যিশাইয় 57
57
1গম্ মানুচ্চুনে যে ভস্ত ওই যাদন্ সিন্দি কনজনে মনান্ ন-দুয়োন। গোজেন ভক্ত মানুচ্চুনোরে নেযা অর্, মাত্তর্ কনজনে বুঝি ন-পারদন্, ভান্ন্যেয় আঢত্তুন্ রোক্ষ্যে গুরিবাত্তে তারারে নেযা অর্। 2যিগুনে গম্ পধেদি চলদন্ তারা সুগ্-শান্দি পেবাক্; তারা মুরিনে মুরি জিরেন্ পেবাক্।
3লগেপ্রভু কত্তে, ও যাদুগুরিয়্যে মিলেবোর পুয়োগুন্, সিনেলী আর বেশ্যে মিলেবোর পুয়োগুন্, তুমি ইদু এজঅ। 4তুমি কারে ঠাট্টা গরর্? কারে তুমি মুয়োন ভেঙর্ আর জিলান্ দেগর্? তুমি কি অন্যেয় গুরিয়্যেগুনোর্ বংশ আর মিজে কধা কোইয়্যেগুনোর পুয়ো নয়? 5তুমি দঅ এলোন গাজ্চুনো ভিদিরে, ডেলা নেইয়্যে পত্তি য়েল্ গাজ তলে কামনায় জুলি উদো; তুমি কলগে কলগে আর মুড়ো মুড়ির ফাদা জাগানিত্ তমা ঝি-পুয়োগুনোরে ডালি দুয়ো।
6ও ইস্রায়েল, তুই লাঙেল সং পাত্তরুন্ পূজো গরচ্; সিগুন, সিগুনই তর্ সোম্বোত্তি। অয়, সিগুনো ইদু তুই ঢাল্যে-উৎসর্ব ঢালি দুয়োচ্ আর শোজ্য-উৎসর্ব গোজ্যস্। ইয়েনি দেগিনে কি মুই জুরো গুরি থেম্? 7তুই অজল্ মুড়ো উগুরে তঅ বিচ্ছোনান্ গোজ্যস্, আর তঅ উৎসর্বর অনুষ্ঠানানত্তে তুই সিয়েনত্ উঠ্যচ্চোই। 8তঅ ঘর ভিদিরে তুই তর্ পূজোর জিনিস্চান রাগেয়োচ্। মরে ছাড়িনে অন্যগুনোরে পেইনে তুই কাবড়ানি খুলিনে খাদত্ উঠ্যচ্, আর নিজো বিচ্ছোনান্ দাঙর্ গুরিনে তারা সমারে থেবাত্তে চুক্তি গোজ্যস্; তুই তারা সমারে থেবাত্তে গম্ পেয়োচ্ আর তারার বেক্কানি দেখ্যচ্। 9তুই জলপাইয়র তেল্ মাজিনে রাজা ইদু যেইয়োচ্ আর অমকদ তুম্বাজ্ জিনিস্ বেবহার গোজ্যস্। তঅ দূত্তুনোরে তুই দূর্ দেজত্ পাদেয়োচ্, এমন্ কি, মরণ জাগা সং পাদেয়োচ্। 10তর্ এই যানা-এযানাগান্দোই তুই বল্পোজ্যে ওইয়োচ্, তো আজা নেই, এ কধাগান ন-কং। মাত্তর্ তুই পূজো গুরিনে নূয়ো বল্ পেইয়োচ্, সেনত্তে তুই বল্পোজ্যে ওই ন-পড়চ্।
11“কারে তুই এদক্ দোরেয়োচ্ যিয়েনত্তে তুই মইদু মিজে কধা কোইয়োচ্, মরে ভুলি যেইয়োচ্ আর মঅ উগুরে অমনযোগি ওইয়োচ্? মুই ভালোক্ দিন ধুরি জুরো গুরি আগং, সেনত্তে কি তুই মরে ন-দরাচ্? 12তর্ সততাগান আর তঅ কামানি যে কি সিয়েনি মুই ফগদাং গুরিম; সিয়েনি দঅ তর্ কনঅ উপকারত্ ন-এবঅ। 13সাহায্যত্তে যেক্কে তুই কানিবে সেক্কে তর্ তুবেয়্যে মুত্তিগুনে তরে রোক্ষ্যে গোরোদোক্। বোইয়্যেরানে তারারে বেক্কুনোরে বুয়োই নেযেব; চিগোন এক্কো নিযেজে তারারে উড়েই নেযেব। মাত্তর্ যে মানুচ্চো মঅ আশ্রয় নেযায় তে দেজর্ আর মঅ সুদ্ধো-সাংগ মুড়োবোর অধিকার পেবঅ।”
14লগেপ্রভু কবঅ, “পথ্তান বানঅ, বানঅ, সিয়েন যুক্কোল্ গরঅ। মঅ মানুচ্চুনো মুজুঙোত্তুন্ বেক্ যাগুলুক্কানি সোরেই ফেলঅ।”
15যিবে মহান আর বাঈনী গরানালোই বর্ পুনোং, যিবে উমরত্তে জেদা, যিবে নাঙান্ পবিত্র, তে কত্তে, “মুই অজল্ আর সুদ্ধো-সাংগ জাগাত্ বজত্তি গরং, মাত্তর্ যিবের মনান্ নম্র, যিবের্ মনান্ ভাঙিনে কট্টা কট্টা ওইয়্যে মুই তা সমারেয়ো বজত্তি গরং যেনে নম্রগুনোর আর মন ভাঙি যেইয়্যে মানুচ্চুনোর্ মনানি মুই নূয়ো গুরিনে ঠিগ্ গুরি পারং। 16মুই উমরত্তে মান্জ্যরে দুষি ন-গুরিম বা মঅ রাগ্কান নিত্য তারা উগুরে ন-থেবঅ। যুনি থায় সালে মানুচ্, যে মানুচ্চোরে মুই বানেয়োং তারা দঅ মঅ মুজুঙোত্ শেজ্ ওই যেবাক্। 17তারার্ লুভোত্তে মুই রাগে জুলি উঠ্যং, আর তারারে সাজা দিইনে অমকদ বেজার্ পেইনে মঅ মুয়োন্ ফিরেই নেযেয়োং; তো তারা তারার আওজ্ মজিম পধেদি যাহ্ ধুরিলাক্। 18মুই মান্জ্যর্ বেক্ বেবহারানি দেখ্যং, তো মুই তারারে গম্ গুরিম। মুই তারারে পরিচালনা গুরিম আর যিগুনে আবিলেচ্ গরন তারারে বুঝেম্। 19সেক্কে তারা কবাক্, ‘কায়কুরে আর দূরো বেক্কুনোর ভালেদি ওক্।’ মুই লগেপ্রভু কঙত্তে, মুই তারারে গম্ গুরিম।”
20মাত্তর্ পাজিগুনে দুলি দুলি থেইয়্যে বড় সাগর ধোক্ক্যেন যিয়েনর তুবোলানে পাক্কাবাই আর কাদা উগুরে তুলে। 21মঅ গোজেনে কত্তে, “পাজিগুনোর্ কনঅ সুগ্-শান্দি নেই।”
Currently Selected:
যিশাইয় 57: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
