যিহোশূয় 2
2
রাহব আর চড়ুনে
1নূনর পূঅ যিহোশূয় শিটীমত্তুন দ্বিবে চড়রে এ কধাগান কোইনে গুমোরত্ পাধেই দিলো, “তুমি যেইনে সে দেজ্চান আর বিশেজ্ গুরি যিরীহো শঅরান্ গমে ডালে চেই এজঅ।” এই কধাগান শুনিনে তারা যিরীহো শঅরত্ গেলাক্। সিদু তারা রাহব নাঙে এক বেশ্যে মিলে ঘরত্ যেইনে রলাক্।
2ইয়েন ভিদিরে যিরীহো শঅরর্ রাজার কানত্ গেলদে, দেজর্ খোজ-হবর নিবাত্তে সাজোন্যে অক্তত্ কয়েক্কো ইস্রায়েলীয় ইদু এচ্চোন্। 3রাজা এ কধানি শুনিনে রাহব ইদু কোই পাদেল, “যিগুনে এইনে তঅ ঘরত্ চোম্মোন্ তারারে নিগিলেই আন্, কিত্যে তারা পুরো দেজ্চানর্ খোজ-হবর নিবাত্তে এচ্চোন্।”
4মাত্তর্ রাহবে সে দ্বিবে মান্জ্যরে লুগেই রাগেল। তে কলঅ, “অয়, মানুচ্চুনে মইদু এচ্চোন্ ঠিগ্, মাত্তর তারা কুত্তুন্ এচ্চোন্ সিয়েন মুই হ্বর ন-পাং। 5সাজোন্যে অক্তত্ শঅরর্ দোরান্ বানিবার এক্কানা আগেন্দি তারা যেয়োন্দোই। তারা কন্ পদেন্দি যেয়োন্ সিয়েন মুই হ্বর ন-পাং। ইক্কিনে তুমি তারার্ পিজেন্দি গেলে অয়ত তারারে ধুরি পাবিরা।” 6আজলে রাহবে সে দ্বিজনরে ছালঅ উগুরে নেযেইনে সিদু তার মিলি দিয়্যে মসীনার কাবড়্লোই নাঢি রাগেল। 7রাহবর কধানি শুনিনে সে মানুচ্চুনে চড়ুনোরে ধুরিবাত্তে নিগিলিলাক্। যর্দন গাঙানর্ যে পথ্তানন্দি আদিনে পার্ অন্ তারা সিদু যেবার্ পথ্তান্ ধুরিনে যাহ্ ধুরিলাক্। তারা শঅরর্ বারেন্দি যেবার লগে লগেই শঅরর্ দোরান্ বানা গেলঅ।
8-9চড়ুনে ঘুমোত্ পড়িবার্ আগেন্দি রাহবে ছালঅ উগুরে যেইনে তারারে কলঅ, “মুই হ্বর পাং লগেপ্রভু এ দেজ্চান তমারে দিয়্যে। তমা পৌইদ্যেনে এক্কান অমকদ দরর্ ভাব্ আমা ভিদিরে জাক্ক্যে। সেনত্তেই এ দেজর আদাম্মেগুনে তমা দরে এক্কুবারে কুল্ ন পেইয়্যে ওইয়োন্। 10মিসর দেজত্তুন তমারে নিগিলেই আনিবার পরেন্দি লগেপ্রভু কেধোক্ক্যেন গুরি লোহিত সাগরর্ পানিগান তমা মুজুঙোত্তুন শুগেই ফেলেয়্যে সিয়েন আমি শুন্ন্যেই। সীহোন আর ওগ নাঙে যর্দনর পূগ পারন্দি দ্বিবে ইমোরীয় রাজারে শেজ্ গুরি দিইনে তুমি তারারে কি দজা গোজ্য সিয়েন-অ আমি শুন্ন্যেই। 11ইয়েনি শুনিনে আমা মনর্ বেক্ আজা-ভরসানি ফুরেই যেইয়্যে আর তমা দরে বেক্কুনে সাহস্ আরেই ফেলেয়োন্। তমা গোজেন লগেপ্রভু স্বর্গর আর পিত্থিমীর গোজেন। 12মুই তমা উগুরে বিশ্বেজ্ গোজ্যং, সেনত্তেই ইক্কিনে তুমি তমার লগেপ্রভুর নাঙে মইদু শমক্ খঅ, আমা পরিবার উগুরেয়ো তুমি বিশ্বেজ্ রাগেবা। এ পৌইদ্যেনে তুমি মরে এন্ এক্কান আরুক্ দুয়ো যিয়েন্দোই মুই বুঝি পারং, 13তুমি মর্ মা-বাপ, ভেই-বোন আর তারার্ বেক মানুচ্চুনোর পরাণান্ বাজেবা আর মরণ আদত্তুন আমারে রোক্ষ্যে গুরিবা।”
