গণাণা 34
34
কনান দেজর্ দুঝি
1-2লগেপ্রভু মোশিরে ইস্রায়েলীয়গুনোত্তে এই উগুমান্ দিইনে কলঅ, কনান দেজত্ সোমেবার্ পরেদি সোম্বোত্তি ইজেবে যে দেজ্চান তমারে দিয়্যে অবঅ তার্ দুঝিগান্ অবঅ এধোক্ক্যেন: 3-4ইদোম দেজর্ দুঝিবো সং যে সীন ধূল্যেচর-চাগালাগান আঘে সিয়েনর্ কিজু ভাগ তমার দেজর্ দোগিণেদি পুরিবো। পূগেন্দি তমার্ এই দোগিণো দুঝিগান ধূল্যেচর-বড়গাঙর্ শেজ্ ভাগত্তুন্ আরাম্ভ ওইনে অক্রব্বীম মুড়োবোর্ পথ পাড় ওইনে সীন ধূল্যেচর-চাগালাত্ চোমেইনে কাদেশ-বর্ণেয়র দোগিণোন্দি যেবগোই। পরেদি সেই চিহ্নোগান্ হৎসর-অদরত্ এইনে অস্মোন সং যেবঅ। 5সে পরেদি সিয়ান্ সিয়োত্তুন্ ঘুরিনে মিসর নাঙে যে শুগুনো গাঙান্ আঘে সিয়ান্ ধুরিনে ভূমধ্য সাগরত্ যেইনে শেজ্ অবঅ।
6তমা দেজর্ পোজিমেন্দি দুঝিবো অবঅ ভুমধ্য সাগরান। ইয়েনোই অবঅ তমার্ পোঝিমেন্দি শেজ্ দুঝিগান।
7-9উত্তোরেন্দি দুঝিবোত্তে তুমি ভূমধ্য সাগরত্তুন্ হোর মুড়োবো আর হোর মুড়োবোত্তুন্ হমাৎ সং এক্কো দুঝি ঠিগ্ গুরি নিবা। সিয়োত্তুন্ সেই দুঝির চিহ্নোগান্ সদাদ্ ওইনে সিফ্রোণ সং যেবগোই আর হৎসর-ঐননত্ যেইনে শেজ্ অবঅ। ইয়েনোই অবঅ তমার্ উত্তোরেদি শেজ্ দুঝিগান।
10পূগেন্দি দুঝিবোত্তে তুমি হৎসর-ঐননত্তুন্ শফাম সং এক্কো দুঝির্ চিহ্নো ঠিগ্ গুরি নিবা। 11এই দুঝির্ চিহ্নোগান্ শফামত্তুন্ ঐনর পূগেন্দি রিব্লা সং লামি যেবঅ আর কিন্নেরৎ সাগরর্ কামা জাগানি ধুরি যাহ্ ধুরিবাক্। 12সে পরেদি এই দুঝির চিহ্নোগান্ যর্দন গাঙান্ ধুরি ধূল্যেচর-সাগরত্ যেইনে শেজ্ অবঅ।
“চেরোকিত্তে এ বেক্ দুঝিগান ভিদিরে ইয়েনোই অবঅ তমার্ দেশ।”
13ইয়েনর্ পরেদি মোশি ইস্রায়েলীয়গুনোরে উগুম গুরিনে কলঅ, “তুমি চাম্বা চেইনে লগেপ্রভুর উগুম মজিম দেজ্চান তমার নয় গুট্টি আর মনঃশির অদ্দেক্ গুট্টি ভিদিরে ভাগ গুরি নেযেইনে তমার্ সোম্বোত্তি গুরি নেযেবা, 14কিত্যে রূবেণ-গুট্টি, গাদ-গুট্টি আর মনঃশির্ অদ্দেক্ গুট্টির বংশগুনে তারার্ সোম্বোত্তি আগে আগে পেইয়োন। 15পদথ্ যিরীহোর্ অন্যকিত্তেন্দি যর্দনর পূগ পারত্ তারা সেই সোম্বোত্তিগানি পেইয়োন।”
16লগেপ্রভু মোশিরে কলঅ, 17“যিগুনে সোম্বোত্তি ইজেবে দেজ্চান তমারে ভাগ গুরি দিবাক তারা অলাক ধর্মগুরু ইলিয়াসর আর নূনোর পুঅ যিহোশূয়। 18সোম্বোত্তি ভাগ গুরিবার্ কামত্ সাহায্য গুরিবাত্তে পত্তি গুট্টিত্তুন্ এক্কো গুরি নেতা নেযা পুরিবো। 19সেই নেতাগুন অলাক যিহূদা-গুট্টির যিফূন্নির পূঅ কালেব; 20শিমিয়োন-গুট্টির অম্বীহূদর্ পূঅ শমূয়েল; 21বিন্যামীন-গুট্টির কিশ্লোনর্ পূঅ ইলীদদ; 22দান-গুট্টির নেতা যগ্লির পূঅ বুক্কি; 23যোষেফর পূঅ মনঃশি-গুট্টির্ নেতা এফোদর্ পূঅ হন্নীয়েল; 24যোষেফর পূঅ ইফ্রয়িম-গুট্টির নেতা শিপ্তনর পূঅ কমূয়েল; 25সবূলূন-গুট্টির নেতা পর্ণকর পূঅ ইলীষাফণ; 26ইষাখর-গুট্টির নেতা অস্সনর পূঅ পল্টিয়েল; 27আশের-গুট্টির্ নেতা শলোমির পূঅ অহীহূদ; 28নপ্তালি-গুট্টির্ নেতা অম্মীহূদোর্ পূঅ পদহেল।”
29কনান দেজত্ ইস্রায়েলীয়গুনোরে সোম্বোত্তি ইজেবে জাগানি ভাগ গুরি দিবাত্তে লগেপ্রভু এই বেক্ মানুচ্চুনোরে নেযেয়ে।
Copyright © 2021 Bangladesh Bible Society