গণাণা 10
10
রূবোর্ বাঁশি
1লগেপ্রভু মোশিরে কলঅ, 2তুই রূবো পিদেইনে দ্বিবে বাঁশি বানেই লঅ। ইস্রায়েলীয়গুনোরে ডাগিনে এগত্তর্ গুরিবাত্তে আর নানান্ দলর্ যাত্রা গরানা আরাম্ভ গুরিবাত্তে তুই সিবে বাজেইবে। 3যেক্কে দ্বিবে বাঁশি বাজা অবঅ সেক্কে ইস্রায়েলীয়গুনে বেক্কুনে মিলন-তাম্বুলোর্ দোরান কুরে তঅ মুজুঙোত্ এইনে এগত্তর্ অবাক্। 4যেক্কে এক্কো বাঁশি বাজা অবঅ সেক্কে ইস্রায়েলর্ নানান্ বংশর নেতাগুনে তমা মুজুঙোত্ এইনে এগত্তর্ অবাক। 5বাঁশিবো যেক্কে পত্তমবার্ বাজা অবঅ সেক্কে যে দলুনে পুগেদি তাম্বুলান্ ফেলেইনে আগন্ তারা আঢা মারিবাক্। 6দ্বিবারত্ বাঁশিবো বাজেইলে দোগিণেদি দলুনে আঢা মারিবাক্। ইবে অলঅ নিগিলি যেবার্ এক্কো রঅ। 7মানুচ্চুনোরে একসমারে এগত্তর্ গুরিবাত্তে অলে তুই দ্বিবে বাঁশি বাজেইবে মাত্তর্ তার্ রঅবো অবঅ আরেক্ বাবোত্যে।
8“এই বাঁশিবো বাজেবাক্ হারোণর্ পূঅগুনে, অত্তাৎ ধর্মগুরুগুনে। ইবে অবঅ তমার্ আর তমার বংশধরুনোত্তে এক্কো থিদেবর্ গোজ্যে সুদোম। 9নিজোর দেজত্ থাগদে যেক্কে তুমি কনঅ অত্যেচার্ গুরিয়্যে শত্রুর বিরুদ্ধে যুদ্ধো গুরিবাত্তে যেবা সেক্কে দ্বিবে বাঁশি বাজেইনে সার্ দিবে। তমা গোজেন লগেপ্রভু সেক্কে তমা কধানি চিন্তে গুরিনে শত্রুগুনোর আঢত্তুন্ তমারে উদ্ধোর্ গুরিবো। 10তমার রঙ্গ-ফুত্তির্ সময়োত, তমাত্তে ঠিগ গোজ্যে নানান্ পরবর্ সময়োত্ আর মাসর্ পৌইল্যেন্দি যেক্কে তুমি পুজ্যে-উৎসর্বর আর উদোলোলি-উৎসর্বর অনুষ্ঠান গুরিবা সেক্কে তুমি বাঁশি বাজেবা। সিবেলোই তমার্ গোজেনর্ মুজুঙোত্ তমারে তুলি ধরা অবঅ। মুই লগেপ্রভু তমার গোজেন।”
ইস্রায়েলীয়গুনোর যাত্রা গরানা
11দ্বিবজরত্ দ্বিমাজর্ কুড়ি দিনোর দিন্নোত্ সাক্ষ্য-তাম্বুল উগুরেত্তুন্ মেঘ্কান কাদেই গেলঅ। 12সেক্কে ইস্রায়েলীয়গুনে সিনাই ধূল্যেচর চাগালাগান ফেলেইনে নিগিলি গেলাক্। সেই মেঘ্কান পারণ ধূল্যেচর চাগালাত্ এইনে সোজা ওইনে ন-থিয়্যেনা সং তারা যাহ্ ধুরিলাক। 13মোশির মাধ্যমে লগেপ্রভুর্ দিয়্যে উগুম্ মজিম তারা এ পত্তম্বার ধোক্ক্যেন যাত্রা পদথ্ টেং বাড়েলাক্।
14পৌইল্যান্দি যাহ্ ধুরিলাক যিহূদা-ভাগর নানান্ বাবোত্তে দলুন্ তারার বড় চাগালার্ বাবতাগানর্ তলে। যিহূদা-গুট্টির নেতা এলঅ অম্মীনাদবর পূঅ নহশোনে। 15ইষাখর-গুট্টির মানুচ্চুনোর ভারান্ এলঅ সূয়ারর পূঅ নথনেল উগুরে, 16আর সবূলূন-গুট্টির মানুচ্চুনোর ভারান্ এলঅ হেলোনর পূঅ ইলীয়াবর উগুরে। 17সে পরেদি থেবার-তাম্বুলান খুলি ফেলা অলঅ আর গের্শোনীয় আর মরারীয়গুনে সিবে বুয়োই নেযা ধুরিলাক্।