14এ কধানি শুনিনে সে দ্বিজনে তারে কলাক্, “আমি যুনি আমা কধামজিম্ কাম্ ন-গুরিই সালে তমা বদলে আমার পরাণানি যোক্। তুমি যুনি আমার এ কধানি ফগদাং গুরি ন-দুয়ো সালে লগেপ্রভু যেক্কে এ দেজ্চান আমারে দিবো সেক্কে আমি তমা লগে গম্ বেবহার গুরিবোং আর তমা উগুরে বিশ্বেজি থেবং।”
15মিলেবো যে ঘরানত্ থেদঅ সিয়েন এলদে শঅরর্ চেরোকিত্তে দেবালর এক দাক্; সেনত্তেই তে জানালা ভিদিরেন্দি দুড়িলোই তারারে কামান্দি লামেই দিলো। 16তে তারারে কলঅ, “তমারে যিগুনে ধুরিবাত্তে যেইয়োন তারা যেনে তমারে থোগেইনে ন-পান সেনত্তেই তুমি মুড়োত্ যগোই। তুমি তিন দিন সিদু লুগি থেবা; যেরেন্দি সে মানুচ্চুনে ফিরি এজানার পর্ তুমি তমার পদেন্দি যেবাগোই।”
17-18তারা মিলেবোরে কলাক্, “আমি যেক্কে এ দেজত্ এবঙ্ সেক্কে যে জানালাগান ইন্দি তুই আমারে লামেই দিবাত্তে যর্ যুনি সেক্কে এ রাঙা দুড়িগান বান্যে ন-থায় আর তঅ মা-বাপ, ভেই-বোন আর তমার গিরির্ বেক্কুনোরে যুনি তমা ঘরত্ আনিনে ন-রাগাচ, সালে আমারে দিইনে যে শমক্তান্ তুই খাবেয়োচ্ সিয়োত্তুন আমি উদ্বোর্ অবং। 19সেক্কে যুনি কনজনে তমা ঘরত্তুন নিগিলিনে পদথ্ যান্ সালে তে নিজেই তার মরানাত্তে দায়ী থেবঅ। আমি তাত্তেই দায়ী ন-অবং। মাত্তর্ যিগুনে তঅ লগে এ ঘরঅ ভিদিরে থেবাক্ তারা কারঅ উগুরে যুনি আঢ্ বাজা অয় সালে তার্ মরাণাত্তে আমি দায়ী থেবং। 20মাত্তর্ যুনি তুই আমা এ বেক কধানি ফগদাঙ্ গুরি দুয়োচ্ সালে তুই আমারে দিইনে যে শমক্ গুরি নেযেয়োচ্ সিয়েনত্তুন আমি উদ্ধোর্ অবং।”
21জোবত্ মিলেবো কলঅ, “ঠিগ্ আঘে, তুমি যিয়েন কোইয়ো সিয়েনই ওক্।” ইয়েন কোইনে মিলেবো তারারে বিদেয় দিলো আর তারা গেলাক্কোই। সে রাঙা দুড়িগান রাহবে জানালাত্ বানি রাগেল।
22সে দ্বিবে ইস্রায়েলীয় সে জাগায়ান ছাড়িনে মুড়োত্ গেলাক্ তিন দিন সং সিদু রলাক্। যিগুনে তারারে ধুরিবাত্তে নিগিল্যন্ এ ভিদিরে তারা পুরো পথ্তান্ তারারে থোগেই ন-পেইনে যেরেন্দি ফিরি গেলাক্। 23যেরেন্দি সে দ্বিবে ইস্রায়েলীয় ফিরি গেলাক্। তারা মুড়োত্তুন কামান্দি লামি এলাক্ আর গাঙান্ পার ওইনে নূনর পূঅ যিহোশূয় ইদু যেইনে তারার যিয়েনি যিয়েনি ঘোত্যে সিয়েনি বেক্কানি কলাক্। 24তারা যিহোশূয়রে কলাক্, “এ কধাগান ঠিগ্, লগেপ্রভু পুরো দেজ্চান আমা আদত্ তুলি দিয়্যে। আমা দরে সে জাগানর্ বেক্ মানুচ্চুনে এক্কুবারে মন্মরা ওই পোজ্যন্।”
Copyright © 2021 Bangladesh Bible Society