গণাণা 8
8
বদঙর্ চেরাগ
1লগেপ্রভু মোশিরে কলঅ, 2“তুই হারোণরে কঅ, বদঙর্ সাত্তো চেরাগ তাত্তুন্ এমন্গুরি বজা পুরিবো যেনে সিগুনোর পহ্রান্ বদঙর মুজুঙো জাগানত্ পড়ে।”
3হারোণে সিয়েনোই গুরিলো। মোশিরে দিয়্যে লগেপ্রভুর উগুম মজিম্ তে চেরাক্কুন্ এমনগুরি বোজেল যেনে বদঙ উগুরে সিগুনোর্ পহ্রানি মুজুঙোন্দি থায়। 4বদঙর গড়াত্তুন্ ধুরি আগাবোর্ ফুলুন সং বেক্কানি সনালোই পিদেইনে বানা ওইয়্যে। লগেপ্রভু মোশিরে যে নকশাগান্ দেগেয়্যে ঠিগ সেধোক্ক্যেন গুরি চেরাগ বদঙো বানা ওইয়্যে।
গোজেনর আওজে লেবীয়গুনোরে যুদো গরানা
5লগেপ্রভু মোশিরে কলঅ, 6তুই অন্য ইস্রায়েলীয়গুনো ভিদিরেত্তুন্ লেবীয়গুনোরে নিগিলেই নেযেইনে তারারে শুদ্ধো-সাংগ গর্। 7ইঙিরিনে তুই তারারে শুদ্ধো-সাংগ গুরিবে: তারা উগুরে শুদ্ধো-সাংগ গুরিবার্ পানিগান ছিদি দিবে। সে পরেদি তারার গোদা কিয়্যেগান ধোইনে কাবড়-চুগোরানি ধোইনে নিজোরে শুদ্ধো-সাংগ গুরিবাক্। 8পরেদি তারা এক্কো বলদ গোরু আর ইবে সমারে শোজ্য-উৎসর্বত্তে তেলর ময়ান দিয়্যে নিগুজ্ মোয়দে আনিবাক্। পাপ-উৎসর্বত্তে তত্তুন্ আর এক্কো বলদ গোরু আনা পুরিবো। 9ইয়েনর্ পরেদি তুই মিলন-তাম্বুলো মুজুঙোত্ লেবীয়গুনোরে আনিবে আর বেক্ ইস্রায়েলীয়গুনোরে সিয়েনত্ এগত্তর্ গুরিবে। 10লেবীয়গুনোরে তুই লগেপ্রভুর মুজুঙোত্ আনিবে আর ইস্রায়েলীয়গুনে তারা উগুরে আত্ রাগেবাক। 11হারোণে ইস্রায়েলীয়গুনো ভিদিরেত্তুন্ দোলন-উৎসর্ব ইজেবে লেবীয়গুনোরে লগেপ্রভুর মুজুঙোত্ আঝিল্ গুরিবো যেনে তারা লগেপ্রভুর কামত্ আঢ্ দি পারন্। 12পরেদি লেবীয়গুনে সেই দ্বিবে বলদ গোরু উগুরে আঢ্ রাগেবাক্ আর তুই সিয়োত্তুন্ এক্কো দিইনে লগেপ্রভুর নাঙে পাপ-উৎসর্ব আর অন্যবো দিইনে পুজ্যে-উৎসর্বর অনুষ্ঠান গুরিনে তারার্ পাপপানি ঢাগি দিবার বেবস্থা গুরিবে। 13লেবীয়গুনোরে তুই হারোণ আর তার্ পূঅগুনো মুজুঙোত্ থিয়্যেই রাগেবে আর লগেপ্রভু ইদু দোলন-উৎসর্ব ইজেবে তারারে উৎসর্ব গুরিবে। 14ইঙিরিনে তুই অন্য ইস্রায়েলীয়গুনোত্তুন্ লেবীয়গুনোরে ফারগ্ গুরি নিবে, আর সেক্কে তারা মর্ অবাক্।
