গণাণা 36
36
সলফাদর মিলেগুনোর্ সোম্বোত্তির ভাগ পানা
1যোষেফর বংশধরুনোর বংশত্তুন্ গিলিয়দর্ নানান্ বংশর নেতাগুনে এইনে মোশি আর ইস্রায়েলীয়গুনোর্ অন্য বংশর নেতাগুনো সমারে কধা কলাক্। গিলিয়দে অলঅ মাখীরোর্ পূঅ আর মনঃশির নাদিন্। 2তারা কলাক্, “ইস্রায়েলীয়গুনো ভিদিরে দেজর্ জাগা-জোমিগানি চাম্বা চেইনে ঠিগ্ গুরিবার্ উগুম্ দিবার্ অক্তত্ লগেপ্রভু আমা গিরোজ্সোরে কোইয়্যেদে আমার ভেই সলফাদর সোম্বোত্তিগানি যেনে তা ঝিগুনোরে দিয়্যে অয়। 3মাত্তর্ ইস্রায়েলীয়গুনোর অন্য গুট্টির মানজ্য সমারে যুনি এই মিলেগুনোর মেলা অয় সালে আমার পুরোণি মানুচ্চুনোর সোম্বোত্তিত্তুন্ তারার্ সোম্বোত্তিগানি নিগিলি যেইনে মিজেব তারার্ নেক্কুনো গুট্টির্ সোম্বোত্তিত্, আর সেক্কে আমা গুট্টির্ সোম্বোত্তির্ ভাগত্তুন্ কয়েক ভাগ যেবগোই। 4ইস্রায়েলীয়গুনোর ফিরি পেইয়্যে বজরত্ তারার্ সোম্বোত্তিগানি শেজন্দি যেইনে মিজেব তারার্ নেক্কুনো গুট্টির সোম্বোত্তিত। ইঙিরিনে আমার্ পুরোণি মানুচ্চুুনোর গুট্টির সোম্বোত্তিতুন্ তারার্ সোম্বোত্তিগানি নিগিলেনে নেযা অবঅ।”
5সেক্কে লগেপ্রভুর উগুম মজিম মোশি ইস্রায়েলীয়গুনোরে কলঅ, “যোষেফর পূঅগুনোর্ এই গুট্টির মানুচ্চুনে যিয়েন্ কোইয়োন্ সিয়েনোই ঠিগ্। 6সেনত্তে সলফাদর মিলেগুনো পৌইদ্যেনে লগেপ্রভু এই উগুমান দেত্তে, তারা পত্তিজনে যিবেরে খুজি তারে নেক্ ইজেবে লোই পারিবাক্, মাত্তর্ যিবেরে নেক্ ইজেবে লবঅ তাত্তুন্ তা বাবঅ গুট্টির মানুচ্ ওয়া পুরিবো। 7ইস্রায়েলীয়গুনোর্ সোম্বোত্তিগানি এক গুট্টিত্তুন্ অন্য গুট্টিত্ যেই ন-পারিবো। পত্তি ইস্রায়েলীয়ত্তুনোই তার্ পুরোণি মানুচ্চুনোত্তুন পেইয়্যে গুট্টির্ সোম্বোত্তিগানি ধুরি রাগা পুরিবো। 8ইস্রায়েলীয়গুনে পত্তিজনে যেনে পুরোণি মানুচ্চুনোত্তুন পেইয়্যে সোম্বোত্তিগানির্ গিরোজ্ রাগান্ সেনত্যে ইস্রায়েলীয় গুট্টির্ পত্তি মিলে-ওয়ারিশরে তার্ বাবঅ গুট্টির যে কনজনরে নেক্ ইজেবে লো পুরিবো। 9কনঅ সোম্বোত্তি এক গুট্টিত্তুন্ অন্য গুট্টিত্ যেই ন-পারিবো। ইস্রায়েলীয়গুনোর্ পত্তি গুট্টিত্তুনই তার্ পেইয়্যে সোম্বোত্তিগানি ধুরি রাগা পুরিবো।”
10-11সেক্কে মহলা, তির্সা, হগ্লা, মিল্কা আর নোয়া নাঙে সলফাদর মিলেগুনে মোশির মাধ্যমে লগেপ্রভুর উগুম মজিম কাম্ গুরিলাক। তারা তারার্ বাবঅ কুদুম্মো যিগুনে ভেই অন্ তারারে নেক্ বানেলাক। 12যোষেফর পূঅ মনঃশির বংশধরুনোর্ বংশ ভিদিরেই তারা নেক্ বানেলাক্। সেক্কে তারার্ সোম্বোত্তিগানি তারার্ বাব বংশ আর গুট্টি ভিদিরে রোই গেলঅ।
13যিরীহোর উই কিত্তেন্দি যর্দন গাঙর্ পারত্ মোয়াবর সংজাগানত্ লগেপ্রভু মোশির্ মাধ্যমে ইস্রায়েলীয়গুনোরে এই বেক্ উগুমানি আর সুদোমানি দিলো।
Copyright © 2021 Bangladesh Bible Society