যিহিষ্কেল 11
11
ইস্রায়েলীয় নেতাগুনোর সাজা
1সে পরেদি লগেপ্রভুর আত্মাগানে মরে তুলি নিইনে উবোসনা-ঘরর্ পূগেদি গেদো ইধু আনিলো। সিয়েনত্ গেদোত্ সোমেবার পদথ্ পোজোচ্জন মরদ এলাক্, আর মুই তারা ভিদিরে অসূরর পুয়ো যাসনিয় আর বনায়র পুয়ো প্লটিয়রে দেগিলুং; তারা এলাক্ মানুচ্চুনোর নেতা। 2লগেপ্রভু মরে কলঅ, “ও মান্জ্যর পুয়োবো, ইগুন সেই মানুচ্ যিগুনে শঅর ভিদিরে কুজুরোমি গত্তন্ আর ভান্ন্যেই সল্লা দেদন্। 3তারা কদন্, ‘ঘর বানেবার সময় কি ন-নয়? এ শঅরান যেন রানেদে পিলে আর আমি ওত্ত্যে য়েরা।’ 4সেনত্তে ও মান্জ্যর পুয়োবো, তুই ইগুনো বিরুদ্ধে ভাববাদী ইজেবে কধা কঅ, অয়, ভাববাদী ইজেবে কধা কঅ।”
5সে পরেদি লগেপ্রভুর আত্মাগান মঅ উগুরে এলঅ, আর তে মরে এ কধাগান কবাত্তে কলঅ, লগেপ্রভু কোইয়্যেদে, ও ইস্রায়েলীয়গুন, তুমি সে কধাগান কত্তে, মাত্তর্ তমা মনত্ কি আঘে সিয়েন মুই হবর্ পাঙ। 6তুমি এ শঅরত্ বোউত্ মান্জ্যরে মারে ফেলেয়ো আর মরা মানুচ্চোই পথ্তানি ভোরেই ফেলেয়ো।
7“সেনত্তে প্রভু লগেপ্রভু কোইয়্যেদে, ‘ঘেচ্চেকগুরি এ শঅরান্ রানি খাইদ্যে পিলে, মাত্তর্ যে মানুচ্চুনোরে তুই শঅরত্ মারে ফেল্যচ্ সিগুনে য়েরা; আর মুই সিয়েনত্তুন্ তমারে ধাবেইনে নিগিলেই দিম্। 8যে যুদ্ধোগানরে তুই দরাচ্ সেই যুদ্ধোগানরে মুই তমা বিরুদ্ধে আনিম। 9মুই শঅরত্তুন্ তমারে লোড়েইনে নিগিলে দিইনে বিদেশীগুনো আঢত্ তুলি দিম আর তমারে সাজা দিম্। 10তুমি যুদ্ধোত্ মুরিবে; ইস্রায়েলর দুযিত্ মুই তমারে বেক্কুনোরে সাজা দিম্। সেক্কে তুমি হবর্ পেবাদে, মুয়ই লগেপ্রভু। 11এ শঅরান্ তমাত্তে পিলেয়ো ন-অবঅ আর তুমিয়ো সিবে ভিদিরে য়েরা ন-অবা; ইস্রায়েলর দুযিত্ মুই তমারে বেক্কুনোরে সাজা দিম। 12সেক্কে তুমি হবর্ পেবা যে, মুয়ই লগেপ্রভু। তুমি মর্ সুদোম্ মজিম্ ন-চলঅ বা মর্ রীদি-সুদোমানিয়ো ন-পালঅ বরং তমা চেরোকিত্তে জাদ্তুনো সুদোম্ মজিম্ চোল্য।’”
বন্দীগুনোরে বুঝোনা
13মুই যেক্কে ভাববাদী ইজেবে কধা কোইয়োং সেক্কে বনায়র পুয়ো প্লটিয় মুরি গেলঅ। সেক্কে মুই মাঢা নিগিরি পড়িনে আবেগ সমারে দাঙর্ দাঙর্ গুরি কলুং, “হায়, প্রভু লগেপ্রভু! তুই কি ইস্রায়েলর বাদবাগি মানুচ্চুনোরে বেক্কুনোরে শেষ্ গুরি দিবে?”
