যাত্রা 35
35
জিরেনার দিন্নোর্ সুদোম
1পরেদি মোশি ইস্রায়েলীয়গুনোরে এগত্তর্ গুরিনেই কলঅ, “লগেপ্রভু তমারে পালেবাত্তে এই বেক্ উগুমানি দিয়্যে। 2সাপ্তায়্ ছয়দিন তুমি কাম্ গুরিবা মাত্তর্ সাত দিন্নো অবদে তমার্ এক্কো যুদো গুরি রাগেয়্যে দিন, লগেপ্রভুর্ নাঙে জিরেবার্ দিন। সেই দিনোত্ যে কাম্ গুরিবো তারে মারে ফেলা অবঅ। 3জিরেবার্ দিন্নোত্ তমার কনঅ ঘরত্ যেনঅ আগুন্ ন-জ্বালান।”
থেবার-তাম্বুলোত্তে পযাপিরা
4-5মোশি ইস্রায়েলীয়গুনোরে কলঅ, লগেপ্রভু উগুম্ গোজ্যেদে যেন তমাত্তুন যিয়েনি আঘে সিয়েনিত্তুন্ তা নাঙে তুমি ভোক্তি-বক্শিজ্ আনঅ। যিগুনে নিজোর্ আওজে দিবাত্তে চান্ তারা লগেপ্রভুত্তে এই বেক্ জিনিস্ছানি আনিবাক্: সনা, রূবো আর পিদোল; 6য়েল্, বিগুনি আর রাঙা রংয়র্ সুদো আর মসীনা সুদো; ছাগলর্ কেশ্; 7রাঙা রঙ্ গোজ্যে ভেড়াছাগলর্ চাম্, ডলপিনোর্ চাম্; বাব্লা তক্তা; 8পহর্ গুরি জ্বালেবাত্তেই জলপাইয়োর্ তেল; অভিষেগ-তেল আর তুম্বাজ ধূপত্তেই মশলা; 9এফোদ আর বুগ-ঢাগনিগান উগুরে বোজেবাত্তে বৈদূর্যমণি আর অন্য দামী পাত্তর্।
10“তমা ভিদিরে যিগুনে কাবিল্ কালিগর তারা এইনে লগেপ্রভু যিয়েনি উগুম্ গোজ্যে সিয়েনি বানেবাক্।” 11সিগুন অলঅ থেবার-তাম্বুল আর সিয়েনি উগুরেদি ছালান্; বেক্ হেবাগুন্, ফ্রেমানি, লাগাড়াগুন, খুদোগুন আর টেং-বদঙুন্; 12লুদিক্কো সুদ্দো সাক্ষ্য-সুন্দুক, তার্ ঢাগনিগান্ আর ঢাগি রাগেবার্ পর্দাগান; 13লুদিক্কো সুদ্দো টেবিলান আর তার্ পযাপিরানি আর লগেপ্রভুর মুজুঙো-রুটিগান; 14পহ্রানত্তেই চেরাগ বদং আর তার্ পযাপিরানি, সিবের্ চেরাক্কো আর পহর্ গুরি জ্বালেবার্ তেলান; 15লুদিক্ সুদ্দো ধূপ-পূজো; অভিষেক-তেল আর তুম্বাস ধূপ; থেবার্-তাম্বুলর্ দোরানর্ পর্দানি; 16পিদোলর্ জাল সুদ্দো পুজ্যে-উৎসর্বর ডালিপূজো, সিবের্ লুদিক্কুন্ আর বাজোন-কদরাগুন; আসনান্ সুদ্দো পিদোলর্ গাবালাগুন; 17খুদো আর খুদোবোর্ টেং-বদঙুন্ সহ উদোনর্ পর্দাগানি আর উদোনত্ সোমেবার্ দোরানর্ পর্দাগানি; 18উদোন পর্দার্ আর থেবার্-তাম্বুলর খুদোগুন আর দুড়িগানি; 19পবিত্র তাম্বুল ঘরত্ সেবা-কামত্তে পোজাক্, অত্তাৎ ধর্মগুরু হারোণত্তে বুন্যে পবিত্র পোজাক্ আর তার্ পূঅগুনোর্ ধর্মগুরু ইজেবে সেবা-কামর্ পোজাক্।
