যিহিষ্কেল 40
40
নুয়ো উবোসনা-ঘরর্ চাগালা
1আমা বন্দীদজাত্ পোজোস্ বজরর্ আরাম্ভত, মাসর্ দশ দিনোত, যিরূশালেম শঅরর্ পতনর্ চৌদ্দ বজর পরেদি লগেপ্রভুর আঢ্তানি মঅ উগুরে এলঅ। 2গোজেনর দিয়্যে দর্শনানর ভিদিরেদি তে মরে ইস্রায়েল দেজত্ নেযেইনে এক্কান অমকদ অজল্ মুড়ো উগুরে রাগেল। সেই মুড়োবোর্ দোগিণেদি কয়েক্কান বিল্ডং এলঅ যিগুন চাদে শঅর ধোক্ক্যেন্। 3তে মরে সিয়েনত্ নেযেল আর মুই এক্কো মান্জ্যরে দেগিলুং যিবের্ কিয়্যেগান পিদোল ধোক্ক্যেন ঝক্মক্ গরের্। আঢত্ মসীনার দড়ি আর মাবেদে কাদিবো নিইনে তে গেদোত্ থিয়্যেই এলঅ। 4মানুচ্চো মরে কলঅ, “ও মান্জ্যর পুয়োবো, তুই চোগেদি চাহ্ আর কানেদি শুন আহ্ মুই তরে যিয়েনি দেগেম সিয়েনি বেক্কানিদি মনযোগ্ দে, কিত্যে সেনত্তে তরে ইধু আনা ওইয়্যে। তুই যিয়েনি দেগিবে বেক্কানি ইস্রায়েলীয়গুনোরে কবে।”
বারেদি উদোনর্ পূগেদি গেইট্
5মুই দেগিলুং এক্কান দেবালদি উবোসনা-ঘরর্ চেরোকিত্তে ঘিজ্যে আঘে। মানুচ্চোর্ আঢ মাবেদে কাদিবো লাম্বাদি ছয় আত্; পত্তি আত্ এক আত্ চের্ আঙুল্ গুরি লাম্বা। তে দেবালান মাবিলো; সিগুন এক্কো মাবেদে কাদি দাঙর্ আর এক্কো মাবেদে কাদি অজল্।
6সে পরেদি তে পূগেদি গেদো ইধু গেলঅ। তে সাঙুলোই উগুরেদি উদিনে গেদোত্ সোমেবার মুয়োন মাবিলো; সিয়েন লাম্বাদি এলদে এক মাবেদে কাদি। 7গেদোত্ চুগিদারুনোর্ গুদিগুন্ এক মাবেদে কাদি লাম্বা আর এক মাবেদে কাদি পাদাজ্যে আর এক গুদিত্তুন আর এক গুদি ভিদিরে দেবালান্ পাচ্ আত্ দাঙর্ এলঅ। গেদোর্ শেজদি উবোসনা-ঘর মুয়োদি গুদিবোত্ সোমেবার মুয়োন এলদে এক মাবেদে কাদি।
8সে পরেদি তে সেই গুদিবো মাবিল; সিবে পাদাজ্যেদি এলদে সেই গুদিবোত্ সোমেবার মুয়োত্ পাদাজ্যেগানত্তুন্ দ্বি কিত্তেদি এক মাবেদে কাদি বেশ্। 9সে গুদিবো লাম্বাদি এলদে আস্তো আত্ আর সিয়েনত্তুন্ নিগিলিবার পধত্ দ্বি কিত্তেদি খুদো দ্বিবে এলাক্ দ্বিআত্ গুরি পাদাজ্যে। গেদো শেজদি সেই গুদিবোর্ মুয়োন এলদে উবোসনা-ঘর ইন্দি।
10পূগেদি গেদো ভিদিরে দ্বিকিত্তেদি তিন্নো গুরি বেক্কুনে ছোবুয়ো গুদি এলঅ; সিগুনোর পত্তিবোর মাপ্ এলদে সং আর সিগুনো ভিদিরে দেবালানির্ পত্তি মাপ্ এক্কুই এলঅ। 11সে পরেদি তে গেদোর্ মাপ নেযেল; সিয়েনর্ সোমেবার পথ্তান লাম্বাদি এলদে তের আত্ আর সোমেবার মুয়োন পাদাজ্যেদি এলদে দশ আত্। 