যিশাইয় 9
9
আমাত্ত্যে এক্কো চিগোন্ চিজির জর্ম
1মাত্তর্ যিগুনে আগেদি দুঘোত্ এলাক্ তারাত্তে আন্ধার আর্ ন-থেবঅ। আগ দিনোত্ গোজেনে সবূলূন আর নপ্তালি চাগালাগানরে তলে লামেই দিয়্যে, মাত্তর্ আগামিদি সাগর পার পথ্তান ধুরিনে যর্দন গাঙর্ পূগ পার চাগালা সং অযিহূদীগুনোর্ গালীলানরে তে সর্মান গুরিবো।
2যে মানুচ্চুনে আন্ধারত্ চলন্ তারা দাঙর্ পহ্র দেগিবাক্;
যিগুনে গুর্গুজ্যে আন্ধার দেজত্ বজত্তি গরন্
তারা উগুরে সে পহ্রান জুলিবো।
3তুই সেই জাদ্তোরে দাঙর্ গুরিবে
আর তারার্ হুজিগানি বাড়েই দিবে;
খেত্-খেত্তি কাবিবার অক্তত্ মান্জ্যে যেধোক্ক্যেন্ ফুত্তি গরন্,
লুদেয়্যে মাল ভাগ্ গুরিবার অক্তত্ যেধোক্ক্যেন্ ফুত্তি গরন্,
সেধোক্ক্যেন্ গুরি তারা তঅ মুজুঙোত্ ফুত্তি গুরিবাক্।
4মিদিয়নর্ উদি যেবার্ দিন্নোত্ যেধোক্ক্যেন্ তুই গোজ্যস্,
সেধোক্ক্যেন্ গুরি তুই চুর্মার্ গুরি দিবে
সেই জুঙোলান্, যিয়েন তারা উগুরে গুয়োর্ ওই আঘে,
সেই লুদিক্কো, যিবে তারারে আঘাত্ গরে,
সেই জাদ্তো, যে তারা উগুরে অত্যেচার্ গরে।
5যুদ্ধো গুরিবাত্তে এচ্চ্যে পত্তিজনর্ যুদ্ধোর জদা,
লো-লোই ভিজে পত্তিজনর্ পোজাক্ আগুন্দোই পুড়ি দিয়্যে অবঅ।
6ইয়েনি বেক্কানি অবঅ,
কিত্তে এক্কো পুয়ো আমাত্তে জোর্মেব,
এক্কো পুয়ো আমারে দিয়্যে অবঅ।
শাজন্ গুরিবার ভারান্ তা কানা উগুরে থেবঅ,
আর তা নাঙান্ অবঅ অামক্ অবার্ সল্লাদিয়্যে, খেমতাবলা গোজেন,
উমরর্ বাপ, শান্তির্ রাজা।
7তার শাজন্ খেমতা বাড়ানা আর শান্তির্ থুম্ ন-অবঅ।
তে দায়ূদোর সিংহাসন আর তা রেজ্যগান উগুরে রাজাগিরি গুরিবো;
তে সেই সময়ত্তুন্ ধুরি উমরত্তে
ন্যায়বিচের্ আর সততালোই সিয়েন থিদেবর্ গুরিবো
আর সিয়েন থির্ গুরিবো।
বেগত্তুন্ খেমতাবলা লগেপ্রভু গভীন্ আওজে ইয়েনি গুরিবো।
ইস্রায়েল উগুরে লগেপ্রভুর রাগ্
8যাকোব বিরুদ্ধে প্রভু এক্কান হবর্ পাদেয়্যে; সিয়েন ইস্রায়েল উগুরে ঘুদিবো। 9ইফ্রয়িম আর শমরিয়ার বেক্ আদাম্মেগুনে সিয়েন হবর্ পেবাক্। তারা বাড়্বো গুরিনে আর মনেদি বাড়্বো গুরি কন্, 10“ইট্তুন পড়ি যেইয়োন, মাত্তর্ আমি সিগুন আরঅ দোল্ গুরি কাপ্যে সিল্লোই তুলিবোং; বেক্ ডোমোর্ গাজ্চুন্ কাবি ফেলা ওইয়্যে, মাত্তর্ আমি সিগুনোর্ বদলে লাগেবং এরস গাজ।” 