যিহিষ্কেল 38
38
গোগর বিরুদ্ধে আগাম্ কধা
1পরেদি লগেপ্রভু মরে কলঅ, 2ও মান্জ্যর্ পুয়োবো, তুই মাগোগ দেজর্ মেশক আর তূবলর আজল্ শাজন্গুরিয়্যে গোগর ইন্দি মুয়োন দিইনে এই আগাম্ কধানি কঅ, 3প্রভু লগেপ্রভু কোইয়্যেদে, ও মেশক আর তূবলর আজল্ শাজন্গুরিয়্যে গোগ, মুই তর্ বিপক্কে। 4মুই তরে পিজেদি ঘুরিনে তর্ মাড়িগানত্ হেবা লাগেম্ আর তর্ পুরো সৈন্যদলর লগে, অত্তাৎ বেক্ ঘোড়া, দোল্ কাবড় উজ্যে বেক্ ঘোড়া চালেয়্যেগুন আর চিগোন্-দাঙর্ ঢাল আর লাম্বাছুরি সুদ্ধো এক্কো দাঙর্ দল সমারে তরে নিগিলেই আনিম। 5তারা সমারে থেবঅ পারস্য, কূশ আর পূট দেজর্ সৈন্যগুন; তারা বেক্কুনে ঢালবলা আর মাঢাগুন রোক্ষ্যে গুরিবার টোক্ক্যে পিন্যে। 6গোমর দেজর্ বেক্ সৈন্যগুন আর উত্তোরেদি শেজ্ দুযির্ বৈৎ-তোগর্ম দেজর্ বেক সৈন্যগুন তঅ সমারে থেবাক্। বোউত্ জাদে তঅ সমাজ্যে অবাক্।
7তুই যুক্কোল্ অ; তুই আর তর্ চেরোকিত্তে এগত্তর্ ওইয়্যে বেক্ দলবলুন্, তুমি নিজোরে যুক্কোল্ গরঅ আর তুই তারার্ সেনাপতি অ। 8ভালোক্ বজর্ পরেদি তরে যুদ্ধোত্তে ডাগা অবঅ। সেক্কে তুই এমন এক্কান দেজ্ আক্রমণ গুরিবে যে দেজ্চান যুদ্ধোত্তুন্ রেহাই পেইয়্যে, যার মানুচ্চুনে ভালোক্ জাদ ভিদিরেত্তুন্ ইস্রায়েলর্ মুড়ো-মুড়িত্ এগত্তর্ ওইয়োন। সেই দেজ্চান ভালোক্ দিন ধুরিনে মানুচ্ নেইয়্যে এলঅ, মাত্তর্ তর্ আক্রমনর্ আগেদি নানান্ জাদ ভিদিরেত্তুন্ তা মানুচ্চুনোরে নিগিলেই আনা অবঅ, আর সেক্কেনে তারা বেক্কুনে গমেডালে বজত্তি গুরিবাক্। 9তুই আর তর্ বেক সৈন্যগুন আর তঅ সমারে ভালোক্কুন জাদে সেই দেজ্চান আক্রমন গুরিবাত্তে ঝড় ধোক্ক্যেন উজেই যেবাক্; তুমি মেঘ ধোক্ক্যেন গুরি দেজ্চানরে নাঢি ফেলেবা।
10সেদিন্যে তঅ মনত্ নানান্ চিন্তে এবঅ আরঅ তুই এক্কান কুজুরোমি মনত্ আনিবে। 11তুই কবে, তুই এমন এক্কান দেজ্ আক্রমন গুরিবে যে আদামানিত্ দেবাল্ নেই। তুই সুগে-শান্দিয়্যে আর নিচিদে থেইয়্যে মানুচ্চুনোরে আক্রমন গুরিবে যিগুনে দেবাল্, গেইত আর লাগাড়া নেইয়্যে গুরি বজত্তি গরন্। 12তুই তারার্ পযাপিরানি কারি নিবে আর লুদেবে আহ্ ভস্ত ওইয়্যে জাগা ঠিগ্ গুরি নেযেয়্যে জাগায়ানি বিরুদ্ধে আর জাদ্তুনো ভিদিরেত্তুন এগত্তর্ ওইয়্যে মানুচ্চুনো বিরুদ্ধে তঅ আঢ্তানি তুলিবে। সে অক্তত সেই মানুচ্চুনে য়েমান পাল্ আর পযাপিরেদি তাগোয়্যে অবাক্ আর দেজ্চান অবঅ পিত্থিমীর কেন্দ্র।