12চুগিদারুনোর্ পত্তি গুদি মুজুঙোত্ এলদে এক আত্ অজল্ আর এক আত্ পাদাজ্যে দেবাল্ আর গুদিগুন লাম্বাদি আর পাদাজ্যেদি এলদে ছয় আত্। 13সে পরেদি তে গেদো ছালর্ পাদাজ্যেগুরি মাপ্ নিলো; তে এক্কো গুদির্ বারেদিত্তুন্ তা মুজুঙেদি গুদিবোর বারেদি সং মাবিলো-এক্কো গুদির্ দেবাল খুলো জাগানত্তুন্ তা মুজুঙেদি গুদিবোর্ দেবাল খুলো জাগানর্ দূরোত্ এলদে পোজোস্ আত্। 14তে গেদোর্ খুদো দ্বিবের্ অজলান্ ষায়েট্ আত্ গুরি ধুরিলো। খুদো দ্বিবেত্তুন্ গেদোর্ উদোনান্ আরাম্ভ ওইয়্যে। 15গেদোত্ সোমেবার মুয়োনত্তুন্ গেদোর্ কাজা কুরেদি গুদিবো সং দূরোত্ এলদে পঞ্চাশ আত্। 16গুদিগুনোর্ বারেদি দেবালত্ আর খুদো দ্বিবের্ কায়কুরে দেবালানত্ জালি দিয়্যে জানালা এলঅ, আর গেদো শেজদি যে গুদিবো এলঅ সিয়েনর্ দেবালানত্অ সেবাবোত্যে এলঅ; এবাবোত্যেগুরি গেদোর্ দেবালানিত্ সেবাবোত্যে জানালা এলঅ। ইয়েনি বাদেয়ো খুদো দ্বিবেত্ খাজোর্ গাজ্ খোদাই গোজ্যে এলঅ।
বারেদি উদোন্
17সে পরেদি তে মরে বারেদি উদোনত্ নেযেল। উদোনর্ চেরোকিত্তেদি মুই বেক্কুনে ত্রিশ্ছো এক কিত্তেদি খুলো গুদি দেগিলুং; সিগুনোর্ মুজুঙেদি বানিবার্ জাগা এলঅ। 18সেই বান্যে জাগায়ান পত্তি গেদোর্ দ্বিকিত্তেদিয়ো এলঅ আর গেদোর্ লাম্বাগান সং এলঅ; ইয়েন এলদে তলেদি বান্যে জাগায়ান। 19সে পরেদি তে পূগেদি বারেদি উদোন গেদোর্ শেজ্ দুযিত্তুন্ ভিদিরে উদোন গেদোত্ সোমেবার মুয়োন সং মাবিলো; সিয়েনর দূরোত্তান্ এলদে একশ আত্। সেবাবোত্যেগুরি উত্তোরেদি দূরোত্ এলদে একশ আত্।
উত্তোর-গেইট্
20সে পরেদি তে বারেদি উদোনর্ উত্তোরেদি মু গেদোর্ লাম্বাগান আর পাদাজ্যেগান মাবিলো। 21সিয়েনর্ দ্বিকিত্তেদি তিন্নো গুরি গুদিগুনোর্ মাপ্ আর সিয়েনর্ খুদোগুন আহ্ সিয়েনর যেরেদি গুদিগুনোর মাপ পৌইল্যা গেদোর্ বেক্ মাপ্পেদে ধোক্ক্যেন এলঅ। সিগুন এলাক্ পঞ্চাশ আত্ লাম্বা আর পোজোস্ আত্ পাদাজ্যে। 22সিগুনোর্ জানালাগুন, শেজ্ গুদিগুন আর খুদোগুন নক্শা গোজ্যে খাজোর্ গাজ্ পূগেদি মু গুরি গেদো ধোক্ক্যেন এলঅ। সিয়েনত্ উদিবার সিড়িগানত্ সাত্তো পোইদ্যে এলঅ আর গেদোর্ শেজ্ দুযিত্ তা গুদিবো এলঅ। 23ভিদিরে উদোনর্ পূগেদি মু গেদো ধোক্ক্যেন তার উত্তোরেদি মু এক্কো গেইট্ এলঅ। তে বারেদি উদোনর্ গেদোত্তুন্ ভিদিরে উদোনর্ গেদো সং মাবিলো; সিয়েন একশ আত্ অলঅ।
দোগিণো-গেইট্
