যিহিষ্কেল 9
9
মূত্তি পূজোগুরিয়্যেগুনোর মরানা
1সে পরেদি মুই গোজেনরে রঅ ছাড়িনে ডাগি কধে শুনিলুং, “ও শঅর-ভস্ত গুরিবার কামত্ নেযেয়্যে মানুচ্চুন, তুমি পত্তিজনে ভস্ত গরেদে আত্যেরানি আঢত্ লোইনে ইধু এজঅ।” 2উত্তোরেদি অজল্ জাগানর্ গেদো ইন্দিত্তুন্ মুই ছয়জন মান্জ্যরে এত্তে দেগিলুং; পত্তিজন আঢত্ ভস্তগরেদে আত্যের্ এলঅ। তারা সমারে এলদে মসীনার কাবড় উজ্যে এক্কো মানুচ্ আর তা কমর ইধু এলঅ লেগেদে জিনিস। তারা ভিদিরে সোমেইনে পিদল পূজোবো কায়কুরে থিয়্যেলাক্।
3সেক্কে ইস্রায়েলর্ গোজেনর যে মহিমাগান্ করূব্পুনো উগুরে এলঅ সিয়েনি সিয়োত্তুন্ উদিনে উবোসনা-ঘরর ফ্রেমান ইধু গেলঅ। লগেপ্রভু মসীনার কাবড় উজ্যে সেই মানুচ্চোরে ডাগিলো। 4তে তারে কলঅ, “তুই যিরূশালেম শঅরান ভিদিরেদি যাহ্ আর সিয়েন ভিদিরে যেদক্কানি জঘন্য কাম গরা ওইয়্যে সেনত্তে যিগুনে ভঅ নিজেস্ ফেলেইনে ফবাদন্ তারা কবালত্ এক্কান গুরি চিহ্নো দুয়ো।”
5সে পরেদি মুই শুনিলুং তে সেই ছয়জনরে কত্তে, “তুমি শঅর ভিদিরে তা পিজে পিজে যঅ আর কনঅ মেয়্যে দোয়্যে ন-দেগেইনে মানুচ্চুনোরে মারে ফেলঅ, কাররে রেহাই ন-দুয়ো। 6বুড়ো, গাবুজ্যে, গাবুরী, বুয়ো যেইয়্যে মিলে আর চিগোন্ গুরোগুনোরে মারে ফেলঅ, মাত্তর্ যিগুনো কবালত্ চিহ্নো আঘে তারারে ন-ধোজ্য। উবোসনা-ঘরত্তুন্ সিয়েন গরানা আরাম্ভ গরঅ।” সেক্কে তারা উবোসনা-ঘর মুজুঙোত্ যে বুড়ো নেতাগুনে এলাক্ তারারে দিইনে আরাম্ভ গুরিলাক্।
7সে পরেদি গোজেনে তারারে কলঅ, “তুমি মোজ্যন্দে মানুচ্চুন্দোই উদোনান্ ভোরেই ফেলেইনে উবোসনা-ঘরান্ অসিজি গরঅ। যঅ, কাম গরঅ।” সেনত্তে তারা নিগিলিনে শঅরত্ যেইনে মানুচ্চুনোরে মারে ফেলা ধুরিলাক্। 8মুই সেক্কে উবোসনা-ঘরত্ গায় গায় এলুং। সে অক্তত্ মুই মাঢা নিগিরি পড়িনে আবেগ সমারে কলুং, “হায়, প্রভু লগেপ্রভু! যিরূশালেম উগুরে তঅ রাগ্কান ঢালি দিইনে তুই কি ইস্রায়েলর বাদবাগি বেক্কুনোরে ভস্ত গুরি ফেলেবে?”
9তে জোবত্ মরে কলঅ, “ইস্রায়েল আর যিহূদার মানুচ্চুনোর পাপ অমকদ বেশ্; দেজ্চান লো-লোই ভরা আর শঅরান্ অন্যেয় কামত্ ডুবি যেইয়্যে। তারা কন্দে, ‘লগেপ্রভু এ দেজ্চান ছাড়ি যেইয়্যে; সেনত্তে তে ইয়েনি ন-দেগে।’ 10সেনত্তে মুই তারারে মেয়্যেলী চোগেদিয়ো ন-চেম্, রেহাইঅ ন-দিম; তারা যিয়েনি গোজ্যন্ সিয়েনর ফল মুই তারা উগুরে ঢালি দিম্।”
11যেরেদি মসীনার কাবড় উজ্যে সেই মানুচ্চো ফিরি এইনে এ হবরান্ দিলো, “মুই তর্ উগুম মজিম্ কাম্ গোজ্যং।”
Currently Selected:
যিহিষ্কেল 9: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
