লেবীয় 23
23
ইস্রায়েলীয়গুনোর্ নানান্ বাবোত্যে পরব্
1-2ইয়েনর্ পরেদি লগেপ্রভু মোশিরে ইস্রায়েলীয়গুনোরে কবাত্তে কলদে, “মুই লগেপ্রভু তমাত্তে কয়েক্কো পরব্ ঠিগ্ গোজ্যং; আর সিগুনোরে তুমি পবিত্র মিলন-সভা বিলি ফগদাঙ্ গুরিবা। 3সাপ্তায় ছদিন তুমি কাম্ গুরি পারিবা মাত্তর্ সাত দিনোত্ অবঅ জিরেবার্ দিন, অত্তাৎ পবিত্র মিলন-সভার দিন। এ দিনোত্ তুমি কনঅ কাম্ ন-গুরিবা। তুমি যিয়েনত্ বজত্তি গত্তা সাৎ এ দিন্য অবঅ লগেপ্রভুর নাঙে জিরেবার্ দিন।” 4লগেপ্রভুর্ যিদুক্কুন ঠিগ্ গোজ্যে পরব্, অত্তাৎ যিদুক্কুন্ পবিত্র মিলন-সভা তুমি সিগুনোর্ ঠিগগোজ্যে দিনোত্ ফগদাঙ্ গুরিবা সিগুন্ অল:
উদ্ধোর-পরব্ আর সদানেইয়্যে রুটির্ পরব্
5বজরর্ পত্তম মাজর্ চৌদ্দো তারিগোত্ সাজোন্যে অক্তত্ লগেপ্রভুর্ নাঙে উদ্ধোর্-পরব্ আরাম্ভ অবঅ। 6সে মাসদই পন্দর তারিগোত্ লগেপ্রভুর নাঙে সদানেইয়্যে রুটির্ পরব্ আরাম্ভ অবঅ। সাত দিন সং তমাত্তুন সদানেইয়্যে রুটি হা পুরিবো। 7এ সাত দিনোর্ পত্তম দিনোত্ পবিত্র মিলন-সভা অবঅ আর সেদিন্যে তমার্ কনঅ দুঘোর্ কাম্ গরানা ন-পুরিবো। 8এ সাত দিনোর্ পত্তি দিন লগেপ্রভুর্ নাঙে তমাত্তুন্ এক্কো গুরি আগুন্দোই-গোজ্যে উৎসর্বর্ অনুষ্ঠান গরা পুরিবো। সাত দিনোত্ তমার্ পবিত্র মিলন-সভা অবঅ আর সেদিন্যে তুমি কনঅ দুঘোর্ কাম্ গুরি ন-পারিবা।
পত্তমে তুল্যে ক্ষেদর্ পরব্
9-10লগেপ্রভু মোশির মাধ্যমে ইস্রায়েলীয়গুনোরে আরঅ কবাত্তে কলঅ, মুই যে দেজ্চান্ তমারে দিবাত্তে যাঙর্ সিয়েনত্ যেবার্ পরেদি যেদক্বার তুমি মোক্কেগুন তুলিবা সেদকবার্ পত্তমে কাপ্পে ফলুনোর এক বনা ধর্মগুরুগুনো ইদু নেযেবা। 11ধর্মগুরুবো সে বনাবো নেযেইনে লগেপ্রভুর্ মুজুঙাত্ দুলেব। সেক্কে লগেপ্রভু তমা উগুরে হুজি অবঅ। ধর্মগুরুবোত্তুন্ সিবে দুলো পুরিবো জিরেবার্ পরেদি দিন্নোত্। 12ধর্মগুরুবো যেদিন্যে সে বনাবো দুলেব সেদিন্যে লগেপ্রভুর্ নাঙে পুজ্যে-উৎসর্ব ইজেবে এক বোজোজ্যা এক্কো দাগ্দুগ্ নেইয়্যে ভেড়া ছঅ তমাত্তুন্ উৎসর্ব গরা পুরিবো। 13সিবে সমারে শোজ্য-উৎসর্ব ইজেবে তেলর ময়ান দিয়্যে তিন কেজি ছয়শ গ্রাম নিগুজ মোইদ্যে উৎসর্ব গরা পুরিবো। ইবে লগেপ্রভুর্ নাঙে আগুন্দোই-গোজ্যে উৎসর্ব, যিবের্ তুম্বাজে লগেপ্রভু হুজি অয়। ইবে সমারে ঢালন-উৎসর্ব ইজেবে এক লিটার আংগুরো-রস দিয়্যে পুরিবো। 