মথি 23
23
ধর্ম-নেতাগুনো বিরুদ্ধে প্রভু যীশুর কধা
(মার্ক ১২:৩৮-৪০; লূক ১১:৩৭-৫২; ২০:৪৫-৪৭)
1পরেদি যীশু মানুচ্চুনো ইধু আর তা শিচ্চ্যগুনো ইধু কলঅ, 2রীতি-সুদোম শিক্ষ্যে দেনা পৌইদ্যেনে ধর্ম-মাষ্টরুনে আর ফরীশীগুনে মোশি জাগানত্ আগন্। 3ইয়েনত্তে তারা যিয়েনি গুরিবাত্তে কন্ সিয়েনি গরঅ আর যিয়েনি পালেবাত্তে উগুম্ দুয়োন্ সিয়েনি পালঅ। 4তারা গুয়োর্ গুয়োর্ বুধি বানিনে মান্জ্য কানা উগুরে চাপি দুয়োন্, মাত্তর্ সিগুন সোরেবাত্তে নিজে এক্কো আঙুল্অ লাড়েবাত্তে ন-চান্। 5মানুচ্চুনোরে দেগেবাত্তে তারা বেক্ কামানি গরন্। পবিত্র বোইবোর্ পদ-লেগা তাবিজ্ তারা দাঙর্ গুরিনে বানান্ আর নিজোরে ধার্মিক দেগেবাত্তে কাবড় কোণাত্ লাম্বা জুদো লাগান্। 6হেবার্ অক্তত্ সর্মান জাগাত্ আর সমাজ-ঘরত্ আজল্ আজল্ জাগানিত্ তারা বুজিবাত্তে গম্ পান। 7তারা আদে-বাজারে সর্মান তগান্ আর চান্ যেনে মানুচ্চুনে তারারে মুরুব্বী বিলি ডাগন্।
8কেঅ তমারে মুরুব্বী বিলি ডাগোক্ সিয়েন্ ন-চেয়ো, কিয়া তমার্ মুরুব্বী কধে বানা একজন আঘে, আর তুমি বেক্কুনে ভেই ভেই। 9এই পিত্থিমীত্ কাররে বাবা বিলি ন-ডাক্ক্য, কিয়া তমার্ এক্কো গুরি বাপ্ আর তে স্বর্গত্ আঘে। 10কেঅ তমারে নেতা বিলি ডাগোক্ সিয়েন্ ন-চেয়ো, কিয়া তমার নেতা কদে বানা এক্কো আঘে, তে মশীহ্। 11তমা ভিদিরে যে বেগত্তুন্ দাঙর্ তে তমার্ সেবাগুরিয়্যে ওক্। 12যে কেঅ নিজোরে অজল্ গরে তারে বাদি গরা অবঅ আর যে কেঅ বাদি গরে তারে অজল্ গরা অবঅ।
13ধর্ম-মাষ্টর আর ফরীশীগুন, তমাত্যে কত্তমান দর্গরেপারা! তুমি ফক্কর্! তুমি মানুচ্চুনো মুজুঙোত্ স্বর্গ-রেজ্যর্ দোরান্ নাঢি রাগঅ। মাত্তর্ তুমি নিজেয়ো ন-সমঅ আর যিগুনে সুমিবাত্তে চেরেস্টা গত্তন্ তারারেয়ো সুমিবাত্তে ন-দুয়ো।
14ফক্কর্ ধর্ম-মাষ্টর আর ফরীশীগুন, অভিশাব্ পোড়োক্ তমার্! এক কিত্তেদি তুমি মানুচ্চুনোরে দেগেবাত্তে লাম্বা লাম্বা গুরি তবনা গরঅ, অন্য কিত্তেদি রানি মিলেগুনোর্ সোম্বোত্তিগানি গজক্ গরঅ। ইয়েনত্তে তমার্ বোউত্ বেশ্ সাজা অবঅ।
15ভণ্ড ধর্ম-মাষ্টর আর ফরীশীগুন, অভিশাব্ পোড়োক্ তমার্! বানা এক্কো মান্জ্যরে তমা ধর্ম-মজিম্ আনিবাত্তে তুমি দুনিয়ের্ কুদু ন-যঅ। আর তে যেক্কে তমা ধর্ম-মজিম্ এজে সেক্কে তুমি নিজোত্তুন্ তারে বোউত্ বেশ্ গুরি নরগত্ যগাজ্যে গরঅ।
