লূক 6
6
জিরেবার্ দিনো পৌইদ্যেনে শিক্ষ্যে
(মথি ১২:১-৮; মার্ক ২:২৩-২৮)
1কনঅ এক জিরেবার্ দিনোত্ যীশু শোজ্যখেদ ভিদিরেদি যার্। তা শিচ্চ্যগুনে শীজেগুন্ ছিনি ছিনি আঢত্ ঘুজি ঘুজি হা ধুরিলাক্। 2সেক্কে কয়েক্কো ফরীশী পুযোর্ গুরিলাক্, “ধর্মর্ সুদোম্ মজিম্ জিরেবার্ দিনোত্ যিয়েন গরানা উচিত নয়, তুমি সিয়েন গরর্ কিত্তে?”
3যীশু তারারে কলঅ, “দায়ূদ আহ্ তা সমাজ্যেগুনোর্ যেক্কে পেট্ পুড়ের্ সেক্কে তে কি গোজ্যে সিয়েন কি কনদিনঅ তুমি ন-পড়অ? 4তে দঅ গোজেন ঘরত্ গেলঅ আর গোজেনরে দিয়্যে রুটিগান লোইনে হেলঅ, আর তা মানুচ্চুনোরেয়ো দি দিলো। মাত্তর্ বানা ধর্মগুরুগুনে বাদে আর কারর্ সিয়েনি হানা আইন বিরুদ্ধে।”
5বেগ যেরেদি যীশু সেই ফরীশীগুনোরে কলঅ, “মান্জ্য পুয়োবো জিরেবার্ দিন্নোর্ গিরোজ্।”
শুগুনো-আঢ্বলা মানুচ্চো গম্ অলঅ
(মথি ১২:৯-১৪; মার্ক ৩:১-৬)
6আর এক জিরেবার্ দিনোত্ যীশু সমাজ-ঘরত্ যেইনে শিক্ষ্যে দের্। সিয়েনত্ এমন এক্কো মানুচ্ এলঅ যিবের্ ডেন্ আঢ্তান্ অবস্ এলঅ। 7ধর্ম-মাষ্টরুনে আর ফরীশীগুনে যীশুরে দুষ্ দিবাত্তে এক্কান্ সুযোগ তগাদন্। সেনত্তে জিরেবার্ দিনোত্ তে কাররে গম্ গরে না হি সিয়েন্ চেবাত্তে তারা তা উগুরে গমেডালে খিয়েল্ গরা ধুরিলাক্। 8মাত্তর্ যীশু তারার্ মন কধানি হবর্ পেদঅ। সেনত্তে যিবে আঢ্তান শুগেই যেইয়্যে তে সে মানুচ্চোরে কলঅ, “উদিনে বেক্কুনো মুজুঙোত্ এইনে থিয়্যে।” সেক্কে তে উদিনে থিয়্যেল।
9সে পরেদি যীশু তারারে কলঅ, “মুই তমারে পুযোর্ গরং, জিরেবার্ দিনোত্ কিজু গরানা আমা আইনে কি কয়? সাহায্য গরানা না হি ক্ষতি গরানা? কারর্ জিংকানিগান্ রোক্ষ্যে গরানা উচিত, না ভস্ত গরানা উচিত্?”