24সে পরেদি তে মরে দোগিণেদি নেযেল। মুই বারেদি উদোনর্ দোগিণো মু এক্কো গেইট্ দেগিলুং। তে সেই গেদোর্ খুদোগুন আর শেজ্ গুদিগুন মাবিলো। অন্য গেইট্তুনো ধোক্ক্যেন্ সিগুন এক্কুই মাপ্ অলঅ। 25অন্য গেদো ধোক্ক্যেন এ গেইট্টোত্অ জানালা এলঅ। গেইট্টো এলঅ পঞ্চাশ আত্ লাম্বা আর পোজোস্ আত্ পাদাজ্যে। 26সিয়েনত্ উদিবার সিড়িগানত্ সাত্তো পোইদ্যে এলঅ আর গেদোর্ শেজ্ দুযিত্ তা গুদিবো এলঅ। গেদো ভিদিরে দ্বিকিত্তেদি খুদোগুনোত্ খাজোর্ গাজ নক্শা গোজ্যে এলঅ। 27ভিদিরে উদোনতঅ এক্কো দোগিণো মু গেইট্ এলঅ। তে সেই গেদোত্তুন্ বারেদি উদোনর্ দোগিণো মু গেদো সং মাবিলো; সিবে একশ আত্ অলঅ।
ভিদিরে উদোনর্ গেইট্টুন্
28সে পরেদি তে ভিদিরে উদোনর্ দোগিণো মু গেদো ভিদিরেদি মরে ভিদিরে উদোনত্ নেযেল আর গেইট্টো মাবিলো; সিবে অন্যগুনো ধোক্ক্যেন এক্কুই মাপ্ অলঅ। 29সেই গেদোর্ চুগিদারুনোর্ গুদিগুন, খুদো দ্বিবে আর শেজর্ গুদিবো অন্যগুনো ধোক্ক্যেন এক্কুই মাবর্ এলঅ। অন্য গেদো ধোক্ক্যেন এ গেইট্টোত্অ জানালা এলঅ। গেইট্টো এলঅ পঞ্চাশ আত্ লাম্বা আর পোজোস্ আত্ পাদাজ্যে। 30ভিদিরে উদোনর্ নানান্ জাগাত্ খুদো উগুরে ছাদ দিয়্যে জাগা এলঅ। সিয়েন এলদে পোজোস্ আত্ লাম্বা আর পাচ্ আত্ পাদাজ্যে। 31ভিদিরে উদোনর্ দোগিণো মু গেদোত্ সোমেবার গুদিবো মুয়োন এলদে বারেদি উদোন ইন্দি। গেদোত্ সোমেবার্ পধ দি কিত্তেদি খুদোগুনোত্ খাজোর্ গাজ নক্শা গোজ্যে এলঅ। সিদু উদিবার সিড়িগানত্ আস্টোবো পোইদ্যে এলঅ।
32সে পরেদি তে মরে ভিদিরে উদোনর্ পূগেদি আনিলো আর সে জাগানর্ গেইট্তো মাবিলো; সিবের্ মাপ্পান অন্যগুনো ধোক্ক্যেন এলঅ। 33তা চুগিদারুনোর্ গুদিগুন, খুদো দ্বিবে আর সোমেবার গুদিবো অন্যগুনো ধোক্ক্যেন এক্কুই মাবর্ এলঅ। অন্য গেদো ধোক্ক্যেন এ গেইট্টোত্অ জানালা এলঅ। গেইট্টো পঞ্চাশ আত্ লাম্বা আর পোজোস্ আত্ পাদাজ্যে এলঅ। 34তার্ সোমেবার গুদিবো মুয়োন এলদে বারেদি উদোন ইন্দি। গেদোত্ সোমেবার পধ দ্বিকিত্তেদি খুদোগুনোত্ খাজোর্ গাজ নক্শা গোজ্যে এলঅ। সিদু উদিবার সিড়িগানত্ আস্টোবো পোইদ্যে এলঅ।
35সে পরেদি তে মরে উত্তোর্-গেদো ইধু আনিনে সিবে মাবিলো। সিবে অন্যগুনো ধোক্ক্যেন এক্কুই মাবর্ এলঅ। 36তার চুগিদারুনোর্ গুদিগুন, খুদো দ্বিবে আর সোমেবার গুদিবো অন্যগুনো ধোক্ক্যেন এক্কুই মাবর্ এলঅ। অন্য গেদো ধোক্ক্যেন এ গেইট্টোত্অ জানালা এলঅ। গেইট্টো পঞ্চাশ আত্ লাম্বা আর পোজোস্ আত্ পাদাজ্যে এলঅ। 37তার খুদো দ্বিবে এলঅ বারেদি উদোন ইন্দি; সিগুনোত্ খাজোর্ গাজ নক্শা গোজ্যে এলঅ। সিদু উদিবার সিড়িগানত্ আস্টোবো পোইদ্যে এলঅ।