15“ইঙিরিনে লেবীয়গুনোরে শুদ্ধো-সাংগ গুরি নেযেইনে দোলন-উৎসর্ব ইজেবে উৎসর্ব গুরিবার পরেদি তারা মিলন-তাম্বুলোত কাম্ গুরিবাত্তে এবাক্। 16বেক্ ইস্রায়েলীয়গুনো ভিদিরেত্তুন্ ইগুনোই পুরোপুরি মর্, আর কারর্ নয়। পত্তি ইস্রায়েলীয় মিলেমান্জ্যর্ পত্তম মরদ্ পূঅবোর্ বদলে মুই লেবীয়গুনোরে মর্ নিজোর্ গুরি নেযাঙর্। 17পত্তম জোর্মেয়ে এমন্ এক এক্কো ইস্রায়েলীয় মরদ পূঅ মর্-সিবে মান্জ্যর্ ওক্ বা য়েমানর্ ওক্। মিসরীয়গুনোর্ পত্তম মরদ পূঅবো মারে ফেলেবার্ সময়োত মুই ইস্রায়েলীয়গুনোর্ পত্তম মরদ পূঅবো মত্তে ফারগ্ গুরি রাগেয়োং। 18পত্তম জোর্মেয়ে সেই বেক্ ইস্রায়েলীয় পূঅগুনোর্ জাগানত্ মুই ইক্কুনি লেবীয়গুনোরে গুজি লোইয়োং। 19ইস্রায়েলীয়গুনো ভিদিরে এই লেবীয়গুনোরে মুই হারোণ আর তার্ পূঅগুনোরে দান গোজ্যং, যেনে তারা ইস্রায়েলীয়গুনোর্ ওইনে মিলন-তাম্বুলোত্ কাম্ গরন্ আর তারার্ পাপ্পানি ঢাগিবার্ বেবস্থা গরন্। সিয়েনত্যে ইস্রায়েলীয়গুনে পবিত্র তাম্বুলো ইদু গেলেয়ো তারা উগুরে কনঅ দজা লামি ন-এবঅ।”
20লগেপ্রভু লেবীয়গুনো পৌইদ্যেনে মোশিরে যেদক্কানি উগুম্ দিয়্যে মোশি, হারোণ আর অন্য বেক্ ইস্রায়েলীয়গুনে লেবীয়গুনোরে লোইনে সিয়েনোই গুরিলাক্। 21লেবীয়গুনে নিজোরে শুদ্ধো-সাংগ গুরিলাক আর কাবড়-চুগোর্ ধোই ফেলেলাক্। সে পরেদি হারোণে লগেপ্রভুর নাঙে দোলন-উৎসর্ব ইজেবে তারারে উৎসর্ব গুরিলো আর শুদ্ধো-সাংগ গুরিবাত্তে তারারে পাপ ঢাগি দিবার বেবস্থা গুরিলো। 22ইয়েনর্ পরেদি লেবীয়গুনে হারোণ আর তার্ পূঅগুনোর অধীনে মিলন-তাম্বুলোত তারার্ কামানি গুরিবাত্তে গেলাক্। লগেপ্রভু মোশিরে যেদক্কানি উগুম্ দিয়্যে তারা লেবীয়গুনোরে নেযেইনে ঠিগ্ সিয়েনোই গুরিলাক্।
23পরেদি লগেপ্রভু মোশিরে কলঅ, 24“লেবীয়গুনো পৌইদ্যেনে এ সুদোমান্ থেবঅ, তারা ভিদিরে পোঁজোশ্ বা তাত্তুন্ বেশ্ বয়জর্ মানুচ্চুনে মিলন-তাম্বুলোত কাম্ গুরিবাত্তে এবাক্, 25মাত্তর্ পঞ্চাশ বজর্ বয়জর্ পরেদি সে কামত্তুন্ তারা ঝিরেবাক; তারা আর কাম্ ন-গুরিবাক। 26সেক্কে এই মানুচ্চুনে মিলন-তাম্বুলোত্ তারার্ ভেইয়ুনো সমারে দেগাশুনোর্ কামত্ সাহায্য গুরি পারিবাক মাত্তর্ নিজেয়ো কনঅ কামত্ আত্ দিই ন-পারিবাক। এই সুদোম মজিম তুই লেবীয়গুনোর্ কামানি ঠিগ্ গুরি দিবে।”
Copyright © 2021 Bangladesh Bible Society