10সে পরেদি যীশু চেরোকিত্তে বেক্কুনো ইন্দি রিনি চেইনে মানুচ্চোরে কলঅ, “তঅ আঢ্তান বাবেই দে।” তে সিয়েন্ গুরিলো আর তা আঢ্তান এক্কুবারে গম্ ওই গেলঅ।
11সেক্কে তারা অমকদ রাগ্ গুরিলাক্ আর যীশুরে নিইনে কি গরা যায় সিয়েন্ নিজো ভিদিরে কুয়ো-কি গরা ধুরিলাক্।
বারজন শিচ্চ্যরে প্রচারক পদ দেনা
(মথি ৪:২৩-২৫; ১০:১-১১; মার্ক ৩:১৩-১৯)
12ইয়েনর্ পরেদি যীশু তবনা গুরিবাত্তে এক্কো মুড়োত্ গেলঅ আর গোদা রেত্তো গোজেন ইধু তবনা গুরিনে কাদেল। 13বেন্যে পহ্র অলে তে তার্ শিচ্চ্যগুনোরে নিজো কায়কুরে ডাগিলো আর তারাত্তুন্ বারজনরে বেঈ লোইনে তারারে প্রচারক-পদ দিলো। 14তারা অলাক্ শিমোন, যিবেরে তে পিতর নাঙান্অ দিলো; শিমোন ভেই আন্দ্রিয়; যাকোব আর যোহন; ফিলিপ আর বর্থলময়; 15মথি আর থোমা; আল্ফেয়র পুয়ো যাকোব; শিমোন, যিবেরে এক্বুচ্চ্যে কুয়ো অয় ; 16যাকোবর্ পুয়ো যিহূদা আর যিহূদা ইস্করিয়োৎ, যে বিশ্বেজ্ ভাঙ্যে।
17যীশু তা শিচ্চ্যগুন্ সমারে লোইনে মুড়োত্তুন্ লামিনে এক্কান্ সং জাগাত্ যেইনে থিয়্যেল। সিয়েনত্ তার ভালোক্কুন্ শিচ্চ্য এগত্তর্ ওইয়োন্। ইগুন বাদেয়ো যিহূদিয়াত্তুন্, যিরূশালেমত্তুন্ আর সোর আহ্ সীদোন নাঙে সাগর পারর্ দ্বিয়েন্ শঅর চাগালাত্তুন্অ বোউত্ মানুচ্ সিয়েনত্ এলাক্। 18তারা তা কধানি শুনিবাত্তে আর পীড়েত্তুন্ গম্ অবাত্তে সিয়েনত্ এচ্চ্যন্। যিগুনে বজং আত্মালোই দুঘ্ পাদন্ তারা গম্ অদন্। 19সেক্কে বেক্ মানুচ্চুনে যীশু কিয়্যেগানত্ বাঁজিবার্ চেষ্টা গরা ধুরিলাক্, কিত্যে তা ভিদিরেত্তুন্ খেমতা নিগিলিনে বেক্কুনোরে গম্ গুরিলো ।
প্রভু যীশুর উপদেজ্
(মথি ৫:১-১২,৩৮-৪৮; ৭:১-৬,১৫-২০,২৪-২৯; ১২:৩৩-৩৭)
20যেরেদি যীশু শিচ্চ্যগুনো ইন্দি রিনি চেইনে কুয়ো ধুরিলো,
নাঢা মানুচ্চুন্, তুমি বর্পেইয়্যে,
কিয়া গোজেন রেজ্যগান্ তমার্।
21বর্পেইয়্যে তুমি, যিগুনোর্ ইক্কিনে পেট্ পুরের্,
কিয়া তমার্ ঈল্ অবঅ।
যিগুনে ইক্কিনে কানদন্, তুমি বর্পেইয়্যে,
কারন তুমি আজিবা।
22বর্পেইয়্যে তুমি, যেক্কে যীশুর কারনে মান্জ্যে তমারে ঈচ্ গরন্, সমাজত্তুন্ নিগিলেই দুয়োন্ আর নিন্দে গরন্ আহ্ তমা নাঙান্ শুনিলে সেফ্ ফেলেবাক্। 23সে সময়োত্ তুমি হুজি ওইয়ো আর হুজিয়ে নাজি উদো, কিয়া স্বর্গত্ তমাত্তে দাঙর্ বক্শিজ্ আঘে। সেই বেক্ মানুচ্চুনোর পূরোণি মানুচ্চুনে ভাববাদীগুনো উগুরে এবাবোত্যে গুরিদাক্।
24মাত্তর্ অভিশাব্ পোড়োক্ তাগোয়্যে মানুচ্চুনোর্!
তুমি পুরোপুরি সুগ্ ভুগ্ গরর্।
25অভিশাব্ পোড়োক্ ঈল্ ওইয়্যে মানুচ্চুনোর্!
