ইব্রীয় 7
7
1এই মল্কীষেদকে শালেমর্ রাজা আর দাঙর্ গোজেনর্ ধর্মগুরু এলঅ। অব্রাহামে যেক্কে রাজাগুনোরে ওদেই দিইনে ফিরি এজের্ সেক্কে তা সমারে এ মল্কীষেদকর্ দেগা ওইয়্যে। মল্কীষেদকে অব্রাহামরে বর্ দিয়্যে, 2আর অব্রাহামে বেক্ জিনিজোর্ দশ্ ভাগর এক ভাগ্ তারে দিয়্যে। মল্কীষেদকর্ অত্ত অলঅ ন্যায়র্ রাজা। মল্কীষেদকে আরঅ শালেমর্-অ রাজা এলঅ, আর সিয়েনর অত্তগান অলঅ শান্তির রাজা। 3মল্কীষেদকর্ মা-বাপ বা কনঅ বংশ-নাঙানি ন-এলঅ। গোজেনর্ পুয়োবো ধোক্ক্যেন তা জিংকানির্ আরাম্ভয়ো ন-এলঅ, থুম্অ ন-এলঅ; তে উমরর্ ধর্মগুরু।
4চঅ, মল্কীষেদকে কত্তমান দাঙর্! আমা দাঙর্ পূরোণি মানুচ্ অব্রাহামেয়ো তারে বেক্কানিত্তুন দশ্ ভাগর্ এক ভাগ দিয়্যে। 5লেবির বংশগুনোত্তুন্ যিগুনে ধর্মগুরু অন্, ইস্রায়েলীয়গুনোত্তুন্, অত্তাৎ তারার্ ভেইয়ুনোত্তুন্ সুদোম মজিম দশ্ ভাগর এক ভাগ তারার্ উজোল্ গরা পরে। এই ভেইয়ুনে অব্রাহামর গুট্টি অলেয়ো সিয়েনি গরা পরে। 6মাত্তর্ এই মল্কীষেদকে লেবির গুট্টি ন-ওইনেয়ো অব্রাহামত্তুন্ দশ্ ভাগর এক ভাগ উজোল্ গোজ্জ্যে আর যিবে ইধু গোজেনে এগেম্ গোজ্জ্যে সেই অব্রাহামরে বর্অ দিয়্যে। 7ইয়েনত্ কনঅ সন্দেহ নেই যে, আশিদ্বাদ যে পায় সিয়েনত্তুন্ যে আশিদ্বাদ গরে তেয়ই দাঙর্। 8এক কিত্ত্যেদি দেগা যাত্তে, মরণর্ অধীন লেবীয়গুনেই দশ্ ভাগর এক ভাগ উজোল্ গরন্; মাত্তর্ অন্য কিত্ত্যেদি দেগা যাত্তে, যিবে জেদা আঘে বিলিনে সাক্ষ্য দিয়্যে ওইয়্যে তে, অত্তাৎ মল্কীষেদকে দশ্ ভাগর এক ভাগ উজোল্ গরের্। 9-10ইয়েনত্ এমন্অ কুয়ো যায় যে, লেবি বংশর যিবে দশ্ ভাগর এক ভাগ উজোল্ গরে তেয়ো অব্রাহামরে দিইনে মল্কীষেদকরে দশ্ ভাগর এক ভাগ দিয়্যে; কিয়া অব্রাহাম সমারে যেক্কে মল্কীষেদকর্ দেগা ওইয়্যে সেক্কে এই লেবি তার্ পূরোণি মানুচ্ অব্রাহাম কিয়্যে ভিদিরে এলঅ।
যীশু মল্কীষেদক ধোক্ক্যেন ধর্মগুরু
11যিগুনে ধর্মগুরুর্ কাম গুরিদাক্ সেই লেবি গুট্টিগুনোর্ কামানি উগুরে ভর্ গুরিনে গোজেনে ইস্রায়েলীয়গুনোরে তার্ রীদি-সুদোমানি দিয়্যে। লেবি বংশর ধর্মগুরুগুনোর্ কামানিলোই যুনি পূরোগান লাভ গরা যেদঅ, সালে পত্তম লেবীয় ধর্মগুরু হারোণর্ বদলে মল্কীষেদক ধোক্ক্যেন অন্য আরেক্জন ধর্মগুরু এবার্ কি দরকার এলঅ? 12যেক্কে ধর্মগুরুবোর্ পদ বদলানা অয় সেক্কে রীদি-সুদোমানিয়ো বদলানার্ দরকার অয়। 13যিবে পৌইদ্যেনে মুই এই কধানি কঙর্ সেই যীশু লেবির বংশত্তুন্ ন-এজে বরং অন্য এক বংশত্তুন্ এচ্চ্যে। সেই বংশর কেঅ কনদিন্অ ধর্মগুরু ইজেবে ডালিপূজো উগুরে য়েমান উৎসর্ব ন-গরন্। 