14গোজেন ইদু এ উৎসর্ববো গুরিবার্ দিন্নো সং তমার্ এ নূয়ো শোজ্যত্তুন্ হেই ন-পারিবা। সিবে বাদেয়ো সিয়োত্তুন্ বানেয়ে কনঅ রুটি বা সিবে আগুন্দোই পুড়িনেয়ো হেই ন-পারিবা। তুমি যিয়েনত্ থেদা সাৎ বংশর্ পর বংশ ধুরি ইবে অবঅ তমাত্তে এক্কো থিদেবর্ গোজ্যে সুদোম।
সাত সাপ্তার্ পরব্
15জিরেবার দিন্নোর্ পরেদি দিনোত্, অত্তাৎ যেদিন্যে তুমি দুলেয়ে-উৎসর্বত্তে শোজ্যর্ বনাগুন্ আনিবা, সে দিন্যেত্তুন্ ধুরি গুণিনে পর পর সাত সাপ্তা বাদ দিয়্যে পুরিবো। 16এ সাত সাপ্তা জিরেবার পরের্ দিন্নোত্,অত্তাৎ দুলেয়্যে-উৎসর্বর পর পঞ্চাশ দিনোত্ লগেপ্রভুর্ নাঙে তুমি নূয়ো গম উৎসর্বর্ অনুষ্ঠানান্ গুরিবা। 17তুমি ঘরত্তুন্ লগেপ্রভুর্ নাঙে দুলেয়্যে-উৎসর্ব ইজেবে তমার্ পত্তমে তুল্যে ক্ষেদর্ কিজু ভাগ আনিবা। সেই দুলেয়্যে-উৎসর্বর্ জিনিস্চানি অবঅ সাড়ে তিন কেজি নিগুজ মোয়দেলোই বানেয়ে সদালোই দ্বিয়েন্ রুটি। 18এ রুটিগানি সমারে সাত্তো এক বোজোজ্যে দাগ্দুগ্ নেইয়ে ভেড়া ছঅ, এক্কো বলদ গোরু আর দ্বিবে ভেড়া আনা পুরিবো। এ য়েমানুন্দোই লগেপ্রভুর্ নাঙে এক্কো পুজ্যে-উৎসর্বর অনুষ্ঠান গরা পুরিবো, আর তা সমারে থেবঅ অক্ত মজিম্ শোজ্য-উৎসর্ব আর ঢালন-উৎসর্ব। ইগুন্ বেক্কুন্ আগুন্দোই-গোজ্যে উৎসর্ব, যিবের্ তুম্বাজে লগেপ্রভু হুজি অয়। 19সে পরেদি তুমি পাপ-উৎসর্ব ইজেবে এক্কো ছাগল আর উদোলোলি-উৎসর্ব ইজেবে এক বোজোজ্যে দ্বিবে ভেড়া ছঅ উৎসর্ব গুরিবা। 20ধর্মগুরুবো লগেপ্রভুর্ মুজুঙোত্ দুলেয়্যে-উৎসর্ব ইজেবে সেই দ্বিবে ভেড়া ছঅ আর পত্তমে তুল্যে ফসলর বানেয়ে রুটি নেযেইনে দুলেব। ইগুন্ লগেপ্রভুর্ নাঙে উৎসর্ব গোজ্যে পবিত্র জিনিস্ যিগুন্ ধর্মগুরুগুনোর্ পাওনা। 21সেদিন্ন্যে তুমি এক্কো পবিত্র মিলন-সভা জানেই দিবা। সেদিন্যে তমার্ কনঅ দুঘোর্ কাম গরানা ন চলিবো। তুমি যিয়োদোই বজত্তি গত্তা সাৎ বংশর পর বংশ ধুরি ইয়েন্ অবঅ তমাত্তে এক্কান থিদেবর্ গোজ্যে সুদোম।