তমার্ দঅ পেট্ পুড়িবো।
অভিশাব্ পোড়োক্ যিগুনে আজর্!
তুমি দুঘ্ পেবা আর কানিবা।
26অভিশাব্ পোড়োক্ তমার্, যেক্কে বেক্ মানুচ্চুনে
তমারে বাঈনী গরন্।
এই বেক্ মানুচ্চুনোর পুরোণি মানুচ্চুনে
ফক্কর্ ভাববাদীগুনোরেয়ো বাঈনী গুরিদাক্।
27তুমি যিগুনে শুনোর্ তারারে মুই কঙর্, তমা শত্রুগুনোরে কোচ্পেয়ো। যিগুনে তমারে ঈচ্ গরন তারার্ ভালেদি চেইয়ো। 28যিগুনে তমার্ ভালেদি চান্ তারার্ ভালেদি চেয়ো। যিগুনে তমা লগে বজং বেবহার গরন্ তারাত্তে তবনা গরঅ। 29যে তর্ এক গালত্ চুয়োড়্ মারে তারে অন্য গালানত্অ মারিবাত্তে দিস্। যে তর্ কাবরান নিবাত্যে চায় তারে সিলুম্মোয়ো নিবাত্যে দিস্। 30যিগুনে তত্তুন্ চান্ তারারে দিস্। কনজনে তর্ কনঅ জিনিস নেযেলে সিয়েন আর ফেরৎ ন-চেজ্। 31মান্জ্যত্তুন্ তুমি যেবাবোত্যে বেবহার পেবাত্তে চঅ তুমিয়ো তারা সমারে সেবাবোত্যে বেবহার গরঅ।
32যিগুনে তমারে কোচ্পান তুমি যুনি বানা তারারে কোচ্পঅ সালে সিয়েনত্ বাঈনী গুরিবার্ কি আঘে? ভান্ন্যেই মানুচ্চুনেয়ো দঅ এবাবোত্যেগুরি কোচ্পেই থান্। 33যিগুনে তমারে ভালেদি গরন্ তুমি যুনি তারারে ভালেদি গুরি থাগ সালে সিয়েনত্ বাঈনী গুরিবার্ কি আঘে? বজং মানুচ্চুনেয়ো দঅ সিয়েন্ গুরি থান্। 34যিগুনোত্তুন্ তুমি ফিরি পেবার্ আজা গরঅ, যুনি তারারে দীনার্ উদোর্ দুয়ো সালে সিয়েনত্ বাঈনী গুরিবার্ কি আঘে? পেবঅ বিলিনে দঅ বজং মানুচ্চুনে বজং মান্জ্যরে উদোর্ দি থান্। 35মাত্তর্ তুমি তমা শত্রুগুনোরে কোচ্পেয়ো আর তারারে মংগল্ গরঅ। কিজু ফেরৎ পেবার্ আজা ন-রাগেনে উদোর্ দুয়ো। সালে তমাত্তে দাঙর্ বক্শিজ্ আঘে, আর তুমি দাঙর্ গোজেনর্ পুয়ো অবা, কারন তে অকৃতজ্ঞ আর পাজিগুনোরেয়ো দোয়্যে গরে। 36তমা বাপ্পো যেবাবোত্যে দোয়্যেলু তুমিয়ো সেবাবোত্যে দোয়্যেলু অ।
37“অন্যগুনোর দুষ্ ধুরিবাত্তে ন-নিগিল্ল্য, সেক্কে তমারেয়ো দুষি ধরা ন-অবঅ। অন্যগুনোরে সাজা পেবার্ যগাজ্যে বিলি মনে গরা ন-অবঅ। অন্যগুনোরে খেমা গরঅ, সেক্কে তমারেয়ো খেমা গরা অবঅ। 38দান্ গরঅ, সেক্কে গোজেনেয়ো তমারে দিবো, বোউত্ বেশ্ গুরি, চাপি চাপি, ঝাগেরে ঝাগেরে, উগুরি পড়েদে ধোক্ক্যেন্ গুরি তমারে দিয়্যে অবঅ, কারন যেবাবোত্যেগুরি তুমি মাবি দুয়ো সেবাবোত্যেগুরি তমাত্তে মাবা অবঅ।” 