ইব্রীয় 2
2
পাপত্তুন্ উদ্ধোর পৌইদ্যেনে উজিয়ার্ গরানা
1ইয়েনত্যে আমি যিয়েনি শুন্ন্যেই সিয়েনি পালন গুরিবাত্যেই আমার আরঅ মনযোগ দেনা উচিত, যেন সিয়েনিত্তুন্ আমি দূরোত্ সুরি ন-যেই। 2স্বর্গদূত্তুনোরে দিইনে যে কধানি কুয়ো ওইয়্যে সিয়েনির দঅ কনঅ লড়্চড় ন-অয়; সিয়েনি বাদে যে কেঅ গোজেনর্ উগুম অমান্য গোজ্জ্যে আর তা কধানি শুনিবাত্যে ন-চায় তে তার্ উজিত সাজা পেয়্যে। 3সালে পাপত্তুন্ উদ্ধোর্ পেবাত্যে গোজেনে ইয়েন যে দাঙর্ বেবস্থা গোজ্জ্যে সিয়েন যুনি আমি য়েলাফেলা গুরিই সালে কেধোক্ক্যেন গুরিনে আমি উদ্ধোর্ পেবং? পাপত্তুন্ উদ্ধোর পেবার কধা পত্তমে প্রভু যীশুই কোইয়্যে আর যিগুনে সিয়েনি শুন্ন্যন্ তারা আমা ইধু সেই উদ্ধোরর্ সত্যগান প্রমাণ গুরি দেগেয়োন। 4সে সমারে গোজেনেয়ো বোউত চিহ্নো আর আমক্ অবার কাম আর খেমতার কাম্বোই আর নিজোর্ আওজ্ মজিম পবিত্র আত্মার দিয়্যে দান্দোই সে পৌইদ্যেনে সাক্ষ্য দিয়্যে।
যীশুই পাপত্তুন্ উদ্ধোর্ গরে
5ভবিচ্চদর্ যে জগদর্ কধা আমি কোর্, গোজেনে সিয়েন স্বর্গদূত্তুনোর্ অধীনোত্ ন-থয়। 6পবিত্র বোইবো ভিদিরে এক জাগাত্ কনঅ একজনে এ কধাগান কোইনে সাক্ষ্য দিয়্যে:
মানুচ্ এমন্ কি যে, তুই তা পৌইদ্যেনে চিন্তে গরচ্?
মান্জ্যর পুয়োগুন বা কি যে, তুই তা-ইন্দি মনযোগ দুয়োচ্?
7তুই মান্জ্যরে স্বর্গদূত্তুনোত্তুন্ সামান্য তলে গোজ্জ্যস্।
রাজমুকুট ইজেবে তুই তারে দান গোজ্জ্যস্ বাঈনী পানা আর সর্মান,
8আর তা ঠেঙ তলাত্ বেক্কানি থোইয়োচ্।
যেক্কে গোজেনে বেক্কানি মান্জ্যর্ অধীনোত্ গুরিলো সেক্কে তে কনঅ কিজু সিয়েনিত্তুন্ বাদ ন-দিলো। খালিক্ বেক্কানি যে আমি ইক্কিনে মান্জ্যর অধীনোত্ দেগির্ সিয়েন নয়, 9মাত্তর্ যীশুরে দঅ আমি দেগির্। তারে স্বর্গদূত্তুনোত্তুন্ সামান্য নীজো গরা ওইয়্যে, যেন গোজেনর্ দোয়্যেই পত্তি মান্জ্যর পৌইদ্যেনে তে নিজেই মুরি পারে। তে দুঘে মোজ্জ্যে বিলি জিদেনার মালা ইজেবে বাঈনী আর সর্মান তারে দান গরা ওইয়্যে।
10বেক্কানি গোজেনত্যে আর বেক্কানি তারে দিইনে ওইয়্যে। সেনত্যে ভালুক্কুন পুয়োরে তার্ মহিমার ভাগী অবার্ আজায় উদ্ধোরর্ গড়াগান যীশুর দুঘ্ পানালোই পূরোণ গরানা গোজেনত্যে ঠিগ্ কামান ওইয়্যে। 11যে মানুচ্চুনোরে পবিত্র গরে সেই যীশু নিজে আর যিগুনোরে তে পবিত্র গরে সে মানুচ্চুনে বেক্কুনে গোজেনর্ ঘোর্বো। ইয়েনত্যে যীশু সে মানুচ্চুনোরে ভেই বিলিনে ডাগদে ন-লাজায়। 12পবিত্র বোইবোত্ তে গোজেনরে কোইয়্যেদে,
“ভেইয়ুনো ইধু মুই তঅ পৌইদ্যেনে ফগদাং গুরিম
আর সমাজ ভিদিরে তর্ গুণগান গুরিবোং।”
13যীশু আরঅ কত্তে,
“মুই গোজেন উগুরে নির্ভর গুরিম।”
আর এক জাগাত্ তে কত্তে,
“এইয়্যে চঅ, মুই আর সেই পুয়োগুনে যিগুনোরে গোজেনে মরে দিয়্যে।”
14সেই পুয়োগুনে অলাক্ লো-য়েরাবলা মানুচ্। সেনত্যে যীশু নিজেয়ো লো-য়েরাবলা মানুচ্ অলঅ, যেনে মরণর খেমতাগান যিবে আঢত্ আঘে সেই শদানরে তে নিজোর মরণানরে দিইনে বল্পোজ্যে গরে, 15আর মরণ দরে যিগুনে গোদা জিংকানিগান চাগর ধোক্ক্যেন কাদেয়োন তারারে উদ্ধোর গরে। 16যীশু স্বর্গদূত্তুনোরে এজাল্ ন-দে, বরং অব্রাহামর গুট্টিগুনোরে তে এজাল্ দে। 17সেনত্যে যীশুত্তুন্ বেক্কানিন্দি তা ভেইয়ুনো ধোক্ক্যেন উয়ো পল্ল, যেনে তে এক্কো দোয়্যেলু আর বিশ্বেজি দাঙর্ ধর্মগুরু ইজেবে গোজেনর্ সেবা গুরি পারে। ইয়েনর উদ্দেচ্চ্যগান অলঅ, তে যেন নিজোর্ মরণানরে দিইনে মান্জ্যর পাপ্পানি দূর্ গুরিনে গোজেনরে হুজি গরে। 18তে নিজেই পোরোক্ষ্যে সোজ্জ্য গুরিনে দুঘ্ পেইয়্যে বিলিনে যিগুনে পোরোক্ষ্যেত্ পড়ন তারারে তে এজাল্ দি পারে।
Currently Selected:
ইব্রীয় 2: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
