যিশাইয় 50
50
ইস্রায়েলর পাপ
1লগেপ্রভু কত্তে, “মুই যে ছুড়্ কাবোজ্চান দিইনে তমা মাবোরে দূর্ গুরি দুয়োং সিয়েন কুদু? মর্ লোনদিয়্যেগুনোর ভিদিরেত্তুন্ কাইদু মুই তমারে বিজি দুয়োং? তমা পাপত্তে তুমি বেজা যেইয়ো; তমা অন্যেয়ত্তে তমা মাবোরে দূর্ গরা ওইয়্যে। 2মুই এজানার্ পরেদি কনজনে সিয়েনত্ ন-এলঅ কিত্তে? মুই ডাগানার্ পরেদি জোব্ দিবাত্তে কনজন ন-এলঅ কিত্তে? তমারে উদ্ধোর্ গুরিবাত্তে মঅ আঢ্তান কি বেশ্ বাদি? তমারে উদ্ধোর্ গুরিবাত্তে মর্ কি খেমতার্ অভাব ওইয়্যে? বানা ধমক্ দিইনে মুই সাগরান শুগেই ফেলাং আর গাঙানি ধূল্যেচর গুরি দুয়োং; সিদুগোর মাছ্চুন পানি অভাবে পুযি যান আর পানি তিরেজে মুরি যান। 3মুই কাবড় ধোক্ক্যেন গুরি আগাজ্চানরে আন্ধার বানাং আর চট্তোই ঢাগি দেদে ধোক্ক্যেন তারে নাঢি দুয়োং।”
লগেপ্রভুর চাগরর্ বাধ্যতা
4প্রভু লগেপ্রভু মরে শিক্ষিতগুনোর্ জিলানি দিয়্যে যেনে মুই কধালোই বল্পোজ্যে মানুচ্চুনোরে সাহায্য গুরি পারং। তে মরে পত্তিদিন বেন্যেমাদান্ জাগেই দে আর মঅ কানানরে সজাক্ গরে যেনে মুই এক্কো শিচ্চ্য ধোক্ক্যেন শুনোং। 5প্রভু লগেপ্রভু মঅ কানান্ খুলি দিয়্যে আর মুই অবাধ্য ন-অং, পিজেদিয়ো ন-যাং। 6যিগুনে মরে মাজ্যন্ মুই তারা ইদু মঅ পিঠ্তান পাদি দুয়োং আর যিগুনে মঅ দাড়িগানি উগুরেয়োন তারা ইদু মঅ গালান্ পাদি দুয়োং। যেক্কে মরে অগমান গরন্ আর মঅ উগুরে সেফ্ ফেলা ওইয়্যে সেক্কে মুই মঅ মুয়োন নাঢি ন-রাগাং। 7প্রভু লগেপ্রভু মরে সাহায্য গরে বিলিনে মুই অগমানিত ন-ওম্। সেনত্তে মুই চক্মকি পাত্তর ধোক্ক্যেন মঅ মুয়োন দরমর গোজ্যং, মুই ন-লাজেম্। 8যিবে মরে নিদ্দুযি বিলি প্রমাণ গোজ্যে তে কায়কুরে আঘে; সালে কন্না মঅ বিরুদ্ধে আবিত্তি গুরিবো? এজঅ, আমি মুয়োমি ওই। কন্না মরে দুযি গোজ্যে? তে মঅ মুজুঙোত্ এজোক্। 9প্রভু লগেপ্রভু মরে সাহায্য গোজ্যে, সেনত্তে কন্না মরে দুষি গুরিবো? তারা বেক্কুনে কাবড় ধোক্ক্যেন পূরোণ ওই যেবাক্; পুগে তারারে হেই ফেলেব।
10তমা ভিদিরে যে লগেপ্রভুরে ভোক্তি গুরিনে দরায়, যে তার চাগর কধালোই বাধ্য অয়, কনঅ পহর্ নেই বিলিনে যে আন্ধারত্ যায়, তে লগেপ্রভু উগুরে বিশ্বেজ্ গোরোক্ আর তা গোজেন উগুরে নির্ভর গোরোক্। 11মাত্তর্ তুমি যিগুনে আগুন জ্বালেয়ো আর বম্বালোই নিজো বেবস্থাগান গোজ্য, তুমি বেক্কুনে যেইনে তমা আগুনো পহর্লোই আর বম্বাগুনো পহ্রান্দোই আঢ। মঅ আঢত্তুন্ তুমি যিয়েনি পেবা সিয়েনি অলঅ, পিড়েলোই তুমি পড়ি থেবা।
Currently Selected:
যিশাইয় 50: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