18ইগুনোর্ পরেদি যাহ্ ধুরিলাক রূবেণ-ভাগর নানান্ বাবোত্যে দলুন তারার বড় চাড়ালার্ বাবতাগানির্ তলে। রূবেণ-গুট্টির নেতা এলঅ শদেয়ূরোর পূঅ ইলীষূর। 19শিমিয়োন-গুট্টির মানুচ্চুনোর ভারান্ এলঅ সূরীশদ্দয়র পূঅ শলুমীয়েলর উগুরে, 20আর গাদ-গুট্টির মানুচ্চুনোর ভারান্ এলঅ দ্যূয়েলর পূঅ ইলীয়াসফর উগুরে। 21ইগুনোর পরেদি থেবার-তাম্বুলোর পবিত্র পজা-পিরানি নেযেনে কহাতীয়োগুনে যাহ্ ধুরিলাক। কহাতীয়গুনে লুমিবার আগেন্দি থেবার-তাম্বুলান যুক্কোল্ অবার কধা এলঅ।
22ইগুনোর পরেদি যাহ্ ধুরিলাক ইফ্রয়িম-ভাগর নানান্ দলুনে তারার বড় চাগালার্ বাবতাগানর্ তলে। ইফ্রয়িম-গুট্টির নেতা এলঅ অম্মীহূদোর্ পূঅ ইলীশামা। 23মনঃশি-গুট্টির মানুচ্চুনোর ভারান্ এলঅ পদাহসূরোর পূঅ গমলীয়েলর উগুরে, 24আর বিন্যামীন-গুট্টির মানুচ্চুনোর ভারান্ এলঅ গিদিয়োনির পূঅ অবীদানর উগুরে।
25বেক্কুনে যেরেন্দি যাহ্ ধুরিলাক দান-ভাগর নানান্ দলুন তারার্ বড় চাগালার্ বাবতাগানর্ তলে। ইগুনে রোক্ষ্যেগুরিয়ে দল ইজেবে বেক্ দলুনোর পিজেন্দি গেলাক্। দান-গুট্টির নেতা এলঅ অম্মীশদ্দয়র পূঅ অহীয়েষর। 26আশের-গুট্টির মানুচ্চুনোর ভারান্ এলঅ অক্রণর পূঅ পগীয়েলর উগুরে, 27আর নপ্তালি-গুট্টির মানুচ্চুনোর ভারান্ এলঅ ঐননর পূঅ অহীরয়র্ উগুরে। 28ইস্রায়েলীয় নানান্ দলুন ইঙিরিনে একদাগির পরেদি আরেকদাগি আদা মারিনে যেইয়োন।
29ইয়েনর পরেদি মোশি তাঁর শুয়োর্বো মিদিয়োনীয় রূয়েলর পূঅ হোববকররে কলদে, “লগেপ্রভু যে দেজ্চান্ আমারে দিবো বিলি শমক্ গোজ্যে আমি সেই দেজ্চানন্দি যাহ্ ধুরির্। তুমি আমা লগে এজঅ। আমি তমার ভালেদি চেই, কিত্যে লগেপ্রভু ইস্রায়েলীয়গুনোরে বোউত্ ভালেদি গুরিবো বিলি শমক্ গোজ্যে।” (গর্বা মাদানা)
30জোবত্ হোববে কলঅ, “না, মুই ন-যেম্। মুই মর্ নিজোর্ দেজত্ নিজোর্ মানুচ্চুনো ইদু ফিরি যাঙর।”
31মাত্তর্ মোশি কলঅ, “না, না, তুমি আমারে ছাড়িনে ফেলে ন-যেইয়ো। তুমি হবর্ পঅ ধূল্যেচর চাগালা ভিদিরে কুদু আমাত্তুন্ তাম্বুলান্ ফেলানা উজিত, সেনত্তে তুমি অবা আমার্ চোগ্কুন। (জামেই-শুয়োর ইজেবে গর্বা মাদানা) 32তুমি যুনি আমা লগে এজঅ সালে লগেপ্রভু আমাত্তে যে ভালেদি গুরিবো বিলি এগেম্ গোজ্যে তার্ ভাগ আমি তমারেয়ো দিবোং।”
33ইঙিরিনে ইস্রায়েলীয়গুনে লগেপ্রভুর মুড়োবো ইত্তুন্ আদা মারিনে তিন দিনোর পদথ্ উজেই গেলাক্। তারা ঝিরেবাত্তে এক্কান্ জাগা তোগেইনে নিগিলেবার্ আজাই সেই তিন দিন সং লগেপ্রভুর বেবস্থা-সুন্দুক্কো তারার্ আগে আগে যাহ্ ধুরিলো। 34তাম্বুলান তুলিনে আদা মারিবার্ পরেদি দিনো লক্কে লগেপ্রভুর মেঘ্কান ইস্রায়েলীয়গুনো উগুরে থেদঅ।
35যেক্কে সাক্ষ্য-সুন্দুক্কো যাহ্ ধুরিদো সেক্কে মোশি কদঅ, “ও লগেপ্রভু, উঠ্। তর্ শত্রুগুনে বেক্কুন ছিদি পোত্তোক্ আর যিগুনে তরে ঘিনাইদে চোগেন্দি দেগন্ তারা তর্ মুজুঙোত্তুন্ ধেই যাদোক।”
36যেক্কে সিবে থামেদ সেক্কে তে কদঅ, ও লগেপ্রভু, গুণি নপুড়েইয়্যে ইস্রায়েলীয়গুনো ইদু তুই ফিরি আয়্।
Copyright © 2021 Bangladesh Bible Society