39যীশু তা শিচ্চ্যগুনোরে এ উপমাগান্ দিলো: এক্কো কান্ মান্জ্যে কি অন্য আর এক্কো কান্ মান্জ্যরে পথ দেগেই পারে? সালে কি তারা দ্বিজনে গাঢত্ ন-পড়িবাক্? 40ছাত্র তা মাষ্টর উগুরে নয়, মাত্তর্ গম্ শিক্ষ্যে পেইনে পত্তি ছাত্র তা মাষ্টর্বো ধোক্ক্যেন্ ওই উদে।
41তর্ ভেইয়ো চোগোত্ যে পেজা আঘে সিয়েন বানা দেগর্, অদচ তঅ নিজো চোগোত্ যে পেজা আঘে সিয়েন ন-দেগর্ কিত্তে? 42তঅ নিজো চোগোত্ যে পেজাগান্ আঘে সিয়েন যেক্কে খিয়েল্ ন-গরর্ সেক্কে কেধোক্ক্যেন্ গুরি তঅ ভেইবোরে কোই পারচ্, ভেই, তঅ চোগোত্ যে পেজাগান্ আঘে, আয়, সিয়েন নিগিলেই দুয়োং? ফক্কর্, পত্তমে তঅ নিজো চোগোত্তুন্ পেজাগান্ নিগিলেই ফেলা, সালে তঅ ভেইয়ো চোগোত্ যে পেজাগান্ আঘে সিয়েন নিগিলেবাত্তে গমেডালে দেগিবে। 43গম্ গাজত্ বজং গুলোগুলি ন-ধরন্, আরঅ বজং গাজত্অ গম্ গুলোগুলি ন-ধরন্। 44গুলোগুলিলোই পত্তি গাজরে চিনে যায়। তুমি কাদা ঝুবোত্তুন্ ডোমোর্ গুলো আর কাদা গাজত্তুন্ আংগুর ন-তুলোন্। 45গম্ মান্জ্যে তা রিবেঙত্তুন্ গম্ কধা নিগিলেই আনন্, আর বজং মান্জ্যে তা মনত্তুন্ বজং কধা নিগিলেই আনন্। মান্জ্যর মনানি যিয়েনিলোই ভরা থায় মুয়োনে দঅ সে কধানি কয়।
46“তুমি কিত্তে মরে ‘প্রভু, প্রভু’ বিলি ডাগ, অদচ মুই যিয়েন কং সিয়েন ন-গরঅ? 47যে কনজনে মইধু এইনে মঅ কধা শুনোন্ আর সেবাবোত্যেগুরি কাম্ গরন্ সিবে কা ধোক্ক্যেন্ মুই সিয়েন তমারে কং। 48তে এমন্ এক্কো মান্জ্য ধোক্ক্যেন, যে ঘরান্ বানেবাত্তে গভীন্ গুরি মাদি কাবিনে পাত্তর উগুরে গড়াগান্ গাড়েল। যেরেদি বান্ এলঅ আর গাঙ পানির গঙার্ সে ঘরান উগুরে এইনে পড়িলো, মাত্তর্ ঘরান লাড়েই ন-পারিলো, কারন সিয়েন দরমর গুরি বানা ওইয়্যে। 49যে মঅ কধাগান শুনে অদচ সেবাবোত্যেগুরি কাম্ ন-গরে তে এমন্ এক্কো মান্জ্য ধোক্ক্যেন, যে মাদি উগুরে গড়াগান্ ন-গাড়েইনে ঘরান্ বানেল। যেরেদি পানিবান যেক্কে সে ঘরান উগুরে এইনে পড়িলো সেক্কে সে ঘরান্ পড়িনে এক্কুবারে ভস্ত ওই গেলঅ।”
Currently Selected:
লূক 6: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society