পত্থম 38
38
যিহূদা আর তামরে
1ইয়েন পরেদি যিহূদা তা ভেইয়ুনোরে ফেলেইনে অদুল্লম আদামত্ এক্কো মান্জো লগে বজত্তি গুরিবাত্তে গেলঅ। মানুচ্চ্যর নাঙান্ এলঅ হীরা। 2সিধু থেবার সময় শূয় নাঙে এক্কো কনানীয় মান্জ্য ঝিরে তা চোগোত্ পড়িলো। মিলেবোরে তে মোক্ ইজেবে ললঅ। 3পরেদি মিলেবো পিদিলী অলঅ আর এক্কো পুয়ো অলঅ। যিহূদা পুয়োবো নাঙান রাগেল এর। 4পরেদি তে আরঅ পিদিলী অলঅ তার আর এক্কো পুয়ো অলঅ। তা মাবো পুয়োবোর নাঙান রাগেল ওনন। 5ইয়েন পরেদি তে আরঅ পিদিলী অলঅ তার্ আর এক্কো পুয়ো অলঅ। তে তা নাঙান রাগেল শেলা। এ পুয়োবো জর্মেবার সময় তারা কষীব আদামত্ এলাক্।
6পরেদি যিহূদা তা দাঙর্ পুয়ো এরর লগে তামর নাঙে এক্কো মিলেলোই মেলা গুরি দিলো। 7মাত্তর্ যিহূদার এ পুয়োবো লগেপ্রভুর চোগোত্ এদক্ বজং এলদে যে, তে তারে আর বাঁজি থেবাত্তে ন-দিলো। 8যিহূদা সেক্কে ওননরে কলঅ, “তঅ ভেইবোর্ রানী মিলেবোরে তুই মোক্ ইজেবে লঅ। তা দিয়োর্ ইজেবে তর্ যিয়েন্ গরা পুরিবো সিয়েন্ গর্ আর তঅ ভেইবো ওইনে তা বংশবো রোক্ষ্যে গুরিচ্।”
9ওননে হবর্ পেদ, সে বংশবো তার্ নিজোর্ ন-অবঅ। ভেইবোর্ ওইনে বংশ রোক্ষ্যে গুরিবার্ আওজ্ ন-থানায়্ যেদক্বার্ তে তা ভেইবোর্ মোক্কো ইধু গেলঅ সেদক্বার তে বীর্যগান মাদিত্ ফেলে দিলো। 10মাত্তর্ তা এ বেবহারান্দোই লগেপ্রভু বেজার্ পেলঅ। সেনত্তে তারেয়ো লগেপ্রভু আর বাঁজি থেবাত্তে ন-দিলো। 11সেক্কে যিহূদা তা পুদবো তামররে কলঅ, “যেদকদিন সং মঅ পুয়োবো শেলা দাঙর্ ন-অয় সেদক্দিন তুই তঅ বাবঅ ঘরত্ যেইনে রানীমিলে ইজেবে বজত্তি গর্লোই।” যিহূদা মনত্ এ দরান্ ওইয়্যে, অয়্ত শেলায়ো তা অন্য ভেইয়ুনো ধোক্ক্যেন মুরি যেবঅ। যিহূদা কধালোই তামরে তা বাবঅ ঘরত্ যেইনে থাহ্ ধুরিলো।
12ইয়েন ভোলোক্ দিন্ পরে যিহূদা মোক্কো, অত্তাৎ শূয়োর্ ঝিবৌ মুরি গেলঅ। তাত্তে আবিলেজ্ গুরিবার্ সময় শেজ্ ওই গেলে পরেদি যিহূদা আর তা অদুল্লমীয় সমাজ্যে হীরা তিম্না আদামত্ গেলঅ। যে মানুচ্চুনে যিহূদা ভেড়া ছাগল কেশ্ কাবিদাক্ তারা সে আদামত্ এলাক। 13ইয়েন আগে এক্কো মানুজ্ তামররে যেইনে কোইয়্যেদে, “চঅ, তঅ শুয়োরবো তা ভেড়া কেশ্ছানি কাবিবাত্তে তিম্নায়ত্ যার্।”
14তামরে রিনি চেলদে, শেলার বয়জ্ অলেয়ো শুয়োরবো তা কধা মজিম শেলা লগে তারে বৌ নঅ-দে। সেনত্তে তে রানীমিলেবোর কাবর-চুগোরানি ফেলেইনে মুয়োন্ ঢাগিনে কিয়্যেত্ কাবড়্ ঢাগিনে ঐনয়িম গেদো দোরান ইধু যেইনে বুয়োই রলঅ। ঐনয়িম এল তিম্না যেবার পদথ্। 15তে মুয়োন ঢাগিনে রাগেয়্যে বিলি যিহূদা তারে দেগিনে বেশ্যেমিলে মনে গুরিলো। 16সেনত্তে তে পদ কুরে তামর মুজুঙোত্ যেইনে কলঅ, “আয়, তঅ লগে মরে ঘুম্ যেবাত্তে দে।” নিজো পূদবোবোরে তে চিনি ন-পারিলো।
তামরে কলঅ, “ইয়েনত্তে তুই মরে কি দিবে?”
