যাত্রা 40
40
থেবার-তাম্বুলান তুলোনা
1ইয়েন পরেদি লগেপ্রভু মোশিরে কলঅ, 2বজরর্ পত্তম মাজর্ পোইল্যে দিনোত্ তুই থেবার-তাম্বুলান, অত্তাৎ মিলন-তাম্বুলান বানেবে। 3সে ভিদিরে সাক্ষ্য-সুন্দুক্কো রাগেইনে তার্ পর্দাগান্দোই সিবে নাঢি দিবে। 4টেবিলান ভিদিরে আনিনে সিয়েন উগুরে যিয়েনি রাগেবার্ সিয়েনি সাজেই রাগেবে। পরেদি চেরাগ টক্কো আনিনেই চেরাক্কুন্ জ্বালেই দিবে। 5সাক্ষ্য-সুন্দুগোর্ মুজুঙোত্ সনার্ ধূপ-পূজোবো রাগেবে আর থেবার্ তাম্বুলর দোরানত্ পর্দা টাঙেবে। 6থেবার্-তাম্বুলর, অত্তাৎ মিলন-তাম্বুলর্ দোরান মুজুঙোত্ পুজ্যে-উৎসর্বর্ ডালিঘরান্ রাগেবে। 7এই ডালিঘরান আর মিলন-তাম্বুলর্ মোধ্যে জাগানত্ গাবালাবো রাগেনে সিয়োত্ পানি রাগেবে। 8সে পরেন্দি উদোনর্ চেরোকিত্তে ঘিরিনেই পর্দা টাঙেবে আর সিয়েনর্ দোরানত্অ পর্দা দিবে।
9“পরেন্দি অভিষেগ-তেল নিবে আর থেবার্-তাম্বুল আর সিয়েন ভিদিরে বেক্কানি উগুরে সেই তেলান দিইনে সিয়েন্ মর্ নাঙে যুদো গুরি নেযেবে। সেক্কে সিয়েনি পবিত্র জিনিস অবঅ।” 10বেক্ বাজোন-কদরাগুন্ সুদ্দো পুজ্যে-উৎসর্বর ডালিঘর উগুরেয়ো অভিষেগ-তেল্লোই ডালিঘরান মর্ নাঙে যুদো গুরি নেযেবে। সেক্কে সিবে দাঙর্ পবিত্র জিনিস অবঅ। 11আসনান্ সুদ্দো গাবালাবো উগুরে অভিষেগ-তেল দিইনে সিয়েন্ মর্ নাঙে যুদো গুরি নেযেবে।
12“সে পরেন্দি হারোণ আর তার্ পূঅগুনোরে মিলন-তাম্বুলর্ দোরান মুজুঙোত্ আনিনে পানিলোই তারার্ কিয়্যেগানি ধবে।” 13পরেন্দি হারোণরে পবিত্র পোজাক্কানি উরেইনে অভিষেগ গুরি মর্ নাঙে যুদো গুরিবে যেনে তে ধর্মগুরু ওইনে মরে সেবা গুরি পারে। 14হারোণর পূঅগুনোরে কায়কুরে আনিনে তারারে ধর্মগুরুর্ সিলুমুন্ উরেই দিবে। 15সে পরেদি তারার বাব্পো ধোক্ক্যেন গুরি তারারেয়ো অভিষেগ গুরিবে যেনে তারা ধর্মগুরু ওইনে মরে সেবা গুরি পারন। এই অভিষেক্কান্দোই যে ধর্মগুরু-পদর সৃট্টি অবঅ সিয়েন বংশর পর বংশ ধুরিনে থেবঅ। 16লগেপ্রভু মোশিরে যেধোক্ক্যেন গুরি উগুম দিয়্যে মোশি সেধোক্ক্যেন বেক্কানি গুরিলো।
17দ্বিবজরর্ পত্তম মাজর্ পোইল্যা দিনোত্ থেবার-তাম্বুলান্ বানা অলঅ। 18সিয়েন দরমর গুরিবাত্তে যেইনে মোশি টেঙ-খুদোগুন বোজেইনে ফ্রেমানি উজু গুরিলো। তে লাগাড়াগুন লাগেল আর খুদোগুন্ বোজেল। 19সে পরেদি লগেপ্রভুর্ উগুম মজিম্ তে থেবার্-তাম্বুল উগুরে ছাগল কেশ্চোই বুন্যে কট্টাবো বিজেই দিলো আর তা উগুরে দ্বিয়েন্ ছাল্ দিলো।