য়েমান-উৎসর্বর্ যুক্কোল-গুদি
38বারেদি উদোন সংমোধ্যে ভিদিরে গেদোর্ খুদোবো কায়কুরে এক কিত্তেদি খুলো এক্কো গুদি এলঅ; সিবে এলদে পুজ্যে-উৎসর্বর্ য়েমান য়েরা ধবার্ জাগা। 39গেদোত্ সোমেবার গুদিবো দ্বিকিত্তেদি দ্বিয়েন গুরি টেবিল এলঅ। সিয়েনি উগুরে পুজ্যে-উৎসর্ব, পাপ-উৎসর্ব আর দুষ-উৎসর্বর য়েমান য়েরা কুদো অয়। 40উত্তোরেদি গেদোত্ সোমেবার পদথ্ এক কিত্তেদি সিড়ি ইধু দিয়্যেন টেবিল আর সিড়ির্ অন্য কিত্তেদি দিয়্যেন্ টেবিল এলঅ। 41এবাবোত্যেগুরি গেদোর্ এক কিত্তেদি চেরান্ আর অন্য কিত্তেদি চেরান্ বেক্কানি আস্টোগান টেবিল এলঅ যিয়েনি উগুরে উৎসর্বর য়েমান য়েরা কুদো অয়। 42পুজ্যে-উৎসর্বত্তে যে চেরান টেবিল এলঅ সিয়েনি পাত্তর্ কাবিনে বানা ওইয়্যে; পত্তি টেবিল এলঅ দেড়্ আত্ লাম্বা, দেড়্ আত্ পাদাজ্যে আর এক আত্ অজল্। সিয়েনিত্ উৎসর্বর মেশিন্ রাগা অয়। 43চের্ আঙুল্ লাম্বা দ্বিবে কাদা বাবোত্যে পেরেক্কোই দেবালত্ লাগেয়্যে এলঅ। টেবিলানি উগুরে উৎসর্বর য়েরা থুয়ো অয়।
ধর্মগুরুগুনোর্ গুদি
44ভিদিরে উদোন সংমোধ্যে গেদো কায়কুরে গীদ্ গেইয়্যেগুনোত্তে তিন্নো এক কিত্তেদি খুলো গুদি এলঅ; দ্বিবে উত্তোর্-গেদো কায়কুরে দোগিণো মু আর এক্কো পূগ-গেদো কায়কুরে উত্তোরেদি মু। 45-46তে মরে কলঅ, “দোগিণোদি মু গুদিবো উবোসনা-ঘরর দেগাশুনোর ভার্-পেইয়্যে ধর্মগুরুগুনোত্তে আর উত্তোরেদি মু গুদিবো পূজোর্ দেগাশুনোর্ ভার-পেইয়্যে ধর্মগুরুগুনোত্তে। সেই ধর্মগুরুগুন অলাক্ সাদোকর্ পুয়োগুন; লেবীয়গুনো ভিদিরে বানা তারা লগেপ্রভুর মুজুঙোত্ তার সেবা-কামত্তে যেই পারন্।”
47সে পরেদি তে উদোনান্ মাবিলো। সিয়েন এলদে একশ আত্ লাম্বা আর একশ আত্ পাদাজ্যে এক্কান চের্কোনা জাগা। আর পূজোবো উবোসনা-ঘরর মুজুঙোত্ এলঅ।
উবোসনা-ঘর
48সে পরেদি তে মরে উবোসনা-ঘরর বারান্দাত্ আনিলো আর বারান্দা মুজুঙোত্ খুদো দ্বিবে আর সোমেবার পধ দ্বিকিত্তেদি বাজু মাবিলো। পত্তি বাজু পাচ্ আত্ পাদাজ্যে আর তিন আত্ দাঙর্ এলাক্। 49বারান্দাগান এলদে কুড়ি আত্ লাম্বা আর এগার আত্ পাদাজ্যে। সিয়েনত্ উদিবার এক্কান সিড়ি এলঅ আর সেই দ্বিবে বাজুর মুজুঙোত্ এলঅ এক্কো গুরি খুদো।
Currently Selected:
যিহিষ্কেল 40: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