17যিহূদা কলঅ, “মঅ ঝাগত্তুন্ মুই তরে এক্কো ছাগল ছঅ পাধেই দিম।”
তামরে কলঅ, “সিবে পাধেই নঅ দেনা সং তুই মঅ মুজুঙোত্ কিজু বন্ধক্ রাগেবে না-কি?”
18যিহূদা কলঅ, “কি বন্ধক্ রাগেম্?”
তে কলঅ, “দুড়িসুমুত্তো তঅ সীল মহ্রবো আর তঅ আঢ লুদিক্কো।” সেক্কে যিহূদা সিয়েনি তা মুজুঙোত জমা রাগেইনে তা লগে থেলঅ, আর থানার্ পরেদি তামরে পিদিলী অলঅ। 19ইয়েন পরেদি তামরে উদিনে গেলগোই, আর মাদা কাবড়ান্ খুলি ফেলেইনে তে আরঅ রানীমিলে কাবর-চুগোরানি উরিলো।
20পরেদি মিলেবোত্তুন্ সে বন্ধক্ রাগেয়্যে জিনিস্ছানি ফেরত্ আনিবাত্তে যিহূদা তা অদুল্লমীয় সমাজ্যেবোরে দিইনে এক্কো ছাগল ছঅ পাধেই দিলো। মাত্তর্ তে তারে তোগেই ন-পেলঅ। 21সেক্কে তে সিদুগোর্ মানুচ্চুনোরে পুযোর্ গুরিলো, “ঐনয়িম পদ ইধু যে মোন্দিরো-বেশ্যেবো এলঅ তে কুধু?”
তারা কলাক্, “ইয়েনত্ দঅ কনঅ মোন্দিরো-বেশ্যে নেই।”
22সেক্কে তে যিহূদা ইধু ফিরি যেইনে কলঅ, “মুই তারে তোগেই ন পেলুং। ইয়েন্ বাদেয়ো সিদুগো মানুচ্চুনে কলাক্, সিধু কনঅ মোন্দিরো-বেশ্যে নেই।”
23যিহূদা কলঅ, “সালে উ জিনিস্ছানি তা ইধু থোক্, ন-অলে মান্জ্যে আমারে ঈচ্ গুরিবাক। সিয়েন্ বাদেয়ো ছাগল ছবো দঅ মুই পাধেই দুয়োং, মাত্তর্ তুই তারে তোগেই ন-পাচ্।”
24ইয়েন পেরায় তিনমাস পরেদি যিহূদা শুনিলোদে, তার পূদবো তামরে বেশ্যে-হাংগি গোজ্যে, আর সিয়েন পরেদি তে ইক্কু পিদিলী ওইয়্যে। এ কধাগান্ শুনিনে যিহূদা কলঅ, “তারে নিগিলেই আনিনে পুড়ি ফেলা ওক্।”
25তামররে যেক্কে নিগিলেই আনা অর্ সেক্কে তে তা শুয়োরবোরে কোই পাদেল, “মঅ পেদত্ যিবের পুয়োবো আঘে এ জিনিস্ছানি তার।” সে পরেদি তে কলঅ, “দোয়্যে গুরি একপল্লা পোরোক্ষে গুরি চেবা না-কি, এ দুড়িসুমুত্তো সীল মহ্রবো আর লুদিক্কো কার্?”
26যিহূদা সিয়েনি চিনি পারিনে কলঅ, “তে-দঅ সালে মত্তুন বহুত্ গম্, কিত্তে মঅ পুয়োবো শেলা লগে মুই তারে মেলা গুরি ন-দুয়োং।” ইয়েন পরেদি তে আর কনদিনঅ তামর লগে ঘুমোত্ ন-পরে।
27পুয়ো পুদেবার অক্তত্ দেগা গেলঅ তামর পেদত্ যামা পুয়ো আঘন্। 28পুয়ো-পুদেবার অক্তত্ এক্কো পুয়ো তা আত্তান্ নিগিলেই-লঅ। সেক্কে অজাবো এক্কান্ রাঙা সুদ তা আদত্ বানি দিইনে কলঅ, “ইবে জর্মগান আগে অলঅ।” 29মাত্তর্ আমক্ অবার্ ইয়েন্, সে পুয়োবো যেক্কে তা আত্তান্ ভিদিরে টানি নিলঅ সেক্কে তা ভেইবো নিগিলি এলঅ। সেক্কে অজাবো কলঅ, “কিঙিরিনে তুই নিগিলি এলে?” ইয়েনত্যে তা নাঙান রাগা অলঅ পেরস (যিয়েনর্ ভেদ্তান্ “ভাঙিনে নিগিলেনা”)।
30সে পরেদি তা ভেইবো আদত্ রাঙা সুদঅ বান্যে গুরি নিগিলি এলঅ। তার নাঙান দিয়্যে অলঅ সেরহ।
Currently Selected:
পত্থম 38: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
