যিহিষ্কেল 45
45
দেজ্চান ভাগ্ গরানা
1তুমি যেক্কে সোম্বোত্তি ইজেবে দেজর্ ভূইয়ানি ভাগ্ গুরি দিবা সেক্কে পোজোস্ আজার্ মাবেদে কাদি লাম্বা আর কুড়ি আজার্ মাবেদে কাদি পাদাজ্যে দেজর্ এক কট্টা ভূই লগেপ্রভুরে দিবা; সেই পুরো চাগালাগান অসিজি অবঅ। 2সিয়েনত্তুন্ পাচশঅ মাবেদে কাদি লাম্বা আর পাচশঅ মাবেদে কাদি পাদাজ্যে এক্কান ভাগ উবোসনা-ঘরত্তে থেবঅ; সিয়েনর্ চেরোকিত্তে পঞ্চাশ আত্ খুলো জাগা থেবঅ। 3সেই পুরো সুদ্ধো-সাংগ চাগালান ভিদিরেত্তুন্ পোজোস্ আজার্ মাবেদে কাদি লাম্বা আর দশ আজার্ মাবেদে কাদি পাদাজ্যে এক্কান ভাগ্ মাবি রাগেবা। এ ভাগ্কান ভিদিরে উবোসনা-ঘর, অত্তাৎ যদবদে সুদ্ধো-সাংগ জাগা থেবঅ। 4এ ভাগ্কান ধর্মগুরুগুনোত্তে; সিয়েন পবিত্র। ধর্মগুরুগুনে উবোসনা-ঘরত্ সেবা-কাম গরন আর লগেপ্রভুরে সেবা গুরিবাত্তে তা মুজুঙোত্ উজেই যান্। সেই জাগানত্ অবঅ তারার্ ঘর-বাড়ি আর উবোসনা-ঘরত্তে সুদ্ধো-সাংগ জাগা। 5বাদবাগি পোজোস্ আজার্ মাবেদে কাদি লাম্বা আর দশ আজার্ মাবেদে কাদি পাদাজ্যে জাগায়ান সেই লেবীয়গুনোর্ গজগত্ থেবঅ যিগুনে উবোসনা-ঘরর্ কাম গরন। সিয়েনত্ তারা বজত্তি গুরিবাক্।
6সুদ্ধো-সাংগ চাগালাগানর্ কায়কুরে পাচ্ আজার মাবেদে কাদি পাদাজ্যে আর পোজোস্ আজার মাবেদে কাদি লাম্বা এক্কান ভাগ্ শঅরত্তে রাগা পড়িবো। সেই শঅরান পুরো ইস্রায়েল জাদত্তে থেবঅ।
7সুদ্ধো-সাংগ চাগালা আর শঅরর্ পূগে আর পোজিমে কায়কুরে ভূইয়ানি শাজন্গুরিয়্যেবোর্ অবঅ। শাজন্গুরিয়্যেবোর্ এ দ্বিয়েন জাগা দেজর্ পোজিমে আর পূগেদি দুযি সং যেবঅ। এই জাগানর্ উত্তোর-দোগিণে মাব্পান্ সুদ্ধো-সাংগ চাগালাগান্ আর শঅরর্ উত্তোর্ দোগিণোর্ মাবর্ সং সং অবঅ। 8এ জাগায়ান ইস্রায়েল দেজর্ শাজন্ গুরিয়্যেবোর্ অধিকারত্ থেবঅ। মর্ শাজন্গুরিয়্যেগুনে মঅ মানুচ্চুনো উগুরে আর্ অত্যেচার ন-গুরিবাক্, বরং ইস্রায়েল জাদরে তার গুট্টিগুন অনুসারে ভূই ভোগ্ গুরিবাত্যে দিবা।
9ও ইস্রায়েলর শাজন্গুরিয়্যেগুন, মুই প্রভু লগেপ্রভু কঙর্, যদেষ্ট ওইয়্যে। ইক্কিনে জোর্ জবরদস্তি আর অত্যেচার গরানা ছাড়ি দিইনে তুমি ন্যায় আর গম্ কাম গরঅ। মঅ মানুচ্চুনোর জাগা তমা গজগত্ নেযানা বন্ধ গরঅ। 10তুমি ঠিগ্ আগেদে পাল্লা আর অন্য মাবর্ জিনিসপাদি বেবহার গরঅ। 11ঐফা আর বাৎ-র মাপ সং অবঅ; এক বাৎ হোমরর্ দশ ভাগর্ একভাগ আর এক ঐফাও হোমরর দশ ভাগর্ এক ভাগ্; এই দ্বিবে মাবা অবঅ হোমর অনুসারে। 12এক শেখেলত্ থেবঅ কুড়ি গেরা। এক মানিত্ থেবঅ ষায়েট্ শেখেল।
বক্শিজ জিনিস আর পবিত্র দিন