20সে পরেদি মোশি সাক্ষ্য-আরুগ্ দ্বিবে নেযেইনে সুন্দুগো ভিদিরে রাগেল আর সুন্দুক্কোত্ দিয়্যে লুদিক্কুন্ লাগেল আর সিবে উগুরে রাগেল তার্ ঢাগনিগান। 21পরেন্দি লগেপ্রভুর উগুম মজিম্ তে সুন্দুক্কো থেবার -তাম্বুল ভিদিরে নেযেল আর পর্দাগান্ দুলে দিইনে সিবে ঢাগি রাগেল।
22-23সেই পর্দাগানর্ বারেন্দি উত্তোরেন্দি থেবার্-তাম্বুল ভিদিরে, অত্তাৎ মিলন-তাম্বুল ভিদিরেই তে টেবিলান্ রাগেল আর লগেপ্রভুর উগুম মজিম্ তা মুজুঙোত্ টেবিলো উগুরে মুজুঙো-পিদে সাজেই রাগেল। 24-25দোগিণে, টেবিলানর উগুদো মোক্ক্যেদি লগেপ্রভুর্ উগুম মজিম্ চেরাগ টক্কো রাগেল আর সিবে উগুরে লগেপ্রভুর্ মুজুঙোত্ চেরাক্কুন্ জ্বালেই দিলো। 26-27পর্দাগানর মুজুঙেন্দি সেই মিলন-তাম্বুল ভিদিরেই তে সনার্ ডালিপূজোবো রাগেল আর লগেপ্রভুর্ উগুম মজিম্ সিবে উগুরে তুম্বাজ্ ধূপ জ্বালেল। 28সে পরেন্দি তে থেবার-তাম্বুল দোরানত্ পর্দানি টাঙেল।
29থেবার্-তাম্বুলর, অত্তাৎ মিলন-তাম্বুলর্ দোরান ইদু তে পূজ্যে-উৎসর্বর ডালিপূজোবো রাগেল আর লগেপ্রভুর্ উগুম মজিম্ তে সিবে উগুরে পূজ্যে-উৎসর্বর আর শোজ্য-উৎসর্বর অনুষ্ঠান গুরিলো। 30সেই ডালিপূজোবো আর মিলন-তাম্বুলানর্ মোধ্যে জাগানত্ তে গাবালাবো বোজেল আর আত্-টেং ধবাত্তেই সিয়োত্ পানি রাগেল। 31সেই গাবালাবোর্ পানিগান্দোই মোশি, হারোণ আর তার্ পূঅগুনে আত্-টেং ধদাক্। 32লগেপ্রভু মোশিরে যেধোক্ক্যেন উগুম্ দিয়্যে সেধোক্ক্যেন মিলন-তাম্বুলত্ চোমেবার্ আগেন্দি বা ডালিপূজোবো ইদু যেবার্ আগেন্দি তারা তারার্ আত্-টেঙানি ধোই নেযেদাক্। 33ডালিপূজো আর থেবার-তাম্বুলানর চেরোকিত্তে তে পর্দাগান্ বিজেইনে উদোনর্ বেবস্থা গুরিলো আর সিয়েনর্ দোরানত্ পর্দাগান্ দিলো। ইঙিরিনে মোশি তার্ কামানি থুম্ গুরিলো।
গোজেনর মহিমা
34সে পরেদি মেঘচাগ্ এইনে মিলন-তাম্বুলান্ নাঢি ফেলেল আর লগেপ্রভুর মহিমায় থেবার-তাম্বুলান ভুরি গেলঅ। 35থেবার-তাম্বুলান, অত্তাৎ মিলন-তাম্বুলান্ মেঘে ঢাক্ক্যা আর লগেপ্রভুর্ মহিমায় ভোজ্যে এলঅ বিলিনে মোশি সিয়োত্ চোমেই ন-পারিলো।
36ইস্রায়েলীয়গুনোর্ গোদা যেবার পদথ্ যেক্কে থেবার্-তাম্বুল উগুরেত্তুন্ মেঘচাগ্ উদি যেদঅ বানা সেক্কে তারা নিগিলিদাক্; 37মাত্তর্ মেঘ ন-উদিলে তারা ন-নিগিলিনেই মেঘ উদিবার আজাই বাজ্জেই থেদাক্। 38ইস্রায়েলীয়গুনোর্ গোদা যেবার্ পদথ্ দিনো অক্তত্ তারার্ চোগো মুজুঙোত্ থেবার্-তাম্বুল উগুরে থেদঅ লগেপ্রভুর্ এই মেঘ চাক্কান্ আর রেদো অক্তত্ সেই মেঘঅ ভিদিরে থেদঅ আগুন।
Currently Selected:
যাত্রা 40: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
