যিহিষ্কেল 35
35
ইদোমর বিরুদ্ধে আগাম্ কধা
1পরেদি লগেপ্রভু মরে কোইয়্যেদে, 2ও মান্জ্যর্ পুয়োবো, সেয়ীর মুড়োবো ইন্দি তর্ মুয়োন রাগেইনে তা বিরুদ্ধে এ আগাম্ কধাগান কঅ, 3প্রভু লগেপ্রভু কোইয়্যেদে, ও সেয়ীর মুড়োবো, মুই তর্ বিপক্ষে; মুই তঅ বিরুদ্ধে মঅ আঢ্তানি বাবেইনে তরে এক্কান মানুচ্ নেইয়্যে উগুজ্যে ভূইয়ো ধোক্ক্যেন বানেই রাগেম। 4তর্ শঅরানি মুই ভস্তর্ জাগা বানেম আর তুই মানুচ্ নেইয়্যে অবে। সেক্কে তুই হবর্ পেবে, মুয়ই লগেপ্রভু।
5তুই ভালোক্ দিন ধুরিনে ইস্রায়েলর শত্রু ওই আগচ্ আর তারার্ দযার্ দিনোত্ যেক্কে তারারে সাজা পুরোপুরিভাবে দিয়্যে ওইয়্যে সেক্কে তুই লাম্বা ছুরি আঢত্ তারারে তুলি দুয়োচ্। 6সেনত্তে মুই প্রভু লগেপ্রভু মর্ জিংকানির নাঙে কঙর্, মুই তরে লো ঝরেদে আঢত্ তুলি দিম আর সিয়েনে তঅ পিজেদি লোড়েব। তুই যেক্কে লো ঝরানা ঈচ্ ন-গরচ্ সেক্কে লো ঝরানাগানে তঅ পিজেদি লোড়েব। 7মুই সেয়ীর মুড়োবোরে মানুচ্ নেইয়্যে আর ভস্তর্ জাগা বানেম আর যিগুনে সিয়েনত্ আদা-উদো গরন তারারে বেক্কুনোরে শেজ্ গুরি দিম। 8তর্ মুড়ো-মুড়িগুন মুই মোজ্যন্দে মানুচ্চুনোরে দিইনে নাঢি দিম; যুদ্ধোত্ যিগুনে মুরি যেইয়োন তারা তর্ মুড়োই মুড়োই, কলগে কলগে আর তর্ বেক পানি গঙারানিত্ পড়ি থেবাক্। 9উমরত্তে মুই তরে মানুচ্ নেইয়্যে গুরি রাগেম; তর্ শঅরানিত্ কনজনে বজত্তি ন-গুরিবাক্। সেক্কে তুই হবর্ পেবে, মুয়ই লগেপ্রভু।
10“‘মুই লগেপ্রভু যুনিয়ো ইস্রায়েল আর যিহূদাত্ এলুং তো তুই কোইয়োচ্, এ দ্বি’দেজ মানুচ্চুন আর তারা দেজ্চান তমার্ অবঅ আর তুমি সিয়েন অধিকার গুরিবা। 11সেনত্তে মুই প্রভু লগেপ্রভু মর্ জিংকানির নাঙে কঙর্, তারা উগুরে ঈচ্ গরানায় তুই যেবাবোত্যে রাগ্ আর ইংসে দেগেয়োচ্ সেই ইজেবে মুই তঅ লগে বেবহার গুরিম; মুই যেক্কে তঅ বিচের্ গুরিম সেক্কে তারা ভিদিরে মুই নিজোরে ফগদাং গুরিম। 12সে অক্তত্ তুই হবর্ পেবে, তুই ইস্রায়েলর মুড়ো-মুড়িগুনোর বিরুদ্ধে যেদক্কানি অগমানর্ কধা কোইয়োচ্ সিয়েনি মুই লগেপ্রভু শুন্যং। তুই কোইয়োচ্চে যে, সিয়েনি ভস্ত ওইনে পড়ি আঘে আর সিয়েনি গজক্ গুরিবাত্তে তরে দিয়্যে ওইয়্যে। 13তুই মঅ বিরুদ্ধে বাড়্বো গুরিনে বোউত্ কধা কোইয়োচ্। মুই সিয়েনি বেক্কানি শুন্যং। 14যেক্কেনে বেক পিত্থিমীগানে ফুত্তি গুরিবো সেক্কে মুই তরে মানুচ্ নেইয়্যে গুরিম। 15ইস্রায়েল জাদে অধিকার ইজেবে যে দেজ্চান পেইয়্যে সিয়েন মানুচ্ নেইয়্যে দেগিনে তুই যেবাবোত্যে ফুত্তি গোজ্যস্ সেবাবোত্যেগুরি মুই তঅ লগে বেবহার গুরিম। ও সেয়ীর মুড়োবো, তুই আর ইদোমর বাদবাগি বেক জাগায়ানি মানুচ্ নেইয়্যে অবাক্। সেক্কে মানুচ্চুনে হবর্ পেবাক যে, মুয়ই লগেপ্রভু।”
Currently Selected:
যিহিষ্কেল 35: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