13তুমি বক্শিজ ইজেবে যিয়েনি দিবে সিয়েনি অলঅ: তমা বেক্ গমুনোর্ ষায়েট্ ভাগর্ এক ভাগ, বেক্ কেশ্বিজির্ ষায়েট্ ভাগর্ এক ভাগ, 14বেক্ জলপাই তেলর্ একশঅ ভাগর্ এক ভাগ। তেলর্ পরিমাণ মাবিবাত্তে বাৎ-র মাপ বেবহার গরা পড়িবো। দশ বাৎ সং এক হোমর্ আর এক হোমরর্ সং এক কোর। 15ইস্রায়েল দেজ ভিদিরে গম্ ভূইয়োত্ চরন্ এবাবোত্যে পত্তি দিশঅ ছাগল-ভেড়াত্তুন্ এক্কো ছঅ দিবে। মানুচ্চুনোর্ পাপ ঢাগিবাত্তে ইগুন্ শোজ্য-উৎসর্ব, পুজ্যে-উৎসর্ব আর উদোলোলি-উৎসর্বত্তে বেবহার গরা অবঅ। 16দেজর্ বেক মানুচ্চুন ইস্রায়েলর্ শাজন্গুরিয়্যেবোরে এ বক্শিজচান দিবাক্। 17শাজন্গুরিয়্যেবোর্ কাম্ অবঅ বেক্ পরব্পুন, আঙোস্যে আর জিরেবার দিনুনোত্তে, অত্তাৎ ইস্রায়েল জাদর্ ঠিগ্ গোজ্যে বেক পরব্পুনোত্তে পূজ্যে উৎসর্ব, শোজ্য-উৎসর্ব আর পানীয়-উৎসর্বর্ জিনিস যুগেই দেনা। তে ইস্রায়েল জাদর্ পাপ ঢাগি দিবাত্তে পাপ-উৎসর্ব, শোজ্য-উৎসর্ব, পূজ্যে-উৎসর্ব আর উদোলোলি-উৎসর্বর জিনিস যুগেই দিবো।
18মুই প্রভু লগেপ্রভু আরঅ কঙর্, তুমি পত্তম্ মাজর্ পৌইল্যা দিনোত্ এক্কো তুদো নেইয়্যে দামাড়া গোরু নিইনে উবোসনা-ঘরান্ সিজি গুরিবা। 19ধর্মগুরুবো পাপ-উৎসর্বত্তে কিজু লো নিইনে উবোসনা-ঘরর দ্বিয়েন দোরত্, পূজোবো উগুরে ভাগর্ চের্ কোণাত্ আর ভিদিরে উদোনর্ গেদো দ্বিবে খুদোত্ লাগেব। 20যিগুনে ভুল গরন্ বা হবর্ ন-পেইনে উবোসনা-ঘর বিরুদ্ধে কনঅ পাপ গুরি ফেলান্ তুমি তারাত্তে মাসর্ সাত দিনোত্ সেই এক্কুই কাম গুরিবা। এবাবোত্যেগুরি তুমি পাপ ঢাগি দিবার্ অনুষ্ঠান গুরিনে উবোসনা-ঘরান্ সিজি গুরিবা।
21পত্তম মাজর্ চৌদ্দ দিনোত্ তুমি উদ্ধোর-পরব্ পালেবা। এ পরব্পো সাত দিনোর; সে অক্তত্ তমাত্তুন্ সদানেইয়্যে পিধে হা পড়িবো। 22সেদিন্যে শাজন্গুরিয়্যেবো তার নিজোত্তে আর বেক্ মানুচ্চুনোত্তে পাপ-উৎসর্ব ইজেবে এক্কো গোরু দিবো। 23পরবর্ সাত দিনোর্ পত্তি দিন তে লগেপ্রভুর নাঙে পূজ্যে-উৎসর্বত্তে তুদো নেইয়্যে সাত্তো গোরু আর সাত্তো ভেড়া দিবো আর পাপ-উৎসর্বত্তে এক্কো পাদা ছাগল দিবো। 24শোজ্য-উৎসর্ব ইজেবে তাত্তুন্ পত্তি গোরু আর ভেড়াত্তে আদার কেজি মোইদ্যে আর পৌনে চের্ লিটার তেল্ দিয়্যে পড়িবো।
25সাত মাসর্ পনর দিনোত্ যে সাত দিনোর্ পরব্ আরাম্ভ অয় সে অক্তত্ উৎসর্বত্তে শাশন্গুরিয়্যেবো পাপ-উৎসর্বর্, পূজ্যে-উৎসর্বর আর শোজ্য-উৎসর্বর জিনিস আর তেল দিবো।
Currently Selected:
যিহিষ্কেল 45: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
