যিহোশূয় 6
6
1সে সময়োত্ ইস্রায়েলীয়গুনোত্তে যিরীহো শঅরর্ গেট্টুন্ দর-মর গুরি বানি দিয়্যে ওইয়্যে। সিয়েনত্তুন কনজনে নিগিলিয়ো ন-এদাক্ আরঅ কনজনে ভিদিরেয়ো ন-চোমেদাক্।
2লগেপ্রভু সেক্কে যিহোশূয়রে কলঅ, “চাহ্, মুই যিরীহো শঅরান্, সিয়েনর্ রাজারে আর তার বেক্ বীর যোদ্ধাগুনোরে তঅ আঢত্ তুলি দুয়োং। 3তুমি বেক্ সৈন্যগুনে মিলিনে শঅরর্ বারেন্দি চেরোকিত্তে একপল্লা ঘুরি এজঅ; ছঅ দিন সং সিয়েনই গুরিবা। 4সাতজন ধর্মগুরু সাত্তো বাশি লোইনে সুদোম-সুন্দুগোর্ আগে আগে যেবাক্। সাত দিনোত্ তুমি শঅরর্ চেরোকিত্তে সাতবার ঘুরিবা আর তা লগে ধর্মগুরুগুনে বাশি বাজেবাক্। 5যেক্কে তুমি শুনিবা সে ধর্মগুরুগুনে বাশিলোই একঢাল্যে রঅ তুল্যন্ সেক্কে বেক্ মানুচ্চুনে অমকদ দাঙর্ গুরিনে কিজেক্কারি উদিবাক্। সেক্কে শঅরর্ দেবালানি ভাঙি পড়ি যেবঅ আর সেনে ইস্রায়েলীয়গুনে সিয়েনর উগুরেন্দি সোজা ভিদিরেন্দি চুমিবাক্কোই।”
6সেক্কে নূনর পূঅ যিহোশূয় ধর্মগুরুগুনোরে ডাগিনে কলঅ, “তুমি সাক্ষ্য-সুন্দুক্কো তুলি নেযঅ আর সাতজন ধর্মগুরু সাত্তো বাশি লোইনে লগেপ্রভুর সুন্দুগোর আগে আগে যঅ।” 7সে পরেন্দি তে মানুচ্চুনোরে উগুম দিলো্, “তুমি উজেই যঅ আর শঅরর্ বারেন্দি চেরোকিত্তে একপল্লা ঘুরি এজঅ। সৈন্যগুনে লগেপ্রভুর সুন্দুগোর আগে আগে যেবাক্।”
8মানুচ্চুনো ইদু যিহোশূয়র কধা কনা থুম্ অলে লগেপ্রভুর মুজুঙোত্ সাতজন ধর্মগুরু সাত্তো বাশি লোইনে বাজাদে বাজাদে যাহ্ ধুরিলাক্ আর তারার পিজে পিজে যাহ্ ধুরিলো লগেপ্রভুর সুুদোম-সুন্দুক্কো। 9যে ধর্মগুরুগুনে বাশি বাজাদন্ তারার্ আগে আগে যাহ্ ধুরিলাক আত্যের্ আদত্ একদল সৈন্য আর সুন্দুগোর্ পিজে পিজে যাহ্ ধুরিলাক পিজেন্দি থেইয়্যে রোক্ষেদলুন্। ধর্মগুরুগুনে পুরো পথ্তানত্ বাঁশি বাজা ধুরিলাক্। 10যিহোশূয় আগেন্দি মানুচ্চুনোরে এ উগুমান দিয়্যে, “তুমি কিজেক্ ন-কারিবা বা দাঙর্ দাঙর্ গুরি কধা ন-কবা বা মুয়ন্দি কনঅ রঅ ন-নিগিলেবা। যেদিন্যে মুই তমারে কিজেক্ কারিবাত্তে কোম্ বানা সেদিন্যে তুমি কিজেক্ কারিবা।” 11ইঙিরিনে যিহোশূয়র উগুমে লগেপ্রভুর সুন্দুক্কো শঅরর্ চেরোকিত্তে একপল্লা ঘুরেই আনা অলঅ। পরেন্দি মানুচ্চুনে তারার তাম্বুলত্ ফিরি গেলাক্ আর রেত্তো সিয়োদোই কাদেলাক্।
12তার্ কেল্যে যিহোশূয় বেন্যেপোত্যে ঘুমত্তুন উদিলো আরঅ ধর্মগুরুগুনে লগেপ্রভুর সুন্দুক্কো তুলি নিলাক্। 13সাতজন ধর্মগুরু সাত্তো বাশি লোইনে বাঁজাদে বাঁজাদে লগেপ্রভুর সুন্দুগোর আগে আগে যাহ্ ধুরিলাক। আত্যের্ আদত্ একদল সৈন্য তারার আগে আগে গেলাক্ আর লগেপ্রভুর সুন্দুগোর পিচ্ছোন্দি আদিলাক্ পিজেন্দি থেইয়্যে রোক্ষেদলুন; পুরো সময়ান ধুরিনে বাঁশির রঅবো শুনো গেলঅ। 14ইঙিরিনে দ্বিদিনোতঅ তারা শঅরর্ চেরোকিত্তে একপল্লা ঘুরি এইনে তাম্বুলানত্ ফিরি যেদাক্। তারা ছদিন সেধোক্ক্যেন্ গুরিলাক্।
