যিশাইয় 13
13
বাবিলো পৌইদ্যেনে লগেপ্রভুর কধা
1আমোস পুয়ো যিশাইয় বাবিল পৌইদ্যেনে দর্শন পেইয়্যে।
2লগেপ্রভু কোইয়্যেদে, “তুমি গাজ্ বাজ্ নেইয়্যে মুড়োবো মাঢা উগুরে এক্কান্ বাবতা তুলো; রঅ ছাড়িনে যোদ্ধাগুনোরে ডাগ আর আজল্ মানুচ্চুনোর গেদো ইন্দি সোমেবাত্তে আঢ্তোই যোদ্ধাগুনোরে ইজিরে দুয়ো। 3মঅ নাঙে যুদো গোজ্যে মানুচ্চুনোরে মুই উগুম দুয়োং; মঅ রাগ্কান ঢালি দিবাত্তে মুই মঅ যোদ্ধাগুনোরে ডাক্কোং। মর্ বাঈনী গরানাগান ফগদাং ওইয়্যে বিলিনে তারা হুজিয়ে বাড়্বো গত্তন্।”
4শুনো, মুড়ো-মুড়ি উগুরে বোউত্ মান্জ্যর রঅ অর্। শুনো, বেগ্ জাদ্তুনোর্ আর রেজ্যর মানুচ্চুনে এক সমারে এগত্তর্ ওইনে যাগুলুক্ গত্তন্। বেগত্তুন্ খেমতাবলা লগেপ্রভু যুদ্ধোত্তে এক্কো সৈন্যদল সাজাদন্। 5তারা দূরোত্তুন্ এত্তন্, তারা পিত্থিমীর শেজ্ দুযিত্তুন্ এত্তন্; লগেপ্রভু তার রাগর্ আত্যের্লোই পুরো পিত্থিমীগানরে ভস্ত গুরিবাত্তে এজের্।
6তুমি দাঙর্ দাঙর্ গুরি কান, কিত্তে লগেপ্রভুর দিন্নো কায়-কুরে এচ্চ্যে; সেদিন্যে খেমতাবলা গোজেনত্তুন্ ভস্তগান্ এবঅ। 7সেনত্তে বেক্কুনোর্ আঢ্তানি গির্গিজ্যে ওই পুরিবো আর বেক্ মানুচ্চুনে সাহজ্ আরেবাক্। 8তারা অমকদ দোরেবাক্, তারার্ পিড়ে আর অমকদ সুলোনি অবঅ, পুয়ো পুদোইদ্যে মিলে ধোক্ক্যেন্ তারা সুলোনিলোই কিয়্যে মুজুরিবাক্, তারা বুদ্ধি আরেইনে একজনে আর একজন ইদু রিনি চেবাক্ আর তারার্ মুয়োনি আগুনো জিলো ধোক্ক্যেন্ অবঅ।
9চঅ, লগেপ্রভুর্ দিন্নো এজের্। সিবে চিৎনপুজ্যে, অমকদ রাগ্ আর জোল্জোল্যে অহুজিলোই এজের্; পিত্থিমীগানরে ভস্তর্ জাগা বানেবাত্তে আর তা ভিদিরে পাপীগুনোরে শেজ্ গুরিবাত্তে এজের্। 10সেক্কে আগাজত্ তারা আর নক্ষত্রগুনে পহ্র ন-দিবাক্; বেলান্ উদিবার অক্তত্অ আন্ধার থেবঅ আর চানানেয়ো পহ্র ন-দিবো।
11লগেপ্রভু কোইয়্যেদে, মুই ভান্ন্যেয়ানত্তে পিত্থিমীগানরে সাজা দিম্; পাজিগুনোর অন্যেয়ানিত্তে তারারে সাজা দিম্। মুই বাড়্বো গুরিয়্যেগুনোরে বাড়্বো গরানাগানি শেজ্ গুরি দিম্ আর চিৎনেইয়্যেগুনোর অহংকারানি ভাঙি দিম্। 12সেক্কে মুই মান্জ্যে পেইয়্যে খাটি সোনা পানাত্তুন্অ বেশ্ দরমর গুরিম্, ওফীরোর সোনা পানাত্তুন্অ বেশ্ দরমর গুরিম্। 13সেনত্তে মুই আগাজ্চানরে গির্গিরে দিম্; বেগত্তুন্ খেমতাবলা লগেপ্রভুর অমকদ রাগে তার জোল্জোল্যে রাগর্ দিন্নোত্ পিত্থিমীগানে তা জাগানত্তুন্ লুড়িবো।
14শিগের্ গুরিবাত্তে লড়া হেইয়্যে উরিঙো ধোক্ক্যেন্, গরক্ বাদে ভেড়া ধোক্ক্যেন্ পত্তিজনে তার নিজো মানুচ্চুনো ইদু ফিরি যেবাক্, পত্তিজনে তার্ নিজো দেজত্ ধেই যেবাক্। 15যিগুনোরে পাহ্ যেবঅ তারারে আত্যের্লোই গুলি গরা অবঅ; যিগুনোরে ধরা অবঅ তারা তলোয়ার্লোই মারা পড়িবাক্। 16তারা চোগো মুজুঙোত্ চিগোন পুয়োগুনোরে আজেরেনে মারা অবঅ; তারার্ ঘরানি লুদো অবঅ আর মিলেগুনোরে জাবা অবঅ।
17“চঅ, মুই তারা বিরুদ্ধে মাদীয়গুনোরে কাট্ট্যেই দিম্। তারা রূবোনি ইন্দি খিয়েল্ ন-গুরিবাক্ আর সনালোইয়ো ফুত্তি ন-গুরিবাক্। 18তারা ধনুলোই গাবুজ্যেগুনোরে মারে ফেলেবাক্; তারা চিগোন পুয়োগুনোরে কনঅ মেয়্যে ন-গুরিবাক্ বা ঝি-পুয়োগুনোর ইন্দি মেয়্যের্ চোগেদি রিনি ন-চেবাক্। 19বেক্ রেজ্যগানির্ মানেক্ বাবিলানরে, কলদীয়গুনোর বাঈনী গরেদে বাবিলানরে গোজেনে সদোম আর ঘমোরা ধোক্ক্যেন্ ভস্ত গুরিবো। 20সিয়েন ভিদিরে আর কনদিন্অ থেবার্ জাগা ন-অবঅ বা বংশর পর বংশ ধুরিনে কনজনে সিয়েনত্ বজত্তি ন-গুরিবাক্। কনঅ আরবীয় সিয়েনত্ তাম্বুল্ ন-ফেলেবাক্, কনঅ গরগে সিয়েনত্ তা এ্যামানুনোরে জিরেবাত্তে ন-দিবাক্। 21মাত্তর্ ধূল্যেচরর্ প্রাণিগুনে সিয়েনত্ পড়ি থেবাক্, সিদুগোর্ ঘরানিত্ শিয়েল ভরা অবাক্, উটপেখ্কুনে সিয়েনিত্ বজত্তি গুরিবাক্ আর ঝার ছাগলুনে ফাল্যে ফাল্যে বেড়েবাক্। 22সিদুগোর্ ঘরানি ভিদিরে শিয়েল ডুগুরিবাক্ আর শিয়েলুনে দোল্ দোল্ ঘরানি ভিদিরে থেবাক্। বাবিলোর সময় এচ্চ্যে, তার দিনুন্ আর বাড়েই দিয়্যে ন-অবঅ।”
Currently Selected:
যিশাইয় 13: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