20ইয়েন পরেদি ইস্রায়েলীয়গুনে মোশি কায়-কুরেত্তুন্ গেলাক্কোই। 21মনত্তুন্ সাড়া পেইনে তারা নিজোর্ আওজ্সোই লগেপ্রভুরে দিবার আজাই মিলন-তাম্বুল বানানা আর তার্ সেবা-কামত্তেই আর ধর্মগুরুর্ পবিত্র পোজাক্কানিত্তেই দরকার মজিম বেক্কানি লোইনে ফিরি এলাক্। 22মরদ আর মিলেগুনো ভিদিরে যিগুনোর্ মনত্ আওজ্ অলঅ তারা নানা বাবোত্যে সনার গহনায়ো আনিলাক্। সিয়েনি ভিদিরে এলঅ কাবড় আক্সো রাগেবার পিন্, কান্ ফুল, আংদি আর অন্য বাবোত্যে গহনা। লগেপ্রভুর্ নাঙে দোলন-উৎসর্বত্তেই তারা এদক্কানি দিলাক্। 23যিগুন ইদু য়েল্, বিগুনি আর রাঙা রঙয়র্ সুদো আর মসীনা সুদো বা ছাগলর্ কেশ্, রাঙা রং গোজ্যে ভেড়াছাগলর চাম্ বা ডলপিনোর্ চাম্ এলঅ তারা সিয়েনি আনিলাক্। 24যিগুনো ইদু রূবো আর পিদোল এলঅ তারা সিয়েনি লগেপ্রভুরে দিবাত্তেই আনিলাক্। থেবার-তাম্বুল বানেবার্ কামত্ লাগিবো এধোক্ক্যেন বাব্লা তক্তা যিগুনো ইদু এলঅ তারা সিয়েনি আনিলাক্। 25যে মিলেগুনে সুদো কাদিবার্ কামত্ কাবিল্ তারা য়েল্, বিগুনি আর রাঙা রঙয়র্ সুদো আর মসীনা সুদো নিজোর্ আদে কাবি আনিলাক্। 26যিগুনে মনত্তুন্ সাড়া পেলাক্ আর সুদো কাদিবার্ কাম্ জানিদাক্ সেই মিলেগুনে ছাগলর্ কেশ্চোই সুদো বানেই আনিলাক্। 27এফোদ আর বুক-ঢাগনিগান উগুরে বোজেবাত্তে মাই-মুরুব্বীগুনে বৈদূর্যমণি আর অন্য মংগা পাত্তর্ আনিলাক্। 28চেরাগ্ জ্বালেবার্ তেল আর অভিষেক-তেল, তুম্বাজ ধূপ বানেবাত্তে তারা মজলা আর জলপাইয়োর্ তেল্অ আনিলাক্। 29মোশিরে দিইনে লগেপ্রভু যিয়েনি গুরিবার্ উগুম্ দিয়্যে সেই বেক্ কামানি গুরিবাত্তেই ইস্রায়েলীয় মিলেগুনে আর মরত্তুনো ভিদিরেত্তুন্ যিগুনোর্ আওজ অলঅ তারা লগেপ্রভুরে দিবাত্তে যিবের্ যেধোক্ক্যেন হুজি লোই আনিলাক্।
বৎসলেল আর অহলীয়াব
30-31ইয়েন পরেদি মোশি ইস্রায়েলীয়গুনোরে কলঅ, “লগেপ্রভু যিহূদা-গুট্টির্ হূরোর্ নাদিন্, অত্তাৎ ঊরির পূঅ বৎসলেলরে বেঈ নেযেয়্যে আর গোজেন আত্মায় ভরণ-পূরোণ গুরিনে তে তারে জ্ঞান, বুদ্ধি, অভিজ্ঞতা আর নানান্ বাবোত্যে কালিগরি কামর্ খেমতা দিয়্যে।” 32সেক্কে তে নিজোর্ মনত্তুন্ সনা, রূবো আর পিদোল উগুরে দোল্ দোল্ আড়ুক্ বানেই পারিবো, 33মংগা মংগা পাত্তর্ কাবানা আর বোজেই পারিবো আর তক্তার্ আর অন্য দোল্ দোল্ আঢর্ কামঅ গুরি পারিবো। 34ইয়েন বাদে অন্যগুনোরে এই বেক্ কামানি শিগেবার্ খেমতায়ো লগেপ্রভু বৎসলেলরে আর দান-গুট্টির অহীষামকর পূঅ অহলীয়াবরে দিলো। 35তে তারারে নানান্ বাবোত্যে আঢর্ কাম্, য়েল্, বিগুনি আর রাঙা রঙয়র্ সুদো আর মসীনা সুদোলোই সিলেইনে আড়ুক্ তুলিবার্ কাম্ আর তাদ কাম্ গুরিবার্ খেমতা দিলো। তারা নানান্ বাবোত্যে আঢ কাম্ গুরি পারিবাক্ আর নিজোর্ মনত্তুন্ নানান্ বাবোত্যে আড়ুক্অ বানেই পারিবাক্।
Currently Selected:
যাত্রা 35: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