22“তুমি যেক্কে তমার ভূইয়োর্ ক্ষেত্তানি কাবিবা সেক্কে ভূইয়ো দুঝির্ ক্ষেত্তানি তুমি ন-কাবিবা আর পড়ি থেইয়্যে শোজ্য থুবেইনে ন-নেযেবা। সিগুন্ নাদামানুচ্ আর দেজত্ বজত্তি গোজ্যে অন্য জাদর্ মানুচ্চুনোত্তে থুয়ো পুরিবো। মুই লগেপ্রভু তমার্ গোজেন।”
শিংগা রবোর্ পরব্
23-24ইয়েনর্ পরেদি লগেপ্রভু মোশির মাধ্যমে ইস্রায়েলীয়গুনোরে কবাত্তে কলঅ, “বজরর্ সাত মাজর্ পত্তম দিন্নোত্ তমার্ জিরেবার্ দিন বিলিনেই পালন গরা পুরিবো। শিংগা বাঁজিইনে দিন্নোরে এক্কো মনত্ রাগেবার্ দিন ইজেবে ফগদাঙ্ গরা পুরিবো আর এক্কো পবিত্র মিলন-সভা অবঅ। 25সেদিন্যে তমার কনঅ দুঘোর্ কাম গরা ন- পুরিবো। সেদিন্যে লগেপ্রভুর্ নাঙে আগুন্দোই-গোজ্যে উৎসর্বর্ অনুষ্ঠান গরা পুরিবো।”
পাপ ঢাগি দিবার দিন্নো
26লগেপ্রভু মোশিরে কলদে, 27“এ সাত মাজর্ দশ দিনোর্ দিন্নো অবঅ পাপ ঢাগি দিবার দিন। সেদিন্যে তমার্ এক্কো পবিত্র মিলন-সভা অবঅ আর নিজোর্ মনান্ ভাঙিচুরি দুখস্বীগের্ গরা পুরিবো। তমার্ সেদিন্যে লগেপ্রভুর্ নাঙে আগুন্দোই-গোজ্যে উৎসর্বর্ অনুষ্ঠান গরা পুরিবো। 28সেদিন্যে তমার্ কনঅ কাম গরা ন-পুরিবো, কিত্যে সিবেয়ই অলঅ পাপ ঢাগি দিবার্ দিন। তমার গোজেন লগেপ্রভুর্ মুজুঙোত্ সেদিন্যে তমার্ পাপ ঢাগি দিয়্যে পুরিবো। 29সেদিন্যে যে দুখস্বীগের্ ন-গুরিবো তারে তার্ জাদ ভিদিরেত্তুন্ তুলি ফেলা অবঅ। 30সেদিন্যে যুনি কনজনে কনঅ কাম্ গরন্ সালে মুই তারে তার্ জাদর্ ভিদিরেত্তুন্ ভস্ত গুরি ফেলেম। 31সেদিন্যে তমার কনঅ কাম্ গরা ন-পুরিবো। তুমি যিয়োদোই বজত্তি গত্তা সাৎ বংশর পর বংশ ধুরি ইবে অলঅ তমাত্তে এক্কো থিদেবর্ গোজ্যে সুদোম। 32সেদিন্নো অবঅ তমাত্তে এক্কো জিরেবার দিন। সেদিন্যে তমার দুখস্বীগের্ গরা পুরিবো। সেই মাজর্ নয় দিনোত্ সাজোন্যেত্তুন্ ধুরি আরাম্ভ গুরি তার্কেল্যে সাজোন্যে সং তুমি এ জিরেবার দিন্নো পালন গুরিবা।”
নাদামান্জ্যর-ঘরর্ পরব্
33-34ইয়েনর্ পরেদি লগেপ্রভু মোশিরে ইস্রায়েলীয়গুনোরে কবাত্তে কলঅ, সাত মাজর্ পন্দর দিনোর দিন্নোত্ লগেপ্রভুর্ নাঙে নাদামান্জ্যর-ঘরর পরব্ আরাম্ভ অবঅ, আর এ পরপ্পো সাত দিন সং চলিবো। 35এ সাত দিনোর পত্তম দিনোত্ তমার পবিত্র মিলন-সভা অবঅ। সেদিন্যে তমার কনঅ দুঘোর্ কাম গরানা ন-চলিবো। 36এ সাত দিনো ভিদিরে পত্তিদিন লগেপ্রভুর্ নাঙে আগুন্দোই-গোজ্যে উৎসর্বর অনুষ্ঠান গরা পুরিবো। সে পরেদি আস্টো দিনোত্অ তমার পবিত্র মিলন-সভা অবঅ আর লগেপ্রভুর্ নাঙে আগুন্দোই-গোজ্যে উৎসর্বর অনুষ্ঠান গরা পুরিবো। ইবে শেজ্ দিনোত্ বিশেজ্ সভা; সেদিন্যে তমার কনঅ দুঘোর্ কাম গরানা ন-চলিবো।
