্যে যিয়েন গুরিলে শান্তি অয় আর যিয়েনর মাধ্যমে আমি একজন আরেকজনরে শিগেইনে তুলি পারিই, এজঅ, আমি সিয়েনর্ চেট্ট্যা গুরিই। 20কনঅ হানাত্যে গোজেনর্ কাম্ বর্বাদ্ ন-গোজ্জ্য। বেক্ হানাগানি সিজি, মাত্তর্ কেঅ কিজু হেইনে যুনি অন্য মনত্ সিয়োংচমা গরে সালে সিয়েন হানা তাত্যেই অন্যেয়। 21য়েরা হানা, আঙ্গুর রচ্ হানা বা এমন্ কিজু গরানা উজিত্ নয় যেনে তর্ কনঅ ভেই মনত্ সিয়োংচমা ন-অয়। 22এ পৌইদ্যেনে তুই যিয়েন গম্ বিলিনে বিশ্বেজ্ গরচ্ সিয়েন গোজেন আর তঅ ভিদিরে থঅ। গম্ মনে গুরিনে কিজু গুরিবার সময় যুনি কারঅ বিবেকে তারে দুষি ন-গরে সালে তে বর্পেইয়্যে। 23মাত্তর্ যুনি কনজনে সন্দেহ গুরিনে কনঅ কিজু খায় সালে তে দুষি, কিয়া তে তার্ বিশ্বেজ্ মজিম কাম্ ন-গরের্। বিশ্বেজ্ বিরুদ্ধে কনঅ কিজু গরানা পাপ।
Currently Selected:
রোমীয় 14: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