13সেক্কে শিবা, দদান আর তর্শীশ আর তার বেক্ আদামানির বেবসায়ীগুনে তরে পুযোর্ গুরিবাক্, তুই লুদেবাত্তে এচ্চোস্ নাহি আর সনা-রূপা, য়েমানপাল আর পযাপিরা নেযেবাত্তে আর ভালোক্কানি পযাপিরা কাড়ি নিবাত্তে তঅ দলবল এগত্তর্ গোজ্যস্ নাহি।
14সেনত্তে, ও মান্জ্যর পুয়োবো, তুই গোগরে এই আগাম্ কধানি কঅ, প্রভু লগেপ্রভু কোইয়্যেদে, সেদিন্যে যেক্কে মঅ মানুচ্চুনে ইস্রায়েলত্ গমেডালে বজত্তি গুরিবাক্ সেক্কে তুই কি সিয়েন খিয়েল্ ন-গুরিবে? 15উত্তোরেদি শেজ্ দুযিত্ তঅ জাগানত্তুন্ তুই আর তঅ লগে ভালোক্ জাদর্ মানুচ্ ঘোড়াত্ চড়িনে এক্কো দাঙর্ দল, এক্কো খেমতাবলা সৈন্যদল ওইনে এবে। 16দেজ্চান মেঘ ধোক্ক্যেন গুরি নাঢি ফেলেবাত্তে তুই মঅ মানুচ্ ইস্রায়েল বিরুদ্ধে উজেই এবে। ও গোগ, শেজ্ কালত্ মুই মঅ দেজ্চান বিরুদ্ধে তরে আনিম। সেক্কে মুই জাদ্তুনোর চোগো মুজুঙোত্ তঅ ভিদিরেদি নিজোরে সুদ্ধো-সাংগ বিলি দেগেম্ যেনে তারা মরে হবর্ পান।
17মুই প্রভু লগেপ্রভু কঙর্, পুরোণি কালত্ মঅ চাগরুনোর্, অত্তাৎ ইস্রায়েল ভাববাদীগুনোর মাধ্যমে মুই যিবে কধা কোইয়োং সিবে কি তুই নয়? সে অক্তত্ বজরর্ পর পর ভাববাদিগুনে কোইয়োন, মুই তরে তারা বিরুদ্ধে আনিম। 18সেদিন্যে যেক্কে গোগে ইস্রায়েল দেজ্চান আক্রমন গুরিবো সেক্কে মর্ অমকদ রাগে জুলি উদিম। 19মর্ আওজে আর অমকদ রাগে মুই ফগদাং গরঙর্, সে অক্তত্ ইস্রায়েল দেজত্ অমকদ ভূজোল্ অবঅ। 20সেক্কে সাগরর্ মাছ, আগাজ পেখ্, ঝার য়েমান, মাদি উগুরে পত্তি বুগেদি-আঢি বেড়েয়্যে প্রাণি আর পিত্থীমির বেক্ মানুচ্চুন মঅ মুজুঙোত্ গির্গিরেবাক্। দাঙর্ দাঙর্ মুড়োগুন উল্যে যেবাক্, অজল্ মুড়োগুন দেঙ্ ভাঙি পড়িবাক্ আর বেক্ দেবালানি মাদিত্ পড়ি যেবাক্। 21মঅ দেজর্ বেক্ মুড়োমুড়িগুনো উগুরে গোগর্ বিরুদ্ধে মুই যুদ্ধো ডাগি আনিম। পত্তি মান্জ্যর লাম্বা ছুরি থেবঅ তা ভেইয়োর্ বিরুদ্ধে। 22মুই ভানা আর লো ঝোরেইনে গোগরে সাজা দিম্; মুই অমকদ ঝড়, শিল্ আর জ্বোল্ জোল্যে গন্ধক তা উগুরে, তা সৈন্যগুনো উগুরে আর তা লগে বেক্ জাদ উগুরে ঢালি দিম। 23এবাবোত্যেগুরি ভালোক্ জাদ চোগো মুজুঙোত্ মুই নিজোরে ফগদাং গুরিম; মুই যে মহৎ আর পবিত্র সিয়েন দেগেম; সেক্কে তারা হবর্ পেবাক্, মুয়ই লগেপ্রভু।
Currently Selected:
যিহিষ্কেল 38: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
