লেবীয় 2
2
শোজ্য-উৎসর্ব
1-2“কনজনে যুনি লগেপ্রভুর্ নাঙে শোজ্য-উৎসর্বর্ অনুষ্ঠান্ গুরিবাত্তে চান্ ছালে সিয়েন্ পাদল্ ময়দেলোই গরা পরিবো। সিয়েন উগুরে তেল ঢালিনে আর লোবান রাগেনে তাত্তুন সিয়েন্ হারোণর্ পূঅগুনো ইদু, অত্তাৎ ধর্মগুরুগুনো ইদু নেযা পুরিবো। ধর্মগুরুবো সিয়োত্তুন্ তেল সমারে এক মুঠ্ মোয়্দে আর বেক্ লোবানান্ তুলি নেযেব আর পুরো উৎসর্ববোর্ বদলে এ ভাক্কান্ পূজোবো উগুরে পুড়ি ফেলেব। ইবে আগুন্দোই-গোজ্যে উৎসর্ব ভিদিরে এক্কো, যিবের্ তুম্বাজে লগেপ্রভু হুজি অয়্।” 3এ শোজ্য-উৎসর্বর জিনিজোর্ বাদবাগি যিয়েনি থেবঅ সিয়েনি হারোণ আর তার্ পূঅগুনোর্ পাওনা অবঅ। লগেপ্রভুর্ নাঙে আগুন্দোই-গোজ্যে বেক্ উৎসর্বয়ান ভিদিরে শোজ্য-উৎর্বর্ এ যেরেদি ভাক্কো দাঙর্ পবিত্র জিনিস্।
4“যুনি কনজনে দাঙর্ চুলোত্ সিক্কে কনঅ জিনিস্চোই শোজ্য-উৎসর্বর অনুষ্ঠান্ গুরিবাত্তে চায়্ সালে সিবে উয়ো পুরিবো সদানেইয়্যে নিগুজ্ ময়দেলোই বানেয়্যে। সিবে তেল মিজেয়ে পিদে ওই পারে বা তেলমিজেয়ে চাপাটি ওই পারে।” 5সেই শোজ্য-উৎসর্ববো যুনি কোড়েয়েলোই ভাজেয়ে কনঅ জিনিস্ অয় সালে সিবে উয়ো পুরিবো তেল্ মিজেয়ে সদাছাড়া নিগুজ্ ময়দালোই বানেয়্যে। 6পরেদি সিয়েন্ কট্টা কট্টা গুরিনে তা উগুরে তেল ঢালি দিয়্যে পুরিবো; ইবে এক্কো শোজ্য-উৎসর্ব। 7সেই শোজ্য-উৎসর্ববো যুনি কোড়েয়্যেত্ ভাজেয়ে কনঅ জিনিস্ অয় সালে সিবে উয়ো পুরিবো তেল আর নিগুজ ময়দালোই বানেয়্যে। 8লগেপ্রভুর্ নাঙে শোজ্য-উৎসর্বত্তে এ বেক্ জিনিস্চানি আনিনে ধর্মগুরুগুনোর্ আঢত্ দিয়্যে পুরিবো আর ধর্মগুরুবো সিয়েন্ পুজোবো ইদু নেযেব। 9শোজ্য-উৎসর্বর্ যে ভাক্কো পুরো উৎসর্বর্ বদলে দিয়্যে অবঅ ধর্মগুরুবো সিয়েন্ যুদো গুরি লোইনে পুজোবো উগুরে পুড়ি ফেলেব। ইবে আগুন্দোই-গোজ্যে উৎসর্ব ভিদিরে এক্কো, যিবের্ তুম্বাজে লগেপ্রভু হুজি অয়। 10এ শোজ্য-উৎসর্বর জিনিজোর্ বাদবাগি যিয়েনি থেবঅ সিয়েনি হারোণ আর তার্ পূঅগুনোর্ পাওনা অবঅ। লগেপ্রভুর্ নাঙে আগুন্দোই-গোজ্যে বেক্ উৎসর্বয়ান ভিদিরে শোজ্য-উৎর্বর্ এ বাদবাগি ভাক্কান দাঙর্ পবিত্র জিনিস্।
11“লগেপ্রভুর্ নাঙে শোজ্য-উৎসর্বত্তে তারা যিয়েনি আনিবাক্ সিয়েনি যেনে সদা ন-দিইনে বানেই দিয়্যে অয়। লগেপ্রভুর্ নাঙে আগুন্দোই-গোজ্যে উৎসর্বর্ জিনিজো ভিদিরে সদা বা মধু দিয়্যে ন-পুরিবো।” 12পত্তমে তুল্যে ফসল উৎসর্ব গুরিবাত্তে তারা সদা আর মধু লগেপ্রভু ইদু নেযেই পারিবো, মাত্তর্ যে উৎসর্বর তুম্বাজে তে হুজি অয়্ এধোক্ক্যেন উৎসর্ব ইজেবে সদা আর মধু পুজোবো উগুরে পুড়োনা ন-চুলিবো। 13শোজ্য-উৎসর্বত্তে যেদক্কানি জিনিস্ আনা অবঅ সিয়েনি ভিদিরে নুন দিয়্যে পুরিবো। ইস্রায়েলীয়গুনোর্ গোজেন তারাত্তে যে বেবস্থা থিদেবর্ গোজ্যে সিয়েনত্তেই শোজ্য-উৎসর্বত্তুন্ নুনান্ বাদ দেনা ন-চুলিবো; তারার্ বেক্ উৎসর্বয়ানি ভিদিরে নুনান্ দিয়্যে পুরিবো।
14লগেপ্রভুর্ নাঙে উৎসর্ব গুরিবাত্তে যুনি তারা পত্তমে তুল্যে ফসল ভিদিরেত্তুন্ কনঅ শোজ্য আনন্ ছালে সেই নুয়ো শোজ্য দাঙর্ গুরি ভাঙিনে আগুন্দোত্ পুড়িনে আনা পুরিবো। 15সিবে উগুরে তেল ঢালি দিয়্যে পুরিবো আর লোবান রাগা পুরিবো; ইবে এক্কো শোজ্য-উৎসর্ব। 16সেই ভাঙি নেযেয়্যে শোজ্য আর তেলর্ যে ভাক্কান্ পুরো উৎসর্ববোর্ বদলে দিয়্যে অবঅ ধর্মগুরুবো সেই ভাক্কান আর বেক্ লোবানান্ লোইনে লগেপ্রভুর্ নাঙে আগুন্দোই-গোজ্যে উৎসর্ব ইজেবে পুড়ি ফেলেব।
Currently Selected:
লেবীয় 2: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
