লেবীয় 21
21
ধর্মগুরুগুনোত্যে সুদোম
1ইয়েনর্ পরেদি লগেপ্রভু মোশিরে কলঅ, তুই ধর্মগুরুগুনোরে, অত্তাৎ হারোণর্ পূঅগুনোরে কোই দে, তারার্ কুদুম্মোগুনো ভিদিরে কনজনে মুরি গেলে সিয়েনর্ কারনে কনঅ ধর্মগুরুর্ নিজোরে ফি-বলা গরানা ন-চলিবো। 2মাত্তর্ বাপ্-মা, ঝি-পূঅ, ভেই-এধোক্ক্যেন সঢর্ কুদুম্মো মানুচ্চুনোত্তে তার্ নিজোরে ফি-বলা গুরি পারিবো। 3সিয়েনবাদে বৌ ন-যায় বিলি যে বোন্নো তার্ সংসারত্ আঘে তাত্তেয়ো নিজোরে ফি-বলা গরানা চলিবো। 4মোগো ইন্দিত্তুন্ যিগুনে কুদুম্মো তারাত্তেয়ো নিজোরে ফি-বলা গুরিনে যুদো গোজ্যে অবস্থাত্তুন্ সাধারণ অবস্থাত্ তার্ লামি এজানা ন-চলিবো।
5ধর্মগুরুগুনোর্ মাদা মুড়োনা, দাড়ির্ কাজানি কাবানা বা কিয়্যের্ কনঅ জাগাত্ ঘা গরানা ন-চলিবো। 6সিয়েন্ গুরিনে তারা তারার্ গোজেনর্ নাঙানর্ পবিত্রতাগান বর্বাদ গুরি ন-পারিবো। তারা যেন তারার্ গোজেনর্ নাঙে ফারগ্ ওই থান্। ধর্মগুরুগুনে লগেপ্রভুর্ নাঙে আগুন্দোই-গোজ্যে উৎসর্বর অনুষ্ঠান্ গুরিবাক্, আর সেনত্তে লগেপ্রভুর নাঙে তারাত্তুন যুদো ওই থাহ্ পুরিবো। এ উৎসর্বর্ জিনিস্চান অলঅ তারার্ গোজেনর্ নাঙে উৎসর্ব গোজ্যে হানা। 7বেশ্যে, মাগি বা নেগে ইরি দিয়্যে কনঅ মিলেমান্জ্যরে তারাত্তুন মোগ্ লনা ন-চলিবো। যিবে তারার্ গোজেন তার্ নাঙে তারা যুদো গুরি রাগেয়্যে। 8ও ইস্রায়েলীয়গুন্, তুমিয়ো ধর্মগুরুগুনোরে গোজেনর্ নাঙে যুদো গুরি রাগেয়্যে মানুচ্ ইজেবে চেবা, কিত্যে তারা তমার্ গোজেনর্ নাঙে হেবার্ উৎসর্ব গুরিবার্ কাম গরন্। যুদো গুরি রাগেয়্যে মানুচ্ বিলিই তারারে চাহ্ পুরিবো, কিত্যে মুই লগেপ্রভু নিজেই পবিত্র আর মুয়ই তমারে মর্ নাঙে যুদো গুরি রাগেয়োং। 9কনঅ ধর্মগুরুর্ ঝি যুনি বেশ্যেগিরির্ কারনে তলে পড়ে সালে তে তার্ বাপ্পোরে ফারগ্ গোজ্যে অবস্থাত্তুন্ সাধারণ অবস্থাত্ লামেই আনে। সে ঝিবোরে আগুনোত্ পুড়ি ফেলা পুরিবো।
10“দাঙর্ ধর্মগুরু, অত্তাৎ ভেইয়ুনো ভিদিরে যিবের্ মাদাত্ অভিষেগ-তেল ঢালা ওইয়্যে আর আগ ধোক্ক্যেন রাগেবার্ অনুষ্ঠানান্দোই যে দাঙর্ ধর্মগুরুবোর্ পবিত্র পোজাক্ উড়িবার্ অধিকার্ পেইয়্যে, দুঘ্-ফগদাঙ্ গুরিবাত্তে তার্ চুলোর্ বান্যেগান্ খুলি দেনা বা তার্ কাবড় ফাদি ফেলানা ন-চলিবো। 