15সাত দিনোত্ তারা বেন্যে পোত্যে উদিলাক্ আর সে আগঅ ধোক্ক্যেন্ সাতবার শঅরর্ চেরোকিত্তে ঘুরিলাক্। বানা সেদিন্যে তারা শঅরর্ চেরোকিত্তে সাতবার ঘুরিলাক্। 16সাত বার ঘুরিবার সময়ানত্ যেক্কে ধর্মগুরুগুনে বাঁশিলোই একঢাল্যে রঅ তুলিলাক্ সেক্কে যিহোশূয় মানুচ্চুনোরে উগুম দিলো্, “তুমি অমকদ দাঙর্ গুরিনে কিজেক্ কারঅ, কিত্যে লগেপ্রভু শঅরান তমারে দিয়্যে। 17শঅর আর তা ভিদিরে বেক্কানি লগেপ্রভুর দিয়্যে ভস্তর্ অভিশাবর তলেদি। বানা বেশ্যে রাহব আর তা ঘরত্ যিদুক্কুন মানুচ্ রোইয়োন তারা বাঁজি থেবাক্, কিত্যে আমার পাদেয়্যে মানুচ্চুনোরে তে লুগেই রাগেয়্যে। 18মাত্তর্ যেদক্কানি জিনিস ভস্তর্ অভিশাবর্ তলে সিয়েনিত্তুন তুমি দূরোত্ থেবা যেনে সিয়েনিত্তুন কনঅ কিজু নিজোত্তে নেযেইনে তুমি নিজো উগুরে দযা ডাগি ন-আনঅ। সিয়েন গুরিলে তুমি ইস্রায়েলীয়গুনোর তাম্বুলানি উগুরে দযা ডাগি আনিবা আরঅ তারারে দযাত্ ফেলেবা। 19বেক্ সনা, রূবো আহ্ পিদোল আর লুয়োর পযাবিরেনি লগেপ্রভুর নাঙে যুদো গরানা; সেনত্তেই সিয়েনি তার ধনভান্ডালত্ যেবঅ।”
20বাশি বাঁজি উদিবার লগে লগে মানুচ্চুনে অমকদ রঅ ছাড়ি ছাড়ি উদিলাক্। বাশির রঅবোলোই যেক্কে মানুচ্চুনে অমকদ রঅ দাঙর্ গুরি উদিলাক্ সেক্কে যিরিহো শঅরর্ দেবালানি ভাঙিনে পড়ি গেলঅ। সেক্কে বেক্ মানুচ্চুন শঅর ভিদিরে চমিলাক্ আরঅ সিয়েন গজক্ গুরি নেযেলাক্। 21তারা আত্যের্লোই মিলে-মরদ, পূঅ-বুড়ো, গোরু, ভেড়া ছাগল, গাধা সুদ্ধো বেক্ পরাণবলাগুনোরে শেজ্ গুরি দিলাক্।
22যে দ্বিজন চড়্ দেজ্ছান চেবাত্তে এচ্ছ্যন যিহোশূয় তারারে কলঅ, “তুমি সে বেশ্যেবো ইদু যে শমক্তান্ খেইয়ো সে মজিম তুমি তা ঘরত্ যেইনে তারে আর তার্ বেক্ মানুচ্চুনোরে নিগিলিনেই আন।” 23এ কধা শুনিনে সে গাবুজ্যে চড়ুনে রাহবর ঘরঅ ভিদিরে চমিনে তারে, তা মা-বাবরে, তা ভেইয়ুনোরে আর ঘরর্ অন্যগুনোরে নিগিলেনেই আনিলাক্। তারা রাহব পরিবারর বেক্কুনোরে নিগিলেই আনিনে ইস্রায়েলীয়গুনোরে তাম্বুলোর্ বারেন্দি এক্কান জাগাত্ থেবাত্তে দিলাক্।
24সে পরেন্দি তারা পুরো শঅরান আর সিয়েন ভিদিরে বেক্কানি পুড়ি দিলাক্, মাত্তর্ সনা, রূবো আহ্ পিদলর আর লুয়োর্ পযাবিরেনি লগেপ্রভুর ঘরর ধনভান্ডালত্ জমা দিলাক্। 25যিহোশূয় যে দ্বিবে চড়রে যিরীহোত্ পাদেয়্যে রাহব বেশ্যে মিলেবো তারারে লুগেই রাগেয়্যে বিলিনে যিহোশূয় তারে, তা বাবর পরিবারর মানুচ্চুনোরে আর ঘরর অন্যগুনোরে রোক্ষ্যে গুরিলো। রাহবে এজঅ ইস্রায়েলীয়গুনো ভিদিরে বজত্তি গরের্।
26ইয়েনর্ পরেন্দি যিহোশূয় শমক্ খেইনে কলদে, “এ যিরীহো শঅরান যে মানুচ্চ্য আরঅ তুলিবো তা উগুরে লগেপ্রভুর এ অভিশাপ্পান পুরিবো:
পত্তম পূঅবোর জীংকানিগান দিইনে তে তার খুদোবো গাড়েব,
আর চিগোন্ পূঅবোর্ জীংকানিগান দিইনে তা গেট্টুন্ তুলিবাক্।”
27লগেপ্রভু যিহোশূয়র সমারে রলঅ, আর দেজর বেক্ জাগানিত্ তার সুনাং ছিদি পড়িলো।
Copyright © 2021 Bangladesh Bible Society