14ইয়েন সাব্ কধা যে, আমা প্রভু যিহূদার বংশত্তুন্ এচ্চ্যে। এই বংশত্তুন্ কনঅ মানুচ্ যে ধর্মগুরু অবঅ সে কধাগান মোশি কনদিন্অ ন-কয়। 15সালে যেক্কে মল্কীষেদক ধোক্ক্যেন আর এক্কো ধর্মগুরু আঝিল্ ওইয়্যে সেক্কে আমি যিয়েন কোইয়্যেই সিয়েন আরঅ গমেডালে বুঝো যার্। 16তার্ এই ধর্মগুরু অবার বেপারান বংশ বিষয়ে কনঅ সুদোম উগুরে নির্ভর্ ন-গরে, সিয়েন তার্ ভস্ত-ন ওইয়্যে জিংকানির খেমতা উগুরে নির্ভর গরে। 17পবিত্র বোইবো এ সাক্ষ্যগান দে,
তুই উমরত্যে মল্কীষেদক ধোক্ক্যেন ধর্মগুরু।
18-19মোশির রীদি-সুদোমানিয়ে কনঅ কিজুরে পূরোণ গুরি ন-পারে, সেনত্যে আগে ধর্মগুরুগুনোর কামানির্ যে সুদোমান এলঅ সিয়েন খেমতা নেইয়্যে আর অকেজো বিলিনে বাতিল গরা ওইয়্যে। ইক্কিনে তা জাগানত্ তাত্তুন দাঙর্ এক্কান আশ্বাস দিয়্যে ওইয়্যে। সেই আশ্বাস্চান্দোই আমি গোজেন ইধু লুমি পারিই। 20যীশুর্ ধর্মগুরু-পদ্তান্ শমক্ খেইনে গোজেনে ঠিগ্ গোজ্জ্যে। লেবির গুট্টিগুনে ধর্মগুরু অবার অক্তত্ গোজেনে কনঅ শমক্ ন-খাবায়, 21মাত্তর্ তে যীশুরে দাঙর্ ধর্মগুরু বানেবার অক্তত্ শমক্ খিয়্যে। পবিত্র বোইবোত্ এ পৌইদ্যেনে লেগা আঘে,
প্রভু শমক্ খিয়্যে,
“তুই উমরত্যে ধর্মগুরু।”
এ পৌইদ্যেনে
তে তার্ মনান্ ন-বোদোলেব।
22ইয়েনত্তুন্ আমি বুঝি পারির্, যীশু আরঅ দাঙর্ এক্কান বেবস্থার জাবিন ওইয়্যে।
23লেবীয়গুনোত্তুন্ ভালোকজনে ধর্মগুরু ওইয়োন, কিয়া মরণানর্ কারনে তারা কেঅ উমর্ সং ধর্মগুরুর্ কামান চালেই যেই ন-পারন্। 24মাত্তর্ যীশু উমরত্যে জেদা আঘে বিলিনে তার্ ধর্মগুরু পদ্তানত্ কনদিন্অ ন-বুদুলিবো। 25ইয়েনত্যে যিগুনে তা মাধ্যমে গোজেন ইধু এজন্ তারারে তে পুরোপুরি গুরিনে উদ্ধোর্ গুরি পারে, কিয়া তারার্ পৌইদ্যেনে কোজোলি গুরিবাত্যে তে নিত্য জেদা আঘে।
26এবাবোত্যে এক্কো পবিত্র, দুষ্-নেইয়্যে আর খাটি ধর্মগুরু আমার দরকার এলঅ। তে পাপী মান্জ্যত্তুন্ জুদো আর গোজেনে তারে আগাজত্তুন্অ উগুরে তুল্ল্যে। 27অন্য দাঙর্ ধর্মগুরুগুনে যেধোক্ক্যেন পত্তমে নিজোর্ আর যেরেদি অন্যগুনোর্ পাপত্যে য়েমান উৎসর্ব গত্তাক্, সেধোক্ক্যেন গুরি এই ধর্মগুরুবোর সিয়েন গুরিবার দরকার ন-এলঅ, কিয়া তে উমরত্যে এক বার্ নিজোর্ জিংকানিগান উৎসর্ব গুরিনে সেই কামান থুম্ গোজ্জ্যে। 28রীদি-সুদোমে মন্-মরা মানুচ্চুনোরে দাঙর্ ধর্মগুরু পদত্ নেযায়; মাত্তর্ রীদি-সুদোমর্ পরেদি যে শমক্ গরা ওইয়্যে সেই শমক্কান্ উমরত্যে পূরোণ ওইয়্যে গোজেনর্ পুয়োবোরে দাঙর্ ধর্মগুরু পদ্তানত্ নেযা ওইয়্যে।
Currently Selected:
ইব্রীয় 7: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