37এ পর্বগুন বেক্কুন্ লগেপ্রভু ঠিগ্ গুরি রাগেয়্যে। তুমি যেনে এ সময়ানত্ আগুন্দোই-গোজ্যে উৎসর্বর অনুষ্ঠান গুরি পার সেনত্তেই তমার পবিত্র মিলন-সভা অবঅ। যিদুক্কুন্ উৎসর্ব তমাত্তুন্ গরা পুরিবো সিগুন্ অলাক পুজ্যে-উৎসর্ব, শোজ্য-উৎসর্ব আর ঢালন-উৎসর্ব। এই বেক্ উৎসর্বগুন্ ঠিগ্ গোজ্যে দিনোত্ তমাত্তুন্ গরা পুরিবো। 38যে উৎসর্বগুনোর কধা আগে কূয়ো ওইয়্যে সিগুনো ভিদিরে এ উৎসর্বগুন্ ধরা ন-অবঅ। সিগুন্ অলঅ, লগেপ্রভু জিরেবার দিন্নোর্ উৎসর্ব, লগেপ্রভুরে দিয়্যে অন্য বেক্ দানুন্, মান্যা আর নিজোর আওজে গোজ্যে উৎসর্ব।
39“সাত মাজর্ পন্দর দিনোর দিন্নোত্ ভূইয়াত্তুন্ ফসল তুলি নেযানার পরেদি লগেপ্রভুর্ নাঙে সাত দিন সং এ নাদামান্জ্যর্-ঘরর্ পরব্ পালন গরা পুরিবো। এ সাত দিনোর্ পত্তম দিন্নো আর আস্টো দিন্নো অবঅ তমার্ জিরেবার দিন। 40পত্তম দিনোত্ তমার নিজোত্তে গাজর্ বেগত্তুন্ গম ফল, খাজোর গাজ পাদা, উইলো গাজ্ আর অন্য পাদালোই ভোজ্যে গাজর্ বাগল্ লোইনে এবা। সে পরেদি সাত দিন ধুরি তুমি তমার গোজেন লগেপ্রভুর্ মুজুঙোত্ ফুত্তি গুরিবা। 41পত্তি বজর সাত দিন সং লগেপ্রভুর্ নাঙে তমার এ পরপ্পো পালন গরা পুরিবো। বংশর পর বংশ ধুরি ইবে অবঅ তমাত্তে এক্কো থিদেবর্ গোজ্যে সুদোম। সাত মাজত্ তমার এই পরপ্পো পালন গরা পুরিবো। 42সাত দিন তুমি নাদামান্জ্যর-ঘরত্ বজত্তি গুরিবা। ইস্রায়েল বংশত্ যিগুনে জোর্মেয়োন্ তারারে বেক্কুনোরে এ সময়ানত্ নাদামান্জ্যর-ঘরত্ থাহ্ পুরিবো। 43ইয়েনর্ মাধ্যমে তমার বংশধরুনে হবর্ পেবাক্, মুই মিসর দেজত্তুন্ ইস্রায়েলীয়গুনোরে নিগিলেই আনিনে নাদামান্জ্যর-ঘরত্ বজত্তি গুরিবাত্তে দুয়োং। মুই লগেপ্রভু তমার গোজেন।” 44ইয়েনর্ পরেদি মোশি যেইনে লগেপ্রভুর্ ঠিগ্ গোজ্যে বেক্ পরবর্ কধা ইস্রায়েলীয়গুনোরে জানেল।
Currently Selected:
লেবীয় 23: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