16অভিশাব্ পোড়োক্ তমার্! তুমি নিজে কান্ অদচ অন্যগুনোরে পথ্ দেগঅ। তুমি কোই থাগঅ, উবোসনা-ঘর নাঙে কেঅ শমক্ হেলে সেক্কে কিচ্চু ন-অয়, মাত্তর্ যুনি কেঅ উবোসনা-ঘরর্ সনাগান নাঙে শমক্ হান্ সালে তে সেই শমক্কান্দোই বানা পড়ে। 17মূর্খ আর কানা দল, কুবোন্ দাঙর্? সনা, নাহি সেই উবোসনা-ঘর্ যিয়েন সেই সনাগানরে গোজেনত্তে যুদো গুরি রাগায়? 18তুমি আরঅ এই কধাগান্ কোই থাগঅ, পূজো নাঙে কেঅ শমক্ হেলে কিচ্চু ন-অয়, মাত্তর্ যুনি কেঅ সেই পূজোবো উগুরে যে দান্ আঘে সিয়েন নাঙে শমক্ গরে তে সেই শমথ্তান্দোই বানা পড়ে। 19কানার্ দল, কুবোন্ দাঙর্? সেই দানুন্, নাহি সেই পূজোবো যিবে সেই দানুনোরে গোজেনত্তে যুদো গুরি রাগায়? 20ইয়েনত্তে পূজোবো নাঙে যে শমক্ খায় তে সেই পূজো আর সিবে উগুরে বেক্কানি নাঙে শমক্ খায়। 21আর উবোসনা-ঘর নাঙে যে শমক্ খায় তে উবোসনা-ঘর আর সিয়েন ভিদিরে যে থায় তা নাঙে শমক্ খায়। 22যে স্বর্গর্ নাঙে শমক্ খায় তে গোজেন সিংহাসন আর যিবে তা উগুরে বুয়োই আঘে তা নাঙে শমক্ খায়। 23ফক্কর্ ধর্ম-মাষ্টর আর ফরীশীগুন, তমাত্যে কত্তমান্ দর্গরেপারা! তুমি পুদিনা, মৌরি আর জিরের্ দশ ভাগর্ এক ভাগ্ গোজেনরে ঠিগ্ মজিম দি থাগঅ; মাত্তর্ ন্যায়, দোয়্যে আর বিশ্বেজ্, যিয়েনি মোশির রীতি সুদোমর্ আরঅ দরকারী বিষয় সিয়েনি তুমি বাদ্ দুয়ো। আগ ইয়েনি পালানা লগে লগে যেরেদি ইয়ানিয়ো পালানা তমার্ উচিত। 24তুমি নিজে কান্ অদচ অন্যগুনোরে পথ্ দেগঅ। এক্কো চিগোন্ মাছিয়ো তুমি ছাগি লঅ অদচ উট গিলি ফেলঅ।
25ফক্কর্ ধর্ম-মাষ্টর আর ফরীশীগুন, তমাত্যে কত্তমান্ দর্গরেপারা! তুমি থাল্-কদরার্ বারেদিগান্ তেল্তেল্যে গুরি রাগঅ, মাত্তর্ সিগুন জুলুমোর্ জিনিস আর লুভে ভরা। 26কানা ফরীশীগুন, আগে সিগুনোর্ ভিদিরেদিগান্ সাব্ গরঅ, সেক্কে সিয়েনর্ বারেদিগান্অ সাব্ অবঅ। 27ফক্কর্ ধর্ম-মাষ্টর্ আর ফরীশীগুন, তমাত্যে কত্তমান্ দর্গরেপারা! তুমি চিবিদিলোই বানেয়্যে গৌর ধোক্ক্যেন্, যিয়েনর বারেদিগান্ দোল্ মাত্তর্ ভিদিরেদিগান্ মরা মান্জ্য আড়্-গোড়া আর নানান্ বাবোত্যে কজরালোই ভোজ্যে। 28ঠিগ্ সেবাবোত্যেগুরি, বারেদি তুমি মানুচ্চুনো চোগোত্ ধার্মিক মাত্তর্ ভিদিরে ফক্করামী আর পাপে ভরা।