11মাত্তর্ লগেপ্রভু দঅ রৎসীনোর্ বিরুদ্ধে তা শত্রুগুনোরে দরমর গোজ্যে আর তা বিরুদ্ধে তারারে উত্তেজিত গোজ্যে। 12পূগেত্তুন্ ধুরি অরামীয়গুনে আর পোজিমেত্তুন্ ধুরি পলেষ্টীয়গুনে মুয়োনি আ গুরিনে ইস্রায়েলরে গিলি ফেলেব। ইয়েনি অলেয়ো তা রাগ্কান ন-থামেব। এজঅ সং তা আঢ্তান তুল্যে আঘে।
13মাত্তর্ যিবে তারারে আঘাত্ গোজ্যে তাইদু মানুচ্চুনে ফিরি ন-এজন্, বেগত্তুন্ খেমতাবলা লগেপ্রভুর আওজ্ মজিম ন-চলে। 14সেনত্তে লগেপ্রভু ইস্রায়েলর খাজোর্ গাজ ডেলা আর নল-খাগড়া, অত্তাৎ মাঢা আর লেজ্চান একই দিনোত্ কাবি ফেলেব। 15সেই মাঢাগুন্ অলঅ বুড়ো নেতাগুনে আর সর্মান পেইয়্যে মানুচ্চুনে, আর লেজ্চান অলঅ মিজে শিক্ষ্যেদিয়্যে ভাববাদীগুনে। 16যিগুনে এ জাদ মানুচ্চুনোরে পথ দেগান্ তারা তারার্ ভুল্ পধেদি নেযান্; যিগুনে তারার্ পিজেদি চলন্ তারা বুঝি ন-পারন্ তারা কুদু যাদন্। 17সেনত্তে প্রভু গাবুজ্যেগুনোরে নিইনে কনঅ ফুত্তি ন-পেবঅ, আর মা-বাপ নেইয়্যেগুনোরে, রানি মিলেগুনো উগুরে তে কনঅ দোয়্যে ন-গুরিবো; কিত্তে বেক্কুনে গোজেন উগুরে ভোক্তি নেইয়্যে আর পাজি, বেক্কুনে বজং কধা কন্। ইয়েনি অলেয়ো তা রাগ্কান ন-থামেব; এজঅ সং তা আঢ্তান তুল্যে আঘে।
18ঘেচ্চেক্গুরি পাজি কামানি আগুনো ধোক্ক্যেন্ জ্বলে, সিয়েনে কাদাঝুপ আর কাদাগাজ্ পুড়ি ফেলায়। সিয়েনে ঝারর্ বেক ঘন ঝুব্পুন জ্বালেই দে আর সেক্কে ধূমোগানে পাক্ হেই হেই উগুরে উদে। 19বেগত্তুন্ খেমতাবলা লগেপ্রভুর অমকদ রাগে দেজ্চান জুলি যেবঅ, আর মানুচ্চুন্ আগুনোত্তে দার্বো গাজ ধোক্ক্যেন অবাক্। কনজনে তা ভেইবোরেয়ো দোয়্যে ন-গুরিবো। 20এ ডাগেদি যিয়েনি আঘে সিয়েনি তারা গিলিবাক্, মাত্তর্ তো পেট্পরা থেবঅ; উ ডাগেদি যিয়েনি আঘে সিয়েনি হেই পারিবাক্, মাত্তর্ ঈল্ ন-অবঅ। যেরেদি পত্তিজনে নিজো মানুচ্চুনোর্ য়েরা হেবাক্- 21মনঃশি ইফ্রয়িমর আর ইফ্রয়িম মনঃশির য়েরা হেবাক্, আর তারা এক সমারে যিহূদা বিরুদ্ধে উদিবাক্। এজঅ সং তা আঢ্তান তুল্যে আঘে।
Currently Selected:
যিশাইয় 9: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
