ওবদিয় 1
1
ইদোম বিরুদ্ধে আগাম্ কধা
1ওবদিয়র দর্শন।
ইদোম দেজর্ পৌইদ্যেনে প্রভু লগেপ্রভু এ বেক্ কধানি কোইয়্যে। আমি লগেপ্রভুত্তুন্ এক্কান হবর্ পেইয়্যেই। তে জাদ্তুনো ইধু এক্কো দূতোরে পাধেইনে এ কধাগান কবাত্তে কোইয়্যে, “উদো, আঢঅ আমি ইদোম বিরুদ্ধে যুদ্ধো গুরিবাত্তে যেই।”
2লগেপ্রভু ইদোমরে কত্তে, চাহ্, জাদ্তুনো ভিদিরেত্তুন্ মুই তরে চিগোন্ গুরিম; তরে এক্কুবারে তুচ্ছো গরা অবঅ। 3তুই পাত্তরর্ মুড়ো ফাদা সেরে বজত্তি গর্ আর অজল্ অজল্ জাগাত্ থাগ্ আর মনে মনে কঅ, কন্না মরে মাদিত্ লামেই পারিবো? মাত্তর্ তঅ মনর্ অহংকারানে তরে ঠোগেয়্যে। 4যুনিয়ো তুই ঈগল পেগো ধোক্ক্যেন অজলত্ ঘর্ বানাচ্ আর তারাগুনো ভিদিরে ঘর বানাচ্ তো মুই সিয়েনিত্তুন তরে লামেই আনিম। মুই লগেপ্রভু এ কধাগান কঙর্।
5“ইস্, কি দযাগান্ তত্তেই বাজ্জেই আঘে! যুনি চুরুনে তইদু এজন্, ডাগেত্তুনে এজন্ রেদোত্, মাত্তর্ তারার্ যেত্তমান আওজ্ বানা সেত্তমান তারা চুর্ গুরিবাক্। আংগুর তুলিবার মানুচ্চুনে যুনি তইদু এজন্ সালে তারা তত্তেই কিজু আংগুর থোই যেবাক্। 6মাত্তর্ এষৌরে এক্কুবারে লুদো অবঅ, তার্ গুমুরো ধনানি পুরোপুরি গুরিনে লুদো অবঅ। 7তর্ বেক সমাজ্যেগুনো-রেজ্যগানিত্ তর্ ধেই যেইয়্যে মানুচ্চুনোরে তারা দুযিত্ সোমেবাত্তে ন-দিবে। তঅ সমাজ্যেগুনে তরে ঠোগেবাক্ আর তরে ভিরেবাক্, যিগুনে তঅ হানা খান্ তারা তত্যেই ফাল্ ফাদিবাক্ মাত্তর্ তুই কিচ্চু বুঝি ন-পারিবে।”
8লগেপ্রভু কত্তে, সেদিন্যে মুই কি ইদোমর জ্ঞানী মানুচ্চুনোরে আর এষৌর মুড়োগুনোত্তুন্ বুদ্ধিবলা মানুচ্চুনোরে ভস্ত ন-গুরিম? 9ও তৈমন, তঅ যোদ্ধাগুনে অমকদ দোরেবাক্ আর এষৌর মুড়োগুনোর্ বেক্কুনোরে মারে ফেলা অবঅ। 10তঅ ভেই যাকোব বিরুদ্ধে অত্যেচারত্তে তুই লাজে ঢাগি যেবে; তুই উমরত্তে ভস্ত অবে। 11অন্য দেজর্ মানুচ্চুনে যেক্কে যাকোবর ধন-সম্বোত্তিগানি নেযাদন্ আর তা গেট্টোদি সোমেইনে যিরূশালেমত্তে চাম্বা চেইয়োন সেক্কে তুই দূরোত্ থিয়্যেই এলে; তুই তারা ধোক্ক্যেন এক্কো ওইয়োচ্। 12তঅ ভেইবোর্ দুঘোত্ তুই হুজি ওইয়োচ্, যিহূদা মানুচ্চুনোর্ ভস্তর্ দিনোত্ তারা পৌইদ্যেনে ফুত্তি গোজ্যস্ আর তারার্ দুঘো দিনোত্ বাড়্বো গোজ্যস্। 13মঅ মানুচ্চুনোর্ দযাত্ তুই তারার্ গেইট্টুনোদি সোম্মোচ্, তারার্ ভস্তর্ দিনোত্ তারার্ দযা দেগিনে তুই হুজি ওইয়োচ্ আহ্ তারার্ ধন-সোম্বোত্তিগানি গজক্ গোজ্যস্, 14তারার্ ধেই যেইয়্যে মানুচ্চুনোরে মারে ফেলেবাত্তে তুই তারারে ধেই যেবার্ পধে পধে বাজ্জেই রোইয়োচ্, আর তারার্ দুঘোর্ দিনোত্ তারার্ রোক্ষ্যে পেইয়্যে মানুচ্চুনোর শত্রুর আঢত্ তুলি দুয়োচ্। ইয়েনি গরানা তর্ ঠিগ্ ন-এলঅ।
15“বেক্ জাদ্তুনোত্তে লগেপ্রভুর দিন্নো কায়কুরে লুম্মেগি। তুই যেবাবোত্যে গোজ্যস্ তঅ উগুরেয়ো সেবাবোত্যে গরা অবঅ; তঅ কামর্ ফল তঅ মাঢা উগুরে ফিরি এবঅ। 16মঅ সুদ্ধো-সাংগ মুড়োবোত্ তুই যেবাবোত্যেগুরি মদ হেইয়োচ্ সেবাবোত্যেগুরি বেক জাদ্তুনে আমিঝে মঅ রাগর্ মদ হেবাক্; তারা দঅ হা ধুরিবাক্ আর পুরোপুরি শেজ্ ওই যেবঅ। 17মাত্তর্ সিয়োন মুড়োবোত্ কয়েক্কো মানুচ্ রোক্ষ্যে পেবাক্; তারা অবাক্ গোজেন নাঙে যুদো গোজ্যে মানুচ্। যাকোবর বংশবো তারার্ পাওনা সাজা সোম্বোত্তি পেবাক্। 18যাকোবর বংশবো অবঅ আগুন আর যোষেফর বংশবো অবঅ আগুনো জ্বিল্; এষৌর বংশবো অবঅ নাড়া আর সেই আগুনানে সিয়েনরে পুড়ি ফেলেব। এষৌর বংশর কনজন বাঁজি ন-থেবাক্। মুই লগেপ্রভু এ কধাগান কোইয়োং।”
19নেগেভত্ থেইয়্যে ইস্রায়েলীয়গুনে এষৌর মুড়োগুন গজক্ গুরি নিবাক্ আর তলেদি মুড়ো চাগালার্ মানুচ্চুনে পলেষ্টীয়গুনোর্ দেজ্চান গজক্ গুরিবাক্। তারা ইফ্রয়িম আর শমরিয়ার্ জাগায়ানি গজক্ গুরিবাক্ আর বিন্যামীন গিলিয়দ চাগালাগান গজক্ গুরিবাক্। 20বন্দীদজাত্ থেইয়্যে ইস্রায়েলীয়গুনোর্ দল্লো এইনে সারিফৎ সং কনানীয়গুনোর্ দেজ্চান গজক্ গুরি নিবাক্; বন্দীদজাত্ থেইয়্যে যিরূশালেমর যে মানুচ্চুনে সফারদত্ আগন্ তারা এইনে নেগেভর আদামানি গজক্ গুরিবাক। 21শাজন্গুরিয়্যেগুনে সিয়োন মুড়োবোত্তুন্ এষৌর মুড়োগুনো মানুচ্চুনোরে শাজন্ গুরিবাক, আর লগেপ্রভু রাজাগিরি গুরিবো।
Currently Selected:
ওবদিয় 1: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