29তমাত্যে কত্তমান্ দর্গরেপারা! তুমি ভাববাদীগুনোর গৌরুন্ নূয়ো গুরি বানঅ আর গোজেন ভক্ত মানুচ্চুনোর গৌরানি সাজঅ। 30তুমি কঅ, আমি যুনি আমা পূরোণি মানুচ্চুনোর অক্তত্ বাঁজি থেদং সালে ভাববাদীগুনোরে খুন্ গুরিবাত্তে তারা লগে ন-মিজেদং। 31ইয়েন্দোই তুমি নিজোর বিরুদ্ধে ইয়েন সাক্ষ্য দোত্তে যে, যিগুনে ভাববাদীগুনোরে খুন গোজ্যন্ তুমি তারই বংশধর। 32সালে তমা পূরোণি মানুচ্চুনে যিয়েনি আরাম্ভ গুরি যেইয়োন্ সিয়েনর্ বাদ্বাগি ভাগ্কান তুমি শেজ্ গরঅ।
33সাপ দল আর সাপর বংশগুন! কেধোক্ক্যেন্ গুরি তুমি নরগর্ সাজাত্তুন্ রোক্ষ্যে পেবা? 34সেনত্যে মুই তমারে কঙর্, মুই তমা ইধু ভাববাদী, জ্ঞানী মানুচ্ আর ধর্ম-মাষ্টরুনোরে পাদাঙর্। তুমি তারাত্তুন্ কয়েকজনরে খুন্ গুরিবা আর কয়েকজনরে ক্রুশোত্ দিবা। কয়েকজনরে তমা সমাজ-ঘরত্ চাবুক্ মারিবা আর এক আদামত্তুন্ অন্য আদামত্ লোড়েইনে বেড়েবা। 35সেনত্তে নিদ্দুজি হেবল খুনোত্তুন্ ধুরি আরাম্ভ গুরিনে তুমি যে বরখিয়র্ পুয়ো সখরিয়রে পবিত্র জাগা আর পূজোবো সংমোধ্যে খুন্ গোজ্য, সেই সখরিয়র খুন্ সং পিত্থিমীত্ যিদুক্কুন্ নিদ্দুজি মানুচ্ খুন্ ওইয়োন্ তুমি সেই বেক্ লো-গানির্ দায়ী অবা। 36মুই তমারে ঘেচ্চেকগুরি কঙর্, এই কাল মানুচ্চুনেই সেই বেক্ লো-গানির্ দায়ী অবাক্।
যিরূশালেমত্তে দুখ্ ফগদাং গরানা
(লূক ১৩:৩৪,৩৫)
37“যিরূশালেম! হায় যিরূশালেম! তুই ভাববাদীগুনোরে খুন্ গুরি থাচ্ আর তমা ইধু যিগুনোরে গোজেনর্ হবর্ কোইয়্যে দিপাদা অয় তারারে পাত্তর্ মারি থাচ্। কুরো শর্মা যেবাবোত্যেগুরি ছগুনোরে তা ডুয়োনিলোই এগত্তর্ গরে সেবাবোত্যেগুরি মুই তঅ মানুচ্চুনোরে কয়বার্ মইধু এগত্তর্ গুরিবাত্তে চেইয়োং, মাত্তর্ তুমি রাজী ন-অ। 38তমা ঘরানি তমা মুজুঙোত্ এনেবাদে পড়ি থেবঅ। 39ইক্কেত্তুন্ ধুরি, মুই তমারে কঙর্, যেদকদিন সং তুমি ন-কবা, ‘যিবে প্রভুর নাঙে এজের্ তার বাঈনী ওক্,’ সেদক্ বিলোন্ সং তুমি আর মরে ন-দেগিবা।”
Currently Selected:
মথি 23: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