11-12মরা কিয়্যে রোইয়্যে এবাবোত্যে কনঅ জাগাত্ তার্ যানা ন-চলিবো। কনঅ মরা মান্জ্যর্ কারনে, এন্ কি, বাপ্-মার্ মরাণার্ কারনেয়ো তার্ নিজোরে ফি-বলা গরানা ন- চলিবো বা তার্ গোজেনর্ পবিত্র তাম্বুলান ফেলেইনে আর কনজাগাত্ যানা ন-চলিবো বা তার্ পবিত্রতাগান্ বর্বাদ্ গরানা ন-চলিবো, কিত্যে গোজেনর্ অভিষেগ-তেল্লোই তারে যুদো গুরি রাগা ওইয়্যে। মুই লগেপ্রভু। 13বানা গাবুজ্যে মিলেরে তে মোগ্ লোই পারিবো। 14রানিমিলে বা নেগে যিবেরে ছাড়ি দিয়্যে বা বেশ্যে ওইনে যে নিজোরে ফি-বলা গোজ্যে এধোক্ক্যেন কনঅ মিলেমান্জ্যরে তার্ মোগ্ লনা ন-চলিবো। বানা নিজোর্ জাদ গাবুজ্যে মিলেরে তে মোগ্ লোই পারিবো, 15যেনে তে পুরো বংশর্ ভিদিরে তার্ নিজোর্ ঝি-পূঅগুনোরে যুদো গোজ্যে অবস্থাত্তুন্ সাধারন অবস্থাত্ লামেই ন-আনে। মুই লগেপ্রভু, মুয়ই দাঙর্ ধর্মগুরুগুনোরে মর্ নাঙে যুদো গুরি রাগেয়োং।”
16ইয়েন পরেদি লগেপ্রভু মোশিরে কোইয়্যেদে, 17তুই হারোণরে কঅ, কিয়্যেত্ থুদো বলা তার্ কোন বংশধর তার্ গোজেনর নাঙে হানা উৎসর্ব গুরিবাত্তে পূজোবো ইদু যেই ন-পারিবো। 18-20চোগ্কান, লেং, নাক্ বোদা, কিয়্যের কনঅ ভাগ্ অমকদ লাম্বা আঢ-টেং ভাঙা, পিঠতান্ গুজোং আঘে, অমকদ বাদি, চোগ্ খারাব, কাচ্চোনিরুগ্ বা খজে দোজ্জে আঘে, বিজেগুলোগুন বর্বাদ ওইয়োন-এধোক্ক্যেন কনঅ মানুচ্, অত্তাৎ দাগ্ পোজ্যে কনঅ মানুচ্ পূজোবো ইদু যেই ন-পারিবো। 21কিয়্যেত্ দাগ্ পোজ্যে লোইনে ধর্মগুরু হারোণর্ কনঅ বংশধর্ পুজোবো ইদু যেইনে লগেপ্রভুর নাঙে আগুন্দোই-গোজ্যে কনঅ উৎসর্বর্ অনুষ্ঠান গুরি ন-পারিবাক্। দাগ্ আঘে বিলিনে তে পূজোবো ইদু যেইনে তার্ গোজেন নাঙে কনঅ হানা উৎসর্ব গুরি ন-পারিবো। 22হালিক্ গোজেনর্ নাঙে উৎসর্ব গোজ্যে হানা ভিদিরে পবিত্র আর দাঙর্ পবিত্র বেক্ হানাগানি তে হেই পারিবো, 23মাত্তর্ তার্ কিয়্যেত্ দাগ্ আঘে বিলিনে তে পবিত্র জাগানর্ পর্দাগান ইদু বা পূজোবোর্ মুজুঙোত যেইনে মর্ পবিত্র জাগাগানির্ পবিত্রতাগান্ বর্বাদ্ গুরি ন-পাবিবো। মুই লগেপ্রভু, মুয়ই ধর্মগুরুগুনোরে মর্ নাঙে যুদো গুরি রাগেয়োং।
24মোশি যেইনে এদক্কানি কধা হারোণ আর তার্ পূঅগুনোরে আর বেক্ ইস্রায়েলীয়গুনোরে জানেল।
Currently Selected:
লেবীয় 21: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