14সেক্কে লগেপ্রভুর এ কধানি মইধু ফগদাং অলঅ, 15ও মান্জ্যর পুয়োবো, তঅ ভেইয়ুনোর, তঅ নিজো মানুচ্চুনোর, অত্তাৎ বন্দীদজাত্ থেইয়্যে বেক্ ইস্রায়েলীয়গুনোর্ পৌইদ্যেনে যিরূশালেমর মানুচ্চুনে কদন্, তারা লগেপ্রভুর দেজত্তুন্ দূরোত্ যেয়োন; এ দেজ্চান দঅ অধিকার ইজেবে আমারে দিয়্যে ওইয়্যে।
16সেনত্তে মুই প্রভু লগেপ্রভু যিয়েনি কঙর্ সিয়েনি তুই তঅ মানুচ্চুনোরে কঅ, মুই যুনিয়ো অন্য জাদ ভিদিরে তারারে পাধেই দুয়োং আর নানান্ দেজত্ ছিদি দুয়োং তো যেদক্কানি দেজত্ তারা যেইয়োন সিয়েনিত্অ এই কয়েক দিনোত্তে মুয়ই তারার্ সুদ্ধো-সাংগ জাগা ওইয়োং।
17সেনত্তে তুই তারারে কঅ, প্রভু লগেপ্রভু কোইয়্যেদে, জাদ ভিদিরেত্তুন্ মুই তারারে এগত্তর্ গুরিম; যেদক্কানি দেজত্ তারা ছিদি পোজ্যন্ সিয়েনিত্তুন্ তারারে ফিরেই আনিম আর ইস্রায়েল দেজ্চান আরঅ মুই তারারে ফিরেই দিম।
18“তারা সিদু ফিরি যেইনে বেক্ বাজে মূত্তি আর জঘন্য মূত্তিগুন দূর্ গুরি দিবাক্। 19মুই তারারে এমন মন দিম্ যিয়েন বানা মইন্দি আসক্ত থেবঅ, আর মুই তারা ভিদিরে নূয়ো আত্মা দিম; মুই তারার্ চিৎনপুজ্যে মনান্ সোরেইনে নরম মনানি দিম। 20সেক্কে তারা মঅ সুদোম মজিম্ চলিবাক্ আর মর্ রীদি-সুদোমানি যত্তন্ গুরি পালেবাক্। তারা মঅ মানুচ্ অবাক্ আর মুই তারার্ গোজেন ওম। 21মাত্তর্ যিগুনোর মনানি বাজে মূত্তি আর জঘন্য মূত্তিগুনো ইন্দি, তারার্ কামর ফল মুই তারা উগুরে ঢালি দিম। মুই প্রভু লগেপ্রভু এ কধাগান কঙর্।”
লগেপ্রভুর মহিমাগান শঅরান্ ছাড়ি গেলঅ
22ইয়েনর পরেদি করূব্পুনে তারার্ ডুয়োনি মিলি দিলাক্; তারার্ কায়-কুরে এলাক্ সেই চাক্কাগুন, আর ইস্রায়েলর গোজেনর মহিমাগান তারা উগুরে এলঅ। 23লগেপ্রভুর মহিমাগান শঅর ভিদিরেত্তুন্ উদিনে শঅরর্ পূগেদি মুড়োমুড়ি উগুরে যেইনে থামেল। 24সে পরেদি গোজেনর আত্মাগানে মরে তুলি নিলো আর তার দিয়্যে দর্শনর ভিদিরেদি আরঅ বাবিলোত্ বন্দীগুনো ইধু নেযেল।
যে দর্শনান্ মুই দেখ্যং ইয়েনর পরেদি সিয়েন শেজ্ ওই গেলঅ। 25লগেপ্রভু মরে যিয়েনি যিয়েনি দেগেয়্যে সিয়েনি বেক্কানি মুই বন্দীগুনো ইধু কলুং।
Currently Selected:
যিহিষ্কেল 11: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
