হবক্কূক 3
3
হবক্কুকর্ তবনা গরানা
1ভাববাদী হবক্কূকর কবিতের্ সুরে তবনা গরানা।
2ও লগেপ্রভু, মুই তঅ কাম কধা শুনিনে দোরেলুং।
ও লগেপ্রভু, আমা সময়োত্ সিয়েনি তুই আরঅ গর্;
আমা সময়োত্ তুই সিয়েনি দেগা।
রাগর্ সময়োত্ তুই মেয়্যে গুরিবার কধা ভুলি ন-যেচ্।
3গোজেনে তৈমনত্তুন্ এজের্,
সেই সুদ্ধো-সাংগ মানুচ্চো পারণ মুড়োবোত্তুন্ এজের্।
তার্ মহিমাগান আগাজত্ সং লুমেগোই;
পিত্থিমীগানে তার্ নাঙ্গিনেনালোই ভরা।
4বেলান ধোক্ক্যেন্ তার জ্বোল্জোল্যেগান;
তা আঢত্তুন্ পহ্রান ছিদি পড়ে,
সিয়েনত্ তা খেমতাগান লুগেয়্যে আঘে।
5তা আগে আগে যার্ ভানাগান্;
তা পিজে পিজে পীড়েগান যার্।
6তে থিয়্যেইনে পিত্থিমীগানরে লাড়ার্;
তে রিনি চেইনে জাদ্তুনোরে গির্গিরে তুলের্।
পুরোণি দিনোর্ মুড়ো-মুড়িগুন কট্টা কট্টা ওই যাদন্
আর পুরোণি যুগোর্ মুড়োগুন ভাঙি পত্তন্।
উমর কালত্তুন্ ধুরি তা পথ্তানর কনঅ পরিবত্তন্ নেই।
7মুই কূশন মানুচ্চুনোরে দুদ্দশাত্ দেগিলুং,
আর দেগিলুং মিদিয়ন আদাম্মেগুনে গির্গিরাদন্।
8ও লগেপ্রভু, গাঙানি উগুরে কি তুই বেজার্ ওইয়োচ্?
তঅ রাগ্কান কি গাঙানি উগুরে পোজ্যে?
তুই কি সাগর উগুরে অমকদ কাঙেলেত্যে ওইয়োচ্?
সেনত্তে কি তুই তর্ ঘোড়াগুনোত্
আর তর্ জিদি যেইয়্যে রথ্তানিত্ চড়ি বেড়র্?
9তর্ ধনুগান তুই তুলি নিলে
আর তর্ কধা মজিম্ সাজা দিবাত্তে লুদিক্কুনে শমক্ হেইয়োন্।
তুই পিত্থিমীগানরে ভাগ গুরি দিলে গাঙ্-ছড়ালোই।
10মুড়ো-মুড়িগুন তরে দেগিনে গির্গিরে উদিলাক্।
অমকদ পানি গঙার্ বেঈ গেলঅ;
গভীন্ পানিগানে গুজুরি উদিলো
আর তার্ তুবোলুন্ উগুরে তুলিলো।
11তর্ উড়েদে সেল্লোর্ ঝিমিলেনিলোই
আর কারেন ধোক্ক্যেন্ তর্ যাদিবোর্ ঝিমিলেনিত্
আগাজত্ বেলান্ আর চানান্ থির্ ওইনে থিয়্যেই রলঅ।
12রাগে তুই পিত্থিমীর ভিদিরেদি উজেই গেলে
আর বেজার্ ওইনে জাদ্তুনোরে টেঙোই মারিলে।
13তঅ মানুচ্চুনোরে উদ্ধোর্ গত্তে,
তর্ অভিষেগ্ গোজ্যে মানুচ্চোরে রোক্ষ্যে গত্তে
তুই নিগিলি এলে।
তুই পাজিগুনোর্ দেজর্ নেতাবোরে আঘাত্ গুরিলে,
তা দেজ্চানরে পুরোপুরি গুরিনে ভস্ত গুরি দিলে।
14যেক্কে তা যোদ্ধাগুনে আমারে ছিদি দিবাত্তে
অমকদ গুরি আক্রমন গুরিলাক্,
সেক্কে তারা তারা ধোক্ক্যেন্ ফুত্তি গোজ্যন্
যিগুনে ভিদিরে ভিদিরে দুখী মানুচ্চুনোরে গিলিনে হুজি অন্।
মাত্তর্ তুই তারার্ নেতাবোরে তা যাদিবো ফুদেই দিলে।
15তর্ পরিচালনায় ঘোড়াগুনে সাগর ইন্দি গেলাক্
আর দাঙর্ পানি গঙারানরে উলোট-পালোট্ গুরিলো।
16সেই রবো শুনিনে মুই গির্গিরে ধুরিলুং,
মঅ ঠুট্টোয়ো গির্গিরে উদিলো;
মুই বল্পোজ্যে ওই পড়িলুং
আর মঅ টেঙানি গির্গিরে ধুরিলো।
তো মুই সেদিন্নোত্যেই ধৈজ্জ্য ধুরিনে বাজ্জেই থেইম্
যেদিন্যে আমা আক্রমন গুরিয়্যেগুনো উগুরে দযা এবঅ।
17যুনিও ডোমোর্ গাজত্ বোল্ ন-পড়িবাক্
আর আংগুর লুদিত্ ন-থেবাক্ কনঅ আংগুর,
যুনিও জলপাই গাজত্ ফল ন-ধুরিবাক্
আর খেদত্ ন-জোর্মেবাক্ হেবাত্তে কনঅ শোজ্য,
যুনিও ভেড়ার ঘরত্ ন-থেবাক্ ভেড়া
আর গোরু ঘরত্ ন-থেবাক্ গোরু,
18তো মুই লগেপ্রভুরে নিইনে ফুত্তি গুরিম,
মর্ উদ্ধোর্ গুরিয়্যে গোজেনরে নিইনে হুজি ওম্।
19প্রভু লগেপ্রভুই মর্ বলান্;
তে মঅ টেঙানি উরিঙি টেঙানি ধোক্ক্যেন গুরি দে
আর মরে অজল্ অজল্ জাগাত্ যেবার খেমতা দে।
গান পরিচালগত্তে। মঅ উগুম্ মজিম্ তারর্ বাজানা সমারে গাহ্ পুরিবো।
Copyright © 2021 Bangladesh